Uthieno ma tokcen ma Yesu ubedo ku jukwenda pare, eyero igi kumae: “Ku yo ng’ei cer para, abicidho i nyimwu i Galilaya.” (Matayo 26:32; 28:7, 10) Kawoni julubne mapol gimaku woth gicidho i Galilaya, re ukwayu gitim ang’o kuca?

Ing’ei saa moko kumeni, Petro uyero ni jukwenda wagi abusiel kumae: “Acitwomo rec.” Juabusiel ne ceke giwacu ire kumae: “Wan bende wabino wakudu.” (Yohana 21:3) Diewor traka, gimaku ngo rec acel de. Saa ma piny ubelero, Yesu utundo rek i dhu wat, re ging’ie ngo nia etie ng’a. Yesu ugam ukok kumae: “Nyithindho, giracama moko ni kudu?” Gidwoko kumae: “Umbe!” Yesu uwacu igi kumae: ‘Wubol voi i ng’et yei ma yor acwic, e wubinwang’u.’ (Yohana 21:5, 6) Kinde ma gibolo voi, gimaku rec swa, m’unuro voi migi anura.

E Yohana uyero ni Petro kumae: “En e Rwoth!” (Yohana 21:7) Ndhundhu Petro ugam utwiyo bongu ma nwang’u ewodho saa m’ebedwaru dwar. Epiei i pii man ekwang’ metre 90 nitundo i dhu wat. Jumange ulubo toke ma gibeii ku voi ma rec pong’ i ie.

Saa ma gitundo i dhu wat, gineno “cukmac keca, ku rec ma juketho i wie, man kwen.” Yesu uwacu igi kumae: “Wukel kum rec moko ma wutwomo kawono.” Petro ugam upeyo voi ma tie ku rec ma dongo 153 ebino ko! E Yesu uyero igi kumae: “Wubin wucam.” Ng’atu moko acel de mbe ikindgi m’unwang’u tegocwiny mi penje kumae: “In i ng’a?” pilembe ging’eyo maber nia en e Yesu. (Yohana 21:9-12) Eni tie wang’ mir adege ma Yesu ubenyuthere ni julubne saa ma gitie karacelo.

E Yesu umio kum kwen ku rec moko igi ceke. Ing’eye, eloko wang’e ibang’ rec ma juai judwaru man epenjo Petro kumae: “Simon, wod [Yohana], imara ma sagu joni?” Nyo Petro umaru dwar pa rec nisagu tic ma Yesu ubemito etim? Petro udwoko kumae: “Eyo, Rwoth; ing’eyo nia ameri.” Yesu uyero ire kumae: “Mi cam ni nyithi rombe para.”​—Yohana 21:15.

Yesu udok upenje kendo kumae: “Simon, wod [Yohana], imara?” Saa moko nyo lworo umaku Petro, e edwoko kumae: “Eyo, Rwoth; ing’eyo nia ameri.” Yesu udok iwi lembe marom kumae: “Kwai rombe para.”​—Yohana 21:16.

Yesu upenje wang’ mir adege kumae: “Simon, wod [Yohana], imara?” Petro copo penjere lee dit nia nyo Yesu utie ku jiji iwi gwoko bedoleng’ pare. E edwoko ni Yesu ku tegocwinye kumae: “Rwoth, ing’eyo gin ceke; ing’eyo nia ameri.” Yesu uketho peko kendo iwi lembe ma Petro ucikere nitimo, eyero kumae: “Mi cam ni rombe para.” (Yohana 21:17) Andhandha dhanu ma gibetelo wi cokiri gicikiri nigwoko rombe ma Mungu upeyo i dwol pare.

Jutwio Yesu man junege pilembe etimo tic ma Mungu umio ire. Kawoni ebenyutho nia Petro de binwang’ere ku kit lembe marom. Yesu uyero ire nia, “Ma fodi in i ayada, itwiri giri, iwotho de ka ma ii yenyo: endre kan ibiti, ibirieyo cingi, man ng’atu mange e ma bitwio iri, biteri de ka m’iyenyo ngo.” E Yesu udok uyero ire kumae: “Lub ng’eya.”​—Yohana 21:18, 19.

Petro ulund uneno bang’ jakwenda Yohana man epenjo Yesu kumae: “Rwoth, ng’atu maeni ke bitimo ang’o?” Niwacu kwo pa jakwenda ma Yesu umaru lee ke bibedo nenedi nindo m’ubino? Yesu udwoko kumae: “Tek ayenyo nia ebed cil m’abino, en e ang’o iri?” (Yohana 21:21-23) Petro ucikere nilubo Yesu m’umbe niketho wie ikum lembe ma jumange ubetimo. Ma jiji mbe, Yesu ubenyutho nia Yohana bikwo lee nisagu jukwenda mange man ebineno ginmawokiwang’ ma binyutho Yesu kinde m’ebebino i dwong’ mi Ker pare calu Rwoth.

I andha, Yesu utimo lembe mange de dupa dit ma ka juwacu jukiew akiewa, buku m’adola dupa de copo romo ngo.