I RUNDI ma con, jakurpiny ubed uneno wi ot kunoke wi piny pa ng’atu mange. Wec mi dhok mi Juebrania man mi dhok mi Jugiriki ma juloko nia “jakurpiny” copo nyutho ng’atu ma neno wi piny moko.

Kinde ma Yosefu ma wod Yakobo ubino ng’eca i Misiri, edoko jakurpiny pa jadit pare. Biblia uwacu nia jadit pare ma Jamisiri ‘uketho gin ceke m’ebedo ko i cing Yosefu.’ (Tha. 39:2-6) I ng’eye, kinde ma Yosefu en gire de enwang’u dito ma lee i Misiri, eketho ng’atu moko udoko ni jakurpiny pare.​—Tha. 44:4.

I rundi pa Yesu, dhanu ma gibino ku ng’om gibed gikwo i adhura bor ku podho migi. Pieno, dhanu maeno gibed giketho jukurpiny pi nineno wi tic ma tung’ tung’ ma jurutic gibetimo i podho migi.

Jubed jung’io dhanu ma nenedi nibedo jakurpiny? Jagor moko mi Roma ma nyinge tie Columella m’ukwo i rundi ma kwong’a uwacu nia ng’eca ma jubed juketho unen wi tic kunoke ubed jakurpiny, ucikere nibedo ng’atu “m’ung’eyo tic cuu.” Ecikere nibedo “ng’atu ma cwalu dhanu utim tic, re kwayu ngo ebed ng’atu ma timojo yangayanga.” Emedo kumae: “M’usagu zoo, ubed ukwayu nia kud ebed epar nia eng’eyo lembe kpo, ento saa ceke kwayu ebed ayika niponjo lembe ma nyen.”

I Lembe pa Mungu, jutio ku lapor pa jakurpiny man tic m’ebed etimo pi niweco iwi kit tic moko m’ubetimere i cokiri mi Jukristu. Ku lapor, jakwenda Petro uketho cwiny Jukristu nia gitii ku copo ma Mungu umio igi pi nikonyiri i kindgi calu “jukurpiny ma ber mi bero pa Mungu ma kwonde tung’ tung’.”​—1 Pet. 4:10.

Yesu de uweco pi jakurpiny saa m’emio lapor ma nwang’ere i Luka 16:1-8. Bende kinde ma Yesu ubino weco iwi lembe ma tung’ tung’ ma binyutho nia ecaku nibimo, etielo cwiny julub pare nia ebiketho ‘jamiru mandha man ma riek,’ kunoke “jakurpiny mandha.” Tic ma dit ma jakurpiny maeno bitimo utie nimio cam mi tipo ni julub pa Yesu nimakere ku yeny migi i nindo mi kajik ceng’. (Mat. 24:45-47; Lk. 12:42) Watie ku mutoro lee ninwang’u girasoma ma tung’ tung’ ma jamiru maeno ubewodho man m’ebeoro i ng’om zoo.