Juponj Biblia gibino ku yeny mi tegocwiny pi nitimo tic migi mi rweyo lembanyong’a. Gibino ku yeny mi “twong’o rwonglembe ma ber” ni ju ma mol man bende mi twong’o “ceng’ mi culokwor” ni jutim rac.

Umego John Henry Hoskin, m’ubino i ng’om mi Canada, utwong’o rwonglembe ku tegocwinye kadok kud i kind jai. I acaki mi oro 1921, erombo ku japonji moko mi dini mi Methodiste. Umego Hoskin ucaku wec kude kumae: “Ukwayu wawec ku kwiyocwiny iwi Biblia, man tek dhogwa urombo ngo iwi lembe moko, asu wacopo jigo wecne ku kwiyocwiny man wabedo asu jurimo.” Re lembene udok utimere ngo kumeno. Umego Hoskin ukoro kumae: “Kinde ma fodi waweco pi dakika ma nyanok ci, japonjine ugoyo dhugola ma tek, m’ageno nyo kieu mi kum dhugolane ung’eny.”

Japonjine ukok nia “pirang’o icidho ngo i bang’ jukafiri pi niweco kugi?” Umego Hoskin ubedo ling’, man kinde m’ebeweke, ewecere yor i iye nia ‘eni de niki aweco i bang’ jakafiri!’

Nindo mange kinde ma japonjine ubino ponjo ponji i ot kanisa migi, eyero lembe ma rac ku nying’ Hoskin. Umego Hoskin ukoro kumae pi gin m’eyero: “Etwong’o ni juyic pare nia atie javupo ma dit mi tuko ngo, ma yawa de mbe i adhura eca, man nia ukwayu junega anega cen.” Lembuno ucero ngo umego Hoskin, emedere asu nirweyo man niweco ku dhanu dupa. Ewacu kumae: “Amaru nirweyo lembanyong’a lee keca. Jumoko wacu nia ‘wang’eyo nia andha itie dhanu pa Mungu!’ man gikwayu ka nyo gicopo konya ku piny moko m’atie ku yenyne.”

Pi nikonyo dhanu kara utim mediri, Juponj Biblia giwodho program mi ponji i gazeti ma tin walwong’o Réveillez-vous ! Program mi ponjine moko ma juyiko pir aradu, ubed ukonyo jurunyodo niweco kud awiya migi. Jurunyodo ubed upenjo awiya ku penji man gibed gikonyogi ninwang’u dwokowang’ penjine i Biblia. Penjine ma calu ve “Biblia utie ku buku adi i iye?,” ubed uponjo lembe ma thindho thindho iwi Biblia. Penjine mange ma calu ve “Nyo ukwayu Jakristu mandha ugen nia ebinwang’ere ku ragedo?,” ubed ukonyo aradu nirweyo lembanyong’a ku tegocwinygi.

 Program mange mi ponji ubedo nuti pi dhanu ma dongo ma dong’ gitie ku ng’eyong’ec iwi Biblia. Gibed ginwang’u wang’ penji migi i buku ma kwong’a ma nyinge tie Études des Écritures. Dhanu elufu ma lee ubed unwang’u kony dupa i program maeno, re judok jutwong’o nia program maeno mi ponji bijik. Pirang’o?

Umego ma gibino telo wi tic m’utimere saa maeca ginwang’u nia dhanu utie ku yeny mi ponjo Biblia i ayi m’upangere ma ber. Eno uketho juwodho buku ma nyinge La Harpe de Dieu i dwi mir 11, oro 1921. Ju ma gimaru niponjo buku maeno, giroyo nying’gi kara gibed giponjiri ku bukune gigi. Ayi maeno ma ng’atini ponjere ko gire ukonyo dhanu ning’eyo pi “lembakeca pa Mungu ma Mungu bimiyo ko kwo ma rondo ku rondo ni dhanu.” Ponjine ubed ukadhu nenedi?

Kinde ma ng’atini ujolo bukune acel, jubed jumiyo ire nyathi kart moko ma nyutho ire mbaya mi bukune m’umaku esom. Yenga m’i ng’eye, judok jumiyo ire kart mange m’utie ku penji dupa i wiye m’edwok wang’e nimakere ku gin m’esomo. I the kartne junwang’u kwan m’unyutho ire gin m’umaku etim pi yengane mange m’ulubo.

Pi yenga 12, japonj Biblia ubed unwang’u kart ma nyen ma cokiri m’utie ceng’ini kude ubed uoro ire. Wang’ ma pol dhanu m’utii man ma tego migi nok m’i cokiri re m’ubed uoro igi kartne. Ku lapor Anna Gardner, m’uai kud i Millvale i États-Unis uwacu kumae: “Kinde ma juwodho buku La Harpe de Dieu, jumiye ni Thayle ma nyamira m’ubino ku peko mi wotho. Ebino ku tic dupa m’ukwayu etim, niwacu nioro kart mi penji ku bang’ yenga.” Kinde ma ka japonj Biblia udaru ponji pare, juoro ng’atu moko kud i cokiri ucidh uliewe pi nikonye kara emedere ku ponji pare mi Biblia.

I thum pa oro, umego Joseph Rutherford ubed uoro barua ni cokiri ceke. Enwang’u nia “rwonglembe mi Ker ma jurweyo pi oro maeno ubino kud adwogi ma ber, man ekonyo dhanu dupa nisagu m’i wang’e.” I ng’eye emedo kumae: “Tic fodi udong’ lee m’ukwayu jutim. Etielo cwiny dhanu nia gidikiri i tic maeni ma miyo mugisa.” Andha juponj Biblia giworo lembe maeno m’eyero. I oro 1922, girweyo rwonglembe mi Ker ku tegocwinygi nisagu m’i wang’e zoo.