Watie ceng’ kas’ario ku reto, nindo 11 mi dwi mi Nisan ubecithum. Bende nindo ma Yesu utimo ie tic lee iwi ng’om de udhingo thum. Dieceng’ ebed eponjo i hekalu, uthieno ke ebed edok evuto woko mir adhura. Dhanu gibino kud ava lee mi winje, uketho gibed gibino “i bang’e pir kugweno i hekalu.” (Luka 21:37, 38) Nindo maeno ukadhu, kawoni dong’ Yesu ku jukwenda pare ang’wen; Petro, Andrea, Yakobo, man Yohana gibedo iwi got Zeituni.

Jukwenda ang’wen maeno gibino ibang’e nyalwe. Cwinygi ubedieng’ pir hekalu, pilembe Yesu ular uewo nia kidi moko acel de mbe ma bidong’ iwi wagi. Re gitie ku paru mange bende m’ubesendogi. Iwang’e Yesu ular uketho cwinygi kumae: “Wuyikru bende: kum i saa ma wuwacu nyo ngo e ma Wod dhanu bino.” (Luka 12:40) Elar eweco bende iwi ‘ceng’ ma Wod dhanu binyuthre i ie.’ (Luka 17:30) Nyo wec m’eyero maeno de urombo ku lembe m’eyero pir hekalu? Jukwenda gibemito ginyang’ lee, uketho gipenje kumae: “Wac iwa, gin maeni bitimbre awene? Man giranyutha mi bino peri en e ang’o, ku mi kajik mi ng’omi?”​—Matayo 24:3.

Ecicopere nia gibino paru pi nyoth mir hekalu ma gibeneno ceng’ini kugi. Gipenje bende iwi bedonuti pa Wod dhanu. Saa moko gicopo nipoi ikum lapor ma Yesu umio m’uweco iwi ‘jadit acel m’ucidho i ng’om ma bor nigamu ker ire gire, man i ng’eye egam edwogo.’ (Luka 19:11, 12) Gipenjiri bende iwi kite ma “kajik mi ng’om” bibedo ko.

I dwokolembe pare, Yesu uweco iwi giranyutha ma biketho julubne ging’ei saa ma Yerusalem man hekalu binyothere i ie. Ekoro lembe lee. Giranyutha maeno bikonyo Jukristu i nindo m’ubino ning’eyo nia gibekwo i saa mi bedonuti pa Kristu man nia ajiki mi ng’om maeni udhingo.

Calu ma oro ubekadhu, jukwenda gicaku nineno kite ma lembila pa Yesu ubepong’o ko. Lembe dupa m’elar eewo ucaku nipong’o i rundi migi. Pieno, Jukristu m’ubino nikio, ma gikwo oro 37 ing’eye, i oro mi 70 R.M., gibino ayika pi nyoth mi Yerusalem ku mir hekalu ma dong’ udhingo. Ento tie ngo nia lembe ceke ma Yesu ular uewo upong’o zoo i nindo m’ucwalujo i nyoth mi oro 70 R.M. Ka kumeno, ang’o ma binyutho nia Yesu ucaku nibimo? Yesu udwokowang’ lembene ni jukwenda.

Yesu ular uwacu nia “ali ku rwongali de” bibedo nuti man nia “thek bijai kum thek, ker de ni ker.” (Matayo 24:6, 7) Eyero bende nia “digidigi ma dit de bibedo nuti, ndru de bibedo nge nge ku thong’om bende.” (Luka 21:11) Yesu upoyo wi julubne kumae: ‘Dhanu bimakuwu ku cing’gi, man gibinyayu ragedo i kumwu.’ (Luka 21:12) Jubila mi ndra biwok man gibiwingo dhanu dupa. Turocik de binyai, man mer mi dhanu dupa de bidoko ng’ic. M’umedo maeno, eyero nia “lembanyong’a maeni mi ker  jubiyero i ng’om ngung’ ni lembatuca ni thek ceke; e kajik bilund wok.”​—Matayo 24:14.

Kadok lembila ma Yesu uewo upong’o i kadiri moko i wang’ nyoth ma Juroma ginyotho ko Yerusalem kunoke i saa mi nyothne, nyo eyero nia yor i ng’eye lembilane bidok pong’o lee m’usagu? Nyo in de ibeneno andha nia lembila ma Yesu uewo ubepong’o lee i nindo ma tin?

Gin acel ma Yesu uweco i wie i giranyutha m’unyutho pi bedonuti pare utie “gin mir adegi mi nyoth.” (Matayo 24:15) I oro 66 R.M., gin mir adegi maeno ubin ucungo, niwacu “njuru askari” mi Roma, gibino kud abera migi ma gibed giworo. Juroma gibin gitieko Yerusalem man girungo kum gang’ kidine moko. (Luka 21:20) Pieno, “gin mir adegi” ucungo ka m’ukwayu ngo ecungi i ie, kaka ma Juyahudi gineno ni “kamaleng’.”

Yesu ular uyero bende nia, “i nindo maeno masendi ma dit bibedo nuti, ma wadi maeno fokuwok ungo ungambre i thekri mi ng’om cil ku kawono de, ungo, kadi cil rondo ku rondo de biwok ungo.” I oro 70 R.M., Juroma gibin ginyotho Yerusalem. Nyoth maeno ma ginyotho ko hekalu man ‘adhura maleng’’ mi Juyahudi, ubino can madit, man junego dhanu elufu swa. (Matayo 4:5; 24:21) Nyoth maeno usagu mange ceke m’unwang’u adhura mi Yerusalem, man kit nyothne fodi nwang’u utundo ngo iwi Juyahudi, man eketho giweko niworo Mungu i hekalu calu ma naka gibed gitimo iwang’e. Eno ubenyutho nia kite ma lembilane bipong’o ko ing’eye, bibedo i ayi ma nyayu ndiri.

Fodi Yesu udaru ngo wec karacelo ku jukwenda pare iwi giranyutha mi bedonuti pare iwi Ker, man iwi ajiki mi ng’om maeni marac. Kawoni ebepoyogi nia kud gilub tok “ju ma gi Kristu mi ndra man jubila mi ndra.” Eyero nia gibimito “giwing cil ju ma jugoyo wigi de, tek ecopre.” (Matayo 24:24) Ento gibiwingo ngo dhanu maeni ma jugoyo wigi. Ju ma gi Kristu mi ndra jubinenogi, ento bedonuti pa Yesu bibedo i kite ma nen ungo.

Yesu uweco pi masendi madit ma biwok nindo mir ajiki mi ng’om marac maeni, eyero kumae: “Ceng’ bidoko col, dwi de birieny ungo, cero de bioi kud i polo, tego mi polo de biyengre.” (Matayo 24:29) Kinde ma jukwenda giwinjo lembe maeno ma nyayu ndiri, ging’eyo ngo nia lembene bitimere tap tap nenedi, re andha ebibedo ni lembe mi zungo.

Can maeno bibedo ku matoke makani iwi dhanu? Yesu wacu kumae: “Dhanu biyenyo tho kum lworo, man kum kuro gin m’ubebino i ng’om: kum tego mi polo biyengre.” (Luka 21:26) Andha Yesu ubekoro nia lembe bibedo rac magwei nisagu m’iwang’e zoo.

Re Yesu uketho cwiny jukwenda pare nia dhanu ceke ngo ma biywak kinde ma ‘Wod dhanu bibino wi afuru mi polo ku tego ku dwong’ madit de.’ (Matayo 24:30) Elar enyutho nia Mungu bilaru “ju ma jugoyo wigi.” (Matayo 24:22) Dong’ julub ma gigwoko bedoleng’ migi gicikiri nibedo ku nen ma nenedi kinde ma lembe ma nyayu can ma Yesu uweco pire bicaku timere? Yesu uketho cwiny julubne kumae: “Ka gin maeno maku timbre, wung’ai weng’wu malu, wuting’ wiwu malu de, kum war mu dhingo.”​—Luka 21:28.

Ka kumeno, julub pa Yesu ma gibekwo i nindo maeno ma jular juewo pire, gibing’eyo nenedi nia ajiki ni ceng’ini? Yesu umio lapor m’uweco iwi yendulok, ewacu kumae: ‘Kinde ma jange doko yom, elodho ithe de, wung’eyo ya cir ni ceng’ini; cil wun bende kumeno, ka wuneno gin maeno ceke, wung’ei ya eni ceng’ini, cil i dhugola. Andha ayero iwu kumae, dhanum’utuk maeni bikadhu woko ngo,  ma fodi gin maeni ceke k’utimbre kakare ngo.’​—Matayo 24:32-34.

Pieno, kinde ma julub gibineno giranyutha ma tung’ tung’ m’ubetimere, gibinyang’ kamaleng’ nia kajik ni ceng’ini. Yesu ucimo wang’ julub ma gibikwo i nindo maeno kumae:

‘Ceng’ nino ku saane de ng’atu moko mbe m’ung’eyo pire, cil ku malaika mi polo de, kadok Wod, ento Wego kende. Man ke calu yang’ ceng’ pa Noa bedo, e bino pa Wod dhanu de bibedo kumeca. Kum calu i ceng’ maeca ma fodi pi ma dit m’uumo ng’om kuwok ungo gibecamu gibemadhu de, gibegambri gibemio de ya jugam, cil i ceng’ ma Noa mondo ko i avur, e ging’eyo ngo maram pii ma dit m’uumo ng’om uwok ko, man eterogi ceke woko, e bino pa Wod dhanu de bibedo kumeca.’ (Matayo 24:36-39) Yesu uporo lembe maeno ku pii m’ucoro ng’om i rundi pa Noa, m’ugam utimere i wang’ ng’om ngung’.

M’umbe jiji, jukwenda ma gibino niwinjo Yesu saa maeno iwi got Zeituni, ginyang’ nia pire tie tek nikio. Yesu wacu kumae: “Wubed ku weng’wu giwu, kara adundewu kud ucid ku giracama, ku mer kong’o, man ku giki mi bedo maeni, e ceng’ maeno bino i kumwu pio pio pa mir uwic: kum ebibino kumeno wi dhanu ceke m’ubedo wi wang’ ng’om ngung’. Ento wuki ku ba nindo ceke, ku kwayu kwac de, kara wusegru niboth ku ba gin maeni ceke ma bitimbre, wucung de i wang’ Wod dhanu.”​—Luka 21:34-36.

Yesu udok unyutho kendo nia lembe m’ebeyero igi, bitimere kakare dupa. Ebeewo ngo lembila ma bitimere kaka moko kende, man ma bibedo ku ma toke iwi adhura mi Yerusalem kende kunoke iwi thek mi Juyahudi. Ento eketho peko iwi lembe ma ‘bibino wi dhanu ceke m’ubedo wi wang’ ng’om ngung’.’

Yesu ubeyero ni julubne nia ukwayu gikii, gibed ku wang’gi man gibed ayika. Edok eketho peko iwi cimowang’ maeno ku lapor mange ma e: ‘Wung’ei maeni, nia ka won ot ung’eyo saa ma jakwo bino i ie diewor, kunodi ekuro, kunodi eyio ngo ya jutur ot pare. Ka kumeno wun bende wubed ayika; kum Wod dhanu bino i saa ma wuwacu nyo ngo.’​—Matayo 24:43, 44.

Yesu umedere ninyutho ni julubne thelembe m’ukwayu gibed ko ku nen maber. Eketho cwinygi nia kinde ma lembila m’eewo bicaku nitimere, “jamiru” m’ubekio man m’ubetimo tic bibedo nuti. Yesu udok uyero lembe ma julub pare gicopo nipoi iwie pio pio, ewacu kumae: “Ng’a ma jamiru mandha ma riek de, ma rwoth pare kethe wi juode, ya emi igi cemo migi i nindone? Mugisa ni jamiru maeno, ma rwoth pare kan ebino, binwang’u ebetimo kumeca. Andha awacu iwu, ya ebikethe wi gin ceke m’ebedo ko.” Ento tek “jamiru” maeno ubedo ku paru marac man ecaku timo jumange rac, rwoth bilund “fode dit.”​—Matayo 24:45-51; som bende Luka 12:45, 46.

Yesu ubeyero ngo nia julubne moko bidoko dhanu mareco. Dong’ emito ginwang’ ponji makani? Ebemito gikii man gitim kud amora, calu m’enyutho igi i lapor mange.