1. I 2 Jukorinto 3:1-3, ang’o m’ukonyowa ninyang’ nia ponjo ng’atini ku Biblia nitundo elim batizo utie giramia ma segi m’uai i bang’ Yehova? (Nen cal m’i ng’eye.)

IWINJIRI nenedi kan ibeneno japonj Biblia moko mi cokiri peri ubelimo batizo? M’umbe jiji, anyong’a negi lee. (Mat. 28:19) Kan etie ng’atu m’iponjo kude Biblia in nitundo i batizo ke, ibedo kud anyong’a ma yawe mbe! (1 Tes. 2:19, 20) Ju ma fodi giai nilimo batizo alima gitie “waraga mi foc” ni juponji migi mi Biblia kendgi ngo, ento ni umego ku nyimego ceke mi cokiri.​—Som 2 Jukorinto 3:1-3.

2. (a) Wacikara nipenjara ku penji ma kani ma pire tek, man pirang’o? (b) Ponji mi Biblia utie ang’o? (Nen korolembe m’i there.)

² I kind oro ang’wen m’ukadhu, umego ku nyimego m’i wang’ ng’om zoo gibed gidwoko ponji mi Biblia * ma tundo milioni 10 kubang’ dwi i rapor migi. Eno tie lembe ma ber rukani! I kind oro ma rom eno, dhanu ma wendgi romo 280 000 ubed ulimo batizo kubang’ oro man gidoko Jumulembe pa Yehova. Calu ma wend juponj Biblia utie milioni dupa, dong’ ukwayu watim ang’o pi nikonyo ju ma pol m’i kindgi kara gilim batizo? Fodi asu Yehova ubemio kaka ni dhanu  ketho gidok Jumulembe pare; pi thelembe maeno re m’umito watim kero mwa ceke nikonyogi pio pio nitundo i batizo. Saa m’anyotha mbe!​—1 Kor. 7:29a; 1 Pet. 4:7.

3. I thiwiwec maeni wabiweco iwi lembang’o?

³ Pire tie tek lee kawoni nia waketh dhanu udok julub; eno re m’uketho Guriri m’utelowic ukwayu nia bethel unyuth gin ma wacopo timo kara wakony ju ma dupa ma waponjo kugi Biblia gimediri nitundo i batizo. I thiwiwec maeni ku m’ulubo, wabineno ponji ma waromo nwang’u kud i lapor mi juyab yo, bamisioner man juliew * ma gidaru riyo i ticne. (Rie. 11:14; 15:22) Gikoro gin m’umego ku nyimego man ju ma giponjo kugi Biblia gicopo timo kara ponjine ubed ku kony lee ni juponj Biblia. I thiwiwec maeni, wabiweco iwi lembe abic m’ukwayu japonj Biblia utim kara emedere nitundo i batizo.

4. Ukwayu wang’ei lembang’o iwi ponji mi Biblia ma jutimo pi saa ma nok magwei?

⁴ Umego ku nyimego mwa ma dupa giponjo Biblia ku dhanu pi saa ma nyanok magwei, man gitime acunga. Moko jutimo ngo ponjine kubang’ yenga de. Kadok nwang’u eno tie ayi ma ber ma medo ava lembe mi Biblia i kum ng’atini de, re ubekwayu wakonye lee nisagu. Eno uketho umego ku nyimego moko gibed gigamu adres pa ng’atune ku nimero pare mi telefon, man i ng’eye gilwong’e kunoke gikiewo ire paru moko mi Biblia nikadhu kud i mesaj. Wec m’adundo kumeno copo medere pi dwi ma dupa m’umbe cegonying’ moko. Ka japonj Biblia ubekoyo ngo saa ma lee, man ebemiere ngo pi niponjo Biblia, nyo eno copo ketho emedere man ethierere nitundo i batizo? Ungo.

5. I Luka 14:27-33, Yesu uyero wec ma kani ma waromo tio ko pi nikonyo ju ma waponjo kugi Biblia?

⁵ Nindo moko, Yesu utio ku lapor moko pi nikoro gin ma ng’atini ucikere nitimo kan ebemito edok jalub pare. Eweco pi ng’atu m’ubemito giero ot ma wiw, man pir ubimo m’ubemito cidho i lwiny. Yesu ukoro nia ng’atu m’ubemito giero ot ucikere ‘nilar bedo piny man nikwanu welpiny’ pare ka nyo ebidaru ode; ubimo ke ucikere ‘nilar bedo piny man niporo lembe’ pi ning’eyo ka nyo juaskari pare gicopo romo lembe ma gibecidho timo. (Som Luka 14:27-33.) Yesu ung’eyo nia ka ng’atini ubemito doko jalub pare, ukwayu ekeng’ii i lembene cuu,  pi ning’eyo gin m’ukwayu etim. Pieno, wacikara niketho cwiny ju ma wabeponjo kugi Biblia nia gibed giponj Biblia kudwa kubang’ yenga. Dong’ wacopo ketho cwinygi nenedi?

6. Kara ponji ma wabetelo wie umedere, ukwayu watim ang’o?

⁶ Mi kwong’o, cak medo saa mi ponji mwu mi Biblia kadok wubetime acunga de. Kakare ning’io i verse acel kende ku jawinj, icopo beng’io kude i verse ario kubang’ liewman. Kan edaru ng’iyo ku liew ma maku saa lee, penje ka nyo kaka moko tie ma wuromo bedo abeda i ie ka wumeduru ku wec. Dwokowang’ lembe pare bikonyi ning’eyo ka nyo pi ponji mi Biblia utie tek ire kunoke ngo. I ng’eye, pi nikonye kara ponji pare umedere pio pio, icopo penje ka nyo eromo maru niponjo wang’ ario kubang’ yenga. Re lembe mange de nuti m’ukwayu jawinj utim kadok ebeponjo wang’ acel kunoke wang’ ario kubang’ yenga.

7. Saa ceke m’ibecitelo wi ponji mi Biblia ukwayu iyikiri nenedi?

⁷ Calu m’itie japonjo, ukwayu iyikiri cuu saa ceke m’ibecitelo wi ponji mi Biblia. Pieno, cak ku somo gin ma wubeciponjone, man nen i giragora ma tung’ tung’. Tim kero ninyang’ cuu i paru ma pigi tek. Par pi thiwiwec mi ponjine, nyithi thiwiwec, penji, giragora ma jukiewo i kume nia “som,” cal, man video ceke ma romo konyi nikoro i ponjine. I ng’eye, par pir ayi m’ibikoro ko lembe ni jawinj peri nimakere ku kite m’ing’eye ko; kor ire lembe i ayi ma yot, man ma terere kara enyang’ cuu man etii ku lembene i kwo pare.​—Neh. 8:8; Rie. 15:28a.

8. Wec pa jakwenda Paulo ma nwang’ere i Jukolosai 1:9, 10 ubeponjowa ku lembang’o iwi rwo ma jurwo ko pi juponj Biblia?

⁸ Kinde m’ibeyikiri pi ponji, rwo pi japonj Biblia man pi yeny pare. Kwai Yehova ukonyi niponjo lembe m’uai i Biblia i ayi ma bimulo adundene. (Som Jukolosai 1:9, 10.) Kepenjiri ka nyo gin moko nuti ma nyang’ i ie copo bedo tek ni ng’atu m’ibeponjo kude Biblia, kunoke m’ecopo yio yot yot ungo. Wii kud uwil nia lembakeca peri utie nikonye emedere nitundo i batizo.

9. Japonjo copo konyo ng’atu m’ebeponjo kude Biblia nenedi niyiko ponji pare? Kekor.

⁹ Watie ku genogen nia ponji mi Biblia ma kubang’ yenga bikonyo japonj Biblia nidwoko  foyofoc ni Yehova giku Yesu pi lembe ma gitimo, e ebimito eng’ei lembe mange dupa. (Mat. 5:3, 6) Kara japonj Biblia unwang’ kony lee i kum ponji pare, ukwayu eketh wie zoo i kum lembe m’ebeponjo. Dong’ kara eketh wie i kum lembene, kor ire nia pire tie tek ya eyikere cuu i wang’ ponjiman; pieno, kwayu elar esom gin ma gibiponjone i wang’e, man epar kilili kite m’ecopo tio ko kude i kwo pare. Dong’ in i japonjo pare ke icopo konye nenedi? Wuyik ponji moko wukude karacelo pi ninyutho ire kite ma juyiko ko ponji mi Biblia. * Nyuth ire kite ma junwang’u ko dwokowang’ penji, man nia ebed eried the wec ma pigi tek kende kara epoi yot yot i kum dwokowang’ penjine. I ng’eye kwaye edwok wang’ penji ku wec ma pare gire. Kinde m’ebetimo kumeno, ibing’eyo ka nyo enyang’ cuu i ponjine. Re lembe mange de nuti m’iromo nyutho ire nia etim.

10. Pirang’o nisomo Biblia kubang’ ceng’ utie lembe ma pire tek? Ukwayu japonj Biblia utim ang’o kara enwang’ kony i kum lembe m’ebesomo i Biblia?

¹⁰ Japonj Biblia romo nwang’u bero kan ebetimo lembe moko en gire kubang’ ceng’. M’uweko ponji ma gitimo kubang’ yenga ku japonjo pare, ukwayu ebed ewec ku Yehova. Nenedi? Nwang’u ebewinje man ebeweco i bang’e. Ebiwinjo Mungu nwang’u ebesomo Biblia kubang’ ceng’. (Yoc. 1:8; Zab. 1:1-3) Nyuth ire kite m’eromo tio ko ku “Program mi Somo Biblia” ma nwang’ere i jw.org. * Jucopo wodhe iwi karatasi bende. Kara ikonye enwang’ bero lee i kum som pare mi Biblia, keth cwinye nia ebed enyam i lembe ma Biblia ubeponje ko iwi Yehova, man eng’ei ayi m’ecopo tio ko ku lembene i kwo pare.​—Tic 17:11; Yak. 1:25.

11. Japonj Biblia copo ponjo nirwo cuu nenedi, man pirang’o pire tie tek nia ebed erwo i bang’ Yehova wang’ ma pol?

¹¹ Keth cwiny ng’atu m’iponjo kude Biblia nia ebed ewec i bang’ Yehova kubang’ ceng’ nikadhu kud i rwo. I acaki man i ajiki mi ponjiman, rwo niai kud adundeni; rwo karacelo kude, man lwong’ nyinge i rwone. Kinde m’ebewinjo kite m’iberwo ko niai kud i adundeni, en de ebiponjo nirwo niai kud i adundene, man ebing’eyo nia ukwayu erwo ni Yehova Mungu i nying’ Yesu Kristu. (Mat. 6:9; Yoh. 15:16) Ka ng’atu m’iponjo kude ubesomo Biblia kubang’ ceng’  (ebewinjo Yehova) man eberwo (ebeweco i bang’ Yehova) m’umbe jiji, lembe maeno bikonye nicoro ceng’ini mandha i vut Mungu! (Yak. 4:8) Tek ebetimo lembe maeno kubang’ nindo, eno biketho ebimedere nitundo ebithierere ni Mungu man ebilimo batizo. Ang’o mange ma bikonye?

12. Icopo konyo ng’atu m’iponjo kude Biblia nenedi kara ebed ku winjiri ma ceng’ini ku Yehova?

¹² Wabemito ng’atu ma waponjo kude Biblia ung’ei lembe lee iwi Yehova. Re ukwayu lembe m’eponjone umul adundene, kara ebed kud ava mi tio kugi i kwo pare. Ayi ma Yesu ubed uponjo ko dhanu ku bodho uketho gibed gimaru nia eponjgi. Ento gin mange m’uketho gilubo toke utie ponji pare m’ubed umulo adundegi. (Lk. 24:15, 27, 32) Ukwayu ng’atu m’iponjo kude Biblia unen Yehova ni ng’atu m’utie andha, m’eromo theyo mer kude, man enene ni Won, ni Mungu pare man Jarimbe. (Zab. 25:4, 5) I saa mi ponji, tel nen pare iwi kite ma beco pa Mungu. (Ai 34:5, 6; 1 Pet. 5:6, 7) Tim kumeno kinde ma wubeponjo thiwiwec moko ci. Kony japonj Biblia unyang’ i kite ma beco pa Yehova, calu ve mer, bero man kisa pare. Yesu uyero nia “lembang’ola ma dwong’ ku ma kwong’a” utie ‘Nimaru Yehova Mungu peri.’ (Mat. 22:37, 38) Tim kero ikony japonj Biblia umar Yehova lee.

13. Kemii lapor moko m’unyutho ayi ma jucopo konyo ko japonj Biblia kara eng’ei kite ma beco pa Yehova.

¹³ Kinde m’ibeweco ku ng’atu m’iponjo kude Biblia, kor ire nia pirang’o imaru Yehova. Eno bikonye nimare, man ning’eyo nia en de ecikere nitheyo mer ma pare gire ku Mungu. (Zab. 73:28) Ku lapor, copere nyo i buku ma wubeponjo kunoke i verse moko, inwang’u lembe moko iwi mer, rieko, bedopwe kunoke tego pa Yehova, m’umulo adundeni. Nyuth lembene ni ng’atu m’iponjo kude Biblia, man kor ire nia eno tie acel m’i kind thelembe m’ucweli nimaru Yehova Wegwa mi polo. Gin mange de nuti ma japonj Biblia moko ci ucikere nitimo kara emedere nitundo i batizo.

14. Juebrania 10:24, 25 uyero lembang’o iwi coko, man lembuno romo konyo japonj Biblia nenedi nitimo mediri?

¹⁴ Wan zoo wamaru nia ju ma waponjo kugi Biblia gimediri nitundo i batizo. Yo acel ma pire tek ma waromo konyo kogi utie nimio  amora i kumgi gibed gicidh i coko mwa ceke. Umego ku nyimego ma gidaru telo wi ponji mi Biblia pi oro ma dupa giyero nia juponj Biblia ma gicidho i coko gitimo mediri pio pio. (Zab. 111:1) Jumoko gibed gikoro ni ju ma giponjo kugi nia, i coko gibinwang’u lembe dupa m’umbe i ponji migi mi Biblia. Som Juebrania 10:24, 25 karacelo ku ng’atu m’iponjo kude, man kor ire bero m’ebinwang’u kan ecidho i coko. Nyuth ire video ma thiwie tie Lembang’o ma Bekadhu i Ot Ker? * Konye eketh coko ubed ni gin ma pire tek i kwo pare, man kud ebed ekeng’gi.

15. Waromo timo ang’o pi nimio amora i kum japonj Biblia kara ebed ecidh i coko nja?

¹⁵ Icopo timo ang’o ka fodi ng’atu m’iponjo kude Biblia ucidho ngo i coko, kunoke ebed ecidho wang’ acel acel? Ku yaw yaw, kor ire lembe moko m’iponjo i coko m’icidho i ie nindo ma ceng’ini eni. Kan ebeneno amora m’itie ko pi coko, eno biketho en de ebicidho. Mii ire Otkur ma Wiw kunoke Buku mi coko mi Kwo man tic mwa mi Jukristu ma jubeponjo nindo maeca. Nyuth ire lembe ma jubiponjo i yenga m’ulubo, man penje nia thenge ma kani m’ufoyo ie. Ponji m’ebiwinjo man lembe m’ebineno i coko mwa wang’ ma kwong’a bikoc bor ku lembe m’edaru neno kunoke m’ewinjo i dini mange. (1 Kor. 14:24, 25) Ebinwang’u dhanu ma gitie ku lapor ma beco m’ecopo lubo, man ma gibikonye kara emedere nitundo i batizo.

16. Wacopo konyo ng’atu ma waponjo kude Biblia nenedi kara emedere nitundo i batizo, man i thiwiwec m’ulubo wabineno lembang’o?

¹⁶ Waromo konyo ng’atu ma waponjo kude Biblia nenedi nitundo i batizo? Ukwayu wakonye enen ponji mi Biblia ni gin ma pire tek; pieno waketh cwinye eponj kubang’ yenga, man ebed eyikere cuu kubang’ ponjine. Bende, kwayu waketh cwinye ebed ewec ku Yehova kubang’ ceng’ man ethei mer ma pare gire kude. M’umedo maeno, wamii amora i kume ebed ecidh i coko ceke. (Nen sanduku ma thiwie tie “ Lembe ma japonj Biblia ucikere nitimo”.) Ento lembe mange abic utie ma ju m’utelo wi ponji mi Biblia giromo timo pi nikonyo ju ma giponjo kugi nitundo i batizo. Wabineno lembene i thiwiwec m’ulubo.