Wucopo weco cuu kud awiya mwu nwang’u ng’atuman ubekoro thwolo thwolo paru pare man kite m’ebewinjere ko.

Niweco kud awiya doko lembe ma tek akecane ka gicaku bethik. Kinde m’awiya peri gibino thindho, copere gibed gikoro iri lembe ceke. Ento kawoni ma dong’ gidoko aradu, giweco ngo kudi akeca man gikoro ngo iri paru migi man kite ma gibewinjiri ko. Edong’ ebedo ve kulo moko ma wang’e lac upoko kindwu. Kadok ubenen nia awiya peri gibemito ngo niweco de, ng’ey nia eno re m’utie saa m’ukwayu iwec kugi lee!

Bed ayika niweco ku nyathin peri. Tim kumeno kadok nwang’u ubekwayu wuwec diewor de.

“Saa moko icopo mito iyer nia, ‘eni kan ibemito waweci ma ke wariyo kudi duu e?’ Dong’ wabikwero nenedi ke kan awiya mwa ubemito weco i bang’wa? Nyo eno tie ngo gin ma junyodo ceke gibed gimito?”​—Lisa.

“Abed amaru ninindo con, ento wang’ ma pol wabed waweco cuu kud awiya para nwang’u dong’ saa udaru nyang’.”​—Herbert.

CIK MIR UKUNGU MI BIBLIA: “Dong’ ng’atuman kud uyeny bero pare gire, ento emedere niyenyo bero pa ng’atu mange.”​—1 Jukorintho 10:24.

Kud iwek gin moko uwil wii. Wego moko uyero kumae: “Saa moko kan awiya para ubeweco i bang’a nwang’u wiya ubeparu pare lemange. E ginyang’ nia abewinjogi ngo.”

Ka in de ibenweng’iri i wang’ lembe ma kumeno, bed ineg televizio cen man iketh telefon ang’et kara kud ginyoth wii kinde m’ibeweco ku nyathin peri. Keth wii i kum lembe ma nyathin peri ubeyero, man cik ithi iwinj lembene cuu mandha, kadok nwang’u ebenen ni gin ma pire tek ungo iri de.

“Kwayu waketh awiya mwa ginyang’ nia paru migi utie gin ma pire tek iwa. Ka ginyang’ nia wabedieng’ ungo ku paru migi, gibicaku ling’ ku parune i igi kunoke gibicaku kore ni dhanu mange.”​—Maranda.

“Ng’eicwiny kud umeki kadok paru pa nyathin peri utie vii de.”​—Anthony.

CIK MIR UKUNGU MI BIBLIA: “Wubed ku weng’wu i kum ayi ma wubewinjo ko.”​—Luka 8:18.

Kud iwek kaka m’unen. Saa moko awiya gikoro paru migi yot yot ni junyodo migi nwang’u gibedo ngo kugi abeda pi nithebo wec.

“Waweco ma ber nwang’u wan’i muthukari. Ka ng’atuman ubedo i ng’et wadi, wec mol ma ber nisagu ma ka wabenenara anena.”​—Nicole.

Saa mange ma ber mi weco utie kinde ma jubecamu.

“I saa pa cam mir uthieno, ng’atuman koro lembe ma rac ku ma ber m’utimere dieceng’. Nitimo kumeno diko kindwa man eketho ng’atuman m’i kindwa nyang’ nia ebenyego ku peko pare en kende ngo.”​—Robin.

CIK MIR UKUNGU MI BIBLIA: “Ng’atuman ubed m’ewinjo lembe pio, ma weco ngo m’umbe niparu i lembe.”​—Yakobo 1:19.