Kinde ma Yesu ubino i hekalu wang’ ma tokcen, emedere nituco wi umbili mi jugorcik ku Jufarisayo, etuco i dhoggi nia gitie weg umbili. Etio ku wec mi lapor, ewacu kumae: “Wulonyo yo ng’ei kikombe ku yo ng’ei atangla, ento kuvuga kud awanya ma rac upong’ yor i igi. In i Jafarisayo ma abinga, ilar ilony yo i kikombe kud atangla de, kara yo ng’eigi bende dok leng’.” (Matayo 23:25, 26) Jufarisayo gilubo lembe mi dwokirileng’ cuu mandha, ento giwil nidwoko ng’atu ma yor i igi leng’ man lembe uvoyogi niketho adundegi mi lapor ubed leng’.

Umbili migi ubino nen bende kamaleng’ nikadhu kud i amora migi mi giero man mi ruko liel mi jubila. Pieno, Yesu uwacu nia gitie “wot ju m’unego jubila.” (Matayo 23:31) Lembuno unen kamaleng’ kum gimito gineg Yesu.​—Yohana 5:18; 7:1, 25.

Ing’eye Yesu udok unyutho lembe ma binwang’u judong dini maeno ka giloko timo migi ngo. Ewacu kumae: “Wu thwol, wu nyikwai urobi, wucopo piei ni lembapoka mi gehena nenedi?” (Matayo 23:33) “Gehena,” thelembene tie ‘poga mir Hinom.’ Pogane ubino i ng’et Yerusalem, man jubed juwang’u susu i ie, eno unyutho nyoth ma rondo ku rondo ma binwang’u jugorcik ku Jufarisayo ma gijutimrac.

Julub pa Yesu gibidong’ kakare calu ‘jubila, ku jurieko man juponji mi dhanu.’ Jubitimogi nenedi? Yesu uyero ni judong dini kumae: “Jumoko m’i kindgi de wubinego wubigurogi de; jumoko de m’i kindgi wubifodogi i kacokri mu, man wubinyayu ragedo i kumgi ku bang’ adhura ku bang’ adhura: kara rimo ceke ma pwe m’uthwogre wi ng’om, ubed i wiwu ugambre ikum rimb [Abel] ma pwe cil ku rimb Zakaria . . . ma wunego.” Ecimogi kumae: “Andha awacu iwu kumae, gin maeni ceke bibino iwi dhanum’utuk maeni.” (Matayo 23:34-36) Lembuno ubin utimere i oro 70 R.M. kinde ma juaskari mi Roma gibin ginyotho Yerusalem man ginego Juyahudi elufu swa.

Lembuno unyayu can i Yesu, uketho eyero kumae: “Yerusalem, Yerusalem, m’unego jubila, m’ucanyu ju ma juorogi i bang’e de ku kidi! wang’ udul ngi ayenyo acok nyithindho peri karacelo, cil calu min gweno coko nyithindhe the bombe, e wuyenyo ngo! Nen, ot mu juweko iwu ni uvuru.” (Matayo 23:37, 38) Dhanu ma gibino winjo wec maeno, giromo penjiri nia emito weco iwi “ot” makani. Nyo ebino niweco iwi hekalu maleng’ ma ni i Yerusalem, m’ubenen ve utie i the gwok pa Mungu?

Ing’eye Yesu umedo lembe ma e: ‘Awacu iwu kumae, ugambre kawono wubinena kendo ngo, cil ma wubiwacu ko kumae, mugisa ni ng’atu m’ubino ku nying’ Yehova.’ (Matayo 23:39) Edok iwi lembila ma nwang’ere i Zaburi 118:26, m’uwacu kumae: “Mugisa kwany ng’atu m’ubino ku nying’ Yehova: wamio mugisa iri kud i ot pa Yehova.” Ubenen kamaleng’ nia kinde ma jubinyotho hekalu maeno, ng’atu moko acel de mbe ma bibino kendo niworo Mungu i ie.

Kawoni Yesu ucidho i ng’et hekalu, kaka ma jubolo ie sente i kakanpiny. Dhanu ubino nibolo giramia migi i sanduku mi kakanpiny. Yesu uneno Juyahudi mapol ku julonyo de, ‘gibebolo sente ma dongo’ ni giramia. Ing’eye Yesu uneno dhatho moko ma jacan de ‘ubebolo sente ario ma tije nok i ie.’ (Marko 12:41, 42) M’umbe jiji, Yesu ung’eyo nia Mungu ubino ku mutoro lee dit ikum giramia pare.

Yesu ulwong’o julubne man ewacu igi kumae: “andha awacu iwu kumae, dhaku maeni ma cware tho ma jacan ebolo ma sagu ma dhanu ceke gibolo i kakanpiny.” Pirang’o? Ekoro  kumae: “Kum gin ceke gibolo i ie kum sagri migi; ento en kum canpiny pare ebolo i ie ceke m’ebedo ko; ma en e ceke m’etungre kudo.” (Marko 12:43, 44) Paru pare ku timo pare, ukoc bor mandha ku mi judong dini.

Calu ma nindo 11 mi dwi mi Nisan udhingo thum, Yesu uweko hekalu wang’ ma tokcen. Jalub pare acel uyero ire kumae: “Japonji, nen, maram kidi ku udi de bedo ko!” (Marko 13:1) Andha kidi moko ma jugiero ko hekalu, ubino kidi ma dongo dongo, man eno re m’uketho hekalune bino maleng’ man ecungo ma tek. Ecinen ni lembe ma winjere ngo ka Yesu ubeyero nia, “ineno udi ma dongo maeni? kidi acel de mbe ma bibedo wi wadi ma jubibolo piny ungo.”​—Marko 13:2.

Ing’ei lembe maeni, Yesu karacelo ku jukwenda gikadhu kud i poga mi Kidron man giidho iwi got Zeituni. En ku jukwenda pare ang’wen, niwacu, Petro, Andrea, Yakobo man Yohana, giwok kaka moko, ma ku keca gicopo neno hekalu ngbeng’ i wang’gi.