THIWIWEC MI 44
WER 33 Redh ter peri iwi Yehova
Gin m’icopo timo ka jubesendi mananu
“Kud iwek lembe ma rac uloyi, ento mediri nivoyo lembe ma rac ku gin ma ber.”—RUM. 12:21.
I ADUNDO
Wabineno gin m’icopo timo ka jubesendi mananu, kara kud iketh lembe unyothere anyotha.
1-2. Wan zoo masendi romo wok i wiwa nenedi?
YESU umiyo lapor pa dhatho moko m’umedere nikwayu japoklembe moko nia upok lembe pare atira. Ma jiji mbe, kpawa maeno ubed udwogo iwi julub pa Yesu ma dupa, pilembe i rundi maeca wang’ ma pol jubed jusendo dhanu ma sai mananu. (Luka 18:1-5) Kpawane pire tek iwa tin bende, pilembe wan de wadaru nwang’ara kokoro ku lembe ma rac ke mananu.
2 I ng’om ma tin eni, akoyakoya man masendi unyay lee, uketho wazungo ngo ka jutimo iwa lembe i atira ngo. (Ekl. 5:8) Ento iwa copo wang’ magwei kan umego kunoke nyamego re m’upoko lembe rac i wiwa; re etie lembe ma copo wok. I andha umego ku nyimego mwa gitie ngo judhu lemandha. Gitie kende kende ku dub’alaga. Ento wacopo nwang’u ponji lee i lembe ma Yesu utimo kinde ma jujai ma reco ubesende mananu. Ka wacopo ciro judhogwa m’ubesendowa mananu, nyo ukwayu ngo wacir umego ku nyimego mwa nisagu?Yehova winjere nenedi tek ju ma woko kunoke ju m’i cokiri gibesendowa mananu? Nyo edieng’ de?
3. Nyo Yehova dieng’ de ka wabesendara mananu, man pirang’o?
3 Yehova dieng’ lee mandha pi lembe ma jubetimo i kumwa. “Yehova umaru lembe m’atira.” (Zab. 37:28) Yesu ubetielo cwinywa nia Yehova ‘biketho lembe uwoth atira . . . pio pio’ tek saane biromo. (Luka 18:7, 8) Ceng’ini eni, ebidaru lembe ceke m’unyayu peko i kumwa man ebikabu kwond masendi ceke.—Zab. 72:1, 2.
4. Kony ma kani ma Yehova miyo iwa tin eni?
4 Kinde ma wabekuro nindo ma lembe m’atira biromo i iye ng’om, Yehova konyowa kara wacir masendi ma jubesendo kowa mananu. (2 Pet. 3:13) Ku lapor, eponjowa ku kite ma waur ko nitimo lembe m’umbe rieko ka jubesendowa mananu. Nikadhu kud i bang’ Wode, Yehova umiyo iwa lapor ma ber mandha ma romo konyowa niciro masendi. Man emiyo iwa juk ma beco ma waromo tiyo ko ka jubesendowa mananu.
BED KU WENG’I I KUM TIMO PERI KA JUBESENDI MANANU
5. Pirang’o ukwayu wabed ku wang’wa i kum timo mwa ka jubesendowa mananu?
5 Masendi ma jubesendo kowa mananu copo timowa rac man copo ng’abu cwinywa. (Ekl. 7:7) Jutic pa Mungu ma gigwoko bedoleng’ migi, calu ve Yob man Habakuk, de giwinjiri kumeno. (Yob 6:2, 3; Hab. 1:1-3) Kadok nwang’u niwinjiri kumeno tie lembe ma kakare de, re ukwayu wabed ku wang’wa i kum timo mwa, wamaru timo lembe ku ming’o.
6. Lapor pa Absalom ubemiyo iwa ponji ma kani? (Nen bende cal.)
6 Ka jubesendowa mananu, wacopo pimo nidaru lembene wan giwa i ayi ma cuu ngo. Ento nitimo lembe i ayi maeno, copo nyotho lembe dong’ magwei. Wakewecu iwi lapor pa Absalom ma wod Ubimo Daudi. Ng’eicwiny umake saa ma Amnon m’umin ma pa won umaku Thamar ma nyamin. Nimakere ku Cik pa Musa, Amnon uromo ku tho pi gin m’etimo. (Law. 20:17) Kadok nwang’u ng’eicwiny pa Absalom ubino lembe ma kakare de, re ebino mbe ku twero mi maku lembene i cinge gire.—2 Sam. 13:20-23, 28, 29.
Ng’eicwiny umaku Absalom pi lembe ma jutimo i kum nyamin ma Thamar (Nen udukuwec mir 6)
7. Masendi ubedo ku matoke ma kani pi kare moko iwi jagor Zaburi?
7 Kan ubenen nia ju m’utimo lembe m’atira ngo gibenwang’u ngo matira, wacopo penjara ka nyo andha pire tie tek nitimo lembe ma pwe. Wakewecu iwi lapor pa jagor Zaburi m’uneno nia lembe mi jutimrac ubewotho miero ma ke gibesendo ko weg bedopwe. Eyero kumae: “Jutimrac gitie kumeno, gin ma saa ceke lembe migi tie miero.” (Zab. 73:12) Masendi m’ebeneno unyotho bende wiye, uketho cwinye uyenyo ai i kum bero mi timo ni Yehova, ewacu kumae: “Kinde m’aii ninyang’ i iye, lembene unyotho wiya.” (Zab. 73:14, 16) Emedo kumae: “Ento an, tienda yenyo weko yo; tienda yenyo kier.” (Zab. 73:2) Lembe ma rom eno utimo umego moko ma nyinge Alberto.
8. Masendi ubedo ku matoke ma kani iwi umego moko?
8 Jugam jucwayu ndra iwi umego Alberto nia ekwalu sente mi cokiri. Eno uketho ebayu rwom pare man ju ma dupa m’i cokiri de gicaku wore ngo kinde ma giwinjo lembene. Eyero kumae: “Cwinya nyothere, ng’eicwiny umaka man can umondo i iya.” Eweko lembuno unyotho winjiri pare ku Yehova man egam ekwiyo kadok i thenge mi tipo pi oro abic. Lembe m’umego eno ukadhu kud i iye ubenyutho gin ma romo timere tekene cwinywa unyothere pi masendi ma jubenyayu i kumwa.
CIR MASENDI CALU YESU
9. Yesu uciro masendi ma kani? (Nen bende cal.)
9 Yesu uweko lapor ma ber mandha iwi kite mi ciro masendi. Wakewecu iwi masendi m’ekadhu kud i iye i kind juruot pagi man bende i bang’ ju ma woko. Wedi pare ma gi juyic ungo giwacu nia wiye nyothere, judong dini ke giwacu nia ebetimo ku pajogi, man juaskari mi Roma lundo gicaye, gifwode man tokcenne ginege. (Mark. 3:21; 14:50, 55; 15:16-20, 35-37) Re Yesu uciro masendi maeno ceke man mange de m’umbe niculo kwor. Lapor pare copo miyo iwa ponji ma kani?
Yesu uweko lapor ma ber mandha iwi ayi ma waromo ciro ko masendi (Nen udukuwec mir 9-10)
10. Yesu uciro masendi nenedi? (1 Pethro 2:21-23)
10 Som 1 Pethro 2:21-23. a Yesu uweko iwa lapor ma ber mandha ma wacopo lubo ka wabenwang’ara ku masendi. Eng’eyo saa m’ukwayu ebed i iye ling’ man saa m’ukwayu ewec i iye. (Mat. 26:62-64) Edwoko ngo wang’ lembe ma rac ceke ma jubeyero pire. (Mat. 11:19) Saa m’ebeweco, ecayu ngo ju m’ubenyayu ragedo i kume kadi ecimogi de ngo. Yesu unyutho kweriri gijo, pilembe “eweko lembe ceke i cing’ Ng’atu ma poko lembe pwe.” Yesu ung’eyo nia ayi ma Yehova neno ko lembe re m’utie gin ma pire tek lee. Ebino ku genogen nia Yehova bidaru masendi i saa m’ukwayere.
11. (a) Wacopo luro i wec mwa i ayi ma kanigi? (Nen bende cal.)
11 Wacopo lubo lapor pa Yesu nwang’u wabeluro cuu i lembe ma wabeyero kinde ma jubesendowa mananu. Masendi moko tie ma ng’ili ng’ili, man wacopo kadhu kud i wigi yot yot. Kunoke waromo bedo ling’ kara kud wayer lembe ma romo nyotho lembe dong’ magwei. (Ekl. 3:7; Yak. 1:19, 20) Saa mange ke kwayu waweci ka waneno nia jubetimo lembe i ayi m’atira ngo, kunoke kan ubekwayu wacer ba lemandha. (Tic. 6:1, 2) Tek ukwayu waweci, wacikara ni ii ku kero mwa zoo ma wawec ko ma kumwa ukwiyo man ku woro.—1 Pet. 3:15. b
Saa ma ka jubesendowa mananu, wacopo lubo lapor pa Yesu nwang’u wabeng’iyo cuu mandha saa man ayi m’ukwayu waweci ko (Nen udukuwec mir 11-12)
12. Wacopo wekara nenedi i cing’ “Ng’atu ma poko lembe pwe”?
12 Waromo lubo bende lapor pa Yesu nwang’u wabewekara zoo i cing’ “Ng’atu ma poko lembe pwe.” Ka jumange gibepoko lembe rac i wiwa kunoke gibesendowa, wabedo ku genogen nia Yehova re m’ung’eyo lemandha. Genogen maeno konyowa niciro ka jubesendowa mananu pilembe wang’eyo nia tokcenne Yehova biyiko lembe i saane. Ka wabeweko lembene i cing’ Yehova, wabibedo ngo ku ng’eicwiny man akece i kum dhanu. Ng’eicwiny kud akece copo ketho wacorara swa, ecopo kabu anyong’a mwa, man ecopo nyotho bende winjiri mwa ku Yehova.—Zab. 37:8.
13. Ang’o ma copo konyowa niciro masendi?
13 I andha re, eromo copere ngo iwa nilubo lapor pa Yesu kubang’e kubang’e. Saa moko, waromo timo kunoke wayero lembe ma i ng’eye kelo ang’eyang’o i iwa. (Yak. 3:2) Man masendi moko ciro copo bedo tek, kum eromo weko poyo i adundewa man i kumwa. Tek eno tie lembe m’ibenweng’iri ko, ng’ey nia Yehova ung’eyo lembe m’ibekadhu kud i iye. Man Yesu, ma jugam jusendo mananu, copo nyang’ ma ber i kite m’iwinjiri ko. (Ebr. 4:15, 16) M’umedo lapor ma ber mandha pa Yesu, Yehova umiyo iwa bende juk ma beco ma romo konyowa ka jubesendowa mananu. Dong’ wakenenu giragora moko ario mi buku mi Jurumi ma copo konyowa.
“WUWEK KAKA NI KWINYO”
14. Waromo ‘weko kaka ni kwinyo’ nenedi? (Jurumi 12:19)
14 Som Jurumi 12:19. Kinde ma jakwenda Paulo ukwayu Jukristu nia ‘giwek kaka ni kwinyo,’ ebino weco pi kwinyo pa ng’a? Nimakere ku verse m’i wang’e ku m’ulubo, ebino weco pi kwinyo pa Yehova. Waweko kaka ni kwinyo pa Yehova nwang’u waweko en re m’eketh lembe m’atira utimere i saa pare man i ayi pare. I ng’ey ma jusendo umego moko ma nyinge John ma ke ekoso ngo, eyero kumae: “Ugam ukwayu aii i kum mito mi tiro lembe ma rac i ayi para. Jurumi 12:19 ukonya kara akur Yehova.”
15. Pirang’o etie ber nia wakur Yehova re m’udar masendi? Kemii lapor.
15 Wanwang’u bero ka wabekuro Yehova re m’uyik lembe. Tek watimo kumeno, wabiuro adieng’acwiny man ng’eicwiny ma waromo bedo ko ka watemo niyiko lembene wan giwa. Yehova ubemito ekonywa. Udog ubedo ve ebeyero kumae: “Wek lembene i cinga; abidaru masendine.” Tek wayiyo lembang’ola pa Yehova ma nia ‘ebiculo kwor en,’ waromo weko lembene ma cwinywa tek nia ebidaru masendine i ayi ma ber m’usagu. Eno re ma gin m’ukonyo John ma waweco pire i wang’e. Eyero kumae: “Kan akuro Yehova, ebidaru lembene i ayi ma ber mandha nisagu ma nwang’u aromo timo.”
“MEDIRI NIVOYO LEMBE MA RAC KU GIN MA BER”
16-17. (a) Rwo romo konyowa nenedi kara wamedara “nivoyo lembe ma rac ku gin ma ber”? (Jurumi 12:21) (b) Inwang’u ponji ma kani i video m’unyutho gin ma waromo timo ka jubesendowa mananu? (Nen korolembe mi there.)
16 Som Jurumi 12:21. Paulo bende ukwayu Jukristu nia ‘gimediri nivoyo lembe ma rac ku gin ma ber.’ Yesu uyero kumae i ponji pare ma wi got: “Wumeduru nimaru judegi mwu man wurwo pi ju m’ubenyayu ragedo i kumwu.” (Mat. 5:44) Eno tie tap gin ma en de etimo. Saa moko nyo wadaru paru lembe iwi can ma Yesu uneno kinde ma juaskari mi Roma ugure iwi yen. Wacopo paru apara kende pi litho, cac man masendi m’eciro.
17 Ento Yesu uweko ngo masendi ma jusende ko mananu uvoye. Kakare nilamu juaskarine, erwo kumae: “Vwa, tim igi kisa, kum ging’eyo ngo gin ma gibetimo.” (Luka 23:34) Kinde ma waberwo pi ju m’ubesendowa, eno romo jwigo paru mir akece man ng’eicwiny kud i iwa. Eromo wilo kadok ayi ma waneno ko ju m’ubetimowa rac.
18. Rwo ukonyo Alberto giku John nenedi kara gicir masendi ma jusendo kogi mananu?
18 Rwo ukonyo umego ario ma waweco pigi i wang’e niciro masendi ma jusendo kogi mananu. Alberto uyero kumae: “Arwo pir umego m’usenda mananu. Akwayu Yehova wang’ dupa nia ekonya kara wiya wil pi masendine.” Lembe ma ber utie nia, Alberto ubetimo kendo ni Yehova ku gwoko bedoleng’. John ke uwacu kumae: “Arwo wang’ dupa pir umego m’utima rac. Rwone ukonya ninene i ayi ma ber, m’umbe nipoko lembe i wiye. Rwone umiyo ira bende kwiyocwiny mir adunde.”
19. Wacikara nitimo ang’o nitundo i ajiki mi ng’om maeni? (1 Pethro 3:8, 9)
19 Waromo yero ngo nia wabinwang’ara ku masendi ma kani i wang’ m’ajiki mi ng’om maeni utundi. Kadok wabinwang’ara ku lembang’o de, kud wawek nikwayu kony i bang’ Yehova. Bende wakwenyu ba lembe ma Yesu timo kinde m’enwang’ere ku masendi man wamedara nitiyo ku juk mi Biblia. Tek watimo kumeno, cwinywa ubed tek nia Yehova bimiyo iwa mugisa.—Som 1 Pethro 3:8, 9.
WER 38 Yehova bidwoki tek
a I barua ma kwong’a pa Pethro, i thekne mir 2 kud 3, ekoro lembe ma Jukristu dupa mi rundi ma kwong’a ginwang’iri i iye, ma judongo ma kwiny man weg udi ma gi juyic ungo gisendo kogi mananu.—1 Pet. 2:18-20; 3:1-6, 8, 9.
b Nen i jw.org video ma thiwiye tie Mer ketho wanwang’u kwiyocwiny mandha.
