1. Mer ma Mungu meri ko ketho iwinjiri nenedi?

JAKWENDA Yohana ukiewo nia “Mungu en e mer.” (1 Yoh. 4:8) Wec maeno ubepoyo wiwa i kum lemandha ma e mir ukungu: Mungu tie Acaki mi kwo, man bende Acaki mi mer. Yehova umaruwa lee! Mer m’emaru kowa ketho wawinjara ma ber man ku mutoro.

2. Lembang’ola ario ma kani ma juweco pigi i Matayo 22:37-40, man pirang’o etie yot ungo niworo lembang’olane mir ario?

² Jakristu ng’io ngo ang’ia nia enyuth mer ni ng’atini. Pirang’o? Pilembe nyutho mer tie cik kunoke lembang’ola. (Som Matayo 22:37-40.) Ka wang’eyo Yehova cuu, woro lembang’ola ma kwong’a bedo iwa yot, pilembe Yehova tie Mungu ma leng’, edieng’ piwa man etimo ngo iwa lembe ma rac. Re saa moko woro lembang’olane mir ario copo bedo iwa tek. Pirang’o? Pilembe umego ku nyimego mwa ma wabekwo kugi gi dhanu ma gileng’ ungo. Uketho saa moko gicopo yero kunoke gitimo iwa lembe ma cuu ngo. Yehova ung’eyo nia wabinwang’ara ku lembe ma kumeno, uketho etelo wi dhanu moko ma gikiewo Biblia kara gikiew pi gin m’umito ucwalwa ninyutho mer ni jumange man kite ma wacopo nyutho ko merne. Acel m’ikind dhanune ubino Yohana.​—1 Yoh. 3:11, 12.

3. Yohana uyero lembang’o ni Jukristu pi mer?

³ I barua ma Yohana ugoro, ewacu wang’ dupa nia Jukristu gicikiri ninyutho mer. Ento i Injili m’ekiewo m’uweco pi kwo pa Yesu kende ci, etio ku wec “mer” kunoke “maru” nisagu ma Matayo, Marko man Luka gikiewo. Kinde ma Yohana ubekiewo Injili pare man barua mange adek, nwang’u dong’ etie ku oro ma romo dak acel. Lembe m’ekiewo unyutho nia mer ucikere nibimo wi lembe  ceke ma Jakristu ubetimo. (1 Yoh. 4:10, 11) Re pi ninyutho mer, lembene uting’o nindo ma lee ni Yohana.

4. Nyo Yohana ubed unyutho mer ni jumange saa ceke? Kekor.

⁴ Kinde ma Yohana ubino aradu, saa moko ebed ekoso ninyutho mer ni jumange. Ku lapor, nindo moko kinde ma Yesu ku julub pare gibino kadhu kud i Samaria pi nicidho i Yerusalem, dhanu moko mi pacu mi Samaria uwok ukwero nijologi. Yohana utim’ang’o saa maeno? Ekwayu nia Yesu uwek gilwong’ mac uai kud i polo ubin uwang’ dhanu mi pacune ceke. (Lk. 9:52-56) I nindo mange, Yohana ukoso bende ninyutho mer ni jukwenda wadi. En kud umin ma Yakobo, gicung’o lembe i megi nia ucidh uyer ni Yesu ya emii igi kabedo ma pire tek i ng’ete i Ker pare. Kinde ma jukwenda mange giwinjo lembe ma Yohana giku Yakobo gitimo, lembene uton i igi lee. (Mat. 20:20, 21, 24) Kadok Yohana utimo kosa dupa de, re asu Yesu mare.​—Yoh. 21:7.

5. I thiwiwec maeni wabiweco iwi lembang’o?

⁵ I thiwiwec maeni, wabiweco iwi lapor pa Yohana man iwi lembe m’ekiewo iwi mer. Kinde ma wabeweco iwi lembene, wabineno kite ma waromo nyutho ko mer ni umego ku nyimego mwa. Wabineno bende kite ma juwi ot copo nyutho ko mer ni juruot migi.

6. Yehova unyutho mer pare iwa nenedi?

⁶ Wang’ ma pol, wabed waparu nia nimaru ng’atini, tie niwinjiri ma ber pire kunoke niyero ire wec ma ketho ewinjere cuu. Ento tek wamaru ng’atini andha, wacikara ninyutho bende mer mwane ku timo. (Nen bende Yakobo 2:17, 26.) Ku lapor Yehova umaruwa. (1 Yoh. 4:19) Enyutho mer parene nikadhu kud i wec ma beco m’eketho jukiewo i Biblia. (Zab. 25:10; Rum. 8:38, 39) Re wang’eyo nia Mungu umaruwa, ungo kende kende pi lembe m’eyero iwa, ento bende ni kum lembe m’ebetimo iwa. Jakwenda Yohana ugoro kumae: “I maeni mer pa Mungu nyuthre iwa, nia Mungu oro Wode kulong’ i ng’om kara wabed kwo ni kume.” (1 Yoh. 4:9) Yehova uyio nia Wode m’emaru unen can man utho piwa. (Yoh. 3:16) Nyo eno ubenyutho ngo nia Yehova umaruwa?

7. Yesu utim’ang’o m’unyutho nia emaruwa?

⁷ Yesu uyero ni julub pare nia emarugi. (Yoh. 13:1; 15:15) Eyero ngo ayera kende nia emarugi, ento enyutho igi  merne man iwa bende nikadhu kud i gin m’etimo. Ewacu kumae: “Ng’atu moko mbe m’ubedo ku mer ma sagu maeni, nia ng’atu moko mi kwo pare pi jurimbe.” (Yoh. 15:13) Dong’ ka waparu pi gin ma Yehova giku Yesu gitimo iwa, ukwayu lembene ucwalwa nitim’ang’o?

8. Buku pa 1 Yohana 3:18 uyero nia wacikara nitim’ango?

⁸ Wanyutho nia wamaru Yehova giku Yesu nwang’u wabeworogi. (Yoh. 14:15; 1 Yoh. 5:3) Yesu ung’olo iwa nia wamarara i kindwa. (Yoh. 13:34, 35) Ukwayu ngo wabed wanyuth mer mwa ni umego ku nyimego kende kende ku wec, ento wabed wanyuthe bende ku timo. (Som 1 Yohana 3:18.) Dong’ wacopo tim’ang’o dhe pi ninyutho nia wamarugi?

9. Mer ucwalu Yohana nitim’ang’o?

⁹ Nwang’u Yohana copo maru nia ebed ku won man etim tic mi dwaru nam kara ebed enwang’ sente lee. Re kakare nitimo kumeno, etio ku dong’ kwo pare pi nikonyo dhanu mange ging’ei Yehova man Yesu. Tic mi lembanyong’a ma Yohana ung’io nitimo, ubino ngo tic ma yot. Junyayu ragedo i kume man i thum mi rundi ma kwong’a jutwiye kinde ma nwang’u dong’ etii. (Tic. 3:1; 4:1-3; 5:18; Nyu. 1:9) Kinde ma jutwiye pilembe ebino rweyo pi Yesu, enyutho kamaleng’ nia emaru jumange man ebedieng’ pigi. Ku lapor, kinde m’ebino i cula mi Patmos, ekiewo buku mi Lembanyutha man eore ni cokiri kara ging’ei lembe ma “bikotimbre be,” i ng’ei nindo ma nyanok. (Nyu. 1:1) Cicopere i ng’ey ma jugonye kud i cula mi Patmos, edok ekiewo Injili m’ukoro pi kwo man tic pa Yesu. Ekiewo bende waraga adek pi nitielo cwiny umego ku nyimego. Dong’, in icopo lubo lapor mi mer pa Yohana nenedi?

10. Icopo nyutho nenedi nia imaru dhanu mange?

¹⁰ Icopo nyutho nia imaru dhanu mange nikadhu kud gin m’ing’io nitimo i kwo peri. Ng’om pa Sitani ubemito itii ku saa man tego peri piri giri, inwang’ sente kunoke iketh nyingi uyiki. Tung’ ku maeno, jurwei lembanyong’a mi Ker i wang’ ng’om zoo, gibetio ku saa migi pi nirweyo lembanyong’a man gibekonyo dhanu ung’ei Yehova. Jumoko m’i kindgi ubetimo ticne pi saa ceke.

11. Jukristu dupa gibenyutho nenedi nia gimaru Yehova man gimaru bende dhanu mange?

¹¹ Jukristu dupa gibetimo tic migi mi kum pi saa ceke kara gipong’ yeny migi ku mi juruot migi. Re kadok kumeno de, gibetielo bende tic mi dilo pa Mungu nimakere ku copo migi. Ku lapor, jumoko ubediko cing’gi i kum tic mi mio kony ni dhanu ma peko ma rek uwok i wigi, jumange ubedikiri i tic mi giedo, man gin ceke gibetielo tic mi Ker m’ubetimere i wang’ ng’om zoo nikadhu kud i giramia migi mi sente. Gibetimo lembe maeno ceke pilembe gimaru Mungu man gimaru dhanu mange bende. Kubang’ yenga, wacidho i coko man wadikara i ie pi ninyutho nia wamaru umego ku nyimego mwa. Kadok waol de asu wacidho i cokone. Kadok wabewinjara cuu ngo, asu wadwoko wang’ penji i coko. Bende, kadok wanwang’ara ku peko de, watielo cwiny umego ku nyimego mwa i wang’ coko kunoke i ng’eye. (Ebr. 10:24, 25) Wabedwoko foyofoc lee pi gin m’umego ku nyimego mwa gibetimo!

12. Yohana unyutho nia emaru umego ku nyimego i yo mange ma kani?

 ¹² Yohana ubed ufoyo ngo umego ku nyimegeo pare afoya kende pi ninyutho nia emarugi, ento ebed emio igi juk bende. Ku lapor, i waraga pare m’ekiewo, efoyo umego ku nyimego pi yioyic migi man bende pi tic ma ber ma gibetimo. Re emio igi bende juk ma ngbeng’ iwi dubo. (1 Yoh. 1:8–2:1, 13, 14) Wan bende mito wabed wafoi umego ku nyimego pi gin ma ber ma gibetimo. Ento ka waneno ng’atu moko ucaku benyutho timo kunoke kura moko ma cuu ngo, mito wanyuth ire mer, ma wajuke ko ku yo pi lembene. Andha mito nibedo ku tegocwiny pi nimio juk ni jarimo, re Biblia uwacu nia jurimo mandha gikonyiri man gijukiri i kindgi.​—Rie. 27:17.

13. Ukwayu wacerara nitimo ang’o?

¹³ Saa moko wanyutho nia wamaru umego ku nyimego nwang’u wabecerara nitimo lembe moko. Ku lapor, ukwayu ngo ng’eicwiny umakwa pio pio pi lembe ma giyero. Kepar pi lembe ma Yesu nwang’ere ko kinde m’ebino iwi ng’om. Ewacu ni julub pare nia, kara ginwang’ kwo, mito gicam ring’kume man gimadh rimbe. (Yoh. 6:53-57) Wec maeno utimo julub ma pol rac, uketho giweko nilubo ng’eye, ento jurimbe mandha gimoko asu i kume, uketho i ie Yohana bende. Gin de ginyang’ ungo i lembe ma Yesu yero, man cicopere nia lembene uwang’u igi bende. Re giparu ngo nia Yesu yero lembe ma rac ma nia uketh gikier. Tung’ kumaeno, giketho genogen migi i wie kum ging’eyo nia eyero lemandha. (Yoh. 6:60, 66-69) Pieno, pire tie tek nia kud wawek wec m’umego ku nyimego giyero uketh wakier nya pio pio! Ento wamii igi kaka ma gikor ko iwa lembe ma wanyang’ ungo cuu i iene.​—Rie. 18:13; Ekl. 7:9.

14. Pirang’o ukwayu ngo wabed kud adegi i iwa i kum umego ku nyimego?

¹⁴ Yohana ubejukowa nia kud wabed kud adegi i iwa i kum umego ku nyimego mwa. Ka wawinjo ngo juk maeno, nwang’u wawenjara giwa i cing’ Sitani. (1 Yoh. 2:11; 3:15) Lembuno ugam utimere ni Jukristu moko mi rundi ma kwong’a. Sitani utimo tego pare ceke kara eroi adegi man pokiri i kind dhanu  pa Mungu. Saa ma Yohana ubino kiewo waraga pare, nwang’u dong’ dhanu ma pidoic migi urombo ku pa Sitani umondo lee i cokiri. Ku lapor, Diotrefe unyayu pokiri ma dit i cokiri. (3 Yoh. 9, 10) Ebed enyutho ngo woro ni ju ma guriri m’utelowic uoro. Ebed etimo tego niriemo kadok dhanu m’ubejolo ju ma juorone cen kud i cokiri. Eno tie lembe ma rac mi tuko ngo! Tin bende, Sitani ubetimo tego asu kara epok kind dhanu pa Mungu. Dong’ kud wawek adegi uketh kindwa upokere ki kud umego mwa.

15. Ukwayu jawi ot ung’ei lembang’o iwi giki mi kum?

¹⁵ Yo acel ma jawi ot copo nyutho ko nia emaru juruot pare, utie nipong’o yeny migi mi kum. (1 Tim. 5:8) Re ukwayu eng’ei bende nia giki mi kum copo pong’o ngo yeny mi tipo mi juruot pare. (Mat. 5:3) Poi pi lapor ma ber ma Yesu weko ni juwi ot. Injili ma Yohana ukiewo uwacu nia, kadok kinde ma Yesu ubino iwi yen mi can de, asu edieng’ pi juruot pagi. Yohana giku Maria gibino nuti kaka ma juguro ie Yesu. Kadok saa ma Yesu ubewinjo litho ma dong’ edhingo tho de, asu ekwayu Yohana nia ugwok Maria ma min. (Yoh. 19:26, 27) Yesu ubino kud umego ku nyimego pare dupa ma nwang’u copo dong’ gwoko Maria, re cicopere nia saa maeno nwang’u fodi ng’at’acel de mbe m’i kindgi m’udoko jalub pare. Eno re m’uketho Yesu mito nia ng’atu moko ubed unuti m’udong’ ukony min i thenge mi kum ku mi tipo bende.

16. Yohana ubino ku rwom ma kani?

¹⁶ Yohana ubino ku rwom ma dit mandha. Calu ebino jakwenda, mito ebed kud amora i tic mi lembanyong’a. Saa moko nyo dhaku pare de bino nuti. Kan andha, ukwayu epong’ bende yeny mi kum ku mi tipo mi juruot pare. (1 Kor. 9:5) Lembuno ubemio ponji ma kani ni juwi ot tin?

17. Umego ma jawi ot copo nyutho nenedi nia emaru juruot pare?

¹⁷ Umego ma tie jawi ot, copo bedo ku rwom dupa ma tung’ tung’. Ku lapor, ukwayu etim tic pare mi kum ku tego kara lembene umii yung ni Yehova. (Ef. 6:5, 6; Tit. 2:9, 10) Man ecopo bedo bende  ku rwom i cokiri, calu jadit cokiri kunoke jakony tic m’ukwayu nia edieng’ pir umego ku nyimego man ebed won amora i tic mi lembanyong’a. I saa maeno, ukwayere bende nia eponj Biblia karacelo ku min ot pare man kud awiya. Kan etimo kumeno, juruot pare bibedo ku foyofoc pi kero m’ebetimo pi nipong’o yeny migi mi kum man nikonyogi gimediri nitimo ni Yehova.​—Ef. 5:28, 29; 6:4.

18. Cwiny Yohana ubino tek iwi lembang’o?

¹⁸ Yohana ukwo pi oro dupa man eneno bende lembe dupa ma beco i kwo pare. Enwang’ere bende ku peko ma nwang’u copo kwio yioyic pare. Re saa ceke ebed etimo kero niworo lembang’ola pa Yesu, calu ve nimaru umego ku nyimego. Eno uketho Yohana ubedo ma cwinye tek nia Yehova giku Yesu gimare, man gicopo mio ire tego pi niciro peko m’ebenwang’ere ko. (Yoh. 14:15-17; 15:10; 1 Yoh. 4:16) Yohana uweko ngo Sitani kadi ng’om pare, ucere ninyutho mer ni umego ku nyimego nikadhu kud i wec man i timo.

19. Buku pa 1 Yohana 4:7 ubecwaluwa nitim’ang’o, man ke pirang’o?

¹⁹ Calu Yohana, tin wan de wabekwo i ng’om ma ng’atu m’ubimo wie tie Sitani ma won adegi. (1 Yoh. 3:1, 10) Ebemito wajig nimaru umego ku nyimego mwa, re ka fodi wamio ngo ire kaka wan, ebicerowa ngo. Dong’ wek waketh ebed iwa ni lembakeca ma wamar ko umego ku nyimego mwa, man wanyuth igi merne nikadhu kud i wec man i timo. Ka watimo kumeno, wabibedo kud anyong’a nibedo i dilo pa Yehova man kwo mwa bipong’ ku mutoro.​—Som 1 Yohana 4:7.