Ng’atu ma timo tic ku tego bedo ngo janyap. Ento emaru nitimo tic kud amora pi nipong’o yeny pare man pi nikonyo jumange; kadok nwang’u ticne uketho dhanu becaye de.

Kadok imar kunoke ngo de, re ng’ei nia kwo upong’ ku lembe dupa m’umito jutim. Nibedo dhanu ma timo tic ku tego utiye mugisa i ng’om maeni ma dhanu m’i iye umaru ngo paru mi timo tic ku tego.​—Eklizia 3:13.

“Anyang’ nia kan itimo tic ku tego, inwang’u anyong’a man yomcwiny. Kit yomcwiny maeno ma nwang’u re m’ucwala nimaru timo tic. Nibedo ku kura mi timo tic ku tego biketho in bende jubiweco piri ber.”​—Reyon.

CIK MIR UKUNGU MI BIBLIA: “Kuloka nuti i tic mi muli ceke.”​—Lembrieko 14:23.

Lub lembe ma jukwanu piny e pi nibedo ku nen ma cuu iwi tic:

Bed kud ava mi ponjo nitimo lembe cuu. Kadok nwang’u ibetimo tic m’i pacu, ibedaru devwar peri mi somo, kunoke ibetimo tic mi sente, miiri zoo i gin m’ibetimone. Ka dong’ icaku betimo tic ma ber, say yore mange m’iromo time ko ma ber ma gwei, man piyo piyo. Tekene itiye jabodho lee, tic peri de binyayu anyong’a lee i ii.

CIK MIR UKUNGU MI BIBLIA: “Ineno ng’atu moko ma won amora i tic pare? ebicungo i wang’ ju m’ubimo; Ebicungo i wang’ dhanu ma sai ungo.”​—Lembrieko 22:29.

Kud idieng’ kwa piri kendi. I lembe ceke kan ibed ipong’o rwom peri cuu, jumange de nwang’u berone. Ku lapor, tekene ibed i timo tic peri m’i pacu ku tego, eno bikonyo kor jupewu mange de.

CIK MIR UKUNGU MI BIBLIA: “Nimiyo nyayu anyong’a lee ma sagu nigamu agama.”​—Tic mi Jukwenda 20:35.

Tim nisagu gin ma jukwayu itim. Kakare nitimo kende kende kadhiri mi lembe ma jukwayu i beng’i, ke pim nitimo nisagu gin ma jukwayu itim. Kud itim kumeno pilembe judiyi adiya, ento tim pileme ing’iyo in giri. I ayi maeno re ma nwang’u ibetelo wi kwo peri ma ber.​—Matayo 5:41.

CIK MIR UKUNGU MI BIBLIA: “Kud adiyi adiya nitimo gin ma ber, ento itime ku mito peri giri.”​—Filemon 14.

Bed ku nen ma ber. Ng’atu ma timo tic ku tego utiye ngo janyap, etiye ngo bende ng’atu ma timo tic nikadhu mukero. Etimo kero nibedo ku nen ma ber, enwang’u anyong’a kadok i tic man i yom bende.

CIK MIR UKUNGU MI BIBLIA: “Gin ma pong’ cing’ acel, karacelo ku cwiny m’ukwiyo e ber, sagu gin ma pong’ cing’ ario ku tic mi muli man kethocwiny kum yamu.”​—Eklizia 4:6.