Yesu ku dhanu ma gibewotho kugi gitundo i Yeriko, ma tie wotho mi bang’ acel kumeni niai kud i Yerusalem. I andha, jucopo yero nia adhura mi Yeriko ie upokere ni ario; adhurane ma con nwang’ere i kilometre acel ku nusu kud adhurane manyen ma jugomo i rundi mi Juroma. Kinde ma Yesu kud udul dhanu giai kud i adhurane acel man gidhingo m’ucelo, abinga moko ario ma jukwaipiny giwinjo woi mi dhanu. Nying’ ng’atu acel m’ikindgi tie Bartimayo.

Saa ma Bartimayo kud abinga wadi giwinjo nia Yesu ubekadhu, gicaku kok ku dwandgi ma tek kumae: “Rwoth, bed ku kisa i kumwa, in i wod Daudi!” (Matayo 20:30) Jumoko m’ubino ikind udul gikwerogi ku kwinyo nia giling’ cen, re abinga maeno gimediri nikok dong’ ma tek nisagu. Kinde ma Yesu uwinjo yakini m’unyai egam ecungo. Eoro ju ma gitie kugi gicidh gilwong’ ng’atu m’ubekok ubin. E gicidho ibang’ jukwaipiny maeno man giwacu ni acel kumae: “Dong’ cwinyi bed tek: ai malu, ebelwong’i.” (Marko 10:49) Abinga maeno uai malu, ebayu kendi pare ma yor iwie man epiei ku mutoro ecidho ibang’ Yesu.

E Yesu upenjogi kumae: “Wuyenyo ya atim ang’o iwu?” Gin ario zoo gidwoko kumae: “Rwoth, wayenyo nia wang’wa yabre.” (Matayo 20:32, 33) Kisa umaku Yesu ikumgi, e emulo wang’gi, man eyero ni acel m’ikindgi segi kumae: “Cidhi. Yioyic peri e m’utito kumi.” (Marko 10:52) Andha, wang’ abinga ario maeno ma gijukwaipiny uyabere. E ndhundhu nica gicaku yungo Mungu, man gilubo tok Yesu. Dhanu mange de saa ma gineno udu maeno, gipaku Mungu.

Saa ma Yesu ubekadhu kud i Yeriko, njuru dhanu madit utieke. Dhanu ceke ubemito gikenen kum ng’atu m’uyabu wang’ abinga. Dhanu ubecung’iri ikum Yesu ma dong’ ecopo yiko kume de ngo; jumoko gibeii kpe nia ginene re gicopo ngo; ikind ju m’ubeii ne, Zakayo de nuti. Etie jadit mi weg ajok i adhura mi Yeriko man i ng’ete. Calu m’etwil, ecopo neno ngo lembe m’ubetimere. Pieno, Zakayo utelo yo ku ng’wec, man ecidh eidho iwi yend ulemo moko ma nwang’ere i dhu gengi ma Yesu ubebino kadhu kud i ie. Kud iwi yen kuca re m’ebeneno lembe ceke m’ubekadhu. Kinde ma Yesu uwok ceng’ini, eneno Zakayo iwi yen man eyero ire kumae: “Zakayo, lor piny pio; kum tinuni akobedo i ot peri be.” (Luka 19:5) E Zakayo gam ulor ku wi yen man eringo i pacu pi niyikere kara ejol welo pare mir awora.

Kinde ma dhanu gineno lembuno, gicaku ng’ur. Ginwang’u nia etie ber ungo ni Yesu nibedo welo pa ng’atu ma gineno nia utie jadubo. I andha, Zakayo ulony ku sente pa dhanu ma gibed gikwalu saa ma gibejoko ajok.

Saa ma Yesu umondo i ot pa Zakayo, dhanu ging’ur i kume, giwacu kumae: “Emondo nibedo  ku ng’atu ma jadubo.” Re Yesu uneno nia Zakayo copo yewo dubo pare, pieno cwinye utur ungo. Zakayo ugam uai malu man ewacu ni Yesu kumae: ‘Nen, Rwoth, ng’et piny para kucel abimio ni jucan; man tek avugo ng’atu moko ku riu, abidwoko wang’e wang’ ang’wen.’​—Luka 19:7, 8.

Wec maeno unyutho nia andha Zakayo uyewo dubo pare! Ecopo ting’o buku pare mir ajok man ediko wel sente ma tap m’ebed egamu kud ibang’ Juyahudi ma tung’ tung’; bende eng’olo nia ebedwoko kawang’e wang’ ang’wen. Eno tie lee dit nisagu kadok ma Cik pa Mungu ukwayu. (Ai 22:1; Lembe mi Julawi 6:2-5) M’umedo maeno, Zakayo ung’olo nia ebiting’o nusu mi jamcinge ebimio ni jucan.

Saa ma Yesu uneno nia andha Zakayo uyewo dubo pare, lembene ufoye, man ewacu kumae: ‘Tinuni both ubino ba ot maeni, kum en bende en e wod Abraham. Kum Wod dhanu bino niyenyo nilaru de ju m’urwinyo.’​—Luka 19:9, 10.

Nwang’u iwang’e, Yesu ular umio lapor pa wod m’urwinyo, pi niketho peko iwi lembe ma ng’atu “m’urwinyo” nwang’ere ko. (Luka 15:11-24) Re lapor m’emio maeni utie pa ng’atu m’ukwo andha, m’ubino ve wod m’urwinyo ma kawoni dong’ unwang’ere. Ecicopere nia judong dini ku dhanu migi ging’ur ikum Yesu man gicaye pilembe ebedieng’ akeca ku dhanu ma ve Zakayo. Kadok kumeno de, re asu Yesu ubemedere nisayu nyithindho pa Abraham m’urwinyo man nikonyogi gidwog ibang’ Mungu.