1. Korolembe ma jumio i coko ma dit mir adhura m’utimere i oro 1935, ubino ku matoke ma kani iwi aradu moko?

JURUOT moko bedo nuti ma gitie Juponj Biblia (nying’ ma con jubed julwong’o ko Jumulembe pa Yehova). Gibino kud awiya ma co adek ku ju ma nyir ario man giponjogi ceke kara gitim ni Yehova man gilub lapor pa Yesu. Wodgi acel ubino ku oro 18 kinde m’elimo batizo i oro 1926. Calu Juponj Biblia mi rundi maeca, jalawobi maeno de ubed ucamu mukati ku divai kubang’ oro i Cemo mir uthieno pa Rwoth. Ento korolembe moko m’umego Rutherford umio i coko ma dit mir adhura m’utimere i oro 1935, uloko genogen pare pi kwo mi nindo m’ubino. Thiwi korolembene ubino “Udul dhanu ma dit.” Jutimo cokone i adhura mi Washington, i États-Unis. Juponj Biblia giwinjo lembang’o ma nyen i coko maeno?

2. Umego Rutherford unyutho lemandha ma kani i saa mi korolembe pare?

² Umego Rutherford unyutho i saa mi korolembe pare nia jukani ma gitie “udul dhanu ma dit,” kunoke “udul ma dit” ma juweco pire i Lembanyutha 7:9. Saa maeca Juponj Biblia ubed uparu nia udul ma dit de bicikwo i polo, re gitie dhanu ma gigwoko bedoleng’ migi akeca ngo calu m’udul ma nok ugwoko. Nimakere ku Lembagora, umego Rutherford unyutho nia udul ma dit utie ngo dhanu ma bicikwo i polo, ento gitie rombe mange * pa Kristu, ma biboth kud i “masendi ma dit” man gibikwo rondo ku rondo iwi ng’om. (Nyu. 7:14) Yesu ung’olo kumae:  “Rombe para mange nuti, ma gi mi dwonduni ngo: gin bende akoakelgi be, man gibiwinjo dwanda; gibidoko udul acel de, ku jakwac acel.” (Yoh. 10:16) Rombe maeno gitie Jumulembe pa Yehova m’ugwoko bedoleng’ migi man ma gibikwo rondo ku rundo i ng’om i paradiso. (Mat. 25:31-33, 46) Dong’ wakenen kite ma nyang’ ma nyen maeno uloko ko genogen mi dhanu pa Yehova, uketho i ie genogen p’umego mwa m’aradu m’ubino ku oro 18.​—Zab. 97:11; Rie. 4:18.

3-4. I coko ma dit mir adhura m’ukadhu i oro 1935, dhanu dupa unyang’ pi genogen ma kani, man ke pirang’o?

³ Kinde ma Rutherford ubino mio korolembe pare, ekwayu juwinj kumae: “Ju ceke ma gitie ku genogen mi kwo rondo ku rondo i ng’om keni, ka copere giai malu!” Umego moko m’ubino nuti i coko maeno uwacu nia, dhanu ma romo 20 000 uai malu saa maeno. I ng’eye umego Rutherford uwacu kumae: “Nen, udul dhanu ma dit!” Saa maeno dhanu ceke padu cingi ma tek kud anyong’a. Dhanu m’ucungo unyang’ nia Yehova ung’iogi ngo pi nicikwo i polo, kum ewirogi ngo ku tipo pare ma leng’. Urwonde dhanu 840 ulimo batizo, ma dupa m’i kindgi ubino rombe mange.

⁴ I ng’ei koroleme maeno, jalawobi ma waweco pire i caku, ku dhanu mange elufu swa, giweko nicamu mukati man nimadhu divai i saa mi Cemo mir uthieno pa Rwoth. Dhanu dupa de giwinjiri calu m’umego ma e uwacu ku jwigiri kumae: “Poi pi tho pa Yesu mi oro 1935 ubino nindo ma tokcen m’acamu ie mukati man amadhu ie divai. Anyang’ nia karaman tie ngo tipo ma leng’ pa Yehova re m’umio ira ava mi cikwo i polo, ento abino ku genogen mi kwo iwi ng’om man nidikara i tic mi dwoko ng’ombe udok ni paradiso.” (Rum. 8:16, 17; 2 Kor. 1:21, 22) Niai eca, wend udul madit ubemedere ameda man gibetimo tic karacelo ku dong Jukristu ma juwiro ku tipo. *

5. Yehova neno nenedi ju ma giweko camu mukati ku divai i saa mi Poi pi tho pa Yesu?

⁵ Yehova uneno nenedi dhanu ma giweko camu mukati ku divai i ng’ei Poi pi tho pa Yesu m’utimere i oro 1935? Tin ke ebeneno nenedi Jumulembe m’ulimo batizo ma gibed gicamu mukati ku divai i saa mi Cemo mir uthieno pa Rwoth, ma re i ng’eye gidok ginwang’u nia eng’iogi ngo ku tipo pare ma leng’? (1 Kor. 11:28) Jumoko ubed ucamu mukati ku divai pilembe gilar giwondiri pi genogen ma gibino ko. Ento ka ginyang’ nia eca gitimo lembe ma rac, man giweko nicamu mukati ku divai, ma gibemediri nitimo ni Yehova ku gwoko bedoleng’ migi, m’umbe jiji, Yehova bijologi nibedo i kind rombe mange. Kadok giweko camu mukati man madhu divai de, re tundo migi i Poi pi tho pa Yesu ubenyutho nia gitie kufoyofoc pi gin ma Yehova ku Yesu gitimo igi.

6. Yesu ung’olo ni jumalaika nia gitim ang’o?

⁶ Calu ma masendi ma dit dong’ ni ceng’ini, pire tie tek nia wakenen gin ma Lembanyutha thek 7 uyero iwi Jukristu ma juwiro ku tipo man iwi udul ma dit. I giragora eno, Yesu ung’olo ni jumalaika  nia gimak dhu yamu ang’wen mi nyoth nitundo ma juketh ko ayi ma tokcen i kum Jukristu ma juwiro ku tipo, niwacu, lembe ma tokcen m’unyutho nia Yehova uyiogi. (Nyu. 7:1-4) Jukristu ma juwiro ku tipo binwang’u mugisa mi gwoko bedoleng’ migi, ma gibibedo ko jubim man julam ku Kristu i polo. (Nyu. 20:6) Yehova, Yesu man jumalaika, gibibedo kud anyong’a lee kinde ma gibineno dhanu 144 000 ma juwiro ku tipo ginwang’u sukulia migi i polo.

7. Nimakere ku Lembanyutha 7:9, 10, Yohana uneno jukani i ginmawokiwang’, man gibetim’ang’o? (Nen cal m’i ng’eye.)

⁷ I ng’ei weco pi dhanu 144 000 ma gitie jubim ku julam, Yohana udok uneno bende “udul dhanu ma dit” ma wang’u ijo ma giboth kud i Armagedon. Tung’ ku dhanu 144 000 m’elar eneno, udul dhanu maeni wendgi dwong’ m’usagu, ma wendgi ma tap ung’eyere ngo. (Som Lembanyutha 7:9, 10.) Gikendiri ku “kendi ma tar” m’unyutho nia gigwokiri gigi ni cilo mi ng’om pa Sitani man gigwoko bende bedoleng’ migi ni Mungu man ni Kristu. (Yak. 1:27) Man gibekok ku dwandgi ma tek, pilembe giboth ni kum gin ma Yehova ku Yesu ma Nyathi rombo pa Mungu gitimo. Bende, gimaku ndhendhe i cing’gi, m’unyutho nia giyio ya Yesu tie Ubimo ma Yehova ung’io.​—Nen bende Yoh. 12:12, 13.

8. Lembanyutha 7:11, 12 uyero lembang’o iwa pi juruot pa Yehova mi polo?

⁸ Som Lembanyutha 7:11, 12. Lembang’o m’utimere i polo kinde m’udul ma dit uwok? I ginmawokiwang’ ma Yohana uneno, anyong’a nego ju ceke ma ni i polo man gipaku Mungu. Anyong’a binego juruot pa Yehova mi polo kinde ma gibineno kite ma ginmawokiwang’ ma Yohana uneno bipong’o ko, saa m’udul ma dit biboth kud i masendi ma dit.

9. Nimakere ku Lembanyutha 7:13-15, tin udul ma dit ubetim’ang’o?

⁹ Som Lembanyutha 7:13-15. Yohana ugoro nia udul ma dit “gilwoko kendi migi, gidwokogi tar de i rimo pa Nyathi Rombo.” Eno ubenyutho nia gitie ku pidocwiny ma leng’ man gitie pwe i wang’ Yehova. (Isa. 1:18) Jukristu maeno ma githieriri man ma gilimo batizo, ginyutho yioyic ma tek i lam ma Yesu uthiero man gitie ku winjiri ma ceng’ini ku Yehova. (Yoh. 3:36; 1 Pet. 3:21) Pieno, giromo nicungo i wang’ komker pa Mungu man nitimo “ire tic [ma leng’] dieceng’ ku diewor” iwi ng’om. Kadok tin bende, giberweyo lembanyong’a mi Ker kud amora man gibeketho dhanu dok julub, pilembe giketho lembe mi Ker i kabedo ma kwong’a i kwo migi.​—Mat. 6:33; 24:14; 28:19, 20.

10. Ang’o ma biketho cwiny udul ma dit bibedo tek, man gibineno lembang’ola ma kani ma bipong’o igi?

¹⁰ Udul ma dit ma giboth kud i masendi ma dit, cwinygi bibedo tek nia Mungu bigwokogi kadok i ng’ei masendi ma dit, pilembe “ng’atu m’ujany wi komker biguro hema pare i wigi.” Rombe mange bineno kite ma lembang’ola ma e ma gicaku kuro niai con ubepong’o ko: “[Mungu] biyweyo piwang’ pet kud i wang’gi; man tho bibedo nuti kendo ngo; kadok can, kadi ywak, kadok remokum de bibedo nuti kendo ngo.”​—Nyu. 21:3, 4.

11-12. (a) Nimakere ku Lembanyutha 7:16, 17, udul ma dit binwang’u mugisa ma kani? (b) Rombe mange gicopo tim’ang’o i Poi pi tho pa Yesu man ke pirang’o?

¹¹ Som Lembanyutha 7:16, 17. Tin jurutic  pa Yehova moko kec ubenegogi ni kum cam m’umbe, jumange ke gibeneno can pilembe gibekwo kaka ma lwiny n’i ie. Ju m’ukende ubeneno can i kol pi yioyic migi. Re kadok kumeno de, udul ma dit maeno gitie kud anyong’a pilembe ging’eyo nia kinde ma gibiboth kud i nyoth mi ng’om maeni ma rac, gibibedo ku cam lee, mi kum ku mi tipo ceke. Yehova bigwoko udul maeno kara kud gipodh i “lietho” mi kwinyo pare kinde m’ebenyotho thek. I ng’ei masendi ma dit, Yesu bitelo wigi “i ba pi mi kwo [ma rondo ku rondo].” Kenen tho genogen ma ber maeno m’udul ma dit gitie ko: tung’ ku dhanu milioni dupa ma bitho, gin saa moko nyo gibitho ungo!​—Yoh. 11:26.

¹² Rombe mange gibedwoko foyofoc lee ni Yehova man ni Yesu pi genogen ma ber ma gitie ko! Kadok Yehova ung’iogi ngo nia gicidh gikwo i polo de, re emarugi tap calu m’emaru ko Jukristu ma juwiro ku tipo. Pieno, Jukristu ma juwiro ku tipo ku rombe mange ceke gitie ku kaka mi paku Mungu man Kristu. Yo acel ma giromo paku kogi utie nicokiri i Cemo mir uthieno pa Rwoth.

13-14. Pirang’o rombe mange ku Jukristu ma juwiro ceke gicidho i Poi pi tho pa Kristu?

¹³ Pi oro moko m’ukadhu, junwang’u nia iwi dhanu 1 000 ma cidho i Poi pi tho pa Yesu, ng’at’acel re ma camu mukati man madhu divai. I cokiri ma dupa, junwang’u ngo dhanu ma camu mukati man ma madhu divai. Dhanu ma pol ma gicokiri i Poi pi tho pa Yesu, gitie ku genogen mi kwo iwi ng’om. Ka kumeno, dong’ pirang’o ke gibed gicidho i Cemo mir uthieno pa Rwoth? Gin gicidho ku thelembe ma rom ku pa ng’atu ma julwong’o ucidh i foc mi nyom. Ka julwong’i i foc mi nyom, icidh’i nyomne pi ninyutho nia imaru ju m’ubenyomo man ibemito idik cingi kugi. Kumeno bende, rombe mange de gicidho i Poi pi tho pa Yesu pilembe gimito ginyuth mer migi man gidik cing’gi ku Kristu man Jukristu ma juwiro ku tipo. Gicidho bende pi ninyutho foyofoc migi pi lam ma Yesu thiero,  m’umio igi kaka ma gibikwo ko rondo ku rondo iwi ng’om.

¹⁴ Thelembe mange ma pire tek m’uketho rombe mange gicidho i Poi pi tho pa Yesu, utie pi niworo lembang’ola pa Yesu. Cing’ ma Yesu ucaku the Cemo mir uthieno pa Rwoth karacalo ku jukwenda pare ma gigwoko bedoleng’ migi, ewacu igi kumae: “Wutim kumeni wupoi ko pira.” (1 Kor. 11:23-26) Pieno, ka fodi Jukristu moko ma juwiro ku tipo utie iwi ng’om keni ci, rombe mange gibimediri migi asu nicokiri i Cemo mir uthieno pa Rwoth. Bende, gilwong’o ng’atu moko ci, ubin udikere karacelo kugi i Poi pi tho pa Yesu.

15. Wacopo paku Mungu man Kristu nenedi i Poi pi tho pa Yesu?

¹⁵ I Poi pi tho pa Yesu wanwang’u kaka mi paku Yehova man Yesu nikadhu kud i wer man rwo. Thiwi korolembe mi oro maeni tie “Nyuth foyofoc pi gin ma Mungu giku Yesu gitimo iri!” Ebiketho foyoc mwa i bang’ Yehova man Kristu bimedere. Kinde ma mukati ku divai ubekadhu i kindwa, eno poyo wiwa pi kum Yesu man rimbe. Ebipoyo wiwa bende i kum mer ma Yehova unyutho iwa m’eoro ko Wode ubin utho piwa kara wanwang’ kwo. (Mat. 20:28) Ng’atu moko ci m’umaru Wegwa mi polo man Wode bimito etund kokoro i Poi pi tho pa Yesu.

16. Jukristu ma juwiro ku tipo man rombe mange girombo i ayi ma kani?

¹⁶ Tung’ tung’ moko nuti i kind jukritu ma juwiro ku tipo man rombe mange. Re Yehova umaru ngo ungu moko nisagu wadi, ento gin ceke pigi tie tek i wang’e. Pilembe kadok Jukristu ma juwiro ku tipo man rombe mange de, ceke Mungu ng’iewogi ku kwo pa Wode m’emaru. Tung’ tung’ m’utie i kindgi utie genogen migi m’ukoc. Ento gin ceke gicikiri nigwoko bedoleng’ migi ni Mungu man ni Kristu. (Zab. 31:23) Man poi nia tipo pa Mungu copo tio ku tego ma rom iwi ng’atu moko ci m’i kindwa. Eno nyutho nia Yehova bemio tipo pare ma leng’ ni makere ku yeny ma ng’atuman utie ko.

17. Dong jukristu ma juwiro ku tipo gibekuro ang’o kud ava?

¹⁷ Jukristu ma juwiro ku tipo junyologi ngo anyola ku genogen maeno. Mungu re m’upidho genogenne i adundegi. Gibed giparu pi genogen migine, girwo pire, man gitie kud ava mi nwang’u sukulia migi i polo. Ging’eyo ngo nia i polo kumgi mi tipo bibedo nenedi. (Flp. 3:20, 21; 1 Yoh. 3:2) Re kadok kumeno de, gitie kud ava ma gibinen ko ku Yehova, Yesu, jumalaika man jukristu ma juwiro  ku tipo ma dong’ udaru ucer. Gitie bende kud ava lee mi nwang’u kaka i kindgi i Ker mi polo.

18. Rombe mange gibekuro ang’o kud ava?

¹⁸ Rombe mange gimaru genogen mi kwo rondo ku rondo iwi ng’om. Ava maeno Yehova ucwio ko dhanu acwia. (Ekl. 3:11) Gibekuro kud ava nindo ma gibidikiri i tic mi dwoko ng’om zoo ni Paradiso. Gibekuro nindo ma gibigiero ie udi, ma gibipidho ie cam man ma gibitungo ie awiya migi ku leng’kum ma ber. (Isa. 65:21-23) Gibekuro bende kud ava nindo ma gibiliewo ie kabedo ma tung’ tung’, gudi, luli, kulo ma dongo man niponjo lembe dupa iwi giracwia pa Yehova. Man gin m’ubenyayu anyong’a i igi nisagu, utie mer migi ku Yehova ma bimedere nidoko tek.

19. Poi pi tho pa Kristu mio kaka mi tim’ang’o ni ng’atuman m’i kindwa, man oro maeni jubitime awene?

¹⁹ Yehova umio genogen ma ber mi nindo m’ubino ni jurutic pare ceke ma githiero kwo migi ire. (Yer. 29:11) Poi pi tho pa Kristu mio kaka ma ng’atuman m’i kindwa paku ko Mungu man Kristu pi gin ceke ma gitimo iwa kara wanwang’ kwo m’ajikine mbe. M’umbe jiji, Poi pi tho pa Kristu utie acel m’i kind coko ma pigi tek ma Jukristu mandha betimo kubang’ oro. Oro maeni jubitimo cokone ceng’ soko, nindo 27, dwi mir 3, 2021 i mwony pa ceng’. Ju ma pol bibedo ku kaka m’icidho i cokone m’umbe macero, jumange gibikadhu kud i peko pi nidikiri i cokone, jumoko ke gibitimo cokone i kol. Kadok wabitime kendwa, i ungu ma nyanok, kunoke i cokiri de, wang’ei nia Yehova, Yesu, jumalaika, man Jukristu mange ma juwiro ku tipo ma gicer gibenenowa. Dong’ wek ng’atuman m’i kindwa utim Poi pi tho pa Yesu kud anyong’a.