1-2. “Tic ma ber” pa jadit cokiri uketho i iye ang’o?

 TEK idaru timo pi kare moko calu jakony tic, nen idaru pong’o lembe moko m’ukwayere pi nidoko jadit cokiri. Nyo icopo yenyo ngo “tic ma ber” maeno?—1 Tim. 3:1.

² Tic pa jadit cokiri uketho i iye ang’o? Ebedo ma kwong’a i lembanyong’a, etimo tic ma tek pi nitelo wi rombe man pi niponjo ponji, man etielo cokiri ku wec man lapor pare. Pi thelembe maeno re ma Biblia lwong’o judong cokiri m’utimo tic ma tek nia “giramiya ma dhanu.”—Efe. 4:8.

3. Umego romo timo ang’o kara edok jadit cokiri? (1 Timoteo 3:1-7; Tito 1:5-9)

³ Iromo timo ang’o kara idok jadit cokiri? Nipong’o lembe m’ukwayere pi nidoko jadit cokiri ukoc ku lembe m’ukwayere pi tic mi kum. Wang’ ma pol i tic mi kum tek itie ku bodho ma jadit tic utie ku yenyne, eno copo ketho inwang’u tic. Ento tek imito idok jadit cokiri, nirweyo lembanyong’a man nibedo ku bodho mi ponji kende uromo ngo. Ukwayu ipong’ lembe ma Biblia ukwayu pi judong cokiri, ma jukwanu i 1 Timoteo 3:1-7 man i Tito 1:5-9. (Som.) I thiwiwec maeni, wabiweco iwi lembe adek ma dongo dongo m’ukwayere i bang’ jadit cokiri: pire ung’eyere ma ber i cokiri man woko bende, ebed ni lapor ma ber i ayi m’etelo ko wi juode, man ebed ayika nitimo ni cokiri.

 PIRI UNG’EYERE MA BER

4. “Nibedo ng’atu m’adote mbe i wiye,” thelembene tie ang’o?

⁴ Pi nidoko jadit cokiri, icikiri “nibedo ng’atu m’adote mbe i wiye,” niwacu piri ung’eyere ma ber i cokiri, pilembe juromo weco ngo rac i kum timo peri. M’umedo maeno, icikiri “nibedo ng’atu ma dhanu ma woko de giyero pire ber.” Dhanu ma juyic ungo giromo cayu yiyoyic peri, ento ukwayu ngo gibed ku thelembe mandha mi bedo ku jiji nia itie dhanu m’atira man ma kura pare cuu. (Dan. 6:4, 5) Dong’ kepenjiri kumae: ‘Nyo pira ung’eyere ma ber i cokiri man woko bende?’

5. Icopo nyutho nenedi nia itie “ng’atu m’umaru gin ma ber”?

⁵ Tek itie “ng’atu m’umaru gin ma ber,” ibiketho wii i kum lembe ma beco ma jumange gitimo man ibifoyogi pi kite migi ma beco. Ibitimo bende bero ni jumange kud anyong’a, man ibitimo kadok nisagu gin m’ukwayere. (1 Thes. 2:8) Pirang’o kite maeno pire tek lee ni judong cokiri? Pilembe gitiyo ku saa migi ma pire tek pi nitelo wi cokiri man pi nitimo tic ma jumiyo igi. (1 Pet. 5:1-3) Kadok kumeno de, anyong’a ma junwang’u ka jubetimo ni jumange ukadhu bor dit lembe ma gitwoniri ko.—Tic. 20:35.

6. Ng’atini romo nyutho nenedi nia etie “jajol”? (Juebrania 13:2, 16; nen bende cal.)

⁶ Iromo nyutho nia itie “jajol” nwang’u ibetimo bero ni dhanu mange, uketho i iye ni ju m’utie ngo jurimbi ma ceng’ini. (1 Pet. 4:9) Girasoma moko ukoro pi ng’atu ma jajol kumae: “Dhugola ot pare man dhugola mir adundene ucikere nibedo ayaba ni welo.” Dong’ kepenjiri kumae: ‘Nyo dhanu ung’eyo de nia abed ajolo welo?’ (Som Juebrania 13:2, 16.) Ng’atu ma jajol miyo piny m’etie ko ni welo, uketho i iye ni jucan, jukorlembe ma welo man jumange ma gitimo tic ma tek pi nitielo cwiny umego ku nyimego, calu ve juliew mi twodiri.—Tha. 18:2-8; Rie. 3:27; Luka 14:13, 14; Tic. 16:15; Rum. 12:13.

7. Jadit cokiri romo nyutho nenedi nia etie “jamar sente ngo”?

⁷ “Jamar sente ngo.” Eno nyutho nia iketho ngo wii kwa i kum piny mi kum.  Kadok i jalonyo kunoke i jacan, iketho yeny mi Ker pa Mungu i kabedo ma kwong’a i lembe ceke mi kwo peri. (Mat. 6:33) Itiyo ku saa peri, kero peri man piny mange m’itie ko pi niworo Yehova, pi nigwoko juruot peri man pi nitimo ni cokiri. (Mat. 6:24; 1 Yoh. 2:15-17) Dong’ kepenjiri kumae: ‘Sente pire tek i iya rukani? Nyo piny m’atie ko beromo wang’a de? Kunoke nyo abed aketho wiya zoo i kum sayu sente man sayu jamcing’ lee?’—1 Tim. 6:6, 17-19.

8. Iromo nyutho nenedi nia itie dhanu ma “kadhu ngo mukero i kwo pare” man “ma kwerere gire”?

⁸ Icopo nyutho nia itie “ng’atu ma kadhu ngo mukero i kwo pare” man “ma kwerere gire,” nwang’u iketho rom rom i lembe ceke mi kwo peri. Eno uketho i iye nikadhu ngo mukero i camu, meth, kendi, ruko man nambu. Itie ngo ng’eca mi lubo kit kwo mi ng’om maeni. (Luka 21:34; Yak. 4:4) Ikwiyo kumi kadok jubeseyi de. Itie ng’atu “ma mer ungo ku kong’o” ; kadi jung’eyi de ngo nia itie umath. Dong’ kepenjiri kumae: ‘Nyo ayi m’akwo ko ubenyutho nia akadhu ngo mukero i kwo para man akwerara gira?’

9. Nibedo ng’atu “ma wiye tiyo ma ber” man “ma pangu lembe kakare kakare” uketho i iye lembang’o?

⁹ Tek itie ng’atu “ma wiye tiyo ma ber,”  eno nyutho nia iparu cuu lembe ma Biblia uyero i lembe ma tung’ tung’ mi kwo. Ibed iparu cuu mandha kite m’iromo tiyo ko ku juk mi Biblia i lembe moko, man eno miyo iri rieko mi nyang’ i lembe pi nimaku yub ma beco. Imaku ngo yub vur vur, ento ineno cuu nia ing’eyo lembe ceke ma pigi tek. (Rie. 18:13)Eno ketho imaku yub mi rieko m’urombo ku paru pa Yehova. Tek itie ng’atu “ma pangu lembe kakare kakare,” nyutho nia icoko dhu lembe cuu man iworo saa. Jung’eyi nia itie dhanu ma jugeno man ma lubo telowic. Kite ma tung’ tung’ ma waponjo pigi i nyathi thiwiwec maeni bikonyi kara piri ung’eyere ma ber. Kawoni dong’ wakewecu iwi lembe ma Biblia ubekwayu nia judong cokiri gipong’ kara gibed juwiot ma ber.

BED JAWIOT MA BER

10. Nico “bimo wi juode i ayi ma ber” nenedi?

¹⁰ Tek itie won ot man imito ipong’ lembe m’ukwayere pi nidoko jadit cokiri, ukwayu juruot peri bende pigi ung’eyere ma ber. Pieno ukwayu ibed “ng’atu ma bimo wi juode i ayi ma ber.” Ukwayu jung’ey nia itie jawiot ma jamer man ma maku yub ma beco pi juruot pare. Eno uketho i iye nibedo ma kwong’a i lembe ceke m’uneno thier mwa. Pirang’o lembuno pire tie tek lee? Jakwenda Paulo upenjo kumae: “Ka ng’atu moko ung’eyo ngo nibimo wi juode gire, ebilund gwoko cokiri pa Mungu nenedi?”—1 Tim. 3:5.

11-12. Kura pa nyathin copo bedo ku matoke ma kani iwi rwom pa won? (Nen bende cal.)

¹¹ Tek i itie wego, icikiri niketho awiya peri ma gin’i the oro 18, ‘giwori m’umbe lele.’ Icikiri niponjogi man nitirogi ku mer. Re gibimaru ging’ier, gituki calu awiya mange ceke. Ento nikum ponji peri ma cuu, gibibedo wor iri, gibiworo jumange, man gibibedo ku kura ma ber. Bende icikiri ni ii ku kero peri ceke pi nikonyo awiya peri gibed ku winjiri ma ceng’ini ku Yehova, gikwo nimakere ku cik mir ukungu mi Biblia, man gitim mediri nitundo gilim batizo.

¹² “Ng’atu ma tie kud awiya ma gi juyic, man ma judotogi ngo nia kura migi rac kadi ya gi jujai.” Tek nyathin ma jayic ma kwo yo pagi utimo dubo moko ma pek,  lembene copo bedo ku matoke ma kani iwi won? Tek won uponje man utwinye ngo cuu, e juromo nwang’u nia epong’o ngo lembe m’ukwayere pi nibedo jadit cokiri.—Nen Otkur ma Wiw mi nindo 15, dwi mir 10, 1996 mba. 21, udu. 6-7.

NITIMO NI COKIRI

13. Iromo nyutho nenedi nia itie ng’atu “ma i lembe pare tek ungo” man “ma winjo jumange”?

¹³ Umego ma gitie ku kite ma tung’ tung’ mi Jukristu, gitie kony ma lee ni cokiri. Ng’atu “ma i lembe pare tek ungo” ketho kwiyocwiny bedo i kindjo. Tek imito jung’eyi ni ng’atu ma i lembe pare tek ungo, bed iwinj jumange man bed inyang’ i paru migi. Nyo i coko icopo becwaku ngo paru mi ju ma pol tek eturo ngo cik mir ukungu mi Biblia? Nibedo “ng’atu ma winjo jumange,” nyutho nia irido ngo nia jutim lembe i ayi peri. (Tha. 13:8, 9; Rie. 15:22) Itie “jarop ungo” kunoke ng’atu “ma ng’eicwiny make swa swa” ngo. Kakare nibedo ng’atu ma kwiny man ma winjere ngo ku dhanu, itie dhanu ma yoo man ma ber. Calu ng’atu ma won kwiyocwiny, imaku yub mi ketho kwiyocwiny, kadok lembe udoko kwiny de. (Yak. 3:17, 18) Wec peri ma ber romo kwiyo kum dhanu mange, uketho i iye kadok jujai.—Pok. 8:1-3; Rie. 20:3; 25:15; Mat. 5:23, 24.

14. Nibedo “jayic ma nyen” ungo man ng’atu “m’ubegwoko bedoleng’ pare ni Mungu” thelembene tie ang’o?

¹⁴ Umego m’upong’o lembe m’ukwayere pi nidoko jadit cokiri “kud ebed jayic ma nyen.” Kadok nwang’u ukwayu ngo nia ibed ng’atu m’ulimo batizo oro dupa de, re ubekwayu nindo ukeukadhi pi nidoko Jakristu m’uteng’ini. I wang’ ma jukethi ni jadit cokiri, icikiri ninyutho calu Yesu nia itie dhanu ma mol man m’utie ayika nikuro Yehova umii ire tic moko ci. (Mat. 20:23; Filip. 2:5-8) Inyutho nia itie ng’atu “m’ubegwoko bedoleng’ pare ni Mungu” nwang’u ibemoko kii i kum Yehova, i kum cik pare ma pwe man nwang’u ibelubo telowic m’ebemiyo nikadhu kud i dilo pare.—1 Tim. 4:15.

15. Nyo jadit cokiri ucikere nibedo jabodho magwei i ponji? Kekor.

 ¹⁵ Lembagora unyutho kamaleng’ nia jadit cokiri ucikere nibedo “jabodho mi ponji.” Nyo eno unyutho nia icikiri nibedo jakorolembe ma jabodho magwei? Ungo. Judong cokiri ma dupa ma giromo, ma re gitie ngo juponji ma jubodho magwei, giponjo cuu i lembanyong’a man i tic mi kwac. (nen bende 1 Jukorintho 12:28, 29 man Juefeso 4:11.) Kadok kumeno de, re icikiri ni ii ma tek pi nimedo bodho peri mi ponji. Icopo doko japonjo ma cuu nenedi?

16. Icopo doko japonjo ma cuu nenedi? (Nen bende cal.)

¹⁶ “M’umoko kikiki i kum lemandha.” Pi nibedo jabodho i ponji, bed iketh ponji peri man juk ma segi m’ibed imiyo ujengere iwi Lembe pa Mungu. Bed iponj Biblia man girasoma mwa cuu mandha. (Rie. 15:28; 16:23) Kinde m’ibeponjo, nen cuu ayi m’iromo tiyo ko ma ber ku Lembangorane. Man saa m’ibeponjo ponji, ii ma tek nimulo adunde dhanu m’ubewinji. Iromo medo bodho peri mi ponji tek ibed ipenjo paru i bang’ judong cokiri ma gitie ku bodho man itiyo ku paru migine. (1 Tim. 5:17) Ukwayu judong cokiri gibed ‘ku copo mi tielocwiny’ umego ku nyimego migi; ento saa moko judong cokiri gicikiri nimiyo juk kunoke nitwinyogi bende. Saa ma gibetimo lembuno zoo, ukwayu ginyuth bero. Tek itie dhanu ma ber, ma jamer man ma jengo ponji pare iwi Lembe pa Mungu, ibidoko japonjo ma jabodho, pilembe nwang’u ibelubo lapor pa Japonjo ma Dit, niwacu Yesu.—Mat. 11:28-30; 2 Tim. 2:24.

MEDIRI NIYENYO

17. (a) Ang’o ma romo konyo jakony tic pi nimedere niyenyo rwom? (b) Judong cokiri gicikiri nigwoko lembang’o i wigi kinde ma ging’iyo ka nyo umego moko uromo nidoko jadit cokiri? (Nen sanduku ma thiwiye tie “ wubed mol saa ma wubeng’iyo ka nyo jumange giromo nwang’u rwom.”)

¹⁷ I ng’ey ma waponjo lembe m’ubekwayere  pi nidoko judong cokiri, jukony tic moko giromo nwang’u nia gicopo doko ngo judong cokiri. Ento poy nia nik’ebed Yehova kadi dilo pare, gibekwayu ngo nia ipong’ lembe m’ukwayerene kubang’e kubang’e. (1 Pet. 2:21) Man utie nikum tego mi tipo pa Yehova re m’iromo pong’o lembe m’ukwayerenegi. (Filip. 2:13) Nyo kite moko unuti de m’inwang’u nia kwayu imediri nicego? Kway Yehova pi lembene. Tim sayusac iwi lembene man kway kony i bang’ jadit cokiri moko iwi kite m’iromo timo ko alokaloka.

18. Lembang’o ma jubekwayu nia jukony tic ceke gitimi?

¹⁸ Dong’ wan ceke, uketho i iye ju ma dong’ gitimo calu judong cokiri, wamedura nicego kite ma tung’ tung’ ma waweco pigi i thiwiwec maeni. (Filip. 3:16) Nyo itie jakony tic? Yeny rwom! Kway Yehova uponji man ebinyi kara itim ire lee man bende itim ni cokiri. (Isa. 64:8) Dong’ Yehova umii mugisa lee iwi kero m’ibetimo pi nipong’o lembe m’ukwayere pi nidoko jadit cokiri.