1. Yehova uweko watim lembang’o?

YEHOVA uweko wang’ii wan giwa lembe ma waromo timo i kwo mwa. Ento eponjowa ku lembe ma wacopo timo kara wamak yub ma beco. Ka wang’io nitimo lembe moko m’ufoyo ie, ekonyowa nidare. (Zab. 119:173) Pieno tek wabed watio ku juk mi rieko ma waponjo i Biblia, wabimaku yub ma beco mandha.​—Ebr. 5:14.

2. I ng’ei ma wamaku yub, ecopo bedo iwa tek nitimo lembang’o?

² Re kadok wamaku yub ma cuu de, saa moko ecopo bedo iwa tek nidaru lembe ma wacaku. Wakenen lapor moko: Umego moko m’aradu umaku yub nia kwayu esom Biblia zoo. E ecaku de ma ber, re esomo pi yenga moko kende ci ejigo somne. Nyamego moko ung’io nia kwayu ecak tic pa jayab yo ma nja, ento ebedwoko lembene kwa ku ng’eye. Guriri mi judong cokiri moko umaku yub nia kwayu gicak timo liew mi kwac i bang’ umego ku nyimego mi cokiri migi, re giweko nindo ubekadhu lee ma fodi gicaku ngo liewne. Dhanu maeno zoo gimaku yub ma tung’ tung’, re gin acel unuti ma gin kpo girem i ie: gitimo ngo lembe ma gipangu. I rundi ma kwong’a de, Jukristu mir adhura mi Korinto ginwang’iri ku lembe ma rom kumeno. Lapor migi copo mio iwa ponji ma kani?

3. Jukorinto gimaku yub ma kani, re lembang’o m’utimere?

³ I kum oro 55 R.M., Jukristu mi Korinto gimaku yub moko ma pire tek mandha. Giwinjo nia kwo doko tek ni umego ku nyimego mi Yerusalem ku mi Yahudi pilembe can upodho i bang’gi, man nia cokiri mange ubejoko sente pi nikonyogi. Calu m’umego mi Korinto gimito ginyuth berocwiny migi, gigam  gimaku yub nia gin de gibimio ajok, e gipenjo jakwenda Paulo nia gitim nenedi. Paulo uoro igi telowic m’ukwayu gilubi, man eng’io Tito ucidh ucok dhu piny ma cokiri ujoko. (1 Kor. 16:1; 2 Kor. 8:6) Re dwi moko i ng’eye, Paulo uwinjo nia Jukorinto gimio ngo ajok ma ging’olo. Pieno, saa m’ukwayu juter ajok mi cokiri ma tung’ tung’ i Yerusalem, unwang’ere nia ajok migi utie ngo ayika.​—2 Kor. 9:4, 5.

4. Nimakere ku 2 Jukorinto 8:7, 10, 11, Paulo uketho cwiny Jukorinto nia gitim ang’o?

⁴ Jukorinto gimaku yub ma cuu, man Paulo ufoyogi pi yioyic migi ma tek, man pir ava ma gibino ko mi timo bero. Re emio amora i kumgi bende nia ukwayu gidar lembe ma gicaku. (Som 2 Jukorinto 8:7, 10, 11.) Lembe ma Jukorinto ginwang’iri i ie ubeponjowa nia ecopo bedo tek kadok ni Jukristu ma gigwoko bedoleng’ de nitimo lembe ma gipangu.

5. Wabidwoko wang’ penji ma kani?

⁵ Calu Jukristu mi Korinto, wan de saa moko waromo nwang’u nia etie tek nitimo lembe ma wapangu. Pirang’o? Calu ma waleng’ ungo, wacopo dwoko lembene kwa ku ng’eye. Bende, lembe ma wok rek copo nwang’uwa, eno romo ketho ebedo iwa tek nitimo lembe ma nwang’u wapangu. (Ekl. 9:11; Rum. 7:18) Dong’ lembang’o ma copo konyowa nimaku yub kunoke nitimo alokaloka i yub moko ma wadaru maku? Ang’o ma romo konyowa kara watim lembe ma wapangu?

6. Pirang’o saa moko copo kwayu wang’ii i yub ma wadaru maku?

⁶ Yub moko tie ma pigi tek, man ma wacikara ngo niwilogi. Ku lapor, wamoko kikiki i kum yub ma wamaku nia wabitimo ni Yehova; bende, watimo kero nigwoko bedoleng’ mwa ni jadhogwa mi gamiri. (Mat. 16:24; 19:6) Ento yub m’ukende wacopo ng’io igi. Pirang’o? Nikum lembe belokore. Dong’ lembang’o ma bikonyowa kara wamak yub ma beco mandha?

7. Wacikara nirwo pi lembang’o, man pirang’o?

⁷ Kwai rieko i bang’ Yehova. Tipo maleng’ utelo wi jakwenda Yakobo uketho ekiewo kumae: “Tek ng’atu moko m’i kindwu rieko mbe kude, wek ekwai Mungu, ma mio ni dhanu ceke ku berocwinye.” (Yak. 1:5) Kud i thenge moko, wan ceke ‘wambe ku rieko.’ Pieno, kinde m’ibemaku yub moko kunoke ibemito wilo yub m’idaru maku, kwai Yehova ukonyi. Ebikonyi kara itim ng’iong’ic mi rieko.

8. Wacikara nitimo ang’o i wang’ nimaku yub moko?

⁸ Tim sayusac lee. Som Biblia, som girasoma ma dilo pa Yehova uwodho man kor pi yub peri ni dhanu m’igeno ma copo mio iri juk ma cuu. (Rie. 20:18) Pire tie tek nitimo kumeno, asagane kan ibemito wilo tic peri mi kum, imito dok kaka mange kunoke imito ng’io kit somo ma bikonyi nipong’o yeny peri kara imediri nitimo ni Yehova.

9. Wabinwang’u bero ma kani ka wabemaku yub ku thelembe ma cuu?

⁹ Ng’ei cuu thelembe m’ubecweli nimaku yub. Thelembe ma cwaluwa nimaku yub pire tie tek lee i Yehova. (Rie. 16:2) Ebemito nia watim lembe ceke m’umbe awondi. Pieno ka wabemaku yub, kwayu wan giwa de wang’ei nia thelembe ma cuu re m’ubecwaluwa nimaku yubne, man kud wawond wang’ jumange. Ka watie juvupo, ecopo bedo iwa tek nitimo lembe ma wang’olo. Ku lapor, kepar nia umego moko m’aradu umaku yub nia kwayu ecak tic pa jayab yo ma nja. Ento i ng’ei nindo moko, ecaku pong’o ngo saa m’ukwayere, man ecaku nwang’u ngo anyong’a i ticne. Copere nyo  ebino wondere nia ebetimo tic pa jayab yo pilembe emaru Yehova, ma re i andha emaku tic pa jayab yo pi nifoyo i junyodo pare kunoke nyo pi nifoyo i ng’atu moko mange.

10. Pi nitimo alokaloka, lembang’o m’ukwayere?

¹⁰ Kepar nia japonj Biblia moko umaku yub nia kwayu ewek nimadhu taba. I acaki, eii emadhu ngo taba pi yenga acel kunoke ario, re rieu taba gam usage, e ecaku madhe kendo. Ento i ng’eye etimo kero eweko taba mi magwei! Lembang’o m’uketho eweko ng’iyo ma rac maeno? Utie mer m’emaru ko Yehova man ava mi nyayu mutoro i ie.​—Kol. 1:10; 3:23.

11. Pirang’o wacikara ning’eyo gin m’ukwayu watim?

¹¹ Ng’ei gin m’ukwayu itim. Kan ing’eyo lembe m’umaku itim, icopo timogi yot yot. Ku lapor, nyo imaku yub nia kwayu ibed isom Biblia nja. Re kan ipangu ngo nia ibibesome saa ma kani, icopo timo ngo gin m’ikeco. * Bende, judong cokiri moko giromo maku yub nia kwayu gicak timo liew mi kwac wang’ ma pol, re nindo copo kadhu lee ma fodi gicaku ngo liewne. Kara lembe ma gipangu uwoth ma ber, kwayu gipenjiri ku penji ma calu ve: “Liew maeni copo mio kony akeca ni ng’agi i kind umego ku nyimego mi cokiri mwa? Nyo wapangu nia wabiciliewogi awene?”

12. Saa moko romo kwayu nia watim ang’o, man pirang’o?

¹² Tim lembe m’icopo. Ng’atu moko mbe ma romo yero nia etie ku saa, copo man kero mi timo lembe moko ci m’emaru timo. Pieno tim lembe m’icopo. Saa moko, iromo nwang’u nia kwayu iwek lembe moko ma nwang’u ipangu nitimo, pilembe dong’ icopo time ngo. (Ekl. 3:6) Re keketh nia ing’io i yub moko m’idaru maku, itimo alokaloka, man inwang’u nia kawoni re dong’ icopo dare. I saa maeno, lembe abic m’ulubo e copo konyi kara idar lembe maeno m’icaku.

13. Ang’o ma bikonyi kara inwang’ kero mi timo lembe m’ipangu?

¹³ Rwo kara inwang’ kero m’itim ko lembe m’ipangu. Mungu copo mio iri “kero mi timo” lembe m’ipangu. (Flp. 2:13, NWT) Pieno kwai Yehova umii iri tipo maleng’ kara ukonyi inwang’ tego. Mediri asu nirwo kadok ibenwang’u nia wang’ rwone ubegalu de. Calu ma Yesu uyero, ‘mediri nikwayu [tipo maleng’], e ebimire iri.’​—Lk. 11:9, 13.

14. Cik mir ukungu ma nwang’ere i Luka 14:28 copo konyi nenedi kara itim lembe m’ipangu?

¹⁴ Pang program mi lembe m’ibitimo. (Som Luka 14:28.) Kara idar lembe moko ci m’icaku, ukwayu ipang program mi lembene. I ng’eye, ii nitimo lembe m’ipangune. Kumeno bende, kan ipangu nia ibitimo gin moko, kiew lembe ma tung’ tung’ ma bikonyi nitime. Ka tic m’ipangu nitimo utie tic ma pek, pok ie nyathindho thindho. Kan idaru acel, ibineno nia karaman icopo darugi ceke. Jakwenda Paulo ukwayu Jukorinto nia gibed gikoi piny moko segi pir ajok i ‘ceng’ ma kwong’a mi yenga,’ kakare nikuro nia eketundi ka gitim ajokne. (1 Kor. 16:2) Bende, kan ipoko i tic peri potopoto, eno biketho ibineno ngo nia ticne pek.

15. Nikiewo lembe m’ipangu akiewa copo mio iri bero ma kani?

¹⁵ Kan ikiewo lembe m’ipangu akiewa, ebibedo iri yot nitimogi. (1 Kor. 14:40) Ku lapor, guriri mi judong cokiri copo ng’io jadit cokiri acel ukiew yub ma gimaku, nying’ judong cokiri ma bitimo lembene, man nindo  m’ukwayu gitime i ie. Ka judong cokiri gipangu lembe kumeno, ebibedo igi yot nitimo calku yub ma gimaku. (1 Kor. 9:26) Icopo timo bende kumeno pi tic peri giri de. Ku lapor, icopo kiewo program mi lembe m’ibibetimo kubang’ nindo, man iromo kiewo nia ibibecaku ku ma ne. Kan itimo kumeno, ibidaru lembe m’icaku, man ibitimo lembe dupa ke pi saa ma nok.

16. Ukwayu itim ang’o kara ituc nitimo lembe moko m’ipangu, man Jurumi 12:11 ucwaku paru maeno nenedi?

¹⁶ Miyiri nitimo lembe m’ipangu. Kara ituc nitimo lembe m’ipangu, ukwayu imiyiri lee. (Som Jurumi 12:11.) Paulo uyero ni Timoteo nia emedere “nimiyere . . . asu” kara edok japonjo ma ber. Wacopo tio ku juk maeno ma jakwenda Paulo umio i lembe moko ci ma wamito watim ni Yehova.​—1 Tim. 4:13, 16.

17. Wacopo tio ku juk ma nwang’ere i Juefeso 5:15, 16 nenedi saa ma wamito timo lembe ma wapangu?

¹⁷ Tii ku saa peri ku rieko. (Som Juefeso 5:15, 16.) Keth saa m’ibitimo ie lembe m’ipangu man kud ilok saane. Kud ikur nia kankan m’i weng’i ceke ukeuthum kan icak timo lembe m’ipangu. (Ekl. 11:4) Kud iwek lembe ma tijgi mbe ucam saa peri man unyoth wii ku timo lembe ma pire tek akeca. (Flp. 1:10) Kan ecopere, pang nitimo tic perine i saa ma jucopo sendo wii ngo i ie. Nyuth ni jumange nia ubekwayu iketh wii i kum gin m’ibetimo. Bende neg telefon peri, bed isom mesaj kunoke imond i Internet i ng’eye. *

18-19. Ang’o ma copo konyi kara idar lembe m’icaku kadok ibenweng’iri i wang’ macero?

¹⁸ Keth wii i kum adwogi mi lembe m’ipangu. Adwogi mi lembe peri m’ipangu utie ve kaka m’ibemito tundo i ie kinde m’icaku woth. Kan andha imito ituc kuca, ibimediri asu ku woth kadok nwang’u bikwayu iwoth i yo m’adhoka de. Rom rom kumeno, kan iketho wii i kum adwogi mi lembe m’ipangu, cwinyi bitur ungo kinde m’inweng’iri i wang’ macero moko.​—Gal. 6:9.

¹⁹ Nimaku yub ma cuu tie yot ungo, bende nitimogi copo bedo tek magwei. Ento Yehova romo mio iwa rieko man kero kara wadar lembe ma wacaku.