Kud iwek gin moko ceri ku nwang’u sukulia
“Ng’atu moko kud umai giragama (sukulia) mi kwaya mu.” —JUKOLOSAI 2:18.
WER: 122, 139
1, 2. (a)Jurutic pa Mungu gibekuro kud ava ninwang’u sukulia makani? (b) Ang’o ma konyowa niketho wang’wa zoo ikum sukulia? (Nen cal mir acaki.)
JUKRISTU ma juwiro ku tipo gitie ku genogen ma pire tek lee. Gibekuro kud ava nicikwo i polo. Jakwenda Paulo ulwong’o genogen maeno nia “sukulia mi lwong’o ma malu pa Mungu.” (Jufilipi 3:14) Kuca i polo, gibibimo karacelo ku Yesu Kristu i Ker pare, man gibitimo tic kude pi nikonyo dhanu gidok leng’. (Lembanyutha 20:6) Eno tie genogen ma ber mire ma! Rombe mange ke gibekuro kud ava ninwang’u sukulia m’ukoc ku migi. Gitie ku genogen mi kwo rondo ku rondo i Paradiso iwi ng’om, man genogen ne uketho gitie kud anyong’a!—2 Petro 3:13.
2 Paulo umito ekony Jukristu wadi ma juwiro ku tipo kara gimediri nigwoko bedoleng’ migi man ginwang’ sukulia. Pieno, eyero igi kumae: “Wuketh pidoiwu kum gin ma malu.” (Jukolosai 3:2) Gicikiri niketho wigi zoo iwi genogen migi ma pire tek lee mi cidho nikwo i polo. (Jukolosai 1:4, 5) Eyo, niparu pi mugisa pa Yehova, konyo jurutic pa Mungu ceke niketho wang’gi ikum sukulia, kadok gibed ku genogen mi kwo i polo, kunoke i ng’om keni.—1 Jukorinto 9:24.
3. Paulo umio cimowang’ makani ni Jukristu wadi?
3 Paulo ucimo bende wang’ Jukristu wadi ikum ariti ma tung’ tung’ ma romo cerogi ku nwang’u sukulia. Ku lapor, egoro ni Jukristu mi Kolosai ma gibino niworo Cik pa Musa pi nipimo ninyayu mutoro i Mungu, kakare niketho yioyic migi i Kristu. (Jukolosai 2:16-18) Bende, Paulo uweco iwi ariti m’utie tin eni de, ma copo cerowa ku nwang’u sukulia. Ekoro kite ma waromo cerara ko ikum ava mi kura mareco, man gin ma wacopo timo ka watie ku lembe moko i kindwa ku juruot mwa kunoke kud umego mwa. Juk ma Paulo umio romo konyowa tin bende. Dong’ wakenen cimowang’ moko mi mer m’emio i waraga pare ni Jukristu mi Kolosai.
WUNEG AVA MI KURA MARECO
4. Pirang’o ava mi timo kura mareco romo cerowa ninwang’u sukulia?
4 Yong’ei ma jakwenda Paulo upoyo wi umego pare pi genogen migi maber akeca, edok ekiewo kumae: “Wuneg wathkumwu ma gini i ng’om [i lembe m’uneno] tarwang’, sasa, awanya ma rac, ayiri, ku kethocwiny hai kum piny.” (Jukolosai 3:5) Ava mi kura mareco romo bedo ku tego lee i wiwa man eromo ketho wabayu winjiri mwa ku Yehova man bende genogen mwa mi nindo m’ubino. Umego moko m’ugam utimo kura marac ma i ng’eye edok edwogo i cokiri, uyero nia ava mi timo kura mareco ubino ire ku tego lee mandha, ma dong’ ‘nicerere de udoko tek nitundo epodho i dubo.’
5. Waromo gwokara nenedi ikum lembe ma romo royowa i ariti?
5 Wacikara nibedo ku wang’wa lee, akecane ka wabenwang’ara i lembe ma copo cwaluwa nituro cik mi kurajo ma Yehova uketho. Ku lapor, etie lembe mi rieko ni dhanu ario ma gibemito nigamiri, niketho mupaka i kindgi niai i acaki mi mer migi, iwi lembe m’uneno mulo kumgi, cwio limbgi, man bedo aponda kendgi. (Lembrieko 22:3) Ariti mange romo wok kinde ma ng’atu ma co man ma dhaku (kunoke nyaku) gibewotho i kuloka kunoke gibetimo tic karacelo. (Lembrieko 2:10-12, 16) Iromo timo ang’o pi nigwokiri? Nyuthiri kamaleng’ nia itie Jamulembe pa Yehova. Bed ku kura ma cu, man wii kud uwil nia, nibedo ndikindiki ikum ng’atu ma tie ngo jadhogi mi gamiri, romo terowu i lembe marac. Wacikara bende nibedo ku wang’wa tekene watie ku can i iwa, kunoke watie kendwa. I saa maeno, cwinywa romo tur man waromo bedo ku yeny ma nia ng’atu moko udieng’ piwa, man wacopo yio lembe pa ng’atu moko ci. Eno tie ariti. Dong’ i saa maeno, kud itim lembe moko ma biceri ku nwang’u sukulia. Ento, kwai kony ibang’ Yehova man ibang’ umego ku nyimego.—Som Zaburi 34:18; Lembrieko 13:20.
6. Wacikara ning’io kit galuwang’ ma nenedi?
6 Pi ninego ava mi kura ma reco kud i kumwa, wacikara nikwerara cen ku galuwang’ mareco. Galuwang’ dupa ma tin, ubepoyo wiwa ikum kit lembe m’ubino con i Sodom ku Gomora. (Yuda 7) Dhanu ma gibewodho galuwang’, giketho lem sasa mi tarwang’ unen ni gin ma cuu. Pieno saa ceke ukwayu wabed ku wang’wa. Kud wajol ngbaku kumeni galuwang’ ceke ma ng’om maeni ubewodho. Ento, wacikara ning’io kit galuwang’ ma bicerowa ngo ku nwang’u sukulia mi kwo.—Lembrieko 4:23.
“WURONY” MER KU BERO
7. Lembang’o ma copo niwok i kindwa i cokiri mi Jukristu?
7 Watie weg anyong’a pilembe wabenwang’ara i cokiri mi Jukristu. Watie ku ng’iyo mi ponjo Lembe pa Mungu i cokiri, man wabekonyara ku mer ng’atuman ku wadi man ku wadi. Lembuno konyowa niketho wang’wa zoo ikum sukulia mwa. Re saa moko kosowinjiri copo niwok, ma copo nyayu lembe i kindwa kud umego ku nyimego. Ka wadaru lembene ngo, ecopo royowa piopio i adegi.—Som 1 Petro 3:8, 9.
8, 9. (a) Kite ma tung’ tung’ makani ma bikonyowa ninwang’u sukulia mwa? (b) Ang’o ma bikonyowa nigwoko kwiocwiny i kindwa ka Jakristu wadwa moko utimowa rac?
8 Ukwayu ngo wawek adegi ucerwa ku nwang’u sukulia mwa. Paulo ukoro gin ma Jukristu gicikiri nitimo, ewacu kumae: “Wurony, calu dhanu ma Mungu goyo wigi, ma leng’ man jumer de, adunde mi ngisi, ku bedo ber ku dhanu, ku ming’o, ku molcwiny, ku mwonyo lembe hai; ma wuoi ko lembe ma kum juwedu ma ng’atuman uoi lembe ma kum wadi man kum wadi, ma wuwek ko lembe ma kum juwedu ma ng’atuman uwek lembe ma kum wadi man kum wadi, tek ng’atu moko lembe ni i ie kum ng’atu moko: cil calu [Yehova] uweko lembe mu, e wun bende wutim kumeno: man ma sagu gin maeni ceke wurony mer, ma en e twic mi doko cu ma ndhu.”—Jukolosai 3:12-14.
9 Mer ku bero copo konyowa niweko lembe ni jumange. Ka ng’atu moko uyero kunoke utimo lembe moko m’utimowa rac, ukwayu wakewapoi ikum lembe moko ma cu ngo ma wan de wagam wayero kunoke watimo ni jumange, ma re giweko iwa. Wabedo ku foyofoc lee mandha ikum mer man bero ma ginyutho iwa! (Som Eklizia 7:21, 22.) Watie ku foyofoc pilembe Kristu ubenyutho bero, m’ebediko ko jurutic mandha pa Mungu i acel. (Jukolosai 3:15) Wan ceke wamaru Mungu acel, warweyo lembe de marom, man watie ku peko dupa bende marom. Ka wabetimo bero, wabenyutho mer, man wabeweko lembe i kindwa, e cokiri bimedere nibedo i acel man wabiketho wiwa ceke ikum sukulia.
10, 11. (a) Pirang’o kumira tie rac? (b) Wacopo timo ang’o kara kumira kud ucerwa ninwang’u sukulia?
10 Bedo ku kumira copo nicerowa ninwang’u sukulia. Lapor ma tung’ tung’ ma nwang’ere i Biblia, ubenyutho kamaleng’ nia kumira tie rac. Ku lapor, Kain ubedo ku kumira ikum Abel uketho enege. Kora, Dathan, man Abiram gibino ku kumira ikum Musa uketho gijai ire. Ubimo Saul ubino ku kumira ikum Daudi, pieno emito enege. Eno nyutho nia lembe ma e ma Biblia ubeyero, utie lemandha: “Ka ma kumira ku koiri ginuti ie, yakni ku tic ceke marac de ginuti.”—Yakobo 3:16.
11 Ka wabetimo kero ninyutho mer man bero, wabibedo ngo jukumira nya swaswa. Lembe pa Mungu uwacu kumae: “Mer ciro lembe hai, man ebedo ber; mer kumira nege ngo.” (1 Jukorinto 13:4) Kara kumira kud ubed iwa ni kite mwa, ubekwayu watim kero nineno lembe calu ma Yehova de beneno. Ukwayu wanen umego ku nyimego mwa calu wathkum acel mi cokiri. Biblia uwacu kumae: “Tek juyungo wathkum acel, wathkum ceke anyong’a negogi gikude.” (1 Jukorinto 12:16-18, 26) Ka lembe maber utimere ni umego mwa moko, wabibedo kud anyong’a ikume kakare nibedo ku kumira. Kepar pi lapor maber pa Yonathan ma wod Ubimo Saul. Kumira unego ngo Yonathan kinde ma jung’io Daudi nibedo ni ubimo kakare ning’io en. Etundo niketho cwiny Daudi man ekonye. (1 Samwil 23:16-18) Nyo wan de wacopo ninyutho bero man mer calu Yonathan?
JURUOT, WUNWANG’ SUKULIA KARACELO
12. Juk makani m’i Biblia ma romo konyo juruot mwa ninwang’u sukulia?
12 Ka ng’atuman mi ot ubetimo tego niworo cik mir ukungu mi Biblia, juruot mwa ceke bibedo ku kwiocwiny, kud anyong’a man gibinwang’u sukulia. Jakwenda Paulo umio juk ma e mi rieko ni juruot: “Mon, wubed wor ni cogwu, calu m’umaku piny i Rwoth. Wu cogmon de, wumar mondwu, man kud wukecgi. Nyithindho, wuwor junyodo mu i gin ceke, kum maeni nyayu mutoro i Rwoth. Wego, kud wunyai ng’ecwiny i nyithindho mu, kara kud wukab cwinygi.” (Jukolosai 3:18-21) Juruot, nyo wubeneno ayi ma juk maeni copo nikonyo kowu?
13. Nyamego romo konyo nenedi won ot pare ma tie ngo Jamulembe kara emar nitimo ni Yehova?
13 Saa moko nyo itie nyamego man won ot peri utie ngo Jamulembe pa Yehova. Iromo timo ang’o kan inwang’u nia ebetio ngo kudi i kite m’ukwayere? Lembuno copo nyayu ng’ecwiny i ii man copo ketho iloko dhogi kude, ento, nyo timo kumeno copo niyiko lembe ayika? Kadok nyo iloyo dhoge ku wec de, nyo eno biketho emar nitimo ni Yehova? Cibedo ve ungo. Ento kan inyutho ire woro pilembe etie won ot, ibikonyo ot peri nibedo ku kwiocwiny lee 1 Petro 3:1, 2.
man ibimio yung ni Yehova. Lapor peri maber romo cwalu won ot peri ucak nitimo ni Yehova, e wun ario ceke wubinwang’u sukulia.—Som14. Umego romo timo ang’o ka dhaku pare ma tie ngo Jamulembe ubewore ngo?
14 Saa moko nyo itie umego man min ot peri utie ngo Jamulembe pa Yehova. Icopo timo ang’o kan inwang’u nia ebewori ngo? Kan ibekok akoka i wie pi ninyutho nia in re m’itie won ot, nyo eno re ma biketho ebiwori? Ungo! Mungu ubekwayu nia imar dhaku peri, pi nilubo lapor pa Yesu. (Juefeso 5:23) Yesu tie jawi cokiri, re saa ceke etie ku cirocir man mer. (Luka 9:46-48) Tekene ilubo lapor pa Yesu, min ot peri romo maru bende nitimo ni Yehova nindo moko.
15. Won ot ma Jakristu copo nyutho nenedi nia emaru dhaku pare?
15 Weg udi, Yehova ubemio iwu telowic ma e: “Wumar mondwu, man kud wukecgi.” (Jukolosai 3:19) Won ot m’umaru dhaku pare, emio yung ni dhakune. Nenedi? Ewinjo paru pa dhaku pare, man eketho enen nia parune pire tek iwang’e. (1 Petro 3:7) Kadok nyo ebitimo ngo kwa gin ma dhakune upenjo de, re niwinjo paru pare copo konye kara emak yub maber. (Lembrieko 15:22) Won ot m’umaru dhaku pare penjo ngo apenja nia dhaku wore. Ento eii nitimo lembe ma ketho dhakune wore yot yot. Ka won ot umaru dhaku pare man awiya bende, gin ceke gicopo bedo kud anyong’a nitimo ni Yehova man ninwang’u sukulia mi kwo.
Wacopo timo ang’o kara kosowinjiri mi ot kud ucerwa ku nwang’u sukulia? (Nen udukuwec mir 13-15)
ARADU, KUD WUYI GIN MOKO UCERWU NINWANG’U SUKULIA!
16, 17. Kan itie aradu, icopo timo ang’o kara kud imak ng’ecwiny ikum junyodo peri?
16 Saa moko nyo itie aradu, man ibeparu nia junyodo peri gibenyang’ kudi ngo kunoke gibedii akeca. Lembuno romo nyayu ng’ecwiny i ii man ecopo ketho ibed ku jiji nitimo ni Yehova. Re ng’ei nia kan iweko Yehova, ibinwang’u nia kara ng’atu moko mbe acel de i ng’om maeni m’umeri calu ma junyodo peri man jurimbi gimeri ko i cokiri.
17 Kepar lembe ma e: Ka nwang’u junyodo peri gibed gimio iri ngo twiny, nwang’u icopo ng’eyo nenedi nia gibedieng’ piri? (Juebrania 12:8) I andha, gitie leng’ ungo, pieno ayi ma gibemio ko iri twiny copo ninyayu ng’ecwiny i ii. Ento kud iketh wii ikum ayi ma gibemio ko iri twinyne. Tung’ ku maeno, pim ninyang’ nia pirang’o gibemio iri twiny man gibeweco iri kumeno. Bed yo man kud ipim niloko dhogi kugi. Lembe pa Mungu uwacu kumae: ‘Ng’atu ma cero lembe pare, en e won ng’eyong’ec; man ng’atu ma cwinye kwio, en e won ng’eyothelembe.’ (Lembrieko 17:27) Keth ebed iri ni lembakeca nibedo ng’atu m’uteng’ini ma jolo juk, man ma nwang’u ponji ikum jukne m’umbe nidieng’ ikum ayi ma jumie ko. (Lembrieko 1:8) Wii kud uwil nia etie mugisa madit nibedo ku junyodo ma gimaru Yehova. Gibemito gikonyi kara ikwo rondo ku rondo.
18. Pirang’o ukwayu iketh wii zoo ikum sukulia peri?
18 Kadok watie ku genogen mi kwo rondo ku rondo i polo, kunoke i paradiso i ng’om keni, wan ceke wacikara niketho wiwa zoo ikum kwo maber akeca mi nindo m’ubino. Genogen mwa utie genogen mandha. Ejengere iwi lembang’ola pa Jacwic mi piny ceke, m’uwacu kumae: “Ng’om bibedo pong’ ku ng’eyong’ec pa Yehova.” (Isaya 11:9) Ceng’ini eni, Mungu biponjo dhanu ceke m’i ng’om. Eno utie sukulia m’ukwayu watim tego mwa zoo ninwang’u. Dong’ saa ceke wii kud uwil ikum gin ma Yehova ung’olo iri, man kud iwek gin moko uceri ki ku nwang’u sukulia!