1. Wacopo bedo karacelo ku Yehova nenedi?

 WABED wamaru nibedo karacelo ku dhanu ma wabedieng’ pigi. Ng’atu m’ugamere emaru lee nibedo karacelo ku jadhoge mi gamiri. Aradu ke gibed gimaru ginamb karacelo ku jurimbgi. Man wan ceke wabed wamaru nibedo karacelo ku juyic wadwa. M’usagu zoo, wamaru nibedo karacelo ku Mungu mwa. Wabedo karacelo kude nwang’u waberwo, wabesomo Biblia, wabenyamu i lembe iwi lembakeca pare man iwi kite pare ma beco. Saa ma wabedo i iye karacelo kude pire tie tek lee mandha!​—Zab. 139:17.

2. Wabenwang’ara ku peko ma kani?

² Kadok wamaru nibedo karacelo ku Yehova de, re etie lembe ma yot ungo. Watie ku lembe dupa m’ukwayu watim ma copo ketho ninwang’u saa ma watim ko lembe mi tipo bedo iwa tek. Tic mwa mi kum, juruot mwa, ku lembe mange m’ukwayu watim copo maku iwa saa lee ma waromo nwang’u nia dong’ saa umbe iwa ma warwo ko, ma watim ko ponji, kunoke ma wanyam ko i lembe.

3. Lembang’o mange ma mayu iwa saa?

³ Lembe mange de nuti ma mayu iwa saa. Ka wabedo ku wang’wa ngo, kadok tic ma ber de copo mayu iwa saa ma watiyo ko pi nicoro ceng’ini ku Yehova. Ku lapor, wan ceke wamaru wanamb ku jumange. Ento nambu maeno de copo camu saa mwa ma saa ma watim ko lembe mi  tipo dong’ iwa nyanok. Pieno, mito ngo waketh pi nambu ubed tek lee nisagu.​—Rie. 25:27; 1 Tim. 4:8.

4. Wabiweco iwi lembang’o i thiwiwec maeni?

⁴ I thiwiwec maeni wabiweco iwi thelembe m’ukwayu wang’ii ko gin ma pire tek lee i kwo mwa. Wabiweco bende iwi kite ma wacopo tiyo ko ma ber mandha ku saa mwa kinde ma wan’i karacelo ku Yehova, man bero ma waromo nwang’u ka wabetiyo ku saa mwa ku rieko.

5. Ninyamu i lembe iwi juk ma nwang’ere i Juefeso 5:15-17, copo konyo aradu nenedi nitiyo ma ber mandha ku kwo pare?

⁵ Ng’ii kit kwo ma ber m’usagu. Wang’ ma pol aradu gibed gidieng’ pir ayi ma ber akeca ma gicopo tiyo ko ku kwo migi. I thenge moko, juponji migi mi somo man wedi migi ma juyic ungo, copo kwayugi nia gisom iniversite kara ya ginwang’ tic mi sente ma lee. Somo maeno copo camu igi saa lee. I thenge m’ucelo ke, jurunyodo ku jurimo mange m’i cokiri gimiyo amora i kum aradu nia gitii ku kwo migi pi nitimo ni Yehova. Ang’o ma romo konyo aradu m’umaru Yehova nimaku yub ma ber m’usagu? Nisomo Juefeso 5:15-17 man ninyamu lembe i wiye copo konye. (Som.) I ng’ei somo versene, aradu eno copo penjere kumae: ‘“Yeny pa Yehova tie ang’o”? Yub ma kani ma binyayu anyong’a i iye? Yub ma kani ma bikonya nitiyo ma ber akeca ku saa para?’ Poy nia “wabekwo i nindo ma rac,” man ceng’ini eni ng’om maeni ma Sitani ubebimo wiye bijik. Ebibedo lembe mi rieko nia watii ku kwo mwa pi nitimo lembe ma nyayu anyong’a i Yehova.

6. Maria utimo ng’iyong’ic ma kani, man pirang’o ebino ng’iyong’ic mi rieko?

⁶ Ng’ii lembe ma pigi tek lee. Saa moko kara watii ma ber ku saa mwa, ekwayere nia watim ng’iyong’ic i kind lembe ario ma re nwang’u girac ungo. Lembuno unen kinde ma Yesu ucidh uliewo Maria giku Martha. M’umbe jiji, anyong’a ma dit ma Martha ubino ko pi nijolo Yesu, uketho etedo cam lee dit. Maria ma nyamin ke, uting’o kaka maeno pi nicibedo ceng’ini i the tiend Rwoth pi niwinjo ponji pare. Lembe ma Martha utimo ubino ngo gin ma rac, ento Yesu uwacu nia “Maria ung’iyo pare gin ma ber.” (Luka 10:38-42) Saa moko nyo i ng’eye wi Maria uwil pi cam ma jujolo ko Yesu saa maeca, ento wacopo yero ma cwinywa tek nia ewil ungo nyanok de ku gin m’ewinjo i bang’ Yesu. Calu ma Maria ugam uneno saa ma gibino i iye karacelo ku Yesu ni gin ma pire tek, wan de mito wanen saa ma watie i iye karacelo ku Yehova ni gin ma pire tek. Dong’ wacopo tiyo ma ber ku saa maeno nenedi?

7. Pirang’o pire tie tek lee nia warwo, watim ponji mwa man wanyam i lembe?

⁷ Ng’ey nia rwo, ponji mwa ma segi, man nyamu i lembe gitie thenge ma zoo mi thier mwa. Tek waberwo, eca nwang’u wabeweco ku Wegwa m’i polo m’umaruwa lee. (Zab. 5:7) Kinde ma wabetimo ponji mwa mi Biblia, eca nwang’u wabenwang’u “ng’eyong’ec pa Mungu,” kum etie acaki mi rieko. (Rie. 2:1-5) Tek wabenyamu i lembe iwi gin ma waponjo iwi Yehova ke, eca nwang’u wabeparu pi kite  pare ma beco man wabepoy pi lembe ma wang’u ijo m’ebemito etim iwa man ni dhanu mange ceke. Eno tie yo ma ber akeca ma watiyo ko ku saa mwa. Dong’ ang’o ma copo konyowa nitiyo ma ber ku saa maeno?

8. Wacopo nwang’u ponji ma kani iwi kite ma Yesu utiyo ko ku saa pare i langa?

⁸ Ka copere, ng’ii kaka ma ling’. Wakewec iwi lapor pa Yesu. I wang’ nicaku tic pare mi rweyo lembanyong’a iwi ng’om, ecidh etimo nindo 40 i langa. (Luka 4:1, 2) I kabedo maeno ma ling’, erwo i bang’ Yehova man enyamu i lembe iwi gin ma Won ubemito etim. Lembuno ukonyo Yesu nibedo ayika pir amulaic m’edok enwang’ere ko i ng’eye. Lapor pa Yesu copo konyi nenedi? Tek yo pewu wutie dupa, ninwang’u kabedo ma ling’ i ot copo bedo tek. Saa maeno icopo sayu kaka mange ma ling’ woko. Eno tie gin ma nyamego Julie utimo kinde m’emito ekoy saa m’erwo ko ni Yehova. Ku won ot pare gibekwo i France i ot moko ma nyanok, etie tek igi nibedo kendgi ma jubesendo ngo wigi. Julie ukoro kumae: “Abed acidho kubang’ ceng’ kaka moko ma juyiko ma ber, kuca abedo kenda ma jubesendo ngo wiya; e aweco cuu i bang’ Yehova.”

9. Kadok Yesu ubino ku lembe dupa m’umito etim, enyutho nenedi nia eneno winjiri pare ku Yehova ni gin ma pire teki?

⁹ Yesu ubino ku tic lee m’ukwayu etim. Udul dhanu ubed ulubo toke kun ku kun, man dhanu eno ceke ubed umito gibed kude. Nindo moko “dhanu ceke mir adhura gicokiri i dhugola” pi ninene. Kadok kumeno de, Yesu ubed ukoyo saa m’erwo ko ni Yehova. Con kugweno ma fodi ceng’ uwok ungo, ecidh enwang’u “kaka ma ling’” m’ecopo bedo i iye kende ku Won.​—Mark. 1:32-35.

10-11. Nimakere ku Matayo 26:40, 41, Yesu umiyo juk ma kani ni julubne tap i saane i podho mi Gethsemane, man gidok gitimo ang’o?

¹⁰ I uthieno ma tokcen mi kwo pa Yesu man i ajiki mi tic pare iwi ng’om, Yesu usayu kendo kaka ma ling’ m’ecopo nyamu i lembe man erwo i iye. Enwang’u kaka maeno i podho mi Gethsemane. (Mat. 26:36) Saa maeno Yesu umiyo juk ni julubne iwi rwo, tap i saane.

¹¹ Wakenen kite ma lembene ukadhu ko. Kinde ma gitundo i podho mi Gethsemane, nwang’u dong’ saa unyang’ lee, copere i diewor ma ling’. Yesu ukwayu nia julune ‘gikii,’ man en ke ecidho ang’et pi nirwo. (Mat. 26:37-39) Ento kinde m’eberwo, nindo ukwalu julubne. Saa ma Yesu udwogo enwang’u gibenindo,  ekwayugi kendo kumae: “Wumeduru nikiyo man wurwo saa ceke.” (Som Matayo 26:40, 41.) Enyang’ nia cwinygi ubino pido man giol. Kisa unege i kumgi man eng’eyo nia ‘kum tie ng’ic.’ Re asu kendo wang’ ario, Yesu ucidh urwo man kinde m’edwogo, ewok enwang’u julune gibenindo aninda kakare nirwo.​—Mat. 26:42-45.

12. Wacopo timo ang’o tek saa moko wanwang’u nia waol, ma nirwo de utie iwa lembe ma teki?

¹² Ng’ii saa ma cuu. Saa moko wacopo nwang’u nia wiwa uol kunoke waol, ma nirwo de copo bedo iwa tek. Tek in de saa moko inweng’iri kumeno, ng’ey nia itie kendi ngo. Dong’ icopo timo ang’o? Jumoko ma gitie ku ng’iyo mi rwo i bang’ Yehova i mwony pa ceng’, ginwang’u nia etie ber nirwo ku reto dhug uthieno ma fodi piny unyang’ ungo, saa ma fodi givoc ungo ku olo. Jumoko ke ginwang’u nia ka gibedo abeda kunoke aruma, eno konyogi niketho wigi zoo i kum rwo. Dong’ kan inwang’u nia cwinyi ung’abere man iol akeca ke? Yer ni Yehova kite m’ibewinjiri ko. Cwinyi ubed tek nia Wegwa utie won kisa, ebinyang’ kudi.​—Zab. 139:4.

13. Jamtic mir elektronik copo nyotho wiwa nenedi i saa ma watie i iye karacelo ku Yehova?

¹³ Kud iketh wii ulal swa kinde m’ibetimo ponji peri ma segi. Yo ma wadwoko ko winjiri mwa ku Yehova udok tek utie ngo rwo kende. Timo ponji mwa ma segi man cidho i coko bende konyowa niketho kindwa ubed ceng’ini ku Mungu. Nyo gin moko nuti m’icopo timo kara itii ma ber ku saa peri mi ponji man saa m’ibenweng’iri i iye i coko? Kepenjiri kumae: ‘Lembang’o ma benyotho wiya i saa mi coko kunoke kinde m’abetimo ponji para ma segi?’ Nyo jubed julwong’i ku telefon kunoke jukiewo iri mesaj i jamticne mange mir elektroniki? Dhanu milioni dupa tin gitie ku jamtic maenogi. Jumoko ma gitimo sayusac giyero nia, kinde ma wabemito nia wiwa ubed ling’ pi timo lembe moko, telefon ma watie ko i ng’etwa de copo nyotho wiwa. Jararieko moko uwacu nia saa maeno “iketho ngo wii i kum gin m’ibetimo, kum paru peri zoo nwang’u n’i kamange.” I wang’ caku coko  mir adhura man mi twodiri, juyero iwa wang’ ma pol nia wayik jamtic mwa mir elektronik kara kud usend jumange. Nyo wacopo timo ngo lembe ma rom eno ka watie kendwa, kara jamtic mwa mir elektronik kud unyoth wiwa man ucam saa mwa ma watie i iye karacelo ku Yehova?

14. Nimakere ku Jufilipi 4:6, 7, Yehova copo konyowa nenedi kara paru mwa kud uwoth swa?

¹⁴ Kway Yehova ukonyi kara paru peri kud uwoth swa. Kinde m’inwang’u nia paru peri ubewotho swa kinde m’ibetimo ponji peri kunoke saa ma in’i coko, kway Yehova ukonyi. Tek cwinyi ubepido kunoke ung’abere, ecopo bedo yot ungo niweko lembe m’usendo wii man niketho wii ucungi i kum lembe mi tipo. Re pire tie tek nia itim lembuno. Kway kwiyocwiny pa Mungu, ma bigwoko ngo kende kende adundeni, ento bende “paru” peri.​—Som Jufilipi 4:6, 7 man korolembe mi there.

15. Ibinwang’u bero ma kani tek ibebedo karacelo ku Yehova?

¹⁵ Tek ibewotho koyo saa mi weco i bang’ Yehova, mi winje, man mi paru lembe i wiye, ibinwang’u bero dupa. Nenedi? Mi kwong’o, ibimaku yub ma cuu. Biblia uwacu nia “woth ku jurieko, e ibibedo riek.” (Rie. 13:20) Pieno, in de ibidoko riek lee tek ibenwang’u saa mi bedo karacelo ku Yehova, kum etie acaki mi rieko. Ibinyang’ ma ber i ayi m’icopo nyayu ko anyong’a i iye, man nikoc i kum timo ng’iyong’ic ma nyayu can i iye.

16. Nibedo karacelo ku Yehova konyowa nenedi nimedo bodho mwa mi ponji?

¹⁶ Mir ario, ibidoko japonji ma ber. Ka wabeponjo Biblia ku ng’atini, lembakeca mwa ma pire tek utie nikonyo ng’atune ucor ceng’ini ku Yehova. Tek wabemedara nirwo i bang’ Yehova man wabeponjo lembe i wiye, mer mwa ma wamare ko de bimedere, e wabibedo ku copo mi ponjo japonj Biblia bende nimare. Poy i kum lapor pa Yesu. Ekoro pi Yehova ni julubne kud amora man enyutho nia emare, eno uketho julubne de gimaru Yehova.​—Yoh. 17:25, 26.

17. Pirang’o rwo man timo ponji mwa ma segi konyowa kara yiyoyic mwa ubed teki?

¹⁷ Mir adek, yiyoyic peri bimedere nidoko tek. Wakemak nia ibecukukwayu telowic, jukocwiny kunoke kony i bang’ Yehova. Kubang’ kare m’ebewotho dwoko iye wang’ rwo peri, yiyoyic peri de medere ameda. (1 Yoh. 5:15) Ang’o mange ma copo konyi kara yiyoyic peri ubed ma  teki? Utie ponji peri ma segi. Poy nia “yiyoyic wok ni kum lembe ma juwinjo.” (Rum. 10:17) Ento kara yiyoyic ubed tek, bedo ku ng’eyong’ec kende uromo ngo. Ukwayu watim lembang’o mange?

18. Kewec iwi lapor m’unyutho nia ukwayu wabed wanyam i lembe.

¹⁸ Ukwayu wanyam i lembe iwi gin ma wabeponjo. Wakewec iwi lapor pa jagor Zaburi mi 77. Cwinye ubino dieng’ nia en ku nyithindho mir Israel ginyotho winjiri migi ku Yehova. Adieng’acwiny maeno uketho nindo de ubed uwok ungo i wang’e diewor. (Verse mir 2-8) Etimo ang’o? Ewacu ni Yehova kumae: “Iya bipido bende kum tic peri ceke, man abiparu pi tic peri.” (Verse mir 12) Jagor zaburi eno ugam ung’eyo pi gin ma Yehova utimo ni dhanu pare con, re adieng’acwiny m’ebino ko uketho epenjere nia nyo “wi Mungu wil ku bero pare? Eciko ba kisa pare ma ng’ic ku ng’ecwiny pare?” (Verse mir 9) Jagor zaburi unyamu lembe iwi tic pa Yehova man iwi kisa ku ngisi m’enyutho ni dhanu pare con. (Verse mir 11) Enwang’u adwogi ma kani? Cwinye udoko tek nia Yehova biweko dhanu pare ki ngo. (Verse mir 15) Pieno, in de yiyoyic peri bidoko tek kan ibenyamu i lembe iwi gin ma Yehova udaru timo ni dhanu pare man m’etimo iri athothi.

19. Bero mange ma kani ma wanwang’u ka wabedo karacelo ku Yehova?

¹⁹ Mir ang’wen. M’usagu zoo, mer m’imaru ko Yehova bimedere ameda. Mer utie kite ma ber m’usagu kite mange ceke; ebicweli niworo Yehova, nimiyiri pi nitimo lembe ma foyo iye, man niciro peko moko ci. (Mat. 22:37-39; 1 Kor. 13:4, 7; 1 Yoh. 5:3) Gin moko mbe acel de ma pire copo bedo tek nisagu winjiri mwa ma watie ko ku Yehova!​—Zab. 63:1-8.

20. Icopo timo ang’o kara inwang’ saa m’ibed ko karacelo ku Yehova?

²⁰ Poy nia rwo, ponji mwa, man nyamu i lembe gitie thenge ma zoo mi thier mwa. Calu Yesu, say kabedo ma ling’ m’ibed i iye karacelo ku Yehova. Kab gin ma tijgi mbe ma romo nyotho wii. Kway Yehova ukonyi kara paru peri kud uwoth swa kinde m’ibetimo lembe mi tipo. Tek ibetiyo ma ber ku saa peri niai kawoni, Yehova bimiyo iri mugisa mi kwo ma rondo ku rondo i ng’om ma nyen pare.​—Mark. 4:24.