Kinde ma Yesu uai i Perea, egam etundo i thondng’om mi Bethania ma nwang’ere i kilometre adek kumeni yo nyangu mi Yerusalem. Maria giku Martha, ma gitie nyimego pa Lazaru ke fodi gitie ku can mi tho p’umegi man dhanu mapol de ubino nijukogi.

Ng’atu moko ugam ucidh unyutho ni Martha nia Yesu ubebino, e Martha uringo pio pio kara eromb kude. Ewok eyero ni Yesu lembe ma copere gibino paru giku nyamin ikind nindo ang’wen m’ukadhu, ewacu kumae: “Rwoth tek ande ini keni, kuno di umira tho ngo.” Wec maeno ubenyutho ngo nia ebino mbe ku genogen, pilembe edok eyero kumae: “Ang’eyo nia gin ceke ma tek ibipenjo ba Mungu, Mungu bimio iri.” (Yohana 11:21, 22) Martha ung’eyo nia Yesu copo cero umin.

Yesu udwoko ire kumae: “Umeru bicer.” Martha unwang’u nia Yesu ubeweco iwi cer ma bitimere i nindo m’ubino iwi ng’om; eno tie genogen m’Abraham ku jumange de gibino ko. Edok eyero wec m’unyutho nia etie ku yioyic nia cer maeno bitimere andha: “Ang’eyo nia ebicer kendo i cer mi kajikceng’.”​—Yohana 11:23, 24.

Nyo Yesu copo timo lembe moko pi nikwio cwiny dhanu ndhundhu nica? Epoyo wi Martha nia Mungu umio ire copo iwi tho, eyero kumae: “Ng’atu m’uyio ira kadok etho ento ebibedo kwo; man ng’atu ma tek ubedo kwo en ke eyio ira ebitho ki ngo.”​—Yohana 11:25, 26.

Yesu ubemito yero ngo nia julubne ma gibekwo saa nica dong’ gibitho ngo, kum kadok en de ebitho, calu m’elar eyero ni jukwenda pare. (Matayo 16:21; 17:22, 23) Ento ebemito ketho peko nia pi ninwang’u kwo ma rondo ku rondo, ubekwayu nibedo ku yioyic i ie. Dhanu mapol gibinwang’u kwo maeno ing’ei cer migi. Ento jurutic pa Mungu ma gibigwoko bedopwe migi nitundo i ajiki mi ng’om maeni marac, gicopo tho ngo. Re nik’ebed ju ma gibicer kunoke ju ma gibiboth i ajiki mi ng’om maeni de, gin ceke gicikiri nimediri nibedo ku yioyic i Yesu; ka gitimo kumeno, m’umbe jiji, gibitho ki ngo.

Re nyo andha Yesu m’uai uyero kawoni nia “an a cer, ku kwo” bicero Lazaru m’udaru tho udoko ceng’ ang’wen? Yesu upenjo Martha kumae: “Iyio maeni?” Martha udwoko kumae: “Eyo, Rwoth: adaru yio nia in i Kristu ma Wod Mungu, ma ng’atu m’ubebino i ng’om.” Martha ubino ku yioyic nia Yesu copo timo lembe moko saa nica, e nyapio pio eringo eyero ni nyamin nyamung’ mung’ kumae: “Japonji ni keni, man ebelwong’i.” (Yohana 11:25-28) Kinde ma Maria uwinjo kumeno, ewok kud i ot, man dhanu mange gilubo toke, pilembe giparu nia nyo ebecidho iwi liel pa Lazaru.

Ento Maria ubino cidho ibang’ Yesu; saa m’etundo ibang’e, epodho i the tiende m’ebewak man edok iwi wec ma nyamin de ular uyero ni Yesu kumae: “Rwoth, tek ini keni kuno di umira kutho ngo.” Kinde ma Yesu uneno Maria kud udul dhanu mange gibewak, en de can umondo i ie, ecur man piwang’e ucaku cwir. Dhanu m’ubino keca ginyang’ nia kara emaru Lazaru lee dit. Re jumoko upenjo kumae: ‘Ng’atu m’uyabu wang’ ng’atu ma abinga e, ecopo ketho ng’atuni bende kud utho ngo?’​—Yohana 11:32, 37.