NG’ATU moko ma neno kite ma yamu wotho lokere ko ubelubo yamu iwi macin pare. Ebeneno nia koth moko bibino ku vira ma tek ma binyotho piny swa i adhura moko ma dhanu upong’ lee i ie. Calu edieng’ pi bedomoth mi dhanu, eno uketho emiyere ku tego pare zoo nipoyo dhanu ma fodi dong’ saa moko nuti.

Rom rom kumeno, tin Yehova bende ubetwong’o dhanu pi “wavuvu” moko ma rac nisagu yamu moko ci ma reco ma jucopo twong’o pire i radio. Ebetwong’o dhanu nenedi? Man ang’o m’unyutho nia Yehova uweko saa ma lee ni dhanu kara gitim alokaloka i kwo migi? Pi nidwoko wang’ penji maeno, wakenen kite ma Yehova ubed utwong’o ko dhanu i rundi ma con.

I rundi ma con, Yehova ubed upoyo dhanu pi “wavuvu “ mi pokolembe m’ebikelo iwi dhanu ma gikwero niworo cik pare (Rie. 10:25; Yer. 30:23) Saa ceke, ebed epoyo dhanu maeno i wang’e man enyutho igi gin m’ukwayu gitim pi ninyutho nia gibewore. (2 Ub. 17:12-15; Neh. 9:29, 30) Wang’ ma pol, ebed etio ku jurutic pare ma gigwoko bedoleng’ migi ire kara gipoi dhanu maeno iwi pokolembe pare, man kara gikonygi ginyang’ nia kwayu gitim alokaloka i kwo migi nyapio pio.​—Amo. 3:7.

I kindgi, Noa de ubino ng’atu ma Mungu utio ko pi nitwong’o dhanu pi pokolembe pare. Pi oro ma dupa, Noa ulworo ngo nipoyo dhanu ma kwiny man ma timo migi reco nia pii ma dit biumo ng’om. (Tha. 6:9-13, 17) Bende, enyutho igi gin m’ukwayu gitim kara gibin gibothi kinde ma pii ma dit bicore iwi ng’om. Noa umiyere lee dit nitwong’o dhanu uketho Biblia ulwong’e nia “jayer mi bedopwe.”​—2 Pet. 2:5.

Kadok nwang’u Noa umiyere lee nitwong’o dhanu mi rundi pare de, re giwinjo ngo rwonglembe maeno m’uai i bang’ Mungu. Eno unyutho nia gibino mbe ku yioyic nyanok de. Pieno, githo kinde ma ‘pii ma dit m’uumo ng’om uwok, man uterogi ceke woko.’ (Mat. 24:39; Ebr. 11:7) Kinde m’ajiki migi utundo, gibino mbe ku thelembe mi wak iwi Mungu nia elar epoyogi ngo.

Saa mange ke, Yehova ubed upoyo dhanu nindo ma nok kende i wang’ ma “wavuvu” mi pokolembe pare ucaki. Kadok i saa maeno de, ebed eweko saa lee ni dhanu ma giromo nwang’iri ku peko mananu pilembe jupoyogi ngo, kara gitim ko alokaloka i kwo migi. Con kinde m’ekelo masendi apar iwi Misiri, elar ebed epoyogi i wang’e. Ku lapor, Yehova uoro Musa gikud Harun gicidh ginyuth ni Farao ku jutic pare pi masendi mir abiro, niwacu pei ma rac ma binyotho piny mi Misiri. Calu peine bicaku urwonde, nyo Mungu uweko igi saa ma gicopo nwang’u ko kaka ma givogiri i ie ni pei maeno? Biblia ukoro kumae: “Ng’atu m’ulworo lembe pa Yehova i kind jutic pa Farao eketho jutic pare ku lim pare giringo i udi: man ng’atu m’uparu pi lembe pa Yehova ngo eweko jutic pare ku lim pare i thim.” (Ai 9:18-21) M’umbe jiji, Yehova upoyo dhanu i wang’e kara masendi maeno kud umii peko akeca i kum ng’atu m’uworo dwande nyapio pio.

Ubenen nia jular jupoyo Farao ku jurutic pare pi masendi mir apar. Ento abelu migi uketho giworo ngo cimowang’ ma Mungu umio igi. (Ai 4:22, 23) Eno uketho wodgi ma kayu utho pet. Ebino lembe mi can ma yawe mbe! (Ai 11:4-10; 12:29) Nyo, nwang’u gicopo loko paru migi i wang’e? Eyo! Ndhundhu nica, Musa upoyo nyithindho mir Israel pi masendi mir apar m’ubebino, man enyutho igi gin ma gicopo timo pi nibodho juruot  migi. (Ai 12:21-28) Wend dhanu m’uworo telowic ma Musa umio igi ubino rukani? Nimakere ku paru mi dhanu moko, dhanu milioni 3, uketho i ie Juisrael man “udul dhanu ma tung’ tung’” ma gibino Jumisiri man dhanu mi thek mange giboth i pokolembe pa Mungu man giwok kud Misiri.​—Ai 12:38.

Calu ma lapor maeno ubenyutho, i wang’ ma Yehova ukel pokolembe iwi dhanu, elar epoyogi kwa man eweko igi saa ma gilok ko timo migi. (Poi. 32:4) Pirang’o Yehova belar poyo dhanu i wang’e? Jakwenda Petro ukoro nia “eyenyo ngo nia ng’atu moko rwiny, ento nia dhanu ceke gitund ba lokocwiny.” (2 Pet. 3:9) Eyo, Mungu ubedieng’ lee pi dhanu. Ebemito gilok cwinygi man gilok timo migi ma fodi pokolembe pare utundo ngo.​—Isa. 48:17, 18; Rum. 2:4.

Tin bende, ukwayu dhanu giwinj cimowang’ ma pire tek lee ma jubemio iwi ng’om zoo. Kinde ma Yesu ubino iwi ng’om, etwong’o nia ng’om maeni binyothere i saa mi “masendi ma dit.” (Mat. 24:21) Pi pokolembe maeno mi nindo m’ubino, ewodho lembila m’unyutho kamaleng’ lembe ma julub pare gibineno man ma gibinwang’iri ko i wang’ nindone. I ng’eye, Yesu udok ukoro pi lembe ma dongo dongo ma tin wabeneno ubetimere iwi ng’om.​—Mat. 24:3-12; Lk. 21:10-13.

Nimakere ku lembila maeno, tin eni Yehova ubekwayu dhanu ceke nia ging’ii nitimo ire man giwore. Ebemito dhanu ma giworo cik pare gikwo ma ber niai tin eni man gibin ginwang’ bende mugisa ma lee i ng’om ma nyen. (2 Pet. 3:13) Yehova ubemito ekony dhanu kara gibed ku yioyic i lembang’ola pare. Ebekonyogi nikadhu kud i rwonglembe ma bodho kwo, niwacu ‘lembanyong’a mi ker,’ ma Yesu uyero nia “jubiyero i ng’om ngung’ ni lembatuca ni thek ceke.” (Mat. 24:14) Mungu ucoko dhu dhanu pare kara gimii “lembatuca,” niwacu girwei rwonglembe m’uai i bang’e; gibetimo tije i ng’om ma tung’ tung’ 240. Yehova ubemito nia dhanu ma lee uwinj cimowang’ m’ebemio kara gibin giboth i saa mi “wavuvu” mi pokolembe pare m’udhingo.​—Zef. 1:14, 15; 2:2, 3.

Dong’ penji ma pire tek utie ngo nia, nyo Yehova biweko saa lee ni dhanu kara giwinj cimowang’ pare. Niai con, ebed eweko saa ni dhanu. Ento penji ma pire tek ni e: Nyo dhanu biworo cimowang’ pa Mungu ma fodi dong’ saa moko nuti e? Nimakere ku Biblia, ukwayu wamedara nikonyo dhanu ma fodi saa utie kara gibin gibothi i ajiki mi ng’om maeni.