Fodi asu Yesu ni Samaria kunoke i Galilaya. Kawoni Jufarisayo gibepenje iwi bino mi Ker pa Mungu, kum gigeno nia Kerne bibino ve giranyutha madit. Re eyero igi kumae: “Ker pa Mungu bino ndem ndem ungo: kadok awaca de gibiwacu ngo kumae, Nen, keni! kadi, Kaca! kum nen, Ker pa Mungu ni i [kindwu].”​—Luka 17:20, 21.

Jumoko gicopo paru nyo Yesu ubeyero nia Ker ni i adunde jurutic pa Mungu. Ento etie kumeno ngo, pilembe Ker pa Mungu ubino mbe i adunde Jufarisayo m’ebeweco i bang’gi. Re Ker pa Mungu ni i kindgi pilembe Yesu ma jung’io pi nibedo Rwoth mi Kerne ubenwang’ere i kindgi keca.​—Matayo 21:5.

Ecicopere nia saa ma Jufarisayo gicidho, Yesu udok umedo lembe mange ni julubne iwi bino mi Ker pa Mungu. Elar ekoro igi nia ebibedo Rwoth i Ker pa Mungu, eyero kumae: “Ceng’ bibino, ka wubiyenyo wunen kind ceng’ acel pa Wod dhanu, ere, wubinene ngo.” (Luka 17:22) Yesu ubemito nyutho nia Wod dhanu bibimo i Ker i nindo m’ubino. Ma fodi nindone uromo ngo, julubne moko gibimito nia ebin pio, ento bikwayu gikekur nitundo saa ma Mungu ung’olo nia Wod dhanu bibino i ie urom.

Yesu umedo kumae: “Gin de gibiwacu iwu kumae, nen, kaca! nen, keni! kud wuci kamoko, kadi kud wulub ng’eigi: kum calu lukoth, kan emil yo the polo kurucel, eriedo de yo the polo ma kurucel; e Wod dhanu de bibedo kumeno i ceng’ pare.” (Luka 17:23, 24) Ang’o ma bikonyo julub pa Yesu kara kud gilub tok dhanu ma giwacu nia gitie masiya? Yesu uyero nia bino pa Masiya mandha bibedo ve mil pa lukoth ma nen kakare ceke. Eno nyutho nia dhanu ceke ma gibedo ma gibekio, gibineno ngbeng’ nia dong’ ebebimo iwi Ker.

Ing’eye Yesu umaku lapor mi lembe moko m’ukadhu con pi ninyutho timo ma dhanu bibedo ko i nindo m’ebibimo i ie: “Calu etimbre i rundi pa Noa, e ebibedo kumeno de i ceng’ pa Wod dhanu . . . Ebedo kumeno cil calu etimbre i ceng’ pa Lot; gicamu, gimadhu, ging’iewo, giloko, gipidho, gigomo: ento i ceng’ ma Lot uai i ie ku i Sodom, mac ku muganga ai i polo ucwi, unyothogi ceke: ebibedo kumeno i ceng’ ma Wod dhanu nyuthre i ie.”​—Luka 17:26-30.

Yesu ubemito yero ngo nia i rundi pa Noa man pa Lot, Mungu ukelo nyoth iwi dhanu, pilembe gibino nicamu, nimadhu, ning’iewo, nilworo, nipidho man nigomo udi; eno gitie lembe mi kwo ma kubang’ ceng’. Kadok Noa giku Lot man juruot migi de gibed gitimo lembe moko m’ikind ma jukwanu eno. Re dhanu moko giroyiri zoo i kit kwo maeno m’umbe niketho wigi nyanok de ikum yeny pa Mungu, man wigi  uwil magwei nia gibino nikwo i nindo makani. Pieno, Yesu ucimo julubne nia giketh wigi kilili pi ning’eyo yeny pa Mungu, man gimiiri zoo pi nitimo yenyne. Ebemito yero igi nia ka gitimo kumeno, gibiboth saa ma Mungu bikelo nyoth i nindo m’ubino.

Julub gicikiri ngo ‘nidok cen’ man niweko kit kwo mi ng’om maeni uwil wigi. Yesu uyero kumae: “I ceng’ maeno, ng’atu m’ubedo wi ot, jemni pare ke ni i ot, kud elor piny nilabugi woko: ng’atu ma ni i thim de kumeno kud edok cen. Wupoi kum ci Lot.” (Luka 17:31, 32) Ci Lot ugam udoko ni mbegi mi kadu.

Kinde ma Yesu ubemedere nikoro kite ma lembe bibedo ko saa ma Wod dhanu bibimo iwi Ker, eyero ni julubne kumae: “I diewor maeno, jumaco ario bibedo wi kavuto acel; jubigamu acel, wadi ke jubiweko.” (Luka 17:34) Eno nyutho nia dhanu moko biboth, ento jumange jubiwekogi, niwacu gibitho.

Julub gipenjo kumae: “Kakani, Rwoth?” Yesu udwoko igi kumae: “Ka ma kum ni i ie, [acur] bicokri ie karacelo.” (Luka 17:37) Andha, julub moko gibibedo ve acur ma wang’e kwindo piny, man gibicokiri ibang’ Kristu mandha, ma en e Wod dhanu. I nindo maeno m’ubino, Yesu bimio lemandha ma bodho kwo ni ju ma gitie ku yioyic.