Yesu umio ponji ma pire tek kinde ma gibino nicamu i ot pa jatelwic moko mi Jufarisayo. Kinde m’ecoko woth ebecidho i Yerusalem, udul dhanu madit de ucoko woth i toke. Pirang’o? Nyo andha gibemito gibed julub pare, kadok nwang’u bikwayu nia gitim ang’o de?

Yesu uyero lembe moko ma saa moko nyo uketho jumoko giwinjiri rac. Ewacu kumae: ‘Tek ng’atu moko ubebino i bang’a, m’edagu won ungo, ku min de ngo, ku cege ku nyithindhe de ngo, ku utumin ku nyimego pare de ngo, eyo, ku kwo pare bende de ngo, ecopo bedo jalubna ngo.’ (Luka 14:26) Eno emito niyero ang’o?

Yesu ubeyero ngo nia dhanu ceke m’ubemito gidok julubne gidag wedi migi. Ento ebeyero nia gidag wedi migi i ayi ma gimar ko Yesu nisagu wedi migi, ungo calu ng’atu m’ukwero lwong’o ma pire tek pilembe nia egamu mugole. (Luka 14:20) Yakobo ma tie kwaru Juyahudi de jugam juyero pire nia ‘udagu’ Leya ento emaru Rahel; i andha eno ubenyutho nia emaru Rahel nisagu Leya.​—Thangambere 29:31.

Ng’ei nia Yesu ubeyero nia jalub ucikere nidagu kadok “kwo pare bende,” kunoke ng’eyong’ec pare. Thelembene tie nia jalub mandha ucikere nimaru Yesu nisagu kwo pare gire, m’etie ko ayika kadok nirwinyo kwo pare pire. Ubenen kamaleng’ nia, nidoko jalub pa Kristu utie lembe mi tuko ngo. Etie lembe m’ukwayu jupar ie cuu mandha, ma kud junen ku tuko.

Nibedo jalub romo ketho junwang’iri ku peko kunoke ragedo, uketho Yesu uyero kumae: ‘Ng’atu ma tek uyeyo yen mi can pare ngo, m’elubo ko ng’eya de ngo, ecopo bedo jalubna ngo.’ (Luka 14:27) Jalub mandha pa Yesu ucikere ning’eyo nia ebinwang’ere ku can, calu ma Yesu bende unwang’ere ko. Yesu ugam uyero bende nia ebitho i cing’ judegine.

Pieno udul dhanu ma gilubo tok Yesu gicikiri niparu cuu mandha gin m’ukwayu gitim kara gibed julub pa Kristu. Yesu utio ku lapor moko pi niweco iwi lembe maeno. Eyero kumae: ‘Kum ng’a m’i kindwu m’uyenyo egom ot ma wiu, m’elar ebedo piny de ngo, ekwan wel piny m’etie ko, tek ebedo ku m’ecopo dare ko? Marmoko, kan ecaku there, dare maru voye.’ (Luka 14:28, 29) Pieno, iwang’ nidoko jalub pa Yesu, dhanu ma gilubo tok Yesu pi nicidho i Yerusalem, gicikiri nitimo ng’iong’ic ma cuu pi nijolo rwom maeno. Eketho peko iwi paru maeno ku lapor mae:

‘Ubimo ma kani, ma kan ecirombo kud ubimo wagi i lwiny, elar ebedo piny ungo eporo lembe de, tek ebicopo lwiny ku dhanu 10 000 nirombo ku ng’atu m’ubino i bang’e ku dhanu 20 000? Tek ecopo ngo, ebioro kwenda ma fodi wadi ni bor, man epenjo lembe mi kwiocwiny.’ Pi niketho peko iwi lembe maeno, Yesu uyero kumae: ‘Kumeno bende, ng’atu mi kindwu ma tek ukuno  ngo gin ceke m’ebedo ko, ecopo bedo jalubna ngo.’​—Luka 14:31-33.

M’umbe jiji, Yesu ubeyero ngo lembuno ni udul dhanu m’ubino nilubo ng’eye kende. Dhanu ceke m’ubeponjo lembe iwi Kristu, gicikiri nibedo ayika nitimo lembe maeni m’eyero. Eno ubenyutho nia ukwayu gibed ayika nithiero gin ceke ma gitie ko, kadok kwo migi, ka gimito gibed julub pare. Eno utie lembe m’ukwayu jupar ie cuu mandha man jurwo pire.

Kawoni Yesu udok umulo kum lembe m’egam eweco i wie i ponji pare mi wi got, kinde m’eyero nia julubne gitie “kadu m’i ng’om.” (Matayo 5:13) Emito yero nia calu ma kadu utie ku tego mi gwoko piny kara kud utopi, julub pare bende gitie ku copo iwi dhanu, ma gigwoko kogi kud ikum nyoth mi tipo man mi kurajo. Kawoni calu ma tic pare udhingo nithum, eyero wec mae: “Kadu bedo mit. Ento ka kadu midone rwinyo, jubidwoke mit kud ang’o?” (Luka 14:34) Juwinjne ging’eyo nia kadu moko bebedo rac, pilembe nwang’u ejebere ku ng’om, man tegone bedo nok.

Pieno, Yesu unyutho nia kadok julub pare ma dong’ gigalu lee de, ukwayu ngo giwek amora migi ujwiki. Ka giweko amora migi ujwik tap, gibidoko ve kadu ma lake mbe. E ng’om bicaku ng’ierogi. Lembe marac magwei utie nia, gicopo ngo ninwang’u bero i wang’ Mungu, gicopo caku kadok nicido nyinge bende. Uketho Yesu unyutho nia pire tie tek niuro lembe maeno. Ewacu kumae: “Ngatu m’ubedo ku ithe m’ewinjo ko, wek ewinji.”​—Luka 14:35.