“Anyong’a binego ng’atu ma pwe ni kum Yehova”
NYAMEGO Diana utie ku oro ma kadhu 80. Won ot pare ubino ku kit twoyo moko ma julwong’o Alzheimer, ma wang’ ma pol bemakujo i tio, man i wang’ tho pare, ebedo pi oro moko kaka ma jugwoko i ie ju m’utii. M’umedo maeno, awiya pa nyamego eno ario ma co utho man en gire de ebetwoyo kanser mi thuno. Re kan umego ku nyimego mi cokiri pa Diana gibenene i coko kunoke i tic mi lembanyong’a, ginwang’u nia saa ceke etie jamutoro.
Umego John ubino jaliew mi twodiri pi oro ma kadhu 43. Tije ubed unyang’e lee dit. Re eweko tic maeno pi nidok kuro wat pare moko m’uberemo, man kawoni ebetimo i cokiri m’eni ie. Ka dhanu m’ung’eyo John girombo kude i coko ma dongo, ginwang’u nia ewilere ngo. Etie asu jamutoro.
Pirang’o Diana giku John gibemediri nibedo jumutoro? Ang’o ma copo mio mutoro ni ng’atini kadok ebesendere? Ang’o ma copo ketho ng’atini bedo asu ku mutoro kadok nwang’u dong’ ebetimo ngo tic m’ubed unyang’e de? Biblia udwoko wang’ penji maeno kumae: “Anyong’a binego ng’atu ma pwe ni kum Yehova.” (Zab. 64:10) Pi ninyang’ ma ber i lemandha maeno ma pire tek, ukwayu wakeng’ei nia lembang’o ma mio mutoro mandha ni ng’atini, man lembang’o ke ma mie ngo.
MUTORO MA GALU NGO
Ma jiji mbe, ing’eyo lembe moko ma nyayu mutoro i dhanu. Ku lapor, ecopo bedo nia nico ku nyaku ma gimariri gituc nigamiri, kunoke nyo ng’atini udoko janyodo kunoke enwang’u rwom moko i tic pa Mungu. Lembuno mio mutoro dre ni dhanu, pilembe giai i bang’ Yehova. En re m’ecaku the gamiri, en re m’ecwio dhanu ku copo mi nyolo nyodo, man en re m’emio tic ma tung’ tung’ ma wacopo timo i dilo pare.—Tha. 2:18, 22; Zab. 127:3; 1 Tim. 3:1.
Re lembe moko ma mio mutoro copo bedo pi nindo moko kende. Nico kunoke dhaku copo podho i gier kunoke ecopo tho athoa de. (Eze. 24:18; Hos. 3:1) Awiya moko giworo ngo junyodo migi man Mungu de; kunoke jucopo koyogi akoya zoo kud i cokiri. Ku lapor, awiya pa Samuel gitimo ngo ni Yehova i kite m’efoyo. Bende, timo ma rac pa Daudi ukelo peko ma lee i ot pare. (1 Sam. 8:1-3; 2 Sam. 12:11) Andha, lembe ma kumeno bekelo can ma lee, man gimio ngo iwa mutoro.
M’umedo maeno, tic moko ma wabetimo i dilo pa Mungu copo jik, saa moko nyo pi twoyo, nyo pilembe ubekwayu icak gwoko wat peri m’uberemo, kunoke nyo pir alokaloka moko m’utimere i dilo. Dhanu ma dupa ma kit alokaloka maeno umulo kumgi giwacu nia kawoni dong’ gimbe kud anyong’a ma tic ma kumeno mio.
Pieno, wacopo neno yot yot nia i kadiri moko, kit mutoro ma piny maeno mio iwa copo galu ngo. Re nyo kit mutoro mange nuti, ma thum ungo kud i ng’atini kadok saa m’ebekadhu kud i peko de? Eyo unuti, pilembe Samuel, Daudi man jumange de gigam gimediri asu nibedo ku mutoro moko, kadok gibino kadhu kud i masendi de.
MUTORO MA GALU
Yesu ugam ung’eyo cuu nia mutoro tie ang’o. Kinde ma fodi eni polo, saa ma lembe ceke ubino ire cuu, “anyong’a nege i wang’ [Yehova] thiri thiri.” (Rie. 8:30) Ento kinde m’eni wi ng’om, saa moko ebed enwang’ere i wang’ peko ma dongo. Re asu Yesu ubino ku mutoro nitimo yeny ma i Won uyenyo. (Yoh. 4:34) Ka dong’ pi litho m’ewinjo ceng’ini i wang’ tho pare ke? Biblia uwacu kumae: “Pi mutoro ma juketho i wang’e eciro yen [mi can].” (Ebr. 12:2) Dong’ wakenen lembe ario ma Yesu uyero ma copo mio mutoro mandha.
Nindo moko, julub 70 giai i tic mi lembanyong’a man gidwogo i bang’ Yesu. Anyong’a ubino negogi lee pilembe giwok gitimo udu, man giriemo kadok pajogi. Yesu ugam uyero igi kumae: “anyong’a kud unegwu kum maeni, nia tipo gibedo wor iwu; ento anyong’a negwu kum nyingwu gore i polo.” (Lk. 10:1-9, 17, 20) Eyo, gin ma pire bino tek nisagu tic ma giai gitimo, utie nia Yehova ufoyo kugi.
Nindo mange, Yesu ubino ponjo udul dhanu. Ponjine ugam uwang’u i dhaku moko ma Nyayahudi lii, uketho ewacu nia min Yesu utie jamutoro ma lee mandha. Re Yesu utwinyo paru pare kumae: “Ma sagu, mugisa (mutoro) ni ju m’uwinjo lem pa Mungu, m’uwore de!” (Lk. 11:27, 28) Eyo, janyodo copo bedo ku mutoro ka nyathin pare ubetimo lembe ma beco. Ento ng’atini copo nwang’u mutoro nisagu kan etie ku winjiri ma ceng’ini ku Yehova pilembe ebewore.
M’umbe jiji, gin ma mio iwa mutoro ma thum ungo utie ning’eyo nia Yehova ubefoyo kudwa. Kadok nwang’u masendi utie ngo lembe ma ber de, re ekabu ngo mutoro maeno. Ento tek wabegwoko bedoleng’ mwa i saa mi masendi, anyong’a mwa bimedere ameda. (Rum. 5:3-5) M’umedo maeno, Yehova bemio tipo pare maleng’ ni ju m’ugene, man anyong’a ke tie kite acel mi nying’ tipo ne. (Gal. 5:22) Eno uketho wanyang’ ma ber i wec ma Zaburi 64:10 uwacu: “anyong’a binego ng’atu ma pwe ni kum Yehova.”
Lembang’o m’ugam ukonyo umego John nibedo ku mutoro mandha?
Lembuno ubekonyowa ninyang’ i thelembe m’uketho Diana giku John ma juweco pigi i acaki gimediri asu nibedo jumutoro kadok kinde ma gibino niii ku masendi ma tung’ tung’ de. Diana uwacu kumae: “Agam apondo i bang’ Yehova, tap calu ma nyathin pondo ko ba janyodo pare.” Enyang’ nenedi nia Mungu tie kude? Ekoro kumae: “Anwang’u nia egam emio ira mugisa man kero m’agam amedara ko nirweyo wang’ ma pol kud anyong’a.” John ke i ng’ei ma tic pare mi liewo twodiri ujik, emedere asu nirweyo kud amora. Kewinj lembe m’eyero e: “Niai i oro 1998 ma jung’ia nibedo japonjo i Dharaza mi tendo umego pi tic pa Mungu (École de formation ministérielle), abed atimo ponji para ma segi wang’ ma pol nisagu m’i wang’e zoo.” Umego John ukoro pigi giku dhaku pare kumae: “Wagam wakeco nitimo lembe ceke ma Yehova ubekwayu i bang’wa i kadhiri ma wacopo; eno uketho wajolo alokaloka maeno yot yot. Ang’eyang’o uwok ungo i iwa nyanok de.”
Dhanu mange de dupa ginwang’u nia wec ma nwang’ere i Zaburi 64:10 utie lemandha. Ku lapor, umego moko giku min ot pare gigam gitimo i Bethel mir États-Unis pi oro ma kadhu 30. I ng’eye, juorogi ni juyab yo ma segi. Giwacu kumae: “Can bemondo pare kwa i cwiny ng’atini, kan ebayu piny moko m’emaru lee.” Re gimedo kumae: “Ento jucopo weko ngo can i cwinyjo pi nja.” Ndhundhu, gigam gimiiri lee mandha nirweyo karacelo ku cokiri ma gini ie. Umegone ku min ot pare giyero bende kumae: “Wabed warwo pi lembe ma tap m’ubedieng’o cwinywa. I ng’eye kinde ma waneno nia Mungu udwoko wang’ rwo mwa, eno ubed umio iwa amora man mutoro lee dit. Nyanok i ng’ei ma watundo i cokiri mwa, umego ku nyimego ma pol gicaku tic pa jayab yo, man wacaku ponjo bende Biblia ku dhanu ario ma gimediri cuu.”
“BED JAMUTORO RONDO KU RONDO”
M’umbe jiji, etie yot ungo nibedo kwa jamutoro, kum saa moko peko copo wok. Ento Yehova re m’uketho jukiewo wec ma nwang’ere i Zaburi 64:10. Kadok kinde ma cwinywa utur, waromo bedo ku genogen nia tek wamedara nigwoko bedoleng’ mwa, ‘anyong’a binegowa ni kum Yehova,’ dok nwang’u masendi mwa tie rukani de. M’umedo maeno, wacopo kuro kud ava, nindo ma lembang’ola pa Yehova iwi “polo ma nyen ku ng’om ma nyen” bipong’o i ie. Saa maeca, jubikabu dubo alaga cen. Lembe ceke ma Mungu bitimo binyayu “mutoro kud anyong’a” i dhanu pare kpo.—Isa. 65:17, 18.
Kepar nyanok kite ma kwo bibedo ko: kumjo bibedo ma leng’ pilembe remo bibedo mbe, man kubang’ rupiny jubibecew ku tego. Kadok nwang’u i wang’e ilar imuliri ku peko ma rukani de, paru mi lembene birwinyo pet. Watie ku genogen nia ‘wabipoi pi gin ma kwong’a ngo, kadi ebiwok i pidoic de ngo.’ Cer bidiko dhanu kendo ku wedi migi ma gimaru. Dhanu milioni ma kwanere ngo gibiwinjiri calu junyodo pa nyaku mi oro 12 ma Yesu ugam ucero. Biblia ukoro nia “igi wang’ lii ku wang’uic ma dit.” (Mk. 5:42) I ng’eye, ng’atu moko ci ma bikwo iwi ng’om bidoko andhandha “ng’atu ma pwe,” man anyong’a ‘binege ni kum Yehova’ rondo ku rondo.