1, 2. (a) Alokaloka ma rek copo bedo ku matoke ma nenedi i wiwa? (Nen cal mir acaki.) (b) Nimakere ku Zaburi 131, ang’o ma copo konyowa kara wabed asu ku kwiocwiny i adundewa?

UMEGO Lloyd giku min ot pare Alexandra gitimo i Bethel pi oro ma kadhu 25, i ng’eye juorogi ni juyab yo. Saa ma giwinjo lembene can umondo i igi. Lloyd uyero kumae: “Abed anwang’u nia ve Bethel utie thuwa. Saa m’alokaloka ugam uwok, anyang’ ma ber i thelembene, re i ng’ei dwi moko, acaku nwang’u nia ve jubaya abaya.” Umego Lloyd ular ubino ku paru ma ber iwi alokaloka maeno, ento i ng’eye cwinye udok utur.

² Tin, alokaloka ma rek copo wok saa moko ci i kwo mwa, man eromo nurowa ku pidoic man adieng’acwiny. (Rie. 12:25) Dong’ wacopo timang’o kara cwinywa kud ung’abere kinde m’alokaloka uwok rek i kwo mwa, man ning’iyo kude ubesendowa? (Som Zaburi 131:1-3.) Wakenen kite ma jutic pa Yehova moko mi rundi ma con, ku mi rundi mwa eni, gigam gigwoko ko kwiocwiny migi saa m’alokaloka wok rek i kwo migi.

3. Kwo pa Yosefu ugam ulokere rek nenedi?

³ Wakenen lapor pa Yosefu. I kind awiya pa Yakobo zoo, Yosefu ubino nyathin ma kacwinye. Eno uketho umego pare gigam gidage lee dit. Kinde ma oro pare doko 17, gilwore ni ng’eca. (Tha. 37:2-4, 23-28) Pi oro ma romo 13, eneno can m’alila i Misiri bor ku won m’emaru: elar ebino ng’eca, i ng’eye ke jubole i kol. Nwang’u lembe maeno copo nyayu ng’ecwiny i ie, man copo ketho eparu nia genogen umbe ire. Ento etimo kumeno ngo. Dong’ ang’o m’ugam ukonye ke?

4. (a) Yosefu utimang’o kinde m’ebino i prizo? (b) Yehova udwoko wang’ rwo pa Yosefu nenedi?

⁴ Kinde ma Yosefu ubedo tagu i prizo, m’umbe jiji, eketho pare zoo i kum kite ma Yehova ubino konye ko. (Tha. 39:21; Zab. 105:17-19) Saa moko nyo epoi bende i kum lek m’egam eleko ma fodi e nyathin, pieno enwang’u nia Yehova ni kude. (Tha. 37:5-11) Bende copere nia ebed erwo wang’ ma pol man ebed ekoro adieng’a mir adundene ceke ni Yehova. (Zab. 145:18) Yehova ugam udwoko wang’ rwo pa Yosefu: etielo cwinye nia ebibedo “i bang’e,” niwacu ebibedo karacelo kude kadok ebekadhu kud i peko ma rukani de.​—Tic. 7:9, 10. *

5. “Kwiocwiny pa Mungu” copo konyowa nenedi?

⁵ Kadok nwang’u wabeii ku lembe ma pek rukani de, asu wacopo bedo ku “kwiocwiny pa Mungu” ma gwoko ‘adundewa ku pidoiwa’ man ma ketho cwinywa kwio. (Som Jufilipi 4:6, 7.) Saa m’adieng’a man apidacwiny ubenurowa, “kwiocwiny pa Mungu” copo mio iwa kero kara kud wavoci nitimo ni Yehova. Wakenwang’ ponji i bang’ umego ku nyimego mi rundi mwa eni, ma gikadhu i lembe ma kumeno.

6, 7. Rwo konyowa nenedi ninwang’u kwiocwiny kendo? Kemii lapor.

⁶ Umego Ryan giku min ot pare Juliette gibino juyab yo ma segi. Kinde ma giwinjo nia tic migine uthum, cwinygi utur mi tuko ngo. Ryan uyero kumae: “Wagam warwo ndhundhu i bang’ Yehova nia emii iwa kero. Waneno nia alokaloka maeno umio iwa kaka ma segi mi nyutho ire nia wagene. Calu ma nwang’u fodi dhanu ma pol mi cokiri mwa giriyo ngo i lemandha, wakwayu Yehova ukonywa wabed igi ni lapor ma ber mi yioyic.”

⁷ Yehova udwoko wang’ rwo migi nenedi? Umego Ryan uyero kumae: “Kinde ma wadaru rwo adara ci, wanwang’u nia paru ma rac man apidaic ma wabino ko uthum. Kwiocwiny pa Mungu ukwio adundewa man pidoiwa. Wanyang’ nia Yehova copo tio kudwa asu tek wamedara nibedo ku paru ma cuu.”

8-10. (a) Tipo pa Mungu konyowa nenedi kinde ma watie kud ang’abacwiny? (b) Mugisa ma kani ma wacopo nwang’u ka waketho wiwa zoo i kum tic pa Yehova?

⁸ Tipo pa Mungu copo kwio cwinywa, man copo telo wiwa ninwang’u verse ma bikonyowa ninyang’ i lembe ma pire tek nisagu zoo i kwo. (Som Yohana 14:26, 27.) Wakenen lembe m’unwang’u umego Philip giku min ot pare Mary, ma gigam gitimo oro ma romo 25 i Bethel. I kind dwi ang’wen kende ci, gin ario zoo meggi utho man wat pa Philip moko de utho; m’umedo maeno, ugam ukwayu bende gigwok won Mary m’abelu tuk i wie.

 ⁹ Philip uwacu kumae: “Ageno nia abeciro peko maenogi cuu i kadiri moko, re karaman lembe moko ugam urem. Kinde m’abino somo Otkur ma Wiw moko mi ponji, apodho iwi verse pa Jukolosai 1:11. I andha, abino ciro, re ceke ceke ngo. Ugam ukwayu anyuth ‘twiocwiny ceke ku mwonyolembe ma jumwonyo hai ku mutoro.’ Verse maeno ukonya ninyang’ nia tipo maleng’ pa Mungu copo ketho abedo kud anyong’a, kadok nwang’u abekadhu i lembe ma tek i kwo para de.”

¹⁰ Calu ma Philip giku Mary giketho wigi zoo i kum timo ni Yehova, egam emio mugisa lee dit igi. Nindo ma nok i ng’ei wok migi kud i Bethel, gin ario zoo gicaku ponjo Biblia ku dhanu moko m’ubino timo mediri pio pio, man dhanune gikwayu nia gibed giponj wang’ dupa i kind yenga. Mary ukoro kumae: “Gibino anyong’a mwa, man ayi ma Yehova unyutho ko iwa nia lembe ceke ubewotho ma ber.”

11, 12. (a) Yosefu utimo lembang’o ma Yehova umio mugisa i wie? (b) Yehova umio mugisa ma kani ni Yosefu?

¹¹ Ka kwo mwa ulokere rek, apidacwiny copo mondo i iwa, man wacopo caku paru kwa pi peko mwa. Copere nia apidacwiny ma kumeno ugam umondo i Yosefu bende. Re kakare niketho wie zoo i kum peko pare, eng’io nitimo lembe m’ecopo. Kinde ma Yosefu ubino i prizo, etimo tic ceke ma jakur prizo umio ire, tap calu m’ebed etimo yo pa Potifar.​—Tha. 39:21-23.

¹² Nindo moko, juketho Yosefu unen wi jumoko ario ma jutwiyo, ma gibed gitimo i lelegang’ pa Farao. Yosefu ubedo ma ber ku juario maeno, uketho gikoro ire pidoic migi ceke, man gikoro ire bende lek m’ubino jebo wigi, ma gileko diewor ma cing’ nica. (Tha. 40:5-8) Yosefu ugam ung’eyo ngo nia wec maeca re ma biketho jubigonye kud i prizo. Oro ario i ng’eye, jugam jugonye man edoko ng’atu ma lee mandha mi Misiri i ng’ei Farao!​—Tha. 41:1, 14-16, 39-41.

13. Kadok wabenwang’ara ku peko, waromo timo lembang’o ma Yehova copo mio mugisa i wie?

¹³ Calu Yosefu, wan bende waromo nwang’ara i lembe moko ma wacopo daru giwa ngo. Ento tek watie jucirlembe man wabeii nitimo lembe moko, Yehova bimio iwa mugisa. (Zab. 37:5) Bende, kadok i saa ma koo koo uketho wiwa unyothere man wiwa jik de, cwinywa ‘biai ungo.’ (2 Kor. 4:8) Yehova bibedo karacelo kudwa, asagane ka wamiyara zoo i tic mwa mi lembanyong’a.

14-16. Kadok nwang’u kwo pa Filipo uwotho lokere de, re emiyere nenedi i rweyo lembanyong’a?

¹⁴ Filipo ma jarwei injili utie lapor ma ber dit iwa, pilembe eweko ngo nirweyo lembanyong’a kadok alokaloka ubed utimere i kwo pare i ayi ma dupa de. Ku lapor, saa moko, ebino timo tic ma nyen ma jumio ire i Yerusalem. (Tic. 6:1-6) E rek kumeni, lembe ujebere. I ng’ei tho pa Stefano, jucaku nyayu ragedo ma lake tek i kum Jukristu, pieno giringo kud i Yerusalem. Re Filipo umito emedere asu ku tic pa Yehova. Pieno, egwaku ngo cinge, ento ecidho i Samaria, kaka ma dhanu ubino ku yeny mi winjo lembanyong’a i ie.​—Mat. 10:5; Tic. 8:1, 5.

¹⁵ Filipo ubino ayika nicidho kaka moko ci ma tipo pa Mungu uore i ie. Pieno, Yehova utio kude pi nirweyo lembanyong’a ni dhanu kaka ma nwang’u fodi jurweyo ngo i ie. Juyahudi ma pol gibed gicenjo Jusamaria acenja man gibed gisendogi. Re Filipo ubino ngo ku kit timo ma kumeno, ento ebed’ayika nirweyo ni Jusamaria. Biblia ukoro nia Jusamaria giwinje “ku cwinygi m’uripo acel!”​—Tic. 8:6-8.

¹⁶ I ng’eye, tipo pa Mungu utelo wi Filipo nicirweyo i adhura mir Azoto man mi Kaisaria, kaka ma dhanu m’ujolo yioyic mi Juyahudi gipong’ i ie. (Tic. 8:39, 40) Saa maeno, alokaloka mange uwok i kwo pa Filipo. Enwang’u nia dong’ ebed magwei kakeca ku juruot pare. Kadok kwo pa Filipo ubed ulokere de, re eweko ngo nirweyo lembanyong’a, man Yehova de umedere nimio mugisa ire ku ni juruot pare bende.​—Tic. 21:8, 9.

17, 18. Wanwang’u bero ma kani ka wabemiyara nirweyo i saa m’alokaloka uwok i kwo mwa?

¹⁷ Umego ku nyimego ma pol ma gibetimo tic mi saa ceke giwacu nia, ka gibemiiri lee i tic mi lembanyong’a, eno bekonyogi nibedo ku paru ma ber man ku mutoro, kadok i saa m’alokaloka uwok i kwo migi. Ku lapor, kinde m’umego Osborne giku dhaku pare Polite ma gibedo i Afrique du Sud giweko Bethel, gigeno nia ebibedo igi yot ninwang’u tic moko ma gicopo timo pi saa ma nok, man ninwang’u ot. Re Osborne uwacu kumae: “Wawok wanwang’u ngo tic ndhundhu calu ma walar waparu.” Polite uyero kumae: “I ng’ei dwi adek de nwang’u fodi wambe ku tic asu; sente de bino mbe ma waromo nikwo ko. Ebino iwa peko ma yawe mbe.”

¹⁸ Dong’ ang’o m’ukonyo Osborne giku  Polite i saa maeno ma kwiny? Osborne uyero kumae: “Rweyo lembanyong’a karacelo ku cokiri uketho wiwa ucungo i kum lembe acel, man ukonyowa nibedo ku nen ma ber.” Kakare nigwaku cing’gi i pacu man nibedieng’ adieng’a, ginwang’u nia ukwayu gimiyiri zoo i nirweyo lembanyong’a. Nitimo lembe maeno umio igi mutoro ma lee dit! Osborne umedo kumae: “Wasayu tic kwakwa, nitundo wabin wanwang’u.”

19-21. (a) Ang’o ma bikonyowa kara wabed asu ku kwiocwiny i adundewa? (b) Wacopo nwang’u mugisa ma kani ka wajolo alokaloka ma rek?

¹⁹ Calu ma waai waneno, ka wabemiyara nitimo lembe ma wacopo i saa ma kwo mwa ulokere mbwang’, wabimedara asu nibedo ku kwiocwiny, kadok nwang’u wanyego ku lembang’o de. (Som Mika 7:7.) Nok nok, wabinyang’ nia kite ma wagam wajolo ko alokaloka uketho mer mwa ku Yehova udoko tek. Nyamego Polite ukoro nia i ng’ei wok migi kud i Bethel, lembe ma gikadhu kud i ie uponje nijengere zoo iwi Yehova, kadok i saa ma kwo utie yot ungo. Eyero kumae: “Mer para ku Yehova udoko tek mandha.”

²⁰ Nyamego Mary ma wadaru weco pire, ubemedere asu nigwoko won man nitimo tic pa jayab yo. Eyero kumae: “Anwang’u nia kan apidacwiny usaga, kwayu abed i ng’om, arwo man wiya wil i kume. Gin ma pire tek m’aponjo utie niweko lembe ceke i cing’ Yehova; eno bibedo ira ku kony kadok i nindo m’ubino de.”

²¹ Umego Lloyd gikud Alexandra ginwang’u nia alokaloka ma gikadhu kud i ie uketho yioyic migi i amulaic i ayi ma nwang’u giparu ngo. Ento kawono gibeneno bero mir amulaic maeno. Ging’eyo nia gitie ku yioyic ma tek ma copo konyogi i saa mi peko, man ginwang’u nia gidoko dhanu ma ber mandha.

22. Ka wabetegara nitimo lembe ma wacopo i saa mi peko, wabinwang’u bero ma kani?

²² I ng’om maeni, kwo mwa copo wilere rek. Jucopo wilo tic ma wabetimo i dilo pa Yehova, remo de copo gonjowa, kunoke saa moko copo kwayu nia wagwok juruot mwa i ayi ma segi. Re kadok ibekadhu kud lembe ma rukani de, ng’ei nia Yehova ubedieng’ piri lee dit man ebikonyi tap i saane. (Ebr. 4:16; 1 Pet. 5:6, 7) Ento pi kawono, tegiri nitimo lembe m’icopo i peko m’ibenweng’iri i ie Kwai Yehova Wegwa mi polo, man jengiri i wie i lembe ceke. Kan ibetimo kumeno, ibimediri nibedo ku kwiocwiny ma Yehova kende re ma mio, kadok i saa mir alokaloka.