1-2. (a) Wapoy pi ng’atu ma wamaru asagane i saa ma kani? (b) Yesu ucaku thelembang’o i uthieno m’i wang’ tho pare?

 DOK nwang’u oro udaru kadhu rukani ma wedi mwa ma wamaru utho i iye de, re asu wapoy pigi. Nindo ma githo i iye poyo wiwa i kum lembe dupa.

² Kubang’ oro, wacokara i kind dhanu milion dupa i wang’ ng’om zoo, pi nipoy pi tho pa Yesu Kristu ma tie ng’atu ma wamaru lee. (1 Pet. 1:8) Wacokara karacelo pi nipoy pi ng’atu m’umiyo kwo pare ni jamgony pi nibodhowa kud i dubo man tho. (Mat. 20:28) Yesu en gire de emito nia julubne gipoy pi tho pare. I uthieno m’i wang’ tho pare, ecaku the cemo ma segi mir uthieno man eng’olo kumae: “Wumeduru nitimo kumeni, wupoy ko pira.” *​—Luka 22:19.

3. Wabiweco iwi lembang’o i thiwiwec maeni?

³ Kud i kind dhanu ma gicokiri i Poy pi tho pa Kristu, ma nok kende re m’utie ku genogen mi cikwo i polo. Re dhanu milion dupa ma gitie ku genogen mi kwo iwi ng’om de gicokiri i iye kugi. I thiwiwec maeni wabineno thelembe m’uketho ungu ario eno ceke gibedo kud ava mi cokiri kubang’ oro pi nipoy pi tho pa Yesu. Wabineno bende bero ma wanwang’u ka wabecokara karacelo pi nitime. Pi nicaku, wakewec iwi thelembe m’uketho Jukristu ma juwiro ku tipo gicokiri i Poy pi tho pa Yesu.

4. Pirang’o Jukristu ma juwiro ku tipo gicamu mukathi man gimadhu divai i saa mi Poy pi tho pa Yesu?

⁴ Kubang’ oro Jukristu ma juwiro ku tipo gicamu mukathi man gimadhu divai kinde ma gicokiri i Poy pi tho pa  Yesu. Pirang’o gin re ma gicamu mukathi man gimadhu divai? Pi nidwoko wang’ penji eno, wakewec iwi lembe m’utimere i uthieno ma tokcen mi kwo pa Yesu iwi ng’om. I ng’ey cemo mi Kadhukuwijo, Yesu udok ucaku the cemo mange ma julwong’o Cemo mir uthieno pa Rwoth. Emiyo mukathi ku divai ni jukwenda pare 11 ma gigwoko bedoleng’ migi, man ewacu igi nia gicame man gimadhe. Yesu uweco kugi iwi lembariba ario: Lembariba ma nyen ku lembariba mi Ker. * (Luka 22:19, 20, 28-30) Lembariba maeno uyabu yo ni jukwenda maeno ku dhanu mange ma wendgi nok, nibedo jubim man julam i polo. (Nyu. 5:10; 14:1) Dong Jukristu m’udong’ * ma juwiro ku tipo ma gitie i lembariba ario maeno kendgi re ma gicopo camu mukathi man gimadhu divai i saa mi Poy pi tho pa Yesu.

5. Jukristu ma juwiro ku tipo ging’eyo lembang’o iwi genogen ma gitie ko?

⁵ Thelembe mange ma ketho Jukristu ma juwiro ku tipo gibedo kud ava mi timo Poy pi tho pa Yesu ni e: Lembene miyo igi kaka mi paru pi genogen migi. Yehova umiyo igi genogen ma wang’u ijo, niwacu nibedo ku kwo ma tho ngo man kum ma nyothere ngo i polo, nitimo karacelo ku Kristu m’unwang’u dwong’ ku jumange m’udong’ m’i kind dhanu 144 000. Man m’usagu zoo ke, gibibedo kaka ma Yehova Mungu n’i iye! (1 Kor. 15:51-53; 1 Yoh. 3:2) Jukristu eno ging’eyo nia julwong’ogi nibedo ku rwom maeno i polo. Ento kara gicidh i polo, gicikiri nigwoko bedoleng’ migi nitundo i tho. (2 Tim. 4:7, 8) Gibedo kud anyong’a lee ka gibeparu pi genogen migi mi cikwo i polo. (Tito 2:13) Wacopo yero ang’o pi “rombe mange” ke? (Yoh. 10:16) Gicokiri pi nitimo Poy pi tho pa Yesu pi thembe ma kani?

6. Pirang’o rombe mange gibed gicokiri i Poy pi tho pa Yesu kubang’ oro?

⁶ Rombe mange gicokiri i Poy pi tho pa Yesu, ungo pi nicamu mukathi man nimadhu divai. I oro 1938, ubino wang’ ma kwong’a ma julwong’o iye ju ma gitie ku genogen mi kwo iwi ng’om pi nicokiri i Poy pi tho pa Yesu. Otkur ma Wiw (mir anglais) mi nindo 1 dwi mir 3, oro 1938, ukoro kumae: “Ebibedo ber akeca ni [rombe mange] de nibedo nuti i coko maeno man nineno lembe m’ubetimere. . . . Ecikere nibedo igi bende ni saa mir anyong’a.” Calu ju ma julwong’o i foc mi nyom gibedo kud anyong’a nineno nyom m’ubekadhu, rombe mange de gibedo kud anyong’a ka gibenwang’iri karacelo i Poy pi tho pa Yesu pi nineno lembe m’ubekadhu i iye.

7. Pirang’o rombe mange gibed gikuro kud ava niwinjo korolembe mi Poy pi tho pa Yesu?

⁷ Rombe mange bende giparu pi genogen migi. Gikuro kud ava niwinjo korolembe mi Poy pi tho pa Yesu, kum lembe ma pol m’i iye beketho nwoc iwi gin ma Kristu ku jumange 144 000 m’ebibimo kugi, gibitimo ni dhanu m’ugwoko bedoleng’ migi i the bimobim mi oro 1 000. I the telowic pa Yesu Kristu, ju ma gibibimone gibidwoko ng’om bidoko ni paradizo man gibitelo wi dhanu ma wor  nidoko ku kum ma leng’, niwacu m’umbe dubo. Etie lembe mir anyong’a mi tuko ngo ni dhanu milion dupa ma gibed gicokiri i Poy pi tho pa Yesu, niparu pi kite ma lembila mi Biblia bipong’o ko i nindo m’ubino, calu ve lembila ma nwang’ere i Isaya 35:5, 6; 65:21-23; man Lembanyutha 21:3, 4. Niparu nia dong’ ve gin’i ng’om ma nyen karacelo ku wedi migi, ketho genogen migi doko tek pi nindo m’ubino, man gibedo ku lembakeca mi timo ni Yehova m’umbe niweko.​—Mat. 24:13; Gal. 6:9.

8. Rombe mange gibed gicokiri i Poy pi tho pa Yesu pi thelembe mange ma kani?

⁸ Wakewec iwi thelembe mukende m’uketho rombe mange gibed gicokiri pi nitimo Poy pi tho pa Yesu. Gimito ginyuth mer ni Jukristu ma juwiro ku tipo man gidik cing’gi kugi. Lembe pa Mungu ular uyero nia Jukristu ma juwiro ku tipo ku jumange ma gitie ku genogen mi kwo iwi ng’om gibitimo tic karacelo. Nenedi? Wakewec iwi laporne moko.

9. Lembila m’ugorere i Zekaria 8:23, ubenyutho nenedi winjiri m’utie i kind rombe mange ku Jukristu ma juwiro ku tipo?

⁹ Som Zekaria 8:23. Lembila maeni ukoro ber dit ayi ma rombe mange giwinjiri ko pir umego ku nyimego ma juwiro ku tipo. Wec ma nia “Jayahudi” man “kudu” ubeweco iwi ungu acel ma rom, niwacu dong Jukristu ma juwiro ku tipo. (Rum. 2:28, 29) “Co apar kud i [dhok mi] thek ceke” ubenyutho rombe mange. ‘Gimaku dhu kendi’, niwacu gimoko kikiki i kum ju ma juwiro ku tipo pi nidikiri kugi i thier ma leng’. Pieno, rombe mange gibed ginyutho nia gimoko i kum Jukristu ma juwiro ku tipo nikadhu kud i Poy pi tho pa Yesu ma gitimo karacelo kugi.

10. Yehova utimo ang’o pi nipong’o lembila ma nwang’ere i Ezekiel 37:15-19, 24, 25?

¹⁰ Som Ezekiel 37:15-19, 24, 25. Kara lembila maeno upong’, Yehova uketho Jukristu ma juwiro ku tipo ku rombe mange gibed i i acel ma kindgi kud ucoti. Lembila maeno uweco pi yen kunoke uluth ario. Ju ma gitie ku genogen mi cikwo i polo, gitie ve yen m’utie “pi Yuda” (suru ma jung’iyo jubim mir Israel kud i iye), man ju ma gitie ku genogen mi kwo iwi ng’om ke, gitie ve yen “pa Efraim.” * Ugorere nia Yehova bidiko kind ungu ario eno kara gidok ni “yen acel.” Eno ubenyutho nia gibitimo tic i acel i the telowic p’Ubimo acel, ma Kristu Yesu. Kubang’ oro, Jukristu ma juwiro ku tipo ku rombe mange gicokiri karacelo pi nipoy pi tho pa Yesu, ungo tung’ tung’ ento ni “udul rombe acel” man i the telowic pa “jakwac de acel.”​—Yoh. 10:16.

11. “Rombe” ma juweco pigi i Matayo 25:31-36, 40 gibediko cing’gi kud umego pa Kristu asagane i tic ma kani?

¹¹ Som Matayo 25:31-36, 40. “Rombe” ma juweco pigi i lembabola maeni ubenyutho weg bedopwe ma gibekwo i nindo mi kajik ceng’ ma gitie ku genogen mi kwo iwi ng’om, niwacu rombe mange. Gibediko cing’gi kud umego pa Kristu asagane pi nikonyogi i tic ma dit ma gitie ko mi rweyo lembanyong’a man mi ketho dhanu udok julub i wang’ ng’om zoo.​—Mat. 24:14; 28:19, 20.

12-13. Rombe mange ginyutho nia gibediko cing’gi kud umego pa Kristu i yo mange ma kani?

¹² Kubang’ oro, i yenga m’i wang’ Poy pi tho pa Yesu, rombe mange ginyutho  nia gibediko cing’gi kud umego pa Kristu nikadhu kud i tic mi kampany ma gibetimo i wang’ ng’om zoo pi nilwong’o dhanu i Poy pi tho pa Yesu. (Nen sanduku “ Nyo ibeyikiri pi Poy pi tho pa Yesu?”) Gikonyo bende pi nimaku yub m’ukwayere kara Poy pi tho pa Yesu utimere i wang’ ng’om zoo, kadok nwang’u cokiri ma dupa umbe ku Jukristu ma juwiro i iye de. Rombe mange gitie kud anyong’a nidiko cing’gi kud umego pa Kristu i yo maeno. Ging’eyo nia Yesu ubeneno lembe ma gibetimo ni umego ma juwirogi ku tipo calu ve gibetimo lembene ire en ku kume.​—Mat. 25:37-40.

¹³ Kadok watie ku genogen mi cikwo i polo kunoke mi kwo iwi ng’om, wan ceke wacokara i Poy pi tho pa Yesu pi thelembe mange ma kani?

14. Yehova giku Yesu ginyutho iwa mer ma dit nenedi?

¹⁴ Watie ku foyofoc pi mer ma Yehova giku Yesu ginyutho iwa. Yehova unyutho nia emaruwa i yo dupa. Ento yone acel ma dit m’usagu zoo, utie nikadhu kud i Wode m’emaru, m’eoro ubin usendere man utho piwa. (Yoh. 3:16) Yesu bende unyutho mer ma dit, kum ebedo ayika nithiero kwo pare piwa. (Yoh. 15:13) Wambe ku gin ma wacopo culo kawang’ mer ma Yehova giku Yesu ginyutho iwa. Ento wacopo nyutho foyofoc mwa nikadhu kud i ayi kwo mwa ma kubang’ ceng’. (Kol. 3:15) Bende, wabed wacokara i Poy pi tho pa Yesu pilembe wamito wapar pi mer ma ginyutho iwa man ma wan bende wamito wanyuth igi.

15. Pirang’o Jukristu ma juwiro ku tipo ku rombe mange ceke gineno jamgony ni gin ma pire tek lee?

¹⁵ Watie ku foyofoc lee pi giramiya mi jamgony. (Mat. 20:28) Jukristu ma juwiro ku tipo gineno jamgony ni gin ma pire tek lee, pilembe eketho gitie ku genogen ma wang’u ijo. Yehova ukwanugi ni weg bedopwe man edwokogi ni nyithindhe nikum yiyoyic migi i lam pa Kristu. (Rum. 5:1; 8:15-17, 23) Rombe mange bende gitie ku foyofoc pi jamgony eno. I ukungu mi yiyoyic ma ginyutho i rimb Kristu m’ucwir, Mungu ubenenogi leng’ i wang’e, ma gicopo timo ire tic ma leng’ man gitie ku genogen ma gibiboth ko “kud i masendi ma dit.” (Nyu. 7:13-15) Yo acel ma Jukristu ma juwiro ku tipo ku rombe mange ceke ginyutho ko foyofoc migi pi jamgony, utie nicokiri i Poy pi tho pa Yesu kubang’ oro.

16. Wacokara i Poy pi tho pa Yesu pi thelembe mange ma kani?

¹⁶ Thelembe mange ma wacokara ko i Poy pi tho pa Yesu utie pilembe wabemito wawor dwand Yesu. Kadok genogen mwa mi nindo m’ubino utie pi nicikwo i polo kunoke iwi ng’om de, ng’atuman m’i kindwa utie kud ava mi woro cik ma Yesu umiyo i uthieno m’ecaku iye Poy pi tho pare. Ewacu kumae: “Wumeduru nitimo kumeni wupoy ko pira.”​—1 Kor. 11:23, 24.

17. Poy pi tho pa Yesu corowa ceng’ini ku Yehova nenedi?

¹⁷ Wacoro ceng’ini ku Yehova. (Yak. 4:8) Calu ma waneno, Poy pi tho pa Yesu miyo iwa kaka ma waparu ko pi genogen ma Yehova umiyo, man ma wanyamu ko lembe iwi mer ma dit m’enyutho  iwa. (Yer. 29:11; 1 Yoh. 4:8-10) Kinde ma wabeparu pi genogen mwa mandha mi nindo m’ubino, man iwi mer ma jik ungo ma Mungu unyutho iwa, mer mwa ma wamare ko de medere ameda man winjiri m’i kindwa doko tek.​—Rum. 8:38, 39.

18. Nyamu i lembe iwi lapor pa Yesu cwaluwa nitimo ang’o?

¹⁸ Walubo lapor pa Yesu. (1 Pet. 2:21) I yenga mi nindo m’ubecwaluwa i kum Poy pi tho pa Yesu, waketho wiwa i kum lembe m’i Biblia m’uweco pi yenga ma tokcen ma Yesu ukwo i iye wi ng’om, iwi tho man iwi cer pare. Bende, uthieno mi ceng’ mi Poy pi tho pa Yesu, korolembe ma wawinjo poyo wiwa iwi mer ma Yesu unyutho iwa. (Efe. 5:2; 1 Yoh. 3:16) Ka wabesomo pi lapor ma Yesu unyutho, m’ewodhere ko piwa man wabenyamu lembe i wiye, lembene cwaluwa ‘niwotho tap calu ma en de ewotho ko.’​—1 Yoh. 2:6.

19. Wacopo bedo nenedi i mer pa Mungu?

¹⁹ Wabedo bende ku lembakeca mi bedo i mer pa Mungu. (Yuda 20, 21) Wabedo i mer pa Mungu nwang’u wabetimo kero mwa ceke pi niwore, niketho nyinge ubed leng’, man ninyayu anyong’a i iye. (Rie. 27:11; Mat. 6:9; 1 Yoh. 5:3) Poy pi tho pa Yesu cwaluwa nibedo ku lembakeca mi kwo kubang’ ceng’ i ayi ma ve wawacu ni Yehova kumae: ‘Abemito abed i mer peri nja ku nja!’

20. Wacokara i Poy pi tho pa Yesu pi thelembe ma kanigi?

²⁰ Kadok watie ku genogen mi cikwo i polo kunoke iwi ng’om, watie ku thelembe dupa ma cwaluwa nipoy pi tho pa Yesu. Kubang’ oro tek wabecokara karacelo i nindo maeno, wapoy pi tho pa Yesu Kristu, ma tie ng’atu ma wamaru. M’usagu zoo, wapoy pi mer ma dit ma Yehova unyutho iwa, m’emiyo ko Wode ni jamgony. Oro maeni, Poy pi tho pa Yesu bibedo uthieno mi ceng’ kas’abic, nindo 15, dwi mir 4, oro 2022. Wamaru Yehova, man Wode bende. Pieno, gin moko mbe ma pire tie tek nisagu bedonuti mwa i nindo mi Poy pi tho pa Yesu.