1. Jakwenda Paulo ubed uneno jukony tic nenedi?

 JUKONY tic gitimo tic ma pire tek lee i cokiri. Jakwenda Paulo ubed uneno jumaco maeno ma gigwoko bedoleng’ migi ni dhanu ma pigi tek. Ku lapor, saa m’ekiewo barua ni Jukristu mi Filipi, emotho jukony tic ku judong cokiri athothi.—Filip. 1:1.

2. Umego Luis uwinjere nenedi pi rwom mi timo calu jakony tic?

² Umego ma dupa m’ulimo batizo ginwang’u anyong’a lee i tic mi bedo jukony tic, dok gibed aradu kadi judongo. Ku lapor, Devan ubino ku oro 18 saa ma jukethe edoko jakony tic. Umego moko ma nyinge Luis lundo udoko jakony tic kinde m’ebino ku oro 50. Lembe m’eyero utie kite ma ju ma dupa giwinjiri ko: “Anwang’u nia etie rwom ma lee nitimo calu jakony tic, asagane kan aparu pi mer ceke ma cokiri unyutho ira!”

3. Wabidwoko wang’ penji ma kani?

³ Tek itie umego m’ulimo batizo man fodi itie ngo jakony tic, nyo icopo ketho ngo ebed ni lembakeca peri? Ang’o ma romo cweli nitimo kumeno? Man Lembagora ukwayu ipong’ lembang’o pi niromo pi tije? I thiwiwec maeni, wabidwoko wang’ penji maeno. Re pi nicaku, wakenenu nia tic pa jakony tic utie ang’o.

JAKONY TIC TIMO TIC MA KANI?

4. Jakony tic timo tic ma kani? (Nen bende cal.)

⁴ Jakony tic utie umego m’ulimo batizo ma tipo ma leng’ re m’uketho pi nikonyo judong cokiri ku timo lembe dupa ma pigi tek i cokiri. Jukony tic moko gipoko therithwar man girasoma ni jurwey pi tic mi lembanyong’a. Jumange ke gikonyo i tic mi ketho leng’o man mi gwoko Ot Ker. Jukony tic gijolo bende dhanu i coko man gitimo ku  jamtic mi koko dwal ku video i saa mi coko. Tic ma pol ma jukony tic timo tie ku kony lee. Ento ku kwong’a jukony tic utie dhanu m’umaru Yehova man m’ubekwo nimakere ku cik pare ma pwe. Gimaru bende umego ku nyimego migi ma Jukristu lee mandha. (Mat. 22:37-39) Umego m’ulimo batizo copo nyutho nenedi nia ebeyenyo edok jakony tic?

5. Umego copo nyutho nenedi nia ebeyenyo edok jakony tic?

⁵ Biblia ukoro lembe m’ukwayere i bang’ umego ma juromo ketho udok jukony tic. (1 Tim. 3:8-10, 12, 13) Icopo nyutho nia ibeyenyo rwom maeno nwang’u ibeponjo gin ma Lembagora ukwayu, man nwang’u ibeii nipong’ogi. Re ukwayu ikerlar ipenjiri cuu nia ang’o dhe m’ubecweli nidoko jakony tic.

PIRANG’O IBEMITO IDOK JAKONY TIC?

6. Ang’o m’ucikere nicweli nitimo tic moko ci pir umego ku nyimego peri? (Matayo 20:28; nen bende cal m’i ng’eye.)

⁶ Wakepar pi Yesu ma tie lapor mwa ma dit. Ebed etimo lembe ceke nikum mer m’emaru ko Won man m’emaru ko dhanu. Merne ucwale nitimo tic ma tek man nitimo ni jumange kadok tic ma dhanu becayu de. (Som Matayo 20:28; Yoh. 13:5, 14, 15) Tek mer re m’ubecweli, Yehova bimiyo iri mugisa man ebikonyi kara itund i kum lembakeca peri mi doko jakony tic.—1 Kor. 16:14; 1 Pet. 5:5.

7. Pirang’o etie rac nisayu nidoko jakony tic kara jumange upakwa?

⁷ I ng’om, jubed juyungo dhanu ma gikethiri nia gin re ma pigi tek. Ento dhanu pa Yehova gitie kumeno ngo. Umego ma mer re m’ubecwalu calu Yesu, sayu ngo dito ku kero kadi ekethere ngo nia en re ma pire tek. Tekene jumiyo rwom ni ng’atu ma kethere nia en re ma pire tek, eromo kwero nitimo tic ma dhanu cayu ma re ubekwayere pi nigwoko rombe ma pigi tek pa Yehova. Eromo paru nia tic ma kumeno uromo ngo kude. (Yoh. 10:12) Yehova bipoko ngo mugisa iwi kero pa ng’atu moko ci m’uweko kuhaya re m’utel wiye kunoke m’ubekethere nia pire tek.—1 Kor. 10:24, 33; 13:4, 5.

8. Juk ma kani ma Yesu umiyo ni jukwenda pare?

⁸ Saa moko, kadok jurimb Yesu ma  ceng’ini de gisayu ninwang’u rwom ku thelembe ma cuu ngo. Wakenenu lembe ma Yakobo giku Yohana ma gi jukwenda pa Yesu gitimo. Gikwayu Yesu nia emii igi kabedo ma segi i Ker pare. Yesu ufoyogi ngo pi paru migine. Ento ekoro ni jukwenda 12 zoo kumae: “Ng’atu m’umito ebed dit i kindwu, ecikere nibedo jatic mwu, man ng’atu m’umito ebed ma kwong’a i kindwu ecikere nibedo ng’eca mi jumange ceke.” (Mark. 10:35-37, 43, 44) Umego m’ubeyenyo ninwang’u rwom ku thelembe ma cuu, niwacu pi nitimo ni jumange, gibibedo ni mugisa ni cokiri.—1 Thes. 2:8.

ANG’O MA ROMO KONYI KARA IBED KUD AVA MI TIMO NI UMEGO PERI?

9. Icopo timo ang’o kara ibed kud ava mi timo ni umego peri?

⁹ Ma jiji mbe, imaru Yehova man imito itim ni jumange. Kadok kumeno de, saa moko iromo bedo mbe kud ava mi timo tic m’ukwayu jakony tic utim. Ang’o ma romo konyi kara ibed kud ava mi timo tic maeno? Par pir anyong’a m’ibinwang’u kan ibetimo ni umego ku nyimego peri. Yesu uyero kumae: “Nimiyo nyayu anyong’a lee ma sagu nigamu agama.” (Tic. 20:35) Yesu uyero ngo lembuno ayera kende, ento etime bende. Enwang’u anyong’a mandha mi timo ni jumange, man in de iromo nwang’u anyong’ane.

10. Yesu unyutho nenedi nia etie kud anyong’a nitimo ni jumange? (Marko 6:31-34)

¹⁰ Wakenenu lapor m’unyutho nia Yesu ubino kud anyong’a nitimo ni jumange. (Som Marko 6:31-34.) Nindo moko, Yesu ku jukwenda pare gigam giol. Gibino cidho kaka moko ma ling’ ma giromo keyom i iye nyanok. Ento udul dhanu ular ukadhu i wang’gi kuca ma gitie ku genogen nia Yesu biwok ponjogi. Nwang’u eromo kwero de, pilembe en ku jukwenda pare “gibedo mbe ku saa kadok mi camu cam.” Kunoke nwang’u Yesu romo lalu dhanu nia gidoki i ng’ey m’enyutho igi lemandha acel kadi ke ario kende. Ento calu ma mer re m’ubino cwale, “ecaku ponjogi ku lembe dupa.” Man emedere niponjogi nitundo “ma saa nyang’.” (Mark. 6:35) Etimo ngo lembuno pilembe nia etie cik, ento pilembe “kisa unege i kumgi.” Emito eponjgi pilembe emarugi. Timo ni jumange ubed unyayu anyong’a ma lee i Yesu.

11. Yesu ukonyo jumange nenedi? (Nen bende cal.)

¹¹ Kinde ma Yesu ubino rweyo ni udul dhanu, eponjogi ngo aponja kende. Epong’o bende yeny migi mi kum. Enyayu cam i ayi mir udu man eketho julub pare gipoke ni dhanu. (Mark. 6:41) I ayi maeno, eponjo julub pare ku kite ma gitim ko ni jumange. Enyutho igi bende nia kit tic maeno, ma tie tic ma wang’ ma pol jukony tic gitimo, utie tic ma pire tek. Kepar pir anyong’a m’unego jukwenda kinde ma gibepoko cam ma Yesu unyayu i ayi mir udu ni dhanu nitundo ma “gin ceke gicamu man giyeng’”! (Mark. 6:42) I andha, eno ubino ngo wang’ ma kwong’a ma Yesu uketho bero mi jumange i wang’ pare. Saa m’ebino iwi ng’om, etimo ni dhanu i kwo pare zoo. (Mat. 4:23; 8:16) Yesu ubino kud anyong’a lee niponjo jumange man nipong’o yeny migi. Ma jiji mbe, in de ibinwang’u anyong’a lee tek itie ayika nitimo ni jumange calu jakony tic.

12. Pirang’o ukwayu ngo ng’atu acel de m’i kindwa upar nia embe ku copo m’eromo tiyo ko pi nikonyo cokiri?

¹² Tek inwang’u nia imbe ku copo moko  ma segi, cwinyi kud utur. Ma jiji mbe, itie ku kite moko kokoro m’iromo tiyo ko pi nikonyo cokiri. Kepar i lembe ma Paulo ukiewo i 1 Jukorintho 12:12-30, man i ng’eye kway Yehova ukonyi kara inen nia lembene umulo kumi nenedi. Wec pa Paulo ubenyutho kamaleng’ nia calu jutic pa Yehova mange, in de itie ku tic ma pire tek i cokiri. Tek pi kawoni fodi ipong’o ngo lembe m’ukwayere pi nibedo jakony tic, cwinyi kud utur. Ento kakare ma nia cwinyi utur, tim gin m’icopo pi nitimo ni Yehova man pi nikonyo umego peri. Cwinyi bed tek nia judong cokiri bipoy piri man gibimiyo iri tic m’urombo ku copo peri.—Rum. 12:4-8.

13. Girang’o m’umito wang’ey i kum lembe m’ukwayere i bang’ umego m’utie ku rwom?

¹³ Wakenenu thelembe mange m’unyutho nia pire tie tek ya itim kero nidoko jakony tic: Lembe ma pol m’ukwayere i bang’ umego m’utie ku rwom utie lembe ma rom m’ukwayere i bang’ Jukristu ceke. Ku lapor, Jukristu ceke gicikiri nicoro ceng’ini i vut Yehova, nibedo kud anyong’a ma junwang’u ka jubemiyo piny ni jumange, man nikwo i ayi ma nyayu mutoro i Mungu. Dong’ ang’o dhe m’umego romo timo pi nidoko jakony tic?

GIN M’UKWAYERE PI NIDOKO JAKONY TIC

14. Nibedo “dhanu ma wayawaya ngo” thelembene tie ang’o? (1 Timoteo 3:8-10, 12)

¹⁴ Kawoni wakewecu iwi lembe moko m’ukwayere ma jukwanu i 1 Timoteo 3:8-10, 12. (Som.) Jakony tic ucikere nibedo “dhanu ma wayawaya ngo.” Jucopo loko bende wec maeno nia ng’atu “m’uromo ku woro,” “mir awora,” kunoke “m’uromo ku yung.” Eno ubenyutho ngo nia icopo ng’iero ngo nyanok de kunoke isembo ngo lembe. (Ekl. 3:1, 4) Ento icikiri ni ii nitimo lembe ceke ma jukwayu i beng’i cuu. Tek ibed idaru tic ma jumiyo iri man ibed itime ma ber, umego ku nyimego mi cokiri gibigeni man gibiwori.

15. Nibedo “dhanu ma dhoggi ario” ngo man “ma sayu ngo ku cwinygi ceke nibedo ku jukupiny i ayi m’atira ngo” thelembene ang’o?

¹⁵ “Kud gibed dhanu ma dhoggi ario.” Eno ubenyutho nia itie dhanu ma yero lemandha, itie dhanu m’atira man ma jugeno. Itimo lembe m’iyero man iwondo ngo dhanu. (Rie. 3:32) Nibedo dhanu “ma sayu ngo ku cwinygi ceke nibedo  ku jukupiny i ayi m’atira ngo” ubenyutho nia itie dhanu m’atira i lemkuloka man i lembe m’uneno sente. Itiyo ngo ku mer m’i kindwu ku Jukristu wedu pi nicamu sente migi.

16. (a) Nibedo ng’atu ‘ma madhu ngo kong’o akeca’ thelembene tie ang’o? (b) Nibedo “ku pidocwiny ma leng’” thelembene tie ang’o?

¹⁶ “Kadi ma madhu kong’o akeca,” niwacu imiyiri ngo i madhu kong’o nikadhu mukero man jung’eyi ngo nia itie umath. Nibedo “ku pidocwiny ma leng’” thelembene tie nikwo nimakere ku cik pa Yehova. Kadok itie ku dub’alaga de, re itie ku kwiyocwiny pilembe itie ku winjiri ma cuu ku Mungu.

17. Umego copo nyutho nenedi nia etie ng’atu ma jugeno saa ma ‘jubepime pi nineno ka nyo eromo’? (1 Timoteo 3:10; nen bende cal.)

¹⁷ “Jupimgi pi nineno ka nyo giromo.” Eno nyutho nia judong cokiri gidaru neno nia ibed itimo tic ma jumiyo iri cuu man nia gicopo geni. Pieno, ka judong cokiri gimiyo iri tic moko, lub cuu telowic migi man ma dilo umiyo. Nen nia inyang’ cuu i gin m’ukwayu itim man nia icikiri nidare awene. Tek ibetimo tic ma jumiyo iri akethacwinyi, umego ku nyimego gibineno man gibifoyo mediri ma ber m’ibetimo. Judong cokiri, wunen nia wuponjo umego m’ulimo batizo ku tic. (Som 1 Timoteo 3:10.) Nyo umego m’ulimo batizo utie de i cokiri mwu ma gitie ku oro ma niai 10 nicidho 14 kunoke ku oro ma piny? Nyo gitie lapor ma ber i lembe m’uneno ponji migi ma segi man yiko coko? Nyo gibed gidwoko jibu nja i coko man girweyo lembanyong’a kubang’ dwi? Tek eyo, wumii igi tic ma giromo timo nimakere ku oro migi. I ayi maeno re ma nwang’u ‘wubepimogi pi nineno ka nyo giromo.’ E saa ma gidoko ku oro ma niai 17 nitundo 19, gicopo pong’o lembe m’ukwayere pi nidoko jukony tic.

18. Nibedo ‘m’adote mbe i wii’ thelembene tie ang’o?

¹⁸ “Adote mbe i wigi.” Eno nyutho nia adote mi lembe moko ma rac m’itimo andha umbe i wii. I andha, jucopo kelo adote mi ndra iwi Jukristu. Yesu de jukelo adote mi ndra i wiye, man eyero nia julub pare bende jubikelo adote mi ndra i wigi. (Yoh. 15:20) Ento tek imediri nibedo ku kura ma cuu calu Yesu, piri bing’eyere ma ber i cokiri.—Mat. 11:19.

19. Nibedo “cwar dhaku acel” ucoko lembang’o?

 ¹⁹ “Cwar dhaku acel.” Tek igamu dhaku, icikiri nimoko i kum cik ma Yehova uketho niai i acaki pi gamiri, niwacu nico acel gamu dhaku acel. (Mat. 19:3-9) Nico ma Jakristu ucikere ngo nitimo lemsasa mi tarwang’ kadok nyanok de. (Ebr. 13:4) Eno ucoko lembe lee. Icikiri nimaru dhaku peri kende, man kud inyekini nyanok de i kum dhaku mange.—Yob 31:1.

20. Nico romo “bimo wi juode i ayi ma ber” nenedi?

²⁰ “Ebed ng’atu ma bimo wi juode i ayi ma ber.” Tek itie won ot, icikiri nineno rwom perine ni gin ma pire tek lee. Bed itel wi thier mi juruot kubang’ yenga. Bed irwey lembanyong’a ku ng’atuman mi ot peri wang’ ma pol i mukero ma copere iri. Kony awiya peri gibed ku winjiri ma ceng’ini ku Yehova. (Efe. 6:4) Nico ma dieng’ pi juruot pare nyutho nia ecopo gwoko bende cokiri.—Nen bende 1 Timoteo 3:5.

21. Tek fodi itie ngo jakony tic, icopo timo ang’o?

²¹ Umego, tek fodi itie ngo jakony tic, wakweyi isom cuu mandha thiwiwec maeni man irwo pi lembene. Ponj lembe m’ukwayere pi nidoko jakony tic man tim kero ipong’ lembene. Par pi mer m’imaru ko Yehova man umego ku nyimego peri. Med mer m’imaru kogi man par pir ayi m’iromo timo ko igi. (1 Pet. 4:8, 10) E ibinwang’u anyong’a lee kinde m’ibetimo ni umego ku nyimego peri. Dong’ Yehova upok mugisa lee mandha iwi kero m’ibetimo pi nidoko jakony tic!—Filip. 2:13.