1. Daudi unwang’ere i peko ma kani?

 DAUDI ubino ringo kara ebodh kwo pare, pilembe Saul m’ubimo mir Israel ukeco nia mito enege. Kinde ma Daudi ubino ku yeny mi cam, ewok emondo i adhura mi Nob, kaka m’ewok ekwayu iye lungu kwen abic kende i bang’ Ahimelek. (1 Sam. 21:1, 3) I ng’eye, en ku dhanu pare giringo gicidh gipondo i odng’om. (1 Sam. 22:1) Pirang’o Daudi unwang’ere i lembe maeno?

2. Saul utimo lembang’o ma rac? (1 Samwil 23:16, 17)

² Saul ubino ku kumira i kum Daudi pilembe dhanu dupa umaru Daudi man gibed gipake pi lwiny m’ebed eloyo. Saul ugam ung’eyo bende nia kosoworo pare re m’uketho Yehova ukwere nibedo ubimo mir Israel man nia eng’iyo Daudi re m’ubed ni ubimo kakare. (Som 1 Samwil 23:16, 17.) Re calu fodi asu ebino ubimo mir Israel, udul mony pare ubino dupa man dhanu ma pol de udiko cing’gi kude, uketho Daudi unwang’u nia mito eringi kara ebodh kwo pare. Nyo andha Saul ubino paru nia ecopo cero Yehova niketho Daudi ubed ni ubimo? (Isa. 55:11) Biblia unyutho ngo; gin ma wang’eyo utie kende kende nia Saul ubino ketho kwo pare gire i ariti. Ju ma gikethiri nibedo judhu Mungu ci, pare lembe voyogi!

3. Daudi uwinjere nenedi kadok ebino nwang’ere ku lembe ma tek de?

³ Daudi ubino ngo ku thama mi sayu dito. Ekethere ngo gire nibedo ubimo mir Israel, ento Yehova re m’ung’iye. (1 Sam. 16:1, 12, 13) Saul uneno Daudi ni jadegine. Kadok kumeno de, Daudi uloko ngo lembe iwi Yehova nia en re  m’eketho ebenwang’ere i ariti, ewak ungo bende nia pi Yehova re m’uketho cam uthum ire man nia eringo i odng’om. Tung’ ku maeno, copere nia ethungo wer mi pak m’uketho i iye wec mi giragora ma thiwiwec maeni ucungo i wiye kinde m’ebino i odng’om maeno. Ewacu kumae: ‘Ju m’uyenyo Yehova gin moko ma ber umbe ma cande binegogi.’​—Zab. 34:10.

4. Wabidwoko wang’ penji ma kanigi, man pirang’o pigi tie teki?

⁴ Tin jurutic pa Yehova dupa gibenwang’iri ku peko mi camu man mi piny mange ma gicopo kwo ko. * Lembuno utimere akeca ceng’ini eni i saa mi peko mi thong’om. Man calu ma dong’ wan’i ceng’ini ku “masendi ma dit,” wang’eyo nia wabinwang’ara ku peko m’ukadhu maeno. (Mat. 24:21) Dong’ pire tie tek nia wakedwok wang’ penji ang’wen ma e: ‘Can gin ma ber unego ngo’ Daudi i ayi ma kani? Pirang’o pire tie tek nia cwinywa ucungi i kum gin ma watie ko? Pirang’o ukwayu cwinywa ubed tek nia Yehova bidieng’ piwa? Man wacopo yikara ke nenedi niai kawoni pi nindo m’ubino?

5-6. Zaburi 23:1-6 ubekonyowa nenedi ninyang’ i lembe ma Daudi umito yero nia ‘can gin moko ma ber umbe ma binego’ jurutic pa Mungu?

⁵ Daudi umito yero ang’o kinde m’ewacu nia ‘can gin moko ma ber umbe ma binego’ jurutic pa Yehova? Wec ma rom m’etiyo ko nwang’ere i Zaburi mi 23. Wec eno copo konyowa ninyang’ i gin m’emito yero. (Som Zaburi 23:1-6.) Daudi ucaku wec mi zaburi eno kumae: “Yehova en e jakwac para; can gin moko binega ngo.” Lembe mange m’edok eyero i zaburi eno, utie lembe ma pigi tek lee, niwacu mugisa dupa mi tipo m’enwang’u pilembe ejolo Yehova ni Jakwac pare. Yehova utelo wiye “i yo mi bedopwe,” man ekonye i saa ma ber kud i saa ma  rac. Daudi ugam ung’eyo nia peko bikoso ngo i kwo pare “i ka ma arusi loth i ie” ma Yehova ubekwaye i iye. Saa moko cwinye copo tur ma bibedo ire ve ebewotho “i longro mi tipo piny” ma bii, man ebirombo bende ku jukwoje. Ento calu Yehova re m’utie Jakwac pare, ‘lworo binege ngo kum gin moko ma rac.’

⁶ Eno ubekonyowa ninwang’u wang’ penji m’uwacu nia, ‘Can gin ma ber unego ngo’ Daudi i ayi ma kani? I thenge mi tipo, ebino ku piny ceke m’etie ku yenyne. Anyong’a pare ugam ujengere ngo iwi giki mi kum, ento anyong’a ubed unege i kum gin ma Yehova umiyo ire. Gin ma pire tek akeca ire ubino mugisa man gwok m’ubed uai i bang’ Mungu pare.

7. Nimakere ku Luka 21:20-24, Jukristu mi rundi ma kwong’a mi Yudea ginwang’iri i lembang’o ma teki?

⁷ Wec ma Daudi uyero ubekonyowa nineno nia mito ngo waketh giki mi kum ubed ni gin ma pire tek lee iwa. Andha wacopo nwang’u anyong’a i kum giki mi kum ma watie ko, re mito ngo waketh ebed ni gin ma kwo mwa zoo ucungo i wiye. Eno ubino lemandha ma pire tek ma Jukristu mi rundi ma kwong’a mi Yudea ginyang’ i iye. (Som Luka 21:20-24.) Yesu ugam upoyogi nia saa ubebino ma ‘juaskari bitieko’ iye adhura mi Yeruzalem. Tek gibineno lembene ubetimere, ukwayu “gicak ringo iwi got.” Ka giringo, gibiboth, re nwang’u giweko piny migi dupa i ng’eigi. Otkur ma Wiw moko uyero nia “giweko podho migi man pacu migi, gicoko ngo kadok piny m’i udi migi. Cwinygi ubino tek nia Yehova bigwokogi, man giketho timo ire ni gin ma pire tek nisagu piny mange ceke ma pigi ubino nen nia utie tek.”

8. Lembe ma Jukristu mi rundi ma kwong’a mi Yudea ginwang’iri ko ubemiyo iwa ponji ma kani ma pire teki?

⁸ Lembe m’unwang’u Jukristu mi rundi ma kwong’a mi Yudea ubemiyo iwa ponji ma kani? Otkur ma Wiw ma rom en unyutho nia “i nindo m’ubino, wabinwang’ara ku lembe ma bikethowa i amulaic. Nyo wabineno giki mi kum re ni gin ma pire tek, kunoke nyo both ma biai i bang’ Mungu re ni lembe ma pire tek nisagu? Kinde m’ajiki bitundo, saa moko nyo ng’wec mwa biketho i iye niciro peko man nitwoniri ku lembe moko i kwo mwa. Bikwayere nia wabed ayika nitimo lembe moko ci m’umitere calu ma Jukristu m’uringo kud i Yudea gitimo.” *

9. Juk ma Paulo umiyo ni Juebrania ubetielo cwinyi nenedi?

⁹ Kepar kite ma lembe ubino ko tek ni Jukristu maeno, niweko piny migi ceke i ng’eigi man nidok caku the kwo kendo kaka mange. Ugam ukwayu gibed ku yiyoyic pi nigeno nia Yehova bikonyogi kara ginwang’ gin ma pire tek pi kwo migi. De andha ginwang’u kony. Oro abic i wang’ ma fodi juaskari mi Roma utieko ngo Yeruzalem, jakwenda Paulo ular umiyo juk ma e ma pire tek ni Juebrania: “Wubed agonya i kum mer ma jumaru ko sente, ento cwinywu cung i kum gin ma wutie ko kawoni. Kum eyero kumae: ‘Abiweki ki ngo, man kadok akuna de abikuni ki ngo.’ Pieno wacopo yero ma cwinywa tek lee kumae: ‘Yehova en e jakonyna; lworo binega ngo. Dhanu copo timo ang’o i kuma?’” (Ebr. 13:5, 6) M’umbe jiji, ju m’ugam utiyo ku juk ma Paulo umiyo, nikwo ku piny ma nok ubino  igi yot kaka ma giringo i iye. Cwinygi ubino tek nia Yehova biketho gibinwang’u piny ma pire tek pi kwo migi. Wec ma Paulo uyero ubenyutho nia wan de wacikara nigeno Yehova.

10. “Lembamung’a” ma kani ma Paulo unyutho pire iwa?

¹⁰ Paulo umiyo kit juk ma rom eno ni Timoteo, ma re jukne tie iwa bende. Ekiewo kumae: “Tekene watie ku cam man kendi, dong’ cwinywa ucung kum gin maeni.” (1 Tim. 6:8) Nyo eno ubenyutho nia kud wabed wacam cam ma mit, kud wabed ku ot ma cuu, kadi bongu ma nyen de kud wabed wang’iewi? Paulo uyero ngo kumeno. Eyero nia cwinywa ucikere nicungo i kum piny mi kum ma watie ko. Eno re m’ubino “lembamung’a” ma Paulo uweco pire i Jufilipi 4:12. Piny mwa ma pire tek nisagu zoo utie winjiri mwa ku Mungu, ento ungo piny mi kum ma watie ko.​—Hab. 3:17, 18.

11. Wec ma Musa uyero ni nyithindho mir Israel iwi bedo ma cwinyjo ucungo ubemiyo iwa ponji ma kani?

¹¹ Gin ma waparu nia watie ku yenyne, copo bedo ngo gin ma rom ma Yehova ubeneno nia watie ku yenyne. Wakewec iwi gin ma Musa uyero ni nyithindho mir Israel kinde ma dong’ giwotho i langa pi oro 40. Ewacu kumae: “Yehova Mungu peri mio mugisa iri i tic ceke mi cingi; eng’eyo woth peri kud i langa maeni ma  dit: rundi pier ang’wen maeni Yehova Mungu peri bedo kudi: gin moko mbe m’urem iri.” (Poi. 2:7) Yehova umiyo mana ni nyithindho mir Israel pi oro 40. Bongu migi ma giwok ko kud i Misiri utii ngo kadok nyanok de. (Poi. 8:3, 4) Kadok jumoko copo neno nia lembuno nwang’u fodi uromo ngo de, re Musa upoyo wi nyithindho mir Israel nia gibino ku piny ceke ma gitie ku yenyne. Anyong’a binego Yehova tek wabeponjo nibedo ma cwinywa ucungo, niwacu nibedo ku foyofoc i kum piny ma thindho thindo m’ebemiyo iwa, ma wanen kogi ni mugisa m’uai i bang’e, man wadwok foyofoc ire.

12. Ang’o m’unyutho nia Daudi ubino ku genogen iwi Yehova ento ungo i wiye gire?

¹² Daudi ung’eyo nia Yehova tie pwe, man ebedieng’ lee pi dhanu m’umare. Kadok kwo pare ubino i ariti kinde m’ebethungo wer mi Zaburi mi 34 de, re ku wang’ mi yiyoyic eneno “malaika pa Yehova” ugonjo “gbur” i ng’ete. (Zab. 34:7) Saa moko nyo Daudi ubino poro malaika pa Yehova ku jaskari m’upondo man m’ubedo nger pi nikiyo jadhoge. Kadok Daudi ubino jakied lwiny ma tek man Yehova ung’olo ire nia ebibedo ubimo de, re ejengere ngo iwi copo pare mi tiyo ku lacur kunoke jungbe, kadi iwi bodho pare mi tiyo ku palamularu pi nivoyo judegine. (1 Sam. 16:13; 24:12) Ebino ku genogen iwi Mungu, m’eng’eyo ko nia malaika pa Yehova ‘bodho ju m’ulwore.’ Tin wacopo geno ngo nia Yehova bigwokowa i ayi mir udu. Ento wang’eyo nia ng’atu m’uketho genogen pare iwi Yehova binwang’ere ngo ku peko ma kuthum.

13. Pirang’o wabinen ni ju ma tego migi mbe i wang’ thek kinde ma Gog mi Magog bilokere i kumwa, man pirang’o lworo ucikere ngo ninegowa? (Nen cal m’i ng’eye.)

¹³ Ceng’ini eni, genogen mwa iwi copo ma Yehova tie ko mi gwokowa binwang’ere i amulaic. Kwo mwa binen ve n’i i ariti kinde ma Gog mi Magog, niwacu dikiri mi thek bilokere i kum dhanu pa Mungu. Bikwayere wabed ma cwinywa tek nia Yehova copo bodhowa, de andha ebibodhowa. I wang’ thek, wabinen ve rombe ma jagwok migi mbe. (Eze. 38:10-12) Wabibedo mbe ku jamblwiny i cingwa, man wabinwang’u ngo ponji mi kiedo lwiny. Wabinen ni ju ma tego migi mbe i wang’ thek. Gibineno ngo gin ma wabeneno ku wang’ mi yiyoyic, niwacu udul jumalaika m’utieko ng’et dhanu pa Mungu m’utie ayika nikiedo piwa. Gin gimbe ku wang’ mi tipo. Igi biwang’ kinde ma gibineno nia udul mony m’i polo ubekiedo piwa!​—Nyu. 19:11, 14, 15.

14. Wacopo timo ang’o niai kawoni kara wayikara pi nindo m’ubino?

¹⁴ Wacopo timo ang’o niai kawoni kara wayikara pi nindo m’ubino? Mi kwong’o, mito wabed ku nen ma ber iwi giki mi kum, ma wang’ey ko nia nindo moko wabiwekogi i ng’eiwa. Mito wabed bende ma cwinywa ucungo i kum piny ma watie ko, man anyong’a unegwa pi winjiri ma watie ko ku Yehova. Ka wabemedara ning’eyo Mungu cuu, e cwinywa bibedo tek nia ebigwokowa kinde ma Gog mi Magog bilokere i kumwa.

15. Lembe ma kani ma Daudi ukadhu kud i iye kinde ma fodi en aradu, m’uponje nia Yehova biweke ngo nyanok de?

¹⁵ Wakewec iwi gin mange m’ukonyo Daudi man ma copo konyowa wan bende  kara wabed ayika pi peko ma copo wok. Daudi uwacu kumae: “Wubil wunen de ya Yehova e ber: Mugisa ni ng’atu m’upondo i bang’e.” (Zab. 34:8) Wec maeno ubenyutho nia Daudi ung’eyo nia ecikere nijengere iwi kony pa Yehova. Daudi ubed ujengere iwi Yehova, man Mungu pare de uweke ngo kadok nyanok de. Kinde ma fodi en aradu, ekiedo ku Goliath ma Jafilisti ma jarukara man eyero ire kumae: “Yehova bimii i cinga tin.” (1 Sam. 17:46) I ng’eye kinde ma Daudi ubino jaratic p’ubimo Saul, wang’ udul Saul umito enege. Ento “Yehova” ubino ku Daudi. (1 Sam. 18:12) Gwok pa Yehova ma Daudi uneno i kwo pare, uketho ebedo ku genogen nia Yehova bikonye i peko m’ebenwang’ere i iye.

16. Wacopo ‘bilo’ bero pa Yehova i yo ma kani?

¹⁶ Tek wabemedara nisayu telowic pa Yehova niai kawoni, e genogen mwa de bimedere ameda nidoko tek i copo pare m’ebibodho kowa i nindo m’ubino. Ukwayu wabed ku yiyoyic man wabed ayika nijengiri iwi Yehova pi nikwayu jadit tic mwa uwek iwa saa ma wacidh ko i coko mwa ma dongo, kunoke nikwaye eyik program mi tic kara wabed wacidh i coko mwa ceke man kara wanwang’ saa mi rweyo lembanyong’a. Wakemak nia jadit tic mwa ukwero lembuno man tic de uwekowa, nyo wabibedo ku yiyoyic nia Yehova biwekowa ngo man nia ebimiyo iwa gin ma pire tek ma watie ku yenyne? (Ebr. 13:5) Dhanu dupa ma gitie i tic mi saa ceke, gicopo koro kite ma Yehova ukonyo kogi kinde ma gibino ku yeny mi kony pare lee. Yehova tie Mungu ma lokere ngo.

17. Giragora mwa mi oro 2022 utie giragora ma kani, man pirang’o ng’iyong’icne umaku kaka?

¹⁷ Wambe ku thelembe mi bedo ku lworo pi nindo m’ubino kum Yehova ni kudwa. Mungu mwa biwekowa ngo nyanok de tek waketho timo yeny pare i kabedo ma kwong’a i kwo mwa. Pi nipoyo wiwa kara wayikara niai kawoni pi peko m’ubebino i wang’wa man niketho genogen mwa nia Yehova biwekowa ngo, Guriri m’utelowic ung’iyo giragora mwa mi oro 2022 ubed Zaburi 34:10 m’uwacu kumae: ‘Ju m’uyenyo Yehova gin moko ma ber umbe ma cande binegogi.’