Umego ma nyen umondo i Guriri m’utelowic
CENG’ kas’adek kugweno, nindo 24, mi dwi mi 1, 2018, juruot mi Bethel mir États-Unis, ku mi Canada, giwinjo atwong’a moko masegi: umego Kenneth Cook, Jr., udoko acel m’i kind umego mi Guriri m’utelowic mi Jumulembe pa Yehova.
Umego Cook unyolere man edongo i adhura mi Pennsylvanie, i États-Unis. Jarimbe moko mi somo re m’ugam uponje ku lemandha i wang’ ninwang’u diplom. Elimo batizo nindo 7, dwi mir 6, 1980. Edoko jayab yo ma nja nindo 1, dwi mir 9, 1982. Etimo tic maeno pi oro ario, e julwong’e i Bethel mi Wallkill, i New York, i nindo 12, dwi mir 10, 1984.
Pi oro 25 m’ulubo, umego Cook utimo tic ma tung’ tung’ kaka ma juwodho i ie girasoma, man etimo bende i biro mi Bethel. Egamu nyamego Jamie i oro 1996, man nyamego eno de ucaku timo i Bethel mi Wallkill. I dwi mir 12, 2009, juoro umego Cook giku min ot pare i Kabedo ma dit mi Somo mi Watchtower ma nwang’ere i Patterson, i New York. Kuca umego Cook ucaku timo i Departema ma dwoko wang’ penji ma jupenjo iwi Biblia man iwi girasoma mwa. I ng’ei m’umego Cook gidok gitimo nindo ma nok giku min ot pare i Wallkill, juorogi i Brooklyn, i New York i dwi mir 4, 2016. Dwi abic i ng’eye, judok juorogi i kabedo mwa ma dit i Warwick, i New York. I dwi mi 1, 2017, jung’io umego Cook nibedo jakony mi Komite mi kiewo girasoma, ma tie Komite acel mi Guriri m’utelowic.