Yesu uai umio juk ma pire tek ni julubne iwi kite mi tio ku lonyo kunoke jamcing’gi. Re julubne gibewinjo jukne gini kendgi ngo. Jufarisayo de ginuti keca man ubekwayu gin bende ginwang’ ponji niai kud i jukne. Pirang’o? Pilembe gitie “jumar sente.” Re kinde ma giwinjo lembe ma Yesu uyero, gicaku ‘nicaye.’​—Luka 15:2; 16:13, 14.

Ento cac migine unyayu ngo lworo nyanok de i Yesu. Eyero igi kumae: “Wun wu ju ma wugonyo lembe m’i wiwu giwu i wang’ dhanu; ento Mungu ng’eyo adundewu: kum gin m’utingre ku ba dhanu en e gin mir adegi kud i wang’ Mungu.”​—Luka 16:15.

Pi oro ma dupa ‘dhanu uting’o’ Jufarisayo, niwacu dhanu udodogi dit, re kawoni lembe biwilere igi marac. Gibino dhanu m’ulony, ma juyungogi de lee, dhanu ma weg dito i lemgamba man i dini, re copo migi ubecithum. Dhanu mange ke, ma Jufarisayo ubed ucayugi, ma re gitie kud ava mi winjo lembe pa Mungu jubecidodogi malu. Yesu unyutho kamaleng’ nia alokaloka madit ubetimere, eyero kumae:

“Cik ku jubila ginuti cil kum Yohana: ugambre i nindo maeca lembanyong’a ma juboth ko mi Ker pa Mungu juyero, man ku ba dhanu nzu gimondo i ie ku kero. Ento kadhu woko mi polo ku ng’om e yot, ma sagu podho mi ng’et nyiguta acel mi Cik.” (Luka 3:18; 16:16, 17) Wec ma Yesu uyero eno unyutho nenedi nia alokaloka ubetimere?

Judong dini mi Juyahudi gibed giyero ating’a gokgi nia gibeworo Cik pa Musa. Ku lapor, nindo moko kinde ma Yesu uyabu wang’ abinga moko i Yerusalem, Jufarisayo giluliri kumae: “Wan wa julub Musa. Wang’eyo nia yang’ Mungu weco ku Musa.” (Yohana 9:13, 28, 29) Andha Mungu umio Cik ibang’ Musa, man acel m’ikind thelembe mi Cikne ubino nia ekel dhanu ma mol nitundo ibang’ Masiya, niwacu Yesu. Yohana ma Jababutisi uyero nia Yesu tie Nyathi Rombo pa Mungu. (Yohana 1:29-34) Niai ikum tic pa Yohana, Juyahudi ma mol, akecane ju ma gibino jucan giwinjo pi “Ker pa Mungu.” M’umbe jiji, “lembanyong’a” utie pi dhanu ceke ma gibemito gibed lwak mi Ker pa Mungu man ginwang’ bero mi Kerne.

Cik pa Musa upong’o kakare, pilembe ekelo dhanu ibang’ Masiya. Bende, nwang’u dong’ judhingo jigo niwore. Ku lapor, Cikne ugam uyio nia jucopo lalu gamiri pi thelembe ma tung’ tung’, re kawoni Yesu ubekoro nia, “ku ba dhanu ndri ma tek uweko cege, man egamu mange, nwang’u egiero gier: ng’atu m’ugamu ng’atu ma cware weke nwang’u egiero gier.” (Luka 16:18) Wec maeno uton lee dit i Jufarisayo ma gibed gimito githung cik iwi lembe ceke!

 Kawoni Yesu umio lapor moko m’uketho peko iwi alokaloka madit m’ubetimere. Lapor m’emione uweco iwi dhanu ario, ma kwo pa ng’atuman m’ikindgi ulokere lee mandha. Kinde ma wabeng’io i laporne, wiwa kud uwil nia ikind ju m’ubewinjo Yesu, Jufarisayo m’umaru sente hai man ma dhanu mapol yungogi lee de ginuti.

Yesu ukoro kumae: “Nwang’u jalonyo moko nuti, m’uronjre kud uluga ku bongu ma nwang’ ma ber, man ecamu cemo ma mit ceng’ ceke: e jakwaipiny moko ma nyinge Lazaru nuti ma juketho dhugang’ pare, ma rem uromo kume ceke, m’eyenyo eyeng’ ku ng’ili cam m’uoi ku dhu mesa pa jalonyo; eyo, cil gwogi gibino ginang’u wang’ rem pare.”​—Luka 16:19-21.

Jufarisayo gitie jumar sente, pieno “jalonyo” ma Yesu uweco pire i lapor maeno ubenyutho gin. Judong dini maeno mi Juyahudi gimaru bende nikendo bongu mi bei ma tek. M’umedo sente ma gitie ko, gibedo bende ve dhanu m’ulony i thenge mi tipo, pilembe gitie ku rwom mi ponjo lembe pa Mungu. Yesu uporogi ku jalonyo m’uronyere ku kendi mi rangi mir uluga calu mi rwodhi; eno unyutho dito ma gibino ko, man bongu ma nwang’ ma tar pa jalonyo eno, unyutho kite ma gikethiri ko gigi nia gitie pwe.​—Daniel 5:7.

Judong dini maeno ma gilony man ma giting’iri gibed gineno jucan man dhanu mange nenedi? Gibed gicayugi nia gitie ‛am ha·’aʹrets, kunoke dhanu mi ng’om, ma ging’eyo Cik ungo  man ma giromo ngo nia juponjgi. (Yohana 7:49) Dhanu maeno re ma juporogi ku ‘jakwaipiny moko ma nyinge Lazaru,’ m’ubed uyenyo eyeng’ ku “ng’ili cam muoi ku dhu mesa pa jalonyo.” Calu Lazaru ma rem uromo kume, jubed jucayu dhanu maeno ve nia tijgi mbe iwang’ Mungu.

Lembe maeno marac utimere pi nindo moko, re Yesu ung’eyo nia saa udaru romo ma alokaloka madit ubeciwok i kwo pa dhanu ma juporogi ku jalonyo man ma juporogi ku Lazaru.

Yesu udok ukoro alokaloka ma lee m’utimere i kwo pa ng’atuman, eyero kumae: ‘Man etimbre, nia jakwaipiny utho, malaika de giyeye gitere kor Abraham: jalonyo bende tho, e juyike. Man eng’ayu wang’e malu kud i Hadeya, ma eni i ndiba e eneno Abraham ku bor, man Lazaru de ni kore.’​—Luka 16:22, 23.

Dhanu ma gibewinjo Yesu ging’eyo nia Abraham udaru tho con man eni i liel. Lembagora bende unyutho kamaleng’ nia dhanu ma gini i liel, kunoke i Hadeya uketho i ie Abraham, gicopo neno ngo man gicopo weco ngo. (Eklizia 9:5, 10) Judong dini ginyang’ nenedi i lapor ma Yesu umaku? Emito yero ang’o pi dhanu ma jubed jucayugi man pi judong dini ma gitie jumar sente?

Kinde ma Yesu ucaku koro pir alokaloka m’ubetimere, eyero nia, ‘Cik ku jubila ginuti cil kum Yohana ma Jababutisi, man ugambre i nindo maeca lembanyong’a ma juboth ko mi Ker pa Mungu juyero.’ Pieno, alokaloka madit uwok i kwo pa Lazaru giku jalonyo ceke, niai ma Yohana giku Yesu Kristu gicaku nirweyo lembanyong’a.

I andha, dhanu ma jucayugi man ma gitie jucan re ma jutwonogi ku lembe pa Mungu pi nindo ma dupa. Re lembanyong’a mi Ker ma Yohana uyero man ma Yesu udok uyero ing’eye ubekonyogi, man gibemediri niwinje. Iwang’e, gibed gijik kende kende ku ‘ng’ili cam m’uoi ku dhu mesa mi thenge mi tipo’ mi judong dini. Re kawoni jubeponjogi ku lemandha ma pigi tek mi Giragora, asagane lembe mabeco ma Yesu ubekoro. Kawoni dong’ iwang’ Yehova Mungu, gin re ma judodogi.

Ento tung’ ku dhanu maeno, judong dini ma gilony man ma dhanu yungogi lee gikwero niwinjo rwonglembe mi Ker ma Yohana giku Yesu girweyo. (Matayo 3:1, 2; 4:17) Rwonglembene ubenyayu kwinyo i igi man ubesendogi, kum enyutho pi pokolembe ma lake tek pa Mungu m’ubebino. (Matayo 3:7-12) Judong dini maeno gibenwang’u nia kara masendi migi uthum, ubekwayu Yesu ku julubne gijig nirweyo pi pokolembe  pa Mungu. Gitie ve jalonyo ma Yesu uweco pire, m’ukwayu kumae: ‘Vwa Abraham, bed ku kisa i kuma, man ior Lazaru, kara eroi wi lwete i pii, ekwi ko leba; kum abedo i ndiba i lebmac maeni.’​—Luka 16:24.

Re lembe utimere ngo i yeny migi. Judong dini maeno gicopo lokiri ngo. Gikwero niwinjo “Musa ku jubila,” ma gikiewo buku ma nwang’u copo konyogi niyio Yesu ma en e Masiya man Rwoth ma Mungu uoro. (Luka 16:29, 31; Jugalatia 3:24) Bende, gikwero nijwigiri man niwinjo lembanyong’a mi jucan ma giyio Yesu, man ma kawoni gibenyayu mutoro i Mungu. Julub pa Yesu ke gicopo weko ngo nirweyo lemandha, kende kende pi ninyayu anyonga i judong dini kunoke pi nijwigo masendi migi. I lapor ma Yesu umaku, ekoro lembuno i wec m’ulubo e, ma Abraham uyero ni jalonyo:

“Woda, poi nia i rundi m’ibedo ie inwang’u gin peri ma ber, Lazaru de kumeno enwang’u gin ma rac: ento kawono ejukre keni, in ke ini i ndiba. M’umedo maeni ceke, i kindwa wakudu longro ma dit nuti, kara ju m’uyenyo giai kakeni gikadh i beng’i ku gicopi, kara jumoko ma kuno de kadhu i bang’wa kud ucopre igi.”​—Luka 16:25, 26.

Alokaloka maeno utimere dre man kakare! Ebenyutho kite ma lembe uwilere ko ni judong dini ma gihayiri, man ni ju ma mol m’ujolo mberembere pa Yesu, ma kawoni dong’ ginwang’u yom man gibecamu cam mi tipo. (Matayo 11:28-30) Alokalokane udok unen ngbeng’ dwi moko ing’eye, kinde ma juwilo lembariba mi Cik ku lembariba manyen. (Yeremia 31:31-33; Jukolosai 2:14; Juebrania 8:7-13) I Pentekoste mi oro 33 R.M., kinde ma Mungu ukonjo tipo maleng’ iwi dhanu, ugam unen kamaleng’ nia julub pa Yesu re ma gitie dhanu ma Mungu uyio, ento Jufarisayo ku dhanu migi ungo.