PI JUNYODO
7: Kura
THELEMBENE TIE ANG’O?
Kura utie kite ma tung’ tung’ ma ng’atini ng’iyo en gire nia umaku ekwo ko. Ku lapor, nyo ibeii nibedo dhanu m’atira i lembe ceke? Pieno, nyo ibemito iroy kura ma ber maeno i awiya peri bende.
Kura uketho i iye bende cik ma tung’ tung’ iwi gin ma ber ku gin ma rac. Ku lapor, ng’atu m’utie ku kura ma ber timo lembe i atira, cuu, man eneno ju mange nia pigi tie tek. Gitiye timo ma beco ma mondo cuu i ng’atini nwang’u fodi etie nyanok.
CIK MIR UKUNGU MI BIBLIA: “Ponj nyathin uwoth i yo m’umaku piny, man cil m’eti ebiweke ngo.”—Lembrieko 22:6.
PIRANG’O PIRE TIE TEK NIPONJO AWIYA KU KURA MA BECO
I rundi maeni ma jamtic mir elektronik unyay, nibedo ku kura ma beco pire tie tek. Mego moko ma nyinge Karyn uyero kumae: “Lembe ma reco copo nwang’ere iwi telefon moko ci, man i saa mokoko ci. Pieno, ukwayu awiya mwa gibed ceng’ini i ng’etwa kinde ma ka gibeneno piny moko ma cuu ngo!”
CIK MIR UKUNGU MI BIBLIA: “Dhanu m’uteng’ini. . . ku copo migi mi ng’iyo i lembe, giponjo nikoyo kind gin ma ber ku gin ma rac.”—Juebrania 5:14.
Kura ma beco mi wec de pigi tie tek. Eno uketho i iye nibedo ku kite ma ber mandha (calu ve niyero “ka copere” man “afoyo”) man ninyutho nia ibedieng’ ku jumange. Kura maeno dong’ dhanu gimbe ko, pilembe ve nia dong’ gidieng’ kwa pi jamtic mir elektronik kakare nidieng’ ku dhanu.
CIK MIR UKUNGU MI BIBLIA: “Calu ma wubemito dhanu gitim iwu, wun de wutim igi kumeca.”—Luka 6:31.
ICOPO TIMO ANG’O?
Nyuth pi kura peri ma beco. Ku lapor, sayusac ma jutimo unwang’u nia aradu gicopo ceriri nitimo ribiri i wang’ gamiri ka jularu junytho igi thwolo thwolo nia kit timo ma kumeno utie rac.
JUK: Tii ku lembe moko m’ung’eyere pi nicaku the wec iwi lembe m’uneno kura. Ku lapor, ka lembang’eya moko ubewec iwi lembe pa nek, icopo yero kumae: “Dhanu moko benyutho ng’eicwiny migi rac dit i kum juwadi. Iparu nia pirang’o dhanu dong’ udoko kumeno?”
“Etie lembe ma tek dit ni awiya ning’iyo gin ma ber ku gin ma rac tekene gilar ging’eyo ngo gin ma ber ku gin ma rac.”—Brandon.
Ponjgi ku kura ma beco mi wec. Kadok awiya ma thindho de copo ponjo niyero wec ma nia “ka copere” man “afoyo” man ninyutho nia gibedieng’ pi jumange. Buku moko mi Junyodo uyero kumae: “Kan awiya ubeneno nia gin de gitie i kind dhanu dupa m’ukadhugi, calu ve: I pacu, i somo, i kind lwak, eno ketho gibedo ayika ninyutho kura ma beco ma miyo bero igi kende ngo ento ni dhanu ceke.”
JUK: Mii tic ni awiya peri, kara uponjgi ging’ey bero mi konyo jumange.
“Kan awiya mwa giponjo nitimo tic mi pacu kawono, eno biketho gibisendiri ngo kinde ma gibicaku kwo i wigi gigi. Saa maeno binwang’u dong’ gidaru ng’iyo ku timo lembe m’ukwayere i kwo migi.”—Tara.
