THIWIWEC MIR 3
WER 124 Wagwok bedoleng’ mwa
Yehova bikonyi i saa mi peko
“[Yehova] en e ot ma tek para ma wiu; cwinya biringo hai ungo.”—ZAB. 62:2.
I ADUNDO
Lembe ma wacopo timo pi ninwang’u kony pa Yehova i saa mi peko.
1-2. Jutic pa Yehova ma weg bedopwe giromo nwang’iri ku peko ma kanigi?
PEKO ma lith m’uwok i wiwa copo loko kwo mwa mbwang’. Ku lapor, junwang’u nia umego moko ma won yiyoyic ma nyinge Luis a utie ku kit kanser moko m’unyay ungo lee. Dokter uyero ire nia ebikwo pi nyathi dwi moko kende. Monika giku won ot pare gibed gimiyiri lee i lembe mi tipo. E ceng’ acel, enyang’ nia karaman won ot pare ma tie jadit cokiri betimo dubo i aponda, ke pi oro ma dupa. Jukwayu nyamego moko ma jamusuma ma nyinge Olivia nia ewok nyapio pio kud i ot pare pilembe wavuvu ma tek ubebino koto. Kinde m’edok, enwang’u yamu urungo ot pare. Pi saa ma nyanok kende ci, kwo mi dhanu maeno zoo ulokere i ayi ma yerere ngo. Nyo in de idaru nweng’iri ku peko moko m’uloko kwo peri mbwang’ kumeni?
2 Kadok nwang’u watie jutic pa Yehova ma weg bedopwe, wan de wanwang’ara ku peko man remokum calu dhanu mange ceke. Waromo ciro bende jai kunoke ragedo mi judegi mwa. I andha, Yehova goyo ngo gang’ i kumwa ni peko ma kumeno, re eng’olo nia ebikonyowa. (Isa. 41:10) Ku kony pare, wacopo gwoko anyong’a mwa, wamaku yub ma beco, man wagwoko bedoleng’ mwa ire kadok ku kind lembe ma kwar nisagu. I thiwiwec maeni, wabiweco iwi yo ang’wen ma Yehova konyowa i igi saa ma peko uwok i wiwa. Wabineno bende gin m’ukwayu watim kara wanwang’ kony m’emiyo.
YEHOVA BIGWOKI
3. Ka wabekadhu kud i peko moko ma lith, eromo bedo iwa tek nitimo ang’o?
3 Ka wabekadhu kud i peko moko ma lith, eromo bedo iwa tek niparu lembe cuu man nimaku yub. Pirang’o? Pilembe i saa ma kumeno waromo winjo litho ma lee i cwinywa, wiwa de romo nyothere. Waromo nwang’ara ve warwinyo i kind utor, ma wang’eyo ngo yo ma wakwany. Kenen kite ma nyimego ario ma walar waweco pigi giwinjiri ko i saa ma gin’i peko. Olivia uyero kumae: “Ing’ey ma yamu ma tekne urungo ot para, anwang’ara ve arwinyo man ve wiya de upong’o lee.” Monika ke uyero pir abor pa won ot pare kumae: “Anwang’u acidi ma porere ngo. Udok ubedo ve ng’atu moko ucobo adundena ku pala. Edoko ira tek nitimo kadok tic ma kubang’ ceng’. Lembe m’abed aparu ngo apara de nia copo wok i wiya re m’unwang’a.” Yehova ung’olo nia ebikonyowa nenedi i saa ma peko ubenurowa i iye?
4. Nimakere ku Jufilipi 4:6, 7, Yehova ung’olo ang’o iwa?
4 Gin ma Yehova timo. Eng’olo nia ebimiyo iwa gin ma Biblia ulwong’o “kwiyocwiny pa Mungu.” (Som Jufilipi 4:6, 7.) Kwiyocwiny maeno utie kite ma cwinywa poto ko man ma paru mwa cungo ko ting’, ke pilembe watie ku winjiri ma ceng’ini kude. Kwiyocwinyne “ukadhu gin ceke ma jucopo nyang’ i iye”; e ber nisagu gin ceke ma wacopo paru. Nyo saa moko idaru nwang’u de nia kumi upoto i ng’ey m’irwo i bang’ Yehova kud adundeni ceke? Ng’ey nia eno ubino “kwiyocwiny pa Mungu.”
5. Kwiyocwiny pa Mungu gwoko adundewa man pidoiwa nenedi?
5 Giragora ma rom eno uyero nia kwiyocwiny pa Mungu “bigwoko” kunoke bikuro “adundewu man pidoiwu.” Wec mi dhu Jugiriki ma juloko nia ‘nigwoko’ ubino wec mi juaskari man jubed jutiyo kude pi niweco iwi juaskari ma gibekuro kum adhura man gibegwoke ni ariti. Dhanu mir adhura ma jubekuro kume gibed ginindo ku kwiyocwiny, ma ging’eyo nia udul mony ni dhugang’. Rom rom kumeno, ka kwiyocwiny pa Mungu ubegwoko adundewa man pidoiwa, kumwa poto, ma wang’eyo nia watie museme. (Zab. 4:8) Calu Ana, kadok nwang’u peko mwa uthum ungo ndhundhu de, asu wacopo bedo ma kumwa upoto. (1 Sam. 1:16-18) Man ka kumwa upoto ke, wang’ ma pol ebedo iwa yot niparu lembe ma ber man nimaku yub mi rieko.
Rwo nitundo inwang’ nia “kwiyocwiny pa Mungu” ubegwoko adundeni man pidoii (Nen udukuwec mir 4-6)
6. Wacopo timo ang’o pi ninwang’u kwiyocwiny pa Mungu? (Nen bende cal.)
6 Gin m’ukwayu watim. Kinde ma wii ujebere, ting’ dwendi pi nikwayu kony. Nenedi? Rwo nitundo inwang’ kwiyocwiny pa Mungu. (Luka 11:9; 1 Thes. 5:17) Luis ma wadaru weco pire ukoro gin ma gitimo giku Ana ma min ot pare kinde ma giwinjo nia edong’ ku nyathi dwi moko kende pi nikwo. Eyero kumae: “I saa ma kumeni, ebedo tek magwei nimaku yub iwi thieth ku lembe mange. Ento rwo ukonyowa nibedo ku kwiyocwiny.” Luis giku min ot pare giyero nia gibed girwo lee mandha man thiri thiri, ma gibekwayu Yehova umii igi kwiyocwiny mir adunde man rieko pi nimaku yub ma beco. E ekonyogi. Tek ibekadhu kud i peko ma tek, rwo areri, e ibineno nia kwiyocwiny pa Mungu ubegwoko adundeni man pidoii.—Rum. 12:12.
YEHOVA BIKETHO ICUNG MA TEK
7. Waromo winjara nenedi kinde ma wabekadhu kud i peko ma teki?
7 Ka wabekadhu kud i peko moko ma tek, kite ma wabewinjara ko, paru mwa man timo mwa romo koc ku ma naka. Tap calu meli ma mujanga ubethoro kun ku kun, wan de waromo winjara i ayi ma tung’ tung’. Ana ma wadaru weco pire uyero nia ewinjere i ayi dupa i ng’ey tho pa Luis. Eyero kumae: “Saa moko awinjara ve atie vogolo, saa mange ke kisa nega i kuma gira. Saa mange lundo ng’eicwiny maka nia eweka nedi.” M’umedo maeno, Ana ubed unwang’ere nia etie kende, man nia eromo ngo nimaku yub iwi lembe ma Luis ubed udaru en. Pieno saa moko ebed enwang’ere ve yamu ubekoto i wiye iwi pii. Yehova konyowa nenedi kinde ma pidoic ma kumeno ubethung’owa?
8. Nimakere ku Zaburi 62:2, Yehova ubetielo cwinywa nenedi?
8 Gin ma Yehova timo. Ebetielo cwinywa nia ebiketho wacung ma tek. (Som Zaburi 62:2.) Ka wavuvu ubekoto iwi meli, ecaku thorere kun ku kun. Kara enyeg ku lembuno, juyiko piny moko ve vombe i ng’ete ario zoo ku yor i the pii. Pinyne giketho meli thorere ngo akeca. E kumeno kwo mi dhanu m’i iye bedo museme man peko bedo mbe akeca i wothne. Re kara pinyne gikony meli ma ber, mito ewoth medere i wang’e. Kumeno bende, Yehova biketho wacung ma tek nwang’u wabemedara nigwoko bedoleng’ mwa ire i saa mi peko.
Tii ku jamtic mwa mi timo sayusac pi nicungo ma tek (Nen udukuwec mir 8-9)
9. Jamtic mi timo sayusac copo konyowa nenedi nicungo ma tek i saa mi peko? (Nen bende cal.)
9 Gin m’ukwayu watim. Kan ibewinjiri ve in’i wavuvu ma tek, tim tego imediri ku ng’iyo peri mi tipo. I andha re, saa moko ecopo bedo iri tek nitimo lembe calu m’i wang’e, ento poy nia i lembe pa Yehova tek ungo. (Nen lembe m’uyenyo rombo kude i Luka 21:1-4.) Bed bende ku ng’iyo mi timo ponji peri ma segi man mi nyamu i lembe. Pirang’o? Pilembe nikadhu kud i dilo pare, Yehova umiyo iwa thiwiwec ku video dupa ma copo konyowa nicungo ma tek i saa mi peko. Pi ninwang’u gin m’itie ku yenyne, tii ku jamtic mi timo sayusac m’unuti i dhok m’inyang’ i iye, calu ve aplikasio JW Library, Index des publications des Témoins de Jéhovah, man Buku mi timo sayusac mi Jumulembe pa Yehova. Monika ma wadaru weco pire uyero nia ebed elokere i bang’ jamtic mi timo sayusac pi ninwang’u juk kinde m’ebewinjo nia can m’i cwinye ubecikadhu mukero. Ku lapor, ebed etimo sayusac iwi “ng’eicwiny” (colère). I saa mange, ebed etimo sayusac iwi “acibe” (trahison) kunoke “gwoko bedoleng’” (fidélité). E esomo piny nitundo ewinjere ma ber. Eyero kumae: “Kan acaku timo sayusac, can m’i iya thum, awinjara ve Yehova ugwaka i kore. Kan abemedara ku som, aneno nia ebenyang’ i ayi ceke m’abewinjara ko man nia ebekonya.” Kony ma kumeno m’uia i bang’ Yehova copo miyo iri tego pi nibimo wi kite m’ibewinjiri ko nitundo m’inwang’ kwiyocwiny.—Zab. 119:143, 144.
YEHOVA BIJENGI
10. Waromo winjara nenedi i ng’ey ma wakadhu kud i peko moko ma lith lee?
10 I ng’ey ma wakadhu kud i peko moko ma lith lee, waromo nwang’u nia wavoc pi kare m’ulwar. Waromo winjara ve jaring ng’wec moko m’unwang’u ret, ma naka ubed uringo ma tek, re dong’ kawoni ebekomo akoma. Eromo doko iwa tek nitimo tic m’ubino iwa yot i wang’e, kunoke wabedo mbe kud ava ma lee mi timo gin ma con ubed unyang’uwa. Calu Eliya, wacopo nwang’u nia etie iwa tek niai malu. Saa moko wabedo kende kende ku yeny mi nindo. (1 Ub. 19:5-7) Yehova ung’olo nia ebitimo ang’o kinde ma wabenwang’u nia wavoci?
11. Yehova konyowa i yo mange ma kani? (Zaburi 94:18)
11 Gin ma Yehova timo. Eng’olo nia ebijengowa. (Som Zaburi 94:18.) Tap calu ma jaring ng’wec m’unwang’u ret bedo ku yeny m’ejengere ko i kum piny moko pi niwotho, wan de waromo bedo ku yeny mi kony kara wamedara ku tic pa Yehova. I saa ma kumeno, Yehova ubetielo cwinywa kumae: “An, Yehova, Mungu peri, abimaku cingi ma yor acwic, m’awacu ko iri kumae, lworo kud unegi; abikonyi.” (Isa. 41:13) Ubimo Daudi unwang’u tap kony ma kumeno. Kinde m’ebino i peko man i wang’ jukwor pare, eyero ni Yehova kumae: “Cingi ma yor acwic uting’a malu.” (Zab. 18:35) Yehova jengowa nenedi?
Jol kony mi wedi peri, mi jurimbi man mi judong cokiri (Nen udukuwec mir 11-13)
12. Yehova copo tiyo ku jukani pi nikonyowa i saa ma wavoc i iye?
12 Wang’ ma pol, Yehova tiyo ku jumange pi nijengowa. Ku lapor, kinde ma Daudi unwang’ere nia evoc, jarimbe ma Yonathan ucidh uliewe pi nimiyo ire tego man nitielo cwinye. (1 Sam. 23:16, 17) I ayi ma rom eno, Yehova utiyo kud Elica pi nikonyo Eliya. (1 Ub. 19:16, 21; 2 Ub. 2:2) Tin eromo tiyo ku wedi mwa, jurimbwa kunoke judong cokiri pi nitielowa. Re ka can n’i cwinywa, waromo bedo ku pidoic mi koyara cen; wamito wabed kendwa. Etie rac ungo niwinjiri kumeno. Dong’ wacopo timo ang’o pi ninwang’u kony pa Yehova?
13. Ukwayu watim ang’o kara wanwang’ kony pa Yehova? (Nen bende cal.)
13 Gin m’ukwayu watim. Nyeg i kum pidoic mi koyiri kendi. Ka wakoyara kendwa, wacaku paru kwa piwa giwa man pi peko mwa. Paru ma kumeno copo bedo ku matoke ma rac iwi yub mwa. (Rie. 18:1) Saa moko re wabedo ku yeny mi bedo kendwa, asagane ka watuc ninwang’ara ku lembe ma tek lee. Ento ka wakoc ku jumange pi kare m’ulwar, waromo uro yo ma Yehova ubetiyo ko pi nikonyowa. Pieno kadok nwang’u peko perine lith rukani de, jol kony mi wedi peri, mi jurimbi man mi judong cokiri. Nen nia Yehova ubetiyo kugi pi nikonyi.—Rie. 17:17; Isa. 32:1, 2.
YEHOVA BIJUKO CWINYI
14. Lembang’o ma romo nyayu lworo i iwa?
14 Saa moko waromo kadhu kud i lembe ma nyayu lworo. I Biblia, jutic pa Yehova ma weg bedopwe giweco pi saa ma ginwang’iri i iye ku can man ku lworo nikum judegi migi kunoke peko mange. (Zab. 18:4; 55:1, 5) Wan bende wacopo nwang’ara i wang’ jai mi wedi mwa, pa gavmenti, i somo, kunoke i kaka tic. Lworo pa tho de romo negowa nikum twoyo moko m’ubesendowa. I saa ma kumeno waromo nwang’u nia kony mwa mbe, ve watie nyathin ma nyanok. Yehova konyowa nenedi i saa ma kumeno?
15. Zaburi 94:19 ubemiyo iwa tielocwiny ma kani?
15 Gin ma Yehova timo. Ejuko man ekwiyo cwinywa. (Som Zaburi 94:19.) Zaburi maeni copo ketho waparu pi nyathi nyaku moko ma lworo ubenego man ma nindo ukeng’ i wang’e nikum yamu ma tek m’ubekoto. Wakepar nia won umondo i bang’e, eting’e, man egwake i kore cil m’enindo. Kadok fodi yamune ubeyengo piny asu de, re enwang’u jukocwiny man ewinjere nia etie agwoka i kor won. Ka wan’i peko m’ubenyayu lworo i iwa, waromo bedo ku yeny ma nia Wegwa m’i polo ugwakwa i kore i ayi mi lapor cil ma cwinywa ukwii ko. Wacopo nwang’u jukocwiny ma kumeno nenedi i bang’ Yehova?
Wek Wuru m’i polo ujuk cwinyi nikadhu kud i Lembagora (Nen udukuwec mir 15-16)
16. Wacopo timo ang’o pi ninwang’u jukocwiny ma Yehova miyo? (Nen bende cal.)
16 Gin m’ukwayu watim. Bed inwang’ saa mi bedo nja ku Yehova ku yore mi rwo man som Lembe pare. (Zab. 77:1, 12-14) E kumeno kinde ma cwinyi ung’abere, gin ma kwong’a m’ibibelar timo bibedo nilokiri i bang’ Wuru m’i polo. Kor ire gin m’ubenyayu lworo i ii man m’ubedieng’o cwinyi. Winje man wek ejuk cwinyi nikadhu kud i Lembagora. (Zab. 119:28) Nisomo theng Biblia moko kende de copo juko cwinyi lee mandha kinde ma lworo ubenegi. Ku lapor, iromo nwang’u tielocwiny i buku pa Yob, i Zaburi, i Lembrieko man bende i wec pa Yesu ma nwang’ere i Matayo thek 6. Kan iberwo i bang’ Yehova man ibesomo Lembe pare, ibinwang’u jukocwiny pare.
17. Cwinywa copo bedo tek i kum lembang’o?
17 Wacopo bedo ku tegocwiny nia Yehova bibedo karacelo kudwa i saa ma peko uwok i wiwa. Wabibedo ngo kendwa nyanok de. (Zab. 23:4; 94:14) Eng’olo nia ebigwokowa, ebiketho wacung ma tek, ebijengowa man ebijuko cwinywa. Isaya 26:3 uyero pi Yehova kumae: “Ibigwoko ng’atu ma pidoie moko i kumi i kwiocwiny ma ndhu cu; kum egeni.” Pieno keth genogen peri iwi Yehova man tim tego inwang’ bero i kum yo m’etiyo ko pi nikonyi. Tek itimo kumeno, ibinwang’u tego peri kendo kadok i saa mi peko.
ICOPO DWOKO NENEDI?
-
Waromo bedo ku yeny mi kony pa Yehova asagane i saa ma kani?
-
Yehova konyowa i yo ang’wen ma kani i saa mi peko?
-
Wacopo timo ang’o pi ninwang’u kony pa Yehova?
WER 12 Mungu ma dwong’ en e Yehova
a Juloko nying’ moko.