Yesu uai ukoro ni juwinj pare kinde ma gini Perea nia, “dhanu dupa ma ma kwong’a bidong’ cen; man m’udong’ cen bibedo ma kwong’a.” (Matayo 19:30) Kara ginyang’ maber i wec maeno, Yesu umaku lapor moko iwi jurutic ma gini podho mir ulok, eyero kumae:

‘Kum Ker m’i polo e calu ng’atu ma won ot, m’ucidho woko pir kugweno nigamu jutic m’utim i podho pare mir ulok. Ka giyio de giku jutic ya ceng’ acel denarius, eorogi i podho pare mir ulok. Ecidho woko de va saa mir adege, man eneno jumange gicungo mananu i katali; man ewacu igi kumae, wun bende wucidh i podho mir ulok, man gin m’umaku piny abimio iwu, e gicidho. E ecidho kendo va saa mir abusiende bende ku mir abung’wende, man etimo kumeca. Man va saa mir apar wi acende ecidho woko, enwang’u jumange de gicungo acunga; man ewacu igi kumae, wucungo keni ceng’ du mananu nedi? Giwacu ire kumae, kum ng’atu moko mbe ma fodumio iwa tic. Ewacu igi kumae, wun bende wucidh i podho mir ulok.’​—Matayo 20:1-7.

Ecicopere nia kinde ma Yesu uweco iwi “Ker m’i polo,” man iwi “won ot,” juwinj pare giparu iwi Yehova. Lembagora uwacu nia Yehova tie won podho mir ulok, ulokne ke unyutho nyithindho mir Israel. (Zaburi 80:8, 9; Isaya 5:3, 4) Dhanu ma gibino i the lembariba mi Cik, gibedo ve jurutic ma gibetimo i podho mir ulok. Re Yesu ubeweco ngo iwi lembe m’udaru kadhu, ento ebekoro lembe m’ubetimere saa nica.

Judong dini, ku lapor Jufarisayo ma iwang’e nyanok gimulo i Yesu ku penji iwi lalu gamiri, re ma gibed ginen ni ju m’ubetimo ni Mungu saa ceke. Gitie calu jurutic m’utimo duu ma gibekuro cul migi mi bang’ acel, niwacu denarius acel.

Julam ku judong dini gibed gineno nia Juyahudi mange gibetimo ni Mungu nyanok, ve jurutic m’utimo duu ngo i podho mir ulok pa Mungu. I lapor pa Yesu dhanu maeno gicaku tic “saa mir adege” (saa 3 mi kugweno) kunoke ikind dieceng’ saa mir abusiende, mir ubung’wende, man ma tokcen ne saa mir apar wi acende (saa 11 mi reto).

Jubed juneno jumaco ku jumamon ma gibelubo tok Yesu calu dhanu m’ubedo “akwong’a.” (Yohana 7:49) I kwo migi mapol gibed gidwaru nam, kunoke ke gibed gitimo tic mange. Ing’eye i thum mi oro 29 R.M., “rwoth mi podho mir ulok” uoro Yesu pi nilwong’o dhanu maeno ma jucan gibed julub pa Kristu kara gitim tic pa Mungu. Gin re ma gitie ju “m’udong’ cen” ma Yesu uwacu nia gitundo saa mir apar acende i podho mir ulok.

Pi nidolo dhu lapor maeno, Yesu ukoro lembe m’utimere i mwony pa ceng’ saa ma tic uthum, ewacu kumae: “E ka piny udoko uthieno, rwoth mi podho mir ulok uwacu ni jakurpiny pare kumae, lwong’ jutic, mi igi sukulia migi, theke kum ma cen cil kum ma kwong’a. Ka ju ma jumio igi tic va saa apar wi acende gibino, gigamu denarius kubang’gi nzu. E ka ma kwong’ane gibino, giwacu nyo gibinwang’u m’usagu; e joni bende gigamu denarius kubang’gi nzu. Ka gigamu de, ging’ur kum won ot, giwacu kumae, maeni ma cen gitimo saa acel kende, e idwokogi rom rom ku wan ngi, ma wasendra ku tic ma tek ceng’ du ku lietho ceng’ ma kec. Ento eloko lembe man ewacu ni acel m’i kindgi kumae, jarimona, atimi rac ungo: wayio wakudi ngo pi denarius? Ting’ maeno ma peri ici ko; ayenyo ami ni maeni ma cen, calu amio iri. Cik uyio ira ngo ya atim gin m’ayenyo ku para ma dhe? Kadi weng’i bedo rac, kum an a beri? Kum kumeno m’udong’ cen gibibedo ma kwong’a, ma kwong’a de bidong’ cen.”​—Matayo 20:8-16.

 Ecicopere nia julub gipenjiri lee dit iwi wec ma tokcen ma Yesu udaru ko lapor pare. Judong dini mi Juyahudi ma gibed giparu nia gitie ‘ma kwong’a gidong’ cen’ i kite makani? Man julub pa Yesu gidoko “ma kwong’a” i kite makani?

Julub pa Yesu ma Jufarisayo ku dhanu mange gibed gineno ni ju “m’udong’ cen” gibecibedo “ma kwong’a” ninwang’u cul migi. Niai ikum tho pa Yesu, Mungu bikwero thek mir Israel mi kum man ebing’io thek mange manyen kakare, niwacu “Israel pa Mungu” (Jugalatia 6:16; Matayo 23:38) Yohana ma Jababutisi ukoro pi ju ma gibibedo Israel pa Mungu kinde m’eweco pi batizo ma ku tipo maleng’. Ju ma nwang’u ‘gidong’ cen’ re ma gibecibedo “ma kwong’a” nimaku batizo maeno man ninwang’u rwom mi bedo jumulembe pa Yesu “cil i tung’ ng’om bende.” (Tic mi Jukwenda 1:5, 8; Matayo 3:11) Calu ma julub ginyang’ ikum alokaloka ma dit ma Yesu ubeweco pire, copere nia gidaru paru kite ma kwinyo binego ko judong dini ma ‘gidong’ cen.’