WEC mi dhu Jugiriki ma juloko nia “magali” i Lok mi ng’om ma nyen copo nyutho kit magali ma tung’ tung’ dupa. (Tic. 8:28, 29, 38) Ento ubenen nia Jaethiopiane ubino ringo ku magali ma dit nisagu magali mi lwiny kunoke mi kwaya mi ng’wec. Wakenen thelembe moko m’uketho wayero kumeno.

Jaethiopiane ubino jatic ma dit man ebino wotho woth ma bor lee. Ebed etimo i kal p’ubimo ma dhaku mir Ethiopia ma nyinge Kandake, ebino ku “dito ma lee man ebed eneno wi lonyo p’ubimo ceke.” (Tic. 8:27) Con, ng’om Sudan ma kawoni ku theng Misiri ma lee ma yo piny ma kawoni zoo ugam umondo i Ethiopia. Kadok nwang’u nyo ng’atuno uringo ngo ku magali ma rom i theng woth parene zoo de, re copere nia egam ewotho ku piny lee. I kind jamwoth ma jubed jutiyo ko i rundi ma kwong’a N.N.Y. pi niyeyo dhanu ma gibewotho, moko ubino magali ma tiende ang’wen man ma wiye tie. Buku moko (Acts—An Exegetical Commentary) ukoro nia “kit magali maeno ubed ubedo ku kaka ma lac mi yeyo piny man ebed eketho juwotho woth ma bor m’umbe peko.”

Jaethiopiane ubino somo piny kinde ma Filipo unwang’e. Kpawa mi Biblia uyero nia kinde ma “Filipo uberingo i ng’et magaline, ewinjo [Jaethiopiane ubesomo] buku pa jabila Isaya ku dwande ma tek.” (Tic. 8:30) Jubed juyiko ngo magali mi woth pi woth m’arenda. Calu ma gibed giringo yoo, eno uketho ecopere ni jatic mi kalne nisomo piny man uketho bende Filipo unwang’u magali pare m’ebewotho ku tiende.

Jaethiopiane “[ukwayu] nia Filipo uidhi man gibed gikude.” (Tic. 8:31) I magali mi kwaya mi ng’wec, juring ng’wec gibed gicungo acunga. I magali ma juyiko pi woth lundo kabedo ubino nuti, uketho jatic mi kalne giku Filipo gibedo abeda.

Nimakere ku Tic mi Jukwenda thek 8 man lembe mange ma jukoro iwi kpawa ma con, i girasoma mwa m’uwok i kind nindo ma ceng’ini eni jukubo nia Jaethiopia ma jatic mi kal uberingo ku magali ma dit m’ukadhu magali mi lwiny kunoke mi kwaya mi ng’wec.