1-3. Lembang’o ma copo ketho dhanu pa Yehova giwak ku piwang’gi?

 WANG’ ma tokcen m’igam iwak i iye ubino awene? Saa moko wawak nwang’u anyong’a re m’ubenegowa. Ento wang’ ma pol can m’i cwinywa re ma ketho wawak. Ku lapor, wacopo wak tek ng’atu ma wamaru utho. Nyamego Lorilei * ma kwo i États-Unis ukiewo kumae: “Kinde ma nyathin para ma nyaku utho, awinjara ku can lee mandha, ma gin moko mbe m’unen nia copo juko cwinya. Saa maeno ang’eyo ngo ka nyo nang’ aromo ciro lembene.”

² Wacopo wak pi lembe mange bende. Nyamego Hiromi ma tie jayab yo i Japan uwacu kumae: “Saa moko cwinya tur pi dhanu m’ubewinja ngo i lembanyong’a. I kare moko akwayu Yehova ku piwang’a, nia ekonya anwang’ ng’atu moko m’umito ng’eyo lemandha.”

³ Nyo in de nindo moko iwinjiri calu nyamego eno? Dupa m’i kindwa udaru winjiri kumeno. (1 Pet. 5:9) Wabemito ‘watim ni Yehova kud anyong’a,’ re wacopo timo ire ku piwang’wa nikum turcwiny man can mir adundewa, kunoke nikum lembe m’uketho gwoko bedoleng’ mwa i amulaic. (Zab. 6:6; 100:2) Wacopo timo ang’o tek wabewinjara kumeno?

4. Wabiweco iwi lembang’o i thiwiwec maeni?

⁴ Wacopo nwang’u ponji i lapor pa Yesu. Saa moko en de enwang’ere ku lembe m’umiyo can lee i cwinye m’uketho ‘piwang’e ucwir.’ (Yoh. 11:35; Luka 19:41; 22:44; Ebr. 5:7) Wakewec iwi lembenegi. Wabineno ponji ma wacopo nwang’u kinde ma wabeweco i wigi. Wabineno bende  gin ma wacopo timo pi ninyego ku lembe ma ketho wawak ku piwang’wa.

5. Lembe m’ugorere i Yohana 11:32-36, ubeponjowa ku lembang’o iwi Yesu?

⁵ I oro mi 32 N.N.Y., twoyo umaku Lazaru ma jarimb Yesu man i ng’eye ke etho. (Yoh. 11:3, 14) Lazaru ubino ku nyimego pare ario, Maria giku Martha. Yesu ugam umaru juruot maeno lee mandha. Can unego jumamon ario eno lee pi tho p’umeggi ma gimaru. I ng’eye kinde ma Lazaru utho, Yesu ucidho i Bethania i pacu ma Maria giku Martha gibino kwo i iye. Saa ma Martha uwinjo nia Yesu ubebino i yo, etimo pio ecidh erombo kude. Kepar pi can m’ebino ko i cwinye kinde m’eyero wec ma e: “Rwoth, ka nwang’u ibino keni, nwang’u di umira tho ngo.” (Yoh. 11:21) I ng’eye nyanok kinde ma Yesu uneno Maria ku jumange gibewak, en de ‘piwang’e ucwir.’​—Som Yohana 11:32-36.

6. Pirang’o Yesu uwak saa maeno?

⁶ Pirang’o Yesu uwak saa maeno? Buku Étude perspicace udwoko wang’ penji eno kumae: “Tho pa Lazaru ma jarimbe man can m’ubino nego nyimego pa Lazaru, uketho Yesu ‘ucur i iye man piwang’e ucwir.’” * Saa moko nyo Yesu ubino paru pi litho mi remokum ma jarimbe Lazaru uwinjere ko man kite m’ebino winjere ko saa m’enwang’u nia ecopo both ungo. M’umbe jiji piwang’ Yesu ucwir bende pi can m’eneno Maria ku Martha gibino ko pir umeggi m’utho. Tek in de wedi peri kunoke ng’atu moko m’imaru utho, m’umbe jiji iwinjiri bende kumeno. Wakewec iwi ponji adek m’iromo nwang’u i kum wak pa Yesu.

7. Wak ma Yesu uwak ko pi jurimbe, ubeponjowa ku lembang’o iwi Yehova?

⁷ Yehova ubenyang’ i kite m’iwinjiri ko. Yesu utie “ayi ma tap” pa Won. (Ebr. 1:3) Kinde ma Yesu uwak, enyutho kite  ma Won de winjere ko. (Yoh. 14:9) Tek ng’atu moko m’imaru utho, ng’ey nia Yehova ubeneno ngo kende kende can m’ibewinjo i cwinyi, ento en de can ubenege lee piri. Ebemito ekey can mir adundeni.​—Zab. 34:18; 147:3.

8. Pirang’o cwinywa copo bedo tek nia Yesu bicero ju ma wamaru ma githo?

⁸ Yesu ubemito ecer ju m’imaru ma githo. Nyanok i wang’ ma fodi Yesu uwak ungo, ejuko cwiny Martha kumae: “Umeru bicer.” Martha uyiyo lembe ma Yesu yero. (Yoh. 11:23-27) Calu ma Martha ubino ng’atu ma woro Yehova, elar eng’eyo pi dhanu ma yang’ jabila Eliya kud Elica giketho ucer. (1 Ub. 17:17-24; 2 Ub. 4:32-37) Ubenen bende nia ewinjo pi dhanu ma Yesu ucero. (Luka 7:11-15; 8:41, 42, 49-56) In bende cwinyi copo bedo tek nia ibineno kendo ju m’imaru ma githo. Wak pa Yesu m’ejuko ko cwiny jurimbe, ubenyutho nia etie kud ava mi cero ju m’utho!

9. Calu Yesu, icopo konyo ju ma gibenwang’iri ku can i cwinygi nenedi? Kemii lapor moko.

⁹ Kony ju ma can ubenego cwinygi. Yesu uwak ungo awaka kende ku Martha man Maria, ento ewinjogi man eyero igi wec mi jukocwiny. Wan de wacopo timo lembe ma rom ni ju ma can ubenego cwinygi. Dan ma tie jadit cokiri ma kwo i ng’om mi Australie uwacu kumae: “Kinde ma min ot para utho, abino ku yeny mi kony. Umego dupa ku mon migi gibino ayika dieceng’ ku diewor pi niwinja. Gibed giweko awak pi can m’i cwinya man gibed gineno lembene rac ungo. Gibed gikonya bende ku nyithi tic ma thindho thindho, calu ve lwoko mutukari para, ng’iewo cam i soko, man tedo cam tek anwang’ara nia timogi tie tek ira. Gibed girwo karacelo kuda wang’ ma pol. Ginyutho nia gitie jurimo man umego ma ‘junyolo [pi nindo] mi can.’”​—Rie. 17:17.

10. Kekor lembe m’ukadhu, ma jugoro pire i Luka 19:36-40.

¹⁰ Yesu ucidho i Yeruzalem nindo 9 mi dwi mi Nisan, oro 33 N.N.Y. Kinde m’etundo ceng’ini kud adhurane, udul dhanu ucokiri man gipedho bongu migi ire i yo pi ninyutho nia gijole ebed ni Ubimo migi. Ma jiji mbe eno ubino nindo mir anyong’a. (Som Luka 19:36-40.) Pieno, julubne gigeno ngo nia lembe moko m’ukoc copo timere i ng’eye. Re “kinde [ma Yesu uwok] ceng’ini, eneno adhura man ewak pire.” Yesu uewo ku piwang’e lembe ma rac ma binwang’u dhanu mir adhura mi Yeruzalem.​—Luka 19:41-44.

11. Pirang’o Yesu uwak pi dhanu mi Yeruzalemi?

¹¹ Yesu uwinjo can ma dit i cwinye kum eng’eyo nia, kadok jujole kud anyong’a de, re Juyahudi ma pol gibijolo ngo rwonglembe mi Ker. Adwogi mi lembene biketho jubinyotho Yeruzalem man Juyahudi ma gibiboth kinde ma jubenyotho adhurane, jubiyakugi ni amaci. (Luka 21:20-24) Lembe mi can utie nia, calu ma Yesu ular uyero, dhanu ma pol ukwere. I kabedo m’ibekwo i iye, dhanu ma pol bejolo rwonglembe mi Ker nenedi? Tek dhanu ma nok kende re ma bejolo lemandha m’ibeponjo igi, wak ma Yesu uwak ko pi jumange copo konyi nenedi? Wakenen ponji adek mange ma wacopo nwang’u.

12. Piwang’ Yesu m’ucwir pi dhanu mange, ubeponjowa ku lembang’o iwi Yehova?

¹² Yehova ubedieng’ pi dhanu. Piwang’ Yesu m’ucwir pi dhanu mange, ubepoyo wiwa nia Yehova ubedieng’ pi dhanu.  “Ebemwonyo lembe hai iwu pilembe ebeyenyo ngo nia ng’atu moko acel de unyothere, enre ebeyenyo dhanu ceke gilok cwinygi.” (2 Pet. 3:9) Tin wanyutho nia wamaru dhanu wadwa nikadhu kud i kero ma wabetimo saa ceke pi niponjogi ku lembanyong’a mi Ker.​—Mat. 22:39. *

13-14. Yesu unyutho kisa nenedi ni dhanu, man wan ke wacopo cego kite maeno nenedi?

¹³ Yesu urweyo lembanyong’a ku tego pare zoo. Yesu unyutho nia emaru dhanu nikadhu kud i ponji m’ebed eponjo kogi i kaka ceke m’umiyere ire. (Luka 19:47, 48) Ang’o m’ucwale? Tie kisa m’eneno i kumgi. I kare moko, dhanu dupa umaru niwinjo ponji pare, uketho en ku julubne “ecopere ngo igi nicamu kadok cam de.” (Mark. 3:20) Ebino bende ayika niweco ku ng’atu moko kud uthieno, i saa ma ng’atune umaru. (Yoh. 3:1, 2) Dupa m’i kind dhanu m’uwinjo Yesu, gidoko ngo julub pare. Ento dhanu ceke m’uwinje ginwang’u lembatuca cuu mandha. Tin wabemito wamii kaka ni dhanu ceke kara giwinj lembanyong’a. (Tic. 10:42) Pi nitimo lembuno, umito wawil ayi mwa mi rweyo lembanyong’a.

¹⁴ Bed ayika nitimo alokaloka m’ukwayere. Tek wabecuku wilo ngo saa ma warweyo iye lembanyong’a, wacopo nwang’u ngo ju ma gimito giwinj lembanyong’a. Nyamego Matilda ma tie jayab yo uwacu kumae: “Waku won ot para watimo kero warweyo lembanyong’a i saa ma tung’ tung’. Kugweno con, wacidh warweyo i kabedo mi kuloka. Dieceng’ kinde ma dhanu ma pol ubewotho i ndaki, watiyo ku prezantwar. I ng’eye saa ma ceng’ uwiro, wadok wanwang’u dhanu lee i pacu migi.” Kakare nimoko kwa i kum program mi saa ma wamaru, ukwayu wabed ayika niwilo program mwa pi nirweyo lembanyong’a i saa ma wacopo nwang’u iye dhanu lee. Ka watimo kumeno, wacopo bedo ma cwinywa tek nia anyong’a ubenego Yehova.

15. Calu m’ugorere i Luka 22:39-44, lembang’o m’utimere i uthieno m’i wang’ tho pa Yesu?

¹⁵ I uthieno mi nindo 14 mi dwi mi Nisan, oro 33 N.N.Y., Yesu ucidho i podho mi Gethsemane. Kuca ewok ekoro lembe mir adundene ceke ni Yehova. (Som Luka 22:39-44.) I saa maeno re ‘m’etimo kwayukwac . . . ku dwal ma tek man ku piwang’.’ (Ebr. 5:7) Pirang’o Yesu urwo uthieno maeno m’i wang’ tho pare? Erwo kara egwok bedoleng’ pare ni Yehova man kara etim yeny pare. Yehova uwinjo kwac ma Wode ukwayu kud adundene ceke man eoro malaika acel ubin umiyo ire tego.

16. Pirang’o cwiny Yesu ubino dieng’ kinde m’eberwo i podho mi Gethsemane?

¹⁶ M’umbe jiji, Yesu uwak kinde m’eberwo i podho mi Gethsemane, pilembe cwinye bino dieng’ nia dhanu binene ni ng’atu m’ucido nying’ Mungu. Bende, egam eng’eyo nia etie ku rwom ma lee dit m’egwok ko bedoleng’ pare man m’eketh ko nying’ Won ubed leng’. Icopo nwang’u ponji ma kani i kum wak pa Yesu, tek ibenweng’iri i wang’ lembe m’ubeketho gwoko bedoleng’ peri i amulaici? Wakenen ponji mange adek.

17. Wang’ rwo ma Yehova udwoko pi kwac ma Yesu ukwaye ko kud adundene ceke, ubemiyo iwa ponji ma kani?

¹⁷ Yehova ubewinjo kwac peri. Yehova ugam uwinjo kwac ma Yesu ukwaye ko kud adundene ceke. Pirang’o? Pilembe adieng’a ma kwong’a ma Yesu ubino ko ubedo nigwoko bedoleng’ pare ni Won man niketho nying’ Won ubed leng’. Yehova bidwoko wang’ rwo mwa pi nikonyowa, tek wan de adieng’a mwa ma kwong’a utie nigwoko bedoleng’ mwa ire man niketho nyinge ubed leng’.​—Zab. 145:18, 19.

18. Yesu ubedo ve jarimo ma nyang’ kudwa i peko mwa i ayi ma kani?

¹⁸ Yesu ubenyang’ i kum kite m’iwinjiri ko. Anyong’a negowa tek jarimbwa moko ubenyang’ kudwa kinde ma wabenwang’ara kud ang’abacwiny, asagane tek en de enwang’ere ku kit peko ma rom ku mwa. Yesu utie jarimo ma kumeno. Eng’eyo kite ma ng’atini winjere ko tek tego pare nok man etie ku yeny mi kony. Enyang’ nia  watie dhanu ma ng’ic, man ebiketho wanwang’ kony ma watie ku yenyne “tap i saane.” (Ebr. 4:15, 16) Tap calu Yesu ugam ujolo kony ma malaika umiyo ire i podho mi Gethsemane, wan de wacikara nibedo ayika nijolo kony ma Yehova ubemiyo iwa, nik’ebed kud i girasoma mwa, i video, i korolembe ma wawinjo, man niai kud i liew pa jadit cokiri moko kunoke Jakristu wadwa m’uteng’ini i tipo.

19. Icopo nwang’u tego nenedi kinde m’ibenweng’iri i lembe m’ubeketho gwoko bedoleng’ peri i amulaic ni Mungu? Kemii lapor moko.

¹⁹ Yehova bimiyo iri “kwiyocwiny” pare. Yehova bimiyo iwa tego nenedi? Tek waberwo, wabinwang’u “kwiyocwiny pa Mungu m’ukadhu gin ceke ma jucopo nyang’ i iye.” (Filip. 4:6, 7) Kwiyocwiny ma Yehova miyo, kwiyo adundewa man ekonyowa niparu lembe i atira. Nyamego Luz unwang’u nia eno tie lemandha. Ekoro kumae: “Abed awinjara liyo kenda. Saa moko lembene ketho aparu nia Yehova umara ngo. Re tek awinjara kumeno, ayero ndhundhu ni Yehova kite m’abewinjara ko. Rwo bekonya kara awinjara ma ber.” Lembe pa nyamego eno ubenyutho nia wan de wacopo nwang’u kwiyocwiny nikadhu kud i rwo.

20. Wanwang’u ponji ma kani i kum wak pa Yesu?

²⁰ Wanwang’u jukocwiny man ponji ma lee i kum wak pa Yesu! Wanwang’u nia mito wakony jurimbwa ma gibewinjiri ku can i cwinygi man nigeno nia Yehova giku Yesu gibikonyowa kinde ma ng’atu ma wamaru utho. Wanwang’u bende nia mito kisa ucwalwa nirweyo lembanyong’a man niponjo dhanu, kum Yehova Mungu man Kristu de gibenyutho kite ma ber maeno. Bende, wanwang’u jukocwiny nia Yehova ku Wode gibenyang’ i kite ma wabewinjara ko, kisa ubenegogi i kumwa pi ng’ico mwa, man nia gibemito gikonywa niciro peko mwa. Dong’ wek wamedara nitiyo ku lembe ma waai waponjo nitundo i nindo ma Yehova bipong’o iye lembang’ola pare ma wang’u ijo, ‘m’ebiweyo ko piwang’wa pet kud i wang’wa’!​—Nyu. 21:4.