Nyo ibed itiyo ku jumamon calu Yehova?
WATIE ku rwom ma dit mi timo ni Yehova karacelo ku jumamon dupa ma weg bedopwe. Wamaru man wabefoyo nyimego a maeno lee pi tic mi muliri ma gibetimo! Pieno umego, wutii kugi ma ber, i ayi m’umaku piny man ku woro. Ento calu ma watie ku dubalaga, saa moko eromo bedo iwa tek nitimo kumeno. Umego moko ginwang’iri ku peko mange bende.
Jumoko gidongo i suru ma jumaco ma dupa m’i igi giparu nia gisagu jumamon. Ku lapor, Hans m’utie jaliew mi twodiri i ng’om mi Bolivie uyero nia jumaco moko gidongo i suru ma jucwaku i iye jumaco nia gi dit nisagu jumamon. Pieno gicayu jumamon man gitiyo kugi m’umbe woro. Jadit cokiri moko mi Taïwan ma nyinge Shengxian uyero kumae: “I kabedo m’akwo i iye, jumaco ma dupa giparu nia jumamon gimbe ku twero mi weco iwi lembe migi. Tek nico moko ubeweco iwi paru ma ng’atu ma dhaku umiyo iwi lembe moko, juwagi caye.” Jumaco mange ginyutho pidoic mir akoyakoya ma gitie ko i kum jumamon i ayi m’ukoc. Ku lapor, giyero wec mir anywar ku nying’ jumamon.
Ku lembe ma ber, ng’atu ma nico romo wilo paru m’edongo ko. Ecopo voyo pidoic ma nia jumaco gi dit iwi jumamon. (Efe. 4:22-24) Ecopo timo lembuno nwang’u ebelubo lapor pa Yehova. I thiwiwec maeni, wabineno kite ma Yehova tiyo ko ku jumamon, kite m’umego gicopo ponjo ko nitiyo ku jumamon calu Yehova man kite ma judong cokiri gicopo bedo ko ma kwong’a i nyutho woro ni nyimego.
YEHOVE TIYO KU JUMAMON NENEDI?
Yehova utie lapor ma pwe i kite mi tiyo ku jumamon. Calu etie Wego m’upong’ ku kisa, emaru awiya pare ceke. (Yoh. 3:16) Man nyimego ma weg bedopwe gitie ve awiya pare ma nyir mir amara. Wakewec iwi kite m’eyungo ko jumamon.
Etiyo kugi m’umbe akoyakoya. Yehova ucwiyo jumaco ku jumamon ceke i ayi pare. Tha. 1:27) Eketho ngo jumaco gibed riek kunoke gibed ku bodho lee nisagu jumamon. (2 Kei. 19:7) Ecwiyo jumaco ku jumamon ceke ku copo ma rom mi nyang’ i lemandha mi Biblia man mi kwanyu lapor mi kurayung pare. Eneno bende yiyoyic mi jumaco ku mi jumamon ceke i ayi ma rom, kadok gitie ku genogen mi kwo rondo ku rondo iwi ng’om m’udoko ni paradizo kunoke mi bedo jubim man julam i polo. Ubenen kamaleng’ nia Yehova nyutho ngo akoyakoya ni jumamon.
(Ewinjogi. Yehova dieng’ i kum kite ma jumamon giwinjiri ko man i peko migi. Ku lapor, ewinjo rwo pa Racel man pa Ana, man edwoko wang’gi. (Tha. 30:22; 1 Sam. 1:10, 11, 19, 20) Etelo bende wi jugor Biblia ku tipo pare ma leng’ pi nikiewo kpawa mi jumaco ma giwinjo jumamon. Ku lapor, Abraham uworo telowic pa Yehova m’uwacu nia ewinj Sara ma min ot pare. (Tha. 21:12-14) Ubimo Daudi uwinjo Abigail. Enyang’ nia Yehova re m’uore ebin ewec i bang’e. (1 Sam. 25:32-35) Yesu m’ulubo lapor mi kurayung pa Won tap tap de uwinjo Maria ma min. (Yoh. 2:3-10) Lapor maeno ceke ubekonyowa ninyang’ i yo acel ma Yehova nyutho i iye woro ni jumamon, niwacu ewinjogi.
Egenogi. Ku lapor, Yehova ubino ku genogen iwi Eva nia ebigwoko ng’om zoo. (Tha. 1:28) E kumeno enyutho nia won ot pare m’Adamu dit ungo nisage, ento nia etie jakony m’uromo kude. Yehova ubino bende ku genogen iwi Debora giku Hulda ma gibino jubila ma mon nia gibimiyo juk ni dhanu pare, man bende ni jabim man jalam moko. (Pok. 4:4-9; 2 Ub. 22:14-20) Tin Yehova utie ku genogen iwi jumamon ma Jukristu nia gibitimo tic pare. Nyimego maeno ma weg bedopwe gibedo jurwey lembanyong’a, juyab yo, man jumisioner. Gikonyo i tic mi kubo pla, mi giero man mi gwoko Udi Ker ku Udi mange ma filial tiyo ko. Jumoko m’i kindgi gitimo i Bethel; jumange ke gitimo i biro mi loko dhok. Nyimego maeno gitie calu udul mony ma dit ma Yehova ubetiyo ko kara yeny pare upong’. (Zab. 68:11) Ubenen kamaleng’ nia Yehova neno ngo nia jumamon gi ng’ic kunoke nia tego migi mbe.
UMEGO GICOPO PONJO NENEDI NITIYO KU JUMAMON CALU YEHOVA?
Umego, kara wanyang’ nia nyo andha wabetiyo ku nyimego mwa calu Yehova, mito wang’ii kilili mandha i paru man timo mwa. Pi nitimo kumeno, watie ku yeny mi kony. Tap calu ma munganga copo tiyo ku macin pi ning’eyo twoyo m’ubesendo adundewa, jarimo mandha man Lembe pa Mungu bende copo konyowa ninyang’ i pidoic ma rac m’upondo i adundewa i kum jumamon. Dong’ wacopo timo ang’o pi ninwang’u kony maeno?
Penj jarimbi moko mandha. (Rie. 18:17) Wacopo penjo jarimbwa moko ma wageno m’utie dhanu ma yoo man ma i lembe pare tek ungo ku penji ma e: “Ibeparu nia abed atiyo ku nyimego nenedi? Nyo gibed giyero de nia aworogi? Nyo ukwayu atim alokaloka moko i ayi m’akwo ko kugi?” Ka jarimbine unyutho lembe moko ma mito itim alokaloka i iye, kud icer beng’i. Ento, bed ayika nitimo alokaloka m’ukwayere.
Ponj Lembe pa Mungu. Yo ma ber m’usagu zoo ma wacopo ng’eyo ko ka nyo wabetiyo ku nyimego mwa ma ber utie ning’iyo i paru man timo mwa nimakere ku Lembagora. (Ebr. 4:12) Ka wabeponjo Biblia, waponjo lembe iwi jumaco ma gitiyo ma ber ku jumamon man iwi ju ma gitiyo kugi rac. I ng’eye, wacopo poro timo migine ku mwa. M’umedo maeno, ning’iyo i verse ma tung’ tung’ mi Biblia copo cerowa ku cungo iwi paru ma rac ma watie ko iwi jumamon, ma wawodho kud i giragora moko acel. Ku lapor, 1 Pethro 3:7 uyero nia jumii yung ni dhaku “calu ni agulu ma ng’ic lee.” b Nyo eno ubenyutho nia dhaku nok, rieko pare ujwik, kunoke copo pare ujwik nisagu pa nico? Tak de ngo! Kepor wec pa Pethro eno ku lembe ma Jugalatia 3:26-29 uyero ma nia Yehova ung’iyo jumamon ku jumaco ceke kara gibim karacelo ku Yesu i polo. Ka wabeponjo Lembe pa Mungu man wabepenjo jarimbwa moko mandha ukeunyuth iwa kite ma watiyo ko ku jumamon, wacopo ponjo ninyutho woro mandha ni nyimego mwa.
JUDONG COKIRI GINYUTHO WORO NENEDI NI NYIMEGO ?
Kara umego giponj nitiyo ku nyimego ku woro, gicopo lubo bende lapor mi judong cokiri ma jumer. Judong cokiri ginyutho nenedi nia gitie ma kwong’a i nyutho woro ni nyimego? Wakewec iwi yone moko.
Gifoyo nyimego. Jakwenda Paulo uweko lapor ma ber ni judong cokiri. Efoyo nyimego dupa kamaleng’ i barua m’ekiewo ni cokiri mi Roma. (Rum. 16:12) Iparu nia nyimego maeno ginwang’u anyong’a rukani kinde ma jubesomo barua pa Paulo eno i wang’ cokiri ceke? Kumeno bende, judong cokiri gifoyo nyimego ku cwinygi ceke pi kurayung migi ma beco man pi tic ma gibetimo ni Yehova. Lembuno konyo nyimego ninyang’ nia pigi tie tek i cokiri man nia juworogi. Wec mi tielocwiny m’uai kud i dhu jadit cokiri romo bedo tap gin ma nyimego gitie ku yenyne kara gimediri nitimo ni Yehova ku bedopwe.—Rie. 15:23.
Bed ifoy nyimego
Kinde ma judong cokiri gibefoyo nyimego, giweco i ayi ma ber man iwi lembe moko ma segi ma gitimo. Pirang’o? Nyamego moko ma nyinge Jessica uyero kumae: “Etie ber kan umego gibeyero ni nyamego nia, ‘wafoyo tic.’ Ento wanwang’u tielocwiny lee kan umego gibefoyowa pi lembe moko ma segi, calu ve pi kite ma waponjo ko awiya mwa kara gibed gibed yoo i coko kunoke pi saa ma wating’o pi nicigamu japonj Biblia moko ubin i coko.” Ka judong cokiri gibefoyo nyimego pi lembe
moko ma segi ma gitimo, giketho nyimego giwinjiri nia pigi tie tek man nia kakagi nuti i cokiri.Giwinjo nyimego. Judong cokiri ma weg jwigiri ging’eyo nia gin kendgi ngo re ma giwodho paru ma cuu. Gikwayu nyimego de gimii paru migi man giwinjogi kilili kinde ma gibeweco. E kumeno, judong cokiri gitielo cwiny nyimego man gin gigi de ginwang’u bero. Nenedi? Jadit cokiri moko ma timo i Bethel ma nyinge Gerardo uyero kumae: “Anwang’u nia nibepenjo paru mi nyimego ukonya nitimo tic para cuu nisagu. Wang’ ma pol, nwang’ere nia giriyo i tic moko nisagu umego.” I cokiri, nyimego dupa gitie juyab yo; pieno inwang’u nia ging’eyo lembe lee iwi dhanu mi kabedo ma gikwo i iye. Jadit cokiri moko ma nyinge Bryan uyero kumae: “Nyimego mwa gitie ku piny dupa ma gicopo miyo ni dilo mwa. Pieno, ii niwang’u bero i bang’gi!”
Bed iwinj nyimego
Judong cokiri ma riek gikadhu ngo nyamalu malu kud iwi paru ma nyimego gimiyo. Pirang’o? Jadit cokiri moko ma nyinge Edward uyero kumae: “Paru pa nyamego man lembe m’ekadhu kud i iye copo konyo umego nineno lembe moko i zoone, man ninyang’ i kite ma jumange giwinjiri ko.” (Rie. 1:5) Kadok nwang’u jadit cokiri bitiyo ngo ku paru ma nyamego moko ubemiyo de, ukwayu efoye asu pi parune man pi nyang’ pare.
Giponjo nyimego. Judong cokiri ma riek gisayu kaka mi ponjo nyimego. Ku lapor, gicopo ponjogi kud ayi ma giromo telo ko wi coko mi tic mi lembanyong’a i saa m’umego m’ulimo bibedo mbe. Gicopo ponjogi bende nitiyo ku jamtic kunoke macin ma tung’ tung’ kara gikony i tic mi giero man mi yiko kum udi mi dilo mwa. I Bethel, umego ma gineno wi tic giponjo nyimego ku tic dupa, calu ve tic mi yiko kum udi, mi ng’iewo piny, mi timo kwan mi sente, mi tiyo ku ordinater, ku mange bende. Ka judong cokiri gibeponjo nyimego, ginyutho nia gibenenogi ni dhanu m’uromo man ma jugeno.
Bed iponj nyimego
Nyimego ma dupa gitiyo ku ponji ma ginwang’u i bang’ judong cokiri pi nikonyo jumange. Ku lapor, nyimego moko gitiyo ku bodho migi mi giedo pi nikonyo jumange nidok giero udi migi kendo i ng’ey peko ma wok rek. Jumange gitiyo ku bodho ma juponjo kogi i tic mi rweyo lembanyong’a kaka ma dhanu pong’ i iye, pi niponjo nyimego mange dupa. Nyimego gineno judong cokiri m’uponjogi nenedi? Nyamego moko ma nyinge Jennifer uyero kumae: “Kinde ma wabino giero Ot Ker moko, umego acel ma janen wi tic uting’o saa ma lee pi niponja. Ebed eneno tic m’abetimo man efoya pire. Abed amaru nitimo karacelo kude pilembe abed awinjara nia pira tie tek man nia jugena.”
BERO MA WANWANG’U KA WABEKWO KU NYIMEGO CALU WEDI MWA MA BUU
Wamaru nyimego mwa ma weg bedopwe calu Yehova! Pieno, wakwo kugi calu ve gitie wedi mwa ma buu. (1 Tim. 5:1, 2) Pigi tie tek i iwa man wamaru nitimo kugi karacelo. Wabedo bende kud anyong’a lee ka ginyang’ nia wamarugi man wabekonyogi. Nyamego moko ma nyinge Vanessa uyero kumae: “Abedwoko foyofoc ni Yehova pilembe atie acel m’i kind dhanu mi dilo pare m’upong’ kud umego ma gitielo cwinya lee mandha.” Nyamego moko mi Taïwan ke uyero kumae: “Atie ku foyofoc ma lee nia Yehova ku dilo pare gineno nia pi jumamon utie tek man ginyang’ i kite ma giwinjiri ko. Lembuno tielo yiyoyic para man ketho anwang’u nia etie rwom ma yerere ngo nibedo acel m’i kind dhanu mi dilo pa Yehova.”
Anyong’a nego Yehova lee mandha kinde m’ebeneno nia umego ma weg bedopwe gibeii nineno man nitiyo ku jumamon calu en! (Rie. 27:11) Umego moko mi ng’om mir Écosse ma nyinge Benjamin uyero kumae: “Jumaco ma dupa mi ng’om maeni gicayu jumamon. Pieno, kinde ma nyimego mwa gin’i Ot Ker, wamito ginen lembe m’ukoc.” Dong’ wek wan ceke watimu kero walub lapor pa Yehova ma nwang’u wabetiyo ku nyimego mwa ku mer man ku woro ma giromo ko.—Rum. 12:10.
a I thiwiwec maeni, wec ma nia “nyimego” ubenyutho akeca nyimego ma Jukristu ento ungo wedi pa ng’atini ma buu.
b Pi ninwang’u lembe ma jukoro i thucne iwi wec ma nia “agulu ma ng’ic lee,” som thiwiwec m’uwacu: La valeur d’“ un vase plus faible ” i Otkur ma Wiw mi nindo 15, dwi mir 5, 2006, man “De sages conseils pour les couples” i Otkur ma Wiw mi nindo 1, dwi mir 3, 2005.