Fodi asu Yesu ubino i ot pa Jafarisayo, yo ng’ei m’ekeyokum ng’atu m’ubino ku twoyo mi tho liec. Yesu uneno dhanu mange ma julwong’ogi ni cam, gibeng’iyo kabedo ma beco, man etio ku lembe maeno m’eneno, pi nimio ponji iwi jwigiri.

Yesu yero kumae: ‘Ka ng’atu moko lwong’i ni cemo mir ambadha, kud ijany wi kom ma sagu wagi; poinyo elwong’o ng’atu moko ma dwong’ ma segi, e ng’atu m’ulwong’i gibibino ku ng’atuno man ebiwacu iri kumae: Wek ng’atuni ubed kakeri; e ibicaku dok i ka ma nok ku lewic.’​—Luka 14:8, 9.

Yesu udok uyero kendo kumae: ‘Ka julwong’i, cidh ibed ka ma nok; kara ka ng’atu m’ulwong’i ubino, ewac iri kumae, Jarimo, cidh i ka ma krr: e ibibedo ku yung i wang’ dhanu ceke ma wubedo kugi dhu cam.’ Eno ubenyutho nia nibedo ku kura maber ikind dhanu kende uromo ngo. Yesu ukoro kumae: ‘Kum ku ba dhanu nzu m’uting’ere gire jubijwige: man ng’atu m’ujwigere gire jubiyunge.’ (Luka 14:10, 11) Yesu ubekwayu juwinjne nia ginyuth jwigiri i kwo migi.

I ng’eye Yesu udok unyutho ni Jafarisayo m’ulwong’e, kite ma jumio ko cam ni ng’atini i ayi ma foyo i Mungu. Eyero ire nia, ‘kan itedo cam mi dieceng’ kadi mir uthieno, kud ilwong’ jurimbi, kadi utumeru, kadi wat peri, kadi judhugula peri ma julonyo; gin bende gimaru lwong’i, e ebidoko iri ni kawang’e. Ento kan itimo agba, lwong’ jucan, ku weg abala mi bot, ku weg abala mi tielo ku weg abinga: e mugisa bikwenyi: kum gimbe ku piny moko ma gicul iri.’​—Luka 14:12-14.

Yesu uyero ngo nia etie rac nilwong’o jurimbi, wat peri, kunoke jirani peri ni cam. Ento emito niyero nia, nimio cam ni ju m’utie ku yeny, calu ve jucan, weg abala, kunoke weg abinga, copo nimio mugisa madit. Eyero ni ng’atu m’ulwong’e kumae: “Ebicule iri i cer mi weg bedopwe.” Ng’atu acel m’ikind welo ma julwong’o ni cam uyero kumae: “Mugisa ni ng’atu ma bicamu kwen i Ker pa Mungu.” (Luka 14:15) Eneno nia eno utie rwom madit mandha. Ento dhanu ceke ngo ma lembuno ufoyo igi, uketho Yesu umaku lapor mae:

‘Ng’atu moko utedo cemo madit mir uthieno; man elwong’o dhanu dupa: . . . Eoro jaratic pare ucidh uwac ni ju ma julwong’ogi kumae: Wubin; kum piny ceke utie ayika kawoni. Ento kagi ceke gicaku loko lembe. Ma kwong’a uwacu ire kumae: Ang’iewo podho, akecinene; akweii gony lembe m’i wia. Mange wacu kumae: Ang’iewo koni dhiang’ ma ku mberembere abic, man akecipimogi; akweii gony lembe m’i wia. Ng’atu mange wacu kumae: Agamu dhaku, ka kumeno acopo bino ngo.’​—Luka 14:16-20.

Eno tie lokolembe ma kathere mbe! I andha ng’atini lar neno podho kunoke dhiang’ agbele i wang’ ning’iewe, pieno ecopo nene kadok ing’eye de. Ng’atu mir adek ubeyikere ngo ayika pi gamu dhaku. Edaru nigamu, pieno lembe moko mbe ma copo cere niyio lwong’o ma pire tek ma julwong’e ko. Kinde ma won cam uwinjo lokolembe migi, ng’ecwiny umake, man eyero ni jaratic pare kumae:

‘Cidh pio i gengi kud i yo man i adhura de, ikel jucan, ku weg abala mi bot, ku weg abinga man weg abala mi tielo.’ Kinde ma jaratic ukelogi i ot, kabedo udong’ asu. Rwoth uyero ni jaratic pare kendo kumae: ‘Cidh i gengi ku dhu gang’ de, man idhulgi gibin gimondi, kara ot pare pong’. Kum awacu iri, nia jumaco maeno ma julwong’o moko mbe ma bibilo cemo para mir uthieno.’​—Luka 14:21-24.

Lembe ma Yesu ukoro, ubenyutho tap kite ma Yehova Mungu ulwong’o ko jumoko nikadhu kud  i ba Yesu Kristu, kara ginwang’ kaka mi bedo i Ker mi polo. Ju ma kwong’a ma julwong’o ubino asagane Juyahudi ma gitie jutel wic mi dini. Re, dupa m’i kindgi gikwero lwong’o maeno kinde ma Yesu ubino nitimo tic mi rweyo lembanyong’a. Ento lwong’one ujik ikumgi kendgi ngo. Yesu unyutho kamaleng’ nia ing’eye jubilwong’o dhanu mi thek mi Juyahudi ma gimol, man thek mange ma gijolo yioyic mi Juyahudi. I ng’eye, lwong’o mir adek man ma tokcen bibedo ni dhanu ma Juyahudi gineno nia tijgi mbe i wang’ Mungu.​—Tic mi Jukwenda 10:28-48.

Lembe ma Yesu uyero urombo ku pa ng’atu acel m’ikind welo ma julwong’o ni cam, m’uwacu kumae: “Mugisa ni ng’atu ma bicamu kwen i Ker pa Mungu.”