1. Yub ma ber m’usagu zoo ma ng’atini copo maku i kwo pare utie ma kani?

WANG’ ma pol, ng’iong’ic mi junyodo bedo ku matoke iwi awiya migi pi oro ma dupa. Tek junyodo gitimo ng’iong’ic ma rac, eno romo kelo peko iwi awiya migi. Ento ka gitimo ng’iong’ic mi rieko, awiya migi kwo ma ber man ku mutoro. Re awiyane de gicikiri nimaku yub ma beco. Yub ma ber m’usagu zoo ma ng’atini copo maku i kwo pare utie nitimo ni Yehova, Wegwa mi polo ma jamer.​—Zab. 73:28.

2. Yesu ku junyodo pare gitimo ng’iong’ic ma kani?

² Yosefu giku Maria gibino ku lembakeca mi konyo awiya migi nitimo ni Yehova. Ng’iong’ic migi unyutho kamaleng’ nia timo ni Yehova ubino lembe ma pire tek i kwo migi. (Lk. 2:40, 41, 52) Yesu de utimo ng’iong’ic ma ber m’ukonye nitimo lembe ma Yehova ukwayu etim. (Mat. 4:1-10) Kinde ma Yesu udongo, ebino dhanu ma ber, ma pwe, man ma won amora. Janyodo moko ci ma lworo Mungu copo maru nyathin pare ubed ku kura ma kumeno.

3. I thiwiwec maeni, wabidwoko wang’ penji ma kani?

³ I thiwiwec maeni, wabidwoko wang’ penji m’ulubo e: Yehova utimo ng’iong’ic ma kani ma ber pi Yesu? Junyodo gicopo nwang’u ponji ma kani i kum ng’iong’ic ma Yosefu giku Maria gitimo? Jukristu m’aradu gicopo ponjo lembang’o i kum ng’iong’ic pa Yesu?

4. Yehova utimo ng’iong’ic ma kani ma pire tek pi Wode?

⁴ Yehova ung’io dhanu ma ber mandha pi nibedo junyodo  pa Yesu. (Mat. 1:18-23; Lk 1:26-38) Wec ma Maria uyero, m’uai i adundene ma judok jukiewo i Biblia, unyutho kamaleng’ nia emaru Yehova man Lembe pare lee dit. (Lk. 1:46-55) Bende, ayi ma Yosefu uworo ko telowic pa Yehova unyutho nia emare man emaru ninyayu anyong’a i ie.​—Mat. 1:24.

5-6. Yehova uweko Wode ukadh kud i lembang’o?

⁵ Yehova ung’io ngo dhanu m’ulony pi nibedo junyodo pa Yesu. Wang’eyo lembuno nenedi? Lam ma Yosefu giku Maria gicidh githiero i ng’ei nyoliri pa Yesu unyutho andha nia gibino jucan. (Lk. 2:24) Copere nia Yosefu ubino ku kaka tic moko ma nyanok m’ebed etimo i ie tic pare mi gobo bau, i ng’et ot pare i Nazareti. Cicopere nia sente migi kunoke piny migi ubino lee ngo, asagane pilembe gidok ginyolo awiya abiro kunoke nikadhu.​—Mat. 13:55, 56.

⁶ Yehova ubed ugwoko Yesu i kum ariti moko, ento egwoke ngo i kum peko ceke. (Mat. 2:13-15) Ku lapor, wedi pa Yesu moko gigam giyie ngo. Kepar pi can ma Yesu unwang’ere ko i cwinye kinde ma wedi pare ma dhe de ku kwong’a gilar giyie ngo nia etie Masiya. (Mk. 3:21; Yoh. 7:5) Bende, ve nia Yosefu utho ma nwang’u fodi Yesu tie aradu, man lembe maeno unyayu can lee i cwinye. Calu ma Yesu re m’ubino jadit, copere nia i ng’ei tho pa Yosefu, en re m’edong’ emedere ku tic mi gobo bau ma won ubed utimo. (Mk. 6:3) Kinde m’edongo, en re m’ebed egwoko juruot pagi. Ecicopere nia Yesu ubed utimo tic ma tek pi nipong’o yeny migi. Pieno, eng’eyo kite ma juol ko ka jutimo tic duu.

7. (a) Penji ma kani ma bikonyo ju m’ugamiri nibedo junyodo ma cuu ni awiya migi? (b) Lembrieko 2:1-6 copo konyo junyodo nenedi niponjo awiya migi?

⁷ Tek wudaru gemuru man wubemito wunyol awiya, wukepenjuru kumae: ‘Nyo watie dhanu ma mol, man dhanu mi tipo calu Maria giku Yosefu, ma Yehova copo ng’io nigwoko nyathin ma pire tek ma wabinyolo?’ (Zab. 127:3, 4) Ka dong’ itie janyodo ke, penjiri kumae: ‘Nyo acukuponjo awiya para de nia pire tie tek nitimo tic ku kero?’ (Ekl. 3:12, 13) ‘Nyo abeii nigwoko awiya para i kum lembe ma reco mi ng’om maeni pa Sitani?’  (Rie. 22:3) I andha, etie lembe ma timere ngo nigwoko awiya peri i kum peko ceke ma gicopo nwang’iri ko. Ento nok nok iromo konyogi ku mer kara ging’ei nijengiri iwi Biblia pi ninyego ku lembe ma romo wok i kwo migi. (Som Lembrieko 2:1-6.) Ku lapor, ka wat mwu moko ung’iyo niweko Yehova, kony awiya peri gitii ku Biblia pi ning’eyo nia pirang’o pire tie tek nigwoko bedoleng’ migi ni Yehova. (Zab. 31:23) Kunoke ka wat mwu moko utho, nyuth ni awiya peri kite ma giromo tio ko ku Biblia pi ninwang’u giragora ma bikonyogi niciro man ninwang’u akwiyacwiny.​—2 Kor. 1:3, 4; 2 Tim. 3:16.

8. Yosefu giku Maria gitio ku lembe ma kani ma nwang’ere i Poi mi Cik 6:6, 7?

⁸ Yosefu giku Maria gilubo telowic ma Yehova umio ni junyodo pi niponjo Yesu, uketho kinde m’edongo enwang’u bero i wang’ Yehova. (Som Poi mi Cik 6:6, 7.) Yosefu giku Maria gimaru Yehova lee mandha, man lembakeca migi ma pire tek ubino nikonyo awiya migi de ubed ku kit mer maeno.

9. Yosefu giku Maria gitimo ng’iong’ic ma kani ma pire tek?

⁹ Yosefu giku Maria gitimo ng’iong’ic ma cuu mandha: gibed gikoso ngo nitimo thier ni Yehova karacelo kud awiya migi. Ma jiji mbe, gibed gicidho i coko kubang’ yenga i kacokiri mi Nazareti; man kubang’ oro, gibed gicidho i Kadhukuwijo i Yerusalem. (Lk. 2:41; 4:16) Copere nia i saa mi wotho maeno ma gibecidho ko i Yerusalem, gibed gikoro kpawa mi jutic pa Yehova ma con ni Yesu kud awiya pagi mange, man ve nia gibed giliewo bende kabedo ma tung’ tung’ ma jukiewo pigi i Lembagora. Kinde ma wend awiya migi ubemedere, copere ebino lembe ma yot ungo igi nitimo thier nja ni Yehova. Re gi ii asu, uketho ginwang’u sukulia! Calu ma giketho thier pa Yehova i kabedo ma kwong’a, juruot migi ubino ku winjiri ma ceng’ini ku Yehova.

10. Janyodo copo nwang’u ponji ma kani i bang’ Yosefu giku Maria?

¹⁰ In i janyodo, ponji ma kani m’icopo nwang’u  i bang’ Yosefu giku Maria? Gin ma pire tek m’ukwayu itim utie ninyutho ni awiya peri nikadhu kud i wec man timo peri nia imaru Yehova. Ng’ei nia giramia ma lee m’usagu zoo m’icopo mio igi utie nikonyogi gimar Yehova. Gin mange ma pire tek nisagu utie niponjogi nia kud gibed gikeng’ ponji migi ma kendgi, gibed girwo, gicidh i coko, man girwei lembanyong’a. (1 Tim. 6:6) I andha, ubekwayu imii ni awiya peri, piny ma gicopo pong’o ko yeny migi mi kum. (1 Tim. 5:8) Re ng’ei nia gin ma bibodhogi i saa ma jubinyotho ng’om pa Sitani utie ngo giki mi kum, ento winjiri migi ma ceng’ini ku Yehova re ma bikonyogi nimondo i ng’om ma nyen. *​—Eze. 7:19; 1 Tim. 4:8.

11. (a) Juk ma nwang’ere i 1 Timoteo 6:17-19 copo konyo junyodo nenedi nitimo ng’iong’ic ma cuu pi nitungo awiya migi? (b) Juruot peri giromo bedo ku lembakeca ma kani, man eno copo kelo adwogi ma kani? (Nen sanduku ma thiwie tie “ Wutie ku lembakeca ma kani?”)

¹¹ Etie lembe mi mutoro ma lee dit nineno junyodo dupa ma Jukristu gibetimo ng’iong’ic ma ber kara awiya migi gibed ku winjiri ma ceng’ini ku Yehova! Gibed gitimo thier ni Mungu karacelo kugi m’umbe nikeng’o, gicidho i coko m’i kind yenga man i coko ma dongo, man girweyo lembanyong’a. Bende, juruot moko ging’io nicirweyo i kabedo ma fodi jurweyo ngo lembanyong’a akeca i ie. Jumoko gicidh giliewo Bethel kunoke gidiko cing’gi i tic mi giedo mi udi mi dilo mwa. Juruot ma ging’io nitimo tic ma kumeno giwodho sente migi gigi, man giromo nwang’iri bende ku peko moko. Ento Yehova mio igi sukulia ma lee pi miyiri migi. (Som 1 Timoteo 6:17-19.) Wang’ ma pol, awiya ma gidongo i ot ma kumeno gimediri asu nitimo lembe maeno ma beco ma giponjo, man gibedo mbe kud ang’eyang’o i kwo migi! *​—Rie. 10:22.

12. Ugam ukwayu nia Yesu utim ang’o kinde m’edongo?

¹² Won Yesu mi polo timo ng’iong’ic ma ber kwa, man junyodo pare mi ng’om de gibed gitimo ng’iong’ic ma beco. Ento kinde ma Yesu dongo, ugam ukwayu etim ng’iong’ic ma pare gire. (Gal. 6:5) Ebino ku bedagonya mi timo ng’iong’ic calu ma watie ko tin eni. Nwang’u Yesu copo timo yeny ma ie maru kakare nitimo yeny pa Mungu. Ento eng’io nibedo ku mer ma ceng’ini ku Yehova. (Yoh. 8:29) Tin macal pare romo konyo aradu nenedi?

13. Yesu utimo ng’iong’ic ma kani ma pire tek kinde m’ebino aradu?

 ¹³ Ma nwang’u fodi Yesu utie aradu, eng’io niworo junyodo pare. Etimo ngo igi tegowic kadok nindo acel de, man eparu ngo nia eng’eyo lembe nisagugi. Ento “eworogi.” (Lk. 2:51) Calu ma Yesu ubino nyathin ma jadit, m’umbe jiji lembe moko bedo nuti m’ukwayu etim, man copere eii nitimo lembene. Etimo kero lee niponjo tic mi gobo bau i bang’ Yosefu, kara enwang’ sente pi nikonyo jupagi.

14. Wang’eyo nenedi nia Yesu ubed uponjo Lembe pa Mungu akethacwinye?

¹⁴ Ecicopere nia junyodo pa Yesu gikoro ire nia enyolere i ayi mir udu, man gikoro ire lembe ma juruor pa Mungu uyero pire. (Lk. 2:8-19, 25-38) Re Yesu unwang’u nia lembe maeno kende uromo ngo; ebed eponjo bende Lembagora en gire. Wang’eyo nenedi nia Yesu ubed uponjo Lembe pa Mungu akethacwinye? Saa ma fodi ebino aradu, juponji mi Yerusalem “igi wang’ lii kum ng’eyong’ec pare ku lembadwoka pare.” (Lk. 2:46, 47) M’umedo maeno, ma fodi Yesu ubino ku oro 12 kende ci nwang’u dong’ edaru ponjo lembe pa Mungu lee uketho eng’eyo cuu nia Yehova utie Won.​—Lk. 2:42, 43, 49.

15. Yesu unyutho nenedi nia eng’io nitimo yeny pa Yehova?

¹⁵ Kinde ma Yesu unyang’ i kum tic m’ukwayu etim kara lembakeca pa Yehova upong’, eng’io nitimo ticne. (Yoh. 6:38) Eng’eyo nia dhanu dupa bidage, man m’umbe jiji paru maeno ubed unyayu can i ie. Re eng’io pare niworo Yehova. Kinde ma Yesu ulimo batizo i oro 29 R.M., gin ma pire tek ire ubino nitimo yeny ma i Won uyenyo. (Ebr. 10:5-7) Kadok kinde ma Yesu ubetho iwi yen mi can de, eweko ngo nyanok de nitimo yeny pa Won.​—Yoh. 19:30.

16. Ponji acel ma kani m’awiya gicopo nwang’u niai kud i lapor pa Yesu?

¹⁶ Wor junyodo peri. Aradu, calu Yosefu giku Maria, in de junyodo peri gitie ku kum mi dubo. Ento Yehova umio igi tic mi gwoki, mi ponji man mi telo wii. Tek iwinjo juk migi man iworo dito migi, lembe bibedo “ber iri.”​—Ef. 6:1-4.

17. Nimakere ku Yocuwa 24:15, aradu gicikiri nitimo ng’iong’ic ma kani igi?

¹⁷ Ng’ii ng’atu m’ibitimo ire. Ukwayu ing’ei  in giri nia Yehova utie ng’a, yeny pare utie ang’o, man ing’ei nia ibitimo yenyne nenedi i kwo peri. (Rum. 12:2) E ibimaku yub ma pire tek nisagu zoo i kwo peri, niwacu yub mi timo ni Yehova. (Som Yocuwa 24:15; Ekl. 12:1) Kan ibed ilubo cuu program peri mi somo Biblia man mi ponji, mer m’imaru ko Yehova bimedere man yioyic peri de bidoko tek magwei.

18. Aradu gicikiri nitimo ng’iong’ic ma kani, man adwogine bibedo ang’o?

¹⁸ Ng’ii niketho yeny pa Yehova i kabedo ma kwong’a i kwo peri. Ng’om pa Sitani beng’olo iwa nia ka watio ku bodho mwa pi bero mwa giwa, wabibedo kud anyong’a. I andha, ju ma giketho wigi zoo i kum yenyo giki mi kum “gidhuiri gigi ku can ma dupa.” (1 Tim. 6:9, 10) Ento tek iwinjo Yehova man ing’io niketho yeny pare i kabedo ma kwong’a i kwo peri, ibikwo ku mutoro man “ibitimo ku rieko.”​—Yoc. 1:8.

19. Junyodo gicikiri ning’eyo lembang’o?

¹⁹ Junyodo, wutim lembe ceke ma wucopo pi nikonyo awiya mwu kara gitim ni Yehova. Wujenguru i wie man ebikonyowu nitimo ng’iong’ic mi rieko. (Rie. 3:5, 6) Wung’ei nia timo mwu bibedo kud adwogi ma lee iwi awiya mwu nikadhu wec mwu. Pieno, wumak yub ma bikonyogi ninwang’u bero i wang’ Yehova.

20. Aradu gibinwang’u mugisa ma kani ka ging’io nitimo ni Yehova?

²⁰ Aradu, junyodo mwu gicopo konyowu nimaku yub ma ber i kwo mwu. Ento wun re ma wucikuru nitimo ng’iong’ic ma cuu ma foyo i Mungu. Pieno, wulub lapor pa Yesu man wung’ii nitimo ni Wegwa mi polo ma jamer. Tek wutimo kumeno, wubikwo ku mutoro niai kawoni. (1 Tim. 4:16) Man i nindo m’ubino, wubinwang’u anyong’a ma yawe mbe i kwo mwu!