1-2. (a) Wec ma kani ma judong ng’om gibiyero kago eni? (b) Ukwayu wadwok wang’ penji ma kani?

KEKETH nia judong ng’om giai giyero wec ma nia “kwiocwiny ku bedomoth” ma wacaku kuro niai con! Saa moko nyo gibigoyo korgi nia gifoketho kwiocwiny mandha iwi ng’om. Gibimito wapar nia gitie ku copo mi daru peko moko ci. Endre gibibedo mbe ku copo iwi lembe ma bilubo! Pirang’o? Pilembe nimakere ku lembila mi Biblia, ‘nyoth bilund bino i wigi ndhu ndhu nica, . . . man gibiboth ki ngo.’​—1 Tes. 5:3.

² Ukwayu wakedwok wang’ penji moko ma e ma pigi tek: (1) Lembang’o ma bitimere i saa mi “masendi ma dit”? (2) Yehova bikwayu nia watim ang’o i saa maeno? (3) Wacopo yikara nenedi tin eni kara wabin wagwok bedoleng’ mwa i saa mi masendi ma dit?​—Mat. 24:21.

3. Nimakere ku Lembanyutha 17:5, 15-18, Mungu bitio ku ng’a pi ninyotho “Babeli ma dit”?

³ Som Lembanyutha 17:5, 15-18. Jubinyotho “Babeli ma dit”! Calu ma wadaru neno, judong ng’om gibibedo mbe ku copo iwi lembe ma bitimere saa nica. Pirang’o? Pilembe “Mungu [biketho] i adundegi nia gitim pidoie.” Pidoic pa Mungune tie ang’o? Utie ninyotho dini ceke mi ndra, uketho i ie bende dinine ma wacu ya gi Jukristu. Mungu biroyo pidoie,  kunoke paru pare i adunde “yedi ma kwar ngbo” man i ‘tunge apar.’ “Yedi” maeno tie ONU, man “tung apar” ubenyutho judong ng’om m’ubetielo yedine. (Nyu. 17:3, 11-13; 18:8) Saa ma judong ng’om maeno gibilokiri i kum dini mi ndra pi ninyothe, eno bibedo acaki mi masendi ma dit. Nyothne biwok rek man ebinyayu ndiri i ng’atu moko ci.

4. (a) Copere nia judong ng’om gibiyero ya ginyotho dini mi ndra pi thelembe ma kani? (b) Saa moko nyo dhanu m’ubed udikiri i dinine gibitimo ang’o?

⁴ Wang’eyo ngo nia judong ng’om gibiyero nia pirang’o gibenyotho Babeli ma dit. Saa moko nyo gibiyero nia jurudini re m’ubecerogi ku ketho kwiocwiny iwi ng’om, man nia gibed giroyo dhoggi i lembgamba. Kunoke nyo gibiyero nia jurudini gicoko lonyo lee dit. (Nyu. 18:3, 7) Ubenen nia judong ng’om gibinyotho ngo dhanu ceke mi dini mi ndra. Ento ve gibinyotho dilo ma tung’ tung’ mi dinine. I ng’ei nyoth maeno, dhanu m’ubed udikiri i dini mi ndra gibinyang’ nia gin ma judongo mi dini migi copo timo umbe; e ve gibimwony nia nwang’u gibino de ngo i dinine.

5. Yehova ung’olo lembanyong’o pi masendi ma dit, man pirang’o?

⁵ Biblia unyutho ngo nia nyoth mi Babeli ma dit biting’o saa ma rukani, ento gin ma wang’eyo utie nia ebimaku ngo saa ma lee. (Nyu. 18:10, 21) Yehova ung’olo nia ‘ebijwigo ceng’’ ma masendi ma dit bimaku, kara ku junyoth “ju ma jugoyo nying’gi” man dini mandha bende. (Mk. 13:19, 20) Re, Yehova bikwayu nia watim ang’o niai i acaki mi masendi ma dit nitundo i lwiny mir Armagedon?

6. Pi ninyutho nia wadaru wok kud i dini mi ndra, ukwayu watim ang’o?

⁶ Calu ma waneno i thiwiwec m’ukadhu, Yehova ubemito jurutic pare giwok kud i dini mi ndra. Ento niwok awoka kende uromo ngo. Ukwayu wamiyara nitimo ni Yehova ku cwinywa ceke. Wakenen yo ario ma wacopo timo ko kumeno.

7. (a) Wacopo nyutho nenedi nia wabecero ba cik ma pwe pa Yehova iwi lembe mi kurajo? (b) Nimakere ku Juebrania 10:24, 25, pirang’o ukwayu wabed wacokara karacelo, man pirang’o pire tie tek nia watim kumeno kawoni?

 ⁷ Mi kwong’o, ukwayu wacer ba cik ma pwe pa Yehova iwi lembe mi kurajo ku tegocwiywa. Wacikara ngo nicwaku timo moko ci mi lembsasa mi ng’om maeni. Ku lapor, wacwaku ngo lembasasa mi tarwang’ mi kwonde moko ci, uketho i ie gamiri co ku co kunoke mon ku mon, ku kit timone mange ma kumeno. (Mat. 19:4, 5; Rum. 1:26, 27) Mir ario, ukwayu wamedara niworo Yehova karacelo ku Jukristu wadwa. Watimo kumeno kaka moko ci ma wacopo, nik’ebed i Ot Ker mwa, i ot p’umego man kadok i aponda kan ukwayere. Kadok lembang’o de, waweko ngo nicokara karacelo kud umego ku nyimego. Wacikara nitimo kumeno kawoni, asagane pilembe ‘wabeneno cenguni dhingo.’​—Som Juebrania 10:24, 25.

8. Copere nia rwonglembe ma waberweyo bilokere nenedi i nindo m’ubino?

⁸ Copere nia rwonglembe ma wabirweyo ni dhanu i saa mi masendi ma dit bikoc. Tin fodi waberweyo lembanyong’a mi Ker pa Mungu man wabetimo kero niketho dhanu udok julub. Ento copere nia i saa maeca, wabirweyo rwonglembe ma kwiny, ma Biblia uporo ku pei ma dongo dongo. (Nyu. 16:21) Saa moko nyo wabirweyo nia i ng’ei nindo ma nok ci, ng’om pa Sitani ubecijik magwei. I ng’ei kare, wabinyang’ nia rwonglembe ma wabirweyone tie ang’o man kite ma bikwayu warweye ko. Nyo wabitio ku bodho ma rom ma wacaku tio ko niai con pi nirweyo lembanyong’a man pi ponjo dhanu? Kunoke nyo wabitio ku bodho mange? Wang’eyo ngo. Kadok wabirweyo nenedi i saa maeno de, ubenen nia wabibedo ku rwom mi twong’o pi pokolembe pa Yehova ku tegocwinywa!​—Eze. 2:3-5.

9. Copere nia thek bitimo ang’o saa ma wabirweyo igi pi pokolembe pa Mungu, ento cwinywa tek i kum lembang’o?

⁹ Ecicopere nia rwonglembe ma wabirweyo eno bicwalu thek nijigo the tic mwa. Ento calu ma tin de wabed wajengara iwi Yehova kara watuc nirweyo lembanyong’a, i nindo maeca de bikwayu wajengara i wie. Wacopo bedo ma cwinywa tek nia Mungu mwa bimio iwa tego kara watuc nitimo yeny pare.​—Mik. 3:8.

10. Nimakere ku Luka 21:25-28, lembe ma bitimere i saa mi masendi ma dit biketho dhanu biwinjiri nenedi?

¹⁰ Som Luka 21:25-28. I saa mi masendi ma dit, i thek biwang’ lii kinde ma gibineno nia ng’om ma nwang’u gigeno nia ucungo, ulund ubenyothere anyotha. Cwinygi ‘bing’abere’ lee mandha man gibinwang’u nia ve gicopo tho rek, kum lembe ma bitimere saa nica fodi utimere ngo niai ma dhanu ucaku kwo iwi ng’om. (Zef. 1:14, 15) I saa maeca, copere kwo bidoko tek kadok ni dhanu pa Yehova bende. Calu ma wabed wamondo ngo i lembgamba mi ng’om, copere nia wabinwang’ara i lembe ma tek. Saa moko nyo wabikoso piny moko ma nwang’u watie ku yenyne.

11. (a) Pirang’o thek man judong ng’om gibigam ketho wang’gi zoo i kum Jumulembe pa Yehova? (b) Pirang’o wacikara ngo nilworo masendi ma dit?

¹¹ Saa ma dhanu ma junyotho dini migi gibinyang’ nia karaman fodi Jumulembe pa Yehova ubemediri asu ku dini migi, lembene biton i igi lee mandha. M’umbe jiji, lembene biketho gibikelo yakini lee mandha kadok cil iwi Internet de. Sitani  ku dhanu pare gibidaguwa magwei pilembe dini mwa kende re m’udong’ ma junyotho ngo. Gibinwang’u nia lembakeca migi mi daru the dini ceke ku wi ng’om fodi upong’o ngo. Pieno, gibigam ketho wang’gi zoo i kum Jumulembe pa Yehova. I saa maeno thek bidoko ni Gog mi ng’om mi Magog. * Gibicoko dhoggi karacelo pi nikelo masendi iwi dhanu pa Yehova ku tego migi ceke. (Eze. 38:2, 14-16) Saa moko lworo copo mondo i iwa ka wabeparu pi lembe ma bitimere i masendi ma dit, asagane pilembe wang’eyo ngo tap tap nia ebibedo nenedi. Ento ukwayu ngo kumwa miel pi lembe ma bitimere i saa nica. Pirang’o? Kum Yehova bimio iwa telowic ma bibodho kwo mwa. (Zab. 34:19) E ‘wabing’ayu wang’wa malu, wabiting’o wiwa malu de’ kum wang’eyo nia ‘war mwa dhingo ceng’ini.’ *

12. ‘Jamiru mandha man ma riek’ ubekonyowa nenedi kara wabed ayika pi lembe ma bitimere i nindo m’ubino?

¹² Niai con, ‘jamiru mandha man ma riek’ ubemedere nikonyowa kara wabin wagwok bedoleng’ mwa i saa mi masendi ma dit. (Mat. 24:45) Ebekonyowa i yo dupa. Kepar pi coko ma dongo mir adhura ma watimo niai i oro 2016 nitundo i oro 2018. I coko maeno, waponjo kite ma tung’ tung’ m’ukwayu wacegi i kwo mwa, kum ceng’ pa Yehova udhingo. Wakedwog kendo iwi kitenegi.

13. Wacopo timo ang’o kara wamedara nigwoko bedoleng’ mwa ni Yehova, man pirang’o kwayu wacak gwoko bedoleng’ mwane tin eni?

¹³ Gwokobedoleng’: Thiwi coko ma dit mir adhura mi oro 2016 ubino “Wamedara nigwoko bedoleng’ mwa ni Yehova!” Korolembe ma tung’ tung’ mi cokone ukonyowa ninyang’ nia kara wagwok bedoleng’ mwa ni Yehova, ukwayu wabed ku winjiri ma ceng’ini kude. Waponjo nia wacopo coro ceng’ini i vut Yehova nikadhu kud i rwo m’uai kud i adunde, man nwang’u wabeponjo Lembe pare aketha cwinywa. Nitimo kumeno bimio iwa tego ma wabiciro ko peko moko ci ma wacopo nwang’ara ko. Calu ajiki mi ng’om pa Sitani ni ceng’ini, ma jiji mbe wabinwang’ara i wang’ lembe ma biketho gwokobedoleng’ mwa ni Yehova i amulaic lee. Ku lapor, copere nia dhanu bimediri nicayuwa. (2 Pet. 3:3, 4) Gibitimo kumeno asagane pilembe wamondo ngo nyanok de i lembgamba. Dong’ ukwayu wacak gwoko bedoleng’ mwa niai kawoni, kara kadok i saa mi masendi ma dit de, wamedara nigwoko bedoleng’ mwa ni Yehova.

14. (a) Alokaloka ma kani ma bitimere pir umego ma gibetelo wi dhanu pa Mungu tin iwi ng’om? (b) Pirang’o bikwayu wagwok bedoleng’ mwa saa nica?

¹⁴ I kind masendi ma dit, alokaloka moko bitimere pir umego ma gibetelo wi dhanu pa Mungu iwi ng’om. I ng’ei saa moko, Jukristu ceke ma juwiro ku tipo ma fodi gini wi ng’om gibicokiri i polo pi nikiedo lwiny mir Armagedon. (Mat. 24:31; Nyu. 2:26, 27) Eno nyutho nia Guriri m’utelo wic bibedo mbe kudwa iwi ng’om saa nica. Ento Yehova bimedere asu nitelo wi udul ma dit. Ebitio kud umego ma giromo ma gini kind rombe mange pi nitelo wi dhanu pare. Bikwayu  wawor telowic ma Yehova bimio nikadhu kud i bang’ umego maenogi, pi ninyutho nia andha wagwoko bedoleng’ mwa ire. Ka watimo kumeno re ma wabiboth!

15. Ukwayu watim ang’o kara wanyuth cirocir saa ceke, man pirang’o ukwayu wacir niai kawoni?

¹⁵ Cirocir: Thiwi coko ma dit mir adhura mi oro 2017 ubino “Kud wavocu!” Coko maeno ukonyowa ninyutho cirocir kadok i kind amulaic ma tek rukani de. Waponjo nia ukwayu ngo lembe ubed miero iwa ka wanyuth cirocir, ento ka wajengara iwi Yehova, wabiciro peko moko ci. (Rum. 12:12) Wiwa kud uwil ku lembe ma e ma Yesu ung’olo: “Ng’atu ma biciro cil i kajikne, ng’atuno biboth.” (Mat. 24:13) Nimakere ku lembang’ola maeno, ukwayu wagwok bedoleng’ mwa saa ceke, kadok kinde ma wabekadhu kud i peko ma rukani de. Tekene wabeciro amulaic moko ci ma wabenwang’ara ko kawoni, masendi ma dit binwang’u yioyic mwa dong’ tek magwei.

16. Wacopo timo ang’o kara wabed ku tegocwiny mandha, man pirang’o pire tie tek nia cwinywa ubed tek niai kawoni?

¹⁶ Tegocwiny: Thiwi coko ma dit mir adhura mi oro 2018 ubino “Cwinyi bed tek”! Korolembe ma tung’ tung’ mi coko maeno ukonyowa ninyang’ nia tegocwiny mandha utie ngo kite ma junyolo ko ng’atini anyola. Calu ma kwayu wajengara iwi Yehova kara wacir peko, kwayu bende wajengara i wie kara wabed ku tegocwiny mandha. Wacopo timo ang’o kara wabed wajengara iwi Yehova saa ceke? Mito wabed wasom Lembe pare kubang’ ceng’, man waketh wiwa i kum ayi ma tung’ tung’ m’ebed ebodho ko dhanu pare con. (Zab. 68:20; 2 Pet. 2:9) Kinde ma thek binyayu masendi i kumwa i saa mi masendi ma dit, wabibedo ku yeny mi tegocwiny, man bikwayu wajengara iwi Yehova nisagu m’i wang’e zoo. (Zab. 112:7, 8; Ebr. 13:6) Dong’ ka wabed wajengara iwi Yehova tin eni, wabibedo ku tegocwiny ma waciro ko masendi ma Gog binyayu i kumwa. *

17. Pirang’o wacikara ngo nilworo Armagedon? (Nen cal m’i ng’eye.)

¹⁷ Calu ma waponjo i thiwiwec m’ukadhu,  ju ma pol m’i kindwa ginyoliri man gikwo kwo migi zoo i nindo mi kajikceng’. Ento watie ku genogen mi both kud i masendi ma dit. Lwiny mir Armagedon bijigo dhu ng’om ma rac maeni pi magwei. Re kadok kumeno de, wambe ku lworo. Pirang’o? Pilembe ebibedo lwiny pa Yehova, wan wabikiedo ngo. (Rie. 1:33; Eze. 38:18-20; Zek. 14:3) Kinde ma Yehova bimio oda ci, e Yesu Kristu bitelo wi udul mony pa Yehova i lwiny maeno. Yesu, karacelo ku Jukristu ma juwiro ku tipo man jumalaika elufu swa gibikiedo i dhu Sitani, pajogi pare man udul asikari mi ng’om maeni.​—Dan. 12:1; Nyu. 6:2; 17:14.

18. (a) Yehova ung’olo lembang’o? (b) Lembanyutha 7:9, 13-17 ubetego cwinyi nenedi pi nindo m’ubino?

¹⁸ Yehova ung’olo kumae: “Jambali moko mbe ma jucwio i kumi ma bibedo miero.” (Isa. 54:17) “Udul dhanu ma dit” ma gigwoko bedoleng’ migi ni Yehova gibikadhu ma kwo kud i “masendi ma dit”! Gibimediri nitimo ni Yehova. (Som Lembanyutha 7:9, 13-17.) Biblia unyutho thelembe dupa m’utego cwinywa nia wabiboth i nindo m’ubino! Wang’eyo nia “Yehova gwoko ju mandha.” (Zab. 31:23) Dhanu ceke ma gimaru Yehova man ma gibepake gibibedo kud anyong’a nineno kite m’ebidwoko ko nyinge leng’.​—Eze. 38:23.

19. Watie ku genogen ma kani pi nindo ma ceng’ini eni?

¹⁹ Kepar pi lembe ma nwang’u giragora pa 2 Timoteo 3:2-5 copo yero ka nwang’u ekoro pi dhanu m’ukwo i ng’om ma nyen ma Sitani ubetelo ngo wigi en. (Nen sanduku ma thiwie tie “ Kura mi dhanu mi ng’om ma nyen.”) Umego George Gangas, m’ubino acel m’i kind umego mi Guriri m’utelo wic ukoro pi ng’om ma nyen kumae: “Ng’ombe bibedo leng’ mi tuko ngo, pilembe dhanu ceke bitimo thier ni Yehova kende! Ceng’ini eni, ibibedo ku rwom mi kwo i ng’om ma nyen. Ibikwo rondo ku rondo, naka ku naka calu Yehova.” Eno tie genogen ma ber mi tuko ngo!