Nyo isomo kilili mandha Otkur ma Wiw m’uwok i kind nindo m’ukadhu ceng’ini eni? Kenen nyo iromo dwoko wang’ penji m’ulubo e:

Lembagora unyutho nenedi nia Mungu beneno kisa i kumwa?

Saa ma nyithindho mir Israel gibino i ng’eca i Misiri, Mungu ugam uneno masendi migi, man lembene uketho enwang’u can i adundene. (Ai 3:7; Isa. 63:9) Mungu ucwiowa i ayiine, pieno wacopo neno kisa i kum jumange. Enyutho iwa kisa kadok wacopo nwang’u nia waromo ngo ku mer pare de.​—wp18.3-F, mba. 8-9.

Ponji pa Yesu ukonyo dhanu nenedi nivoyo akoyakoya?

I rundi pa Yesu, Juyahudi ma dupa gibino kud akoyakoya. Ento Kristu unyutho nia ukwayu nibedo ku jwigiri, man ukwayu ngo nineno nia thek moko tie ber nisagu mange. Eyero ni julubne nia gicikiri nineniri ni umego.​—w18.06, mba. 9-10.

Wacopo nwang’u ponji ma kani i kum thelembe m’uketho Mungu uyio ngo nia Musa umond i Ng’om mi lembang’ola?

Musa ubino ku winjiri ma ceng’ini mandha ku Yehova. (Poi. 34:10) Kinde ma nyithindho mir Israel gidhingo daru woth ma giwotho oro 40 i langa, giwagiri wang’ mir arionde pi pii m’umbe. Mungu ugam uwacu nia Musa ucidh uwec ni cana. Re Musa ugoyo cana agoya. Copere ng’ecwiny umaku Yehova pilembe Musa ulubo ngo telowic pare, kunoke pilembe emio ngo ire yung pir udu maeno. (Wel 20:6-12) Lembuno ubeponjowa nia wacikara niworo telowic m’uai i bang’ Yehova man nimio ire yung.​—w18.07, mba. 13-14.

Ka wabeweko nen mi wang’ uwondwa, wacopo podho i kosa ma kani?

Dhanu ma dupa giweko nen mi wang’ re ma wondogi; eno ketho gipoko lembe nimakere ku lembe adek ma e: rangi pa ng’atini kunoke thugi, sente pa ng’atini, man oro pa ng’atini. Pire tie tek dit iwa nia waii nineno jumange calu ma Mungu neno kogi. (Tic. 10:34, 35)​—w18.08, mba. 8-12.

Jukristu m’utii gicopo konyo jumange i yo moko ma kani?

Jakristu m’utii ma kawoni dong’ ubetimo kit tic mange, pire tie tek asu i wang’ Mungu, man ecopo timo lembe dupa pi nikonyo jumange. Ku lapor, eromo nikonyo nico kunoke dhaku ma jayic ungo, ng’atu m’ukwio i tipo, ecopo telo wi ponji mi Biblia man nirweyo lembanyong’a lee.​—w18.09, mba. 8-11.

Jukristu gitie ku jamtic ma kani i Sanduku mi jamtic mi ponjo Biblia ku dhanu?

I sanduku maeno, junwang’u Kart ma terojo i JW.ORG, man karatasi mi lwong’o. Etie bende ku trakt abora ma beco, gazeti Otkur ma Wiw man Cew! Bende, i ie junwang’u nyithibuku moko, buku ario ma pigi tek ma waponjo ko Biblia, man video ang’wen ma cuu mandha, ma acel m’i kindgi thiwie tie, Pirang’o ukwayu niponjo Biblia?​—w18.10, mba. 16.

Jakristu copo ‘ng’iewo lemandha’ nenedi calu ma Lembrieko 23:23 uyero?

Pi niponjo lemandha, waculo ngo sente. Re ubekwayu watii ku saa mwa, man watim kero ma lee pi ninwang’e.​—w18.11, mba. 4.

Wacopo nwang’u ponji ma kani i kum lembe ma Hoseya utimo ni Gomer ma dhaku pare?

Gomer upodho i gier wang’ dupa, ento Hoseya uweko ire man emedere asu nibedo kude. Ka dhaku kunoke nico ma Jakristu upodho i tarwang’, jadhoge mi gamiri copo ng’io niweko ire. Kan edok ecaku timo ribiri kendo ku jadhoge m’upodho i tarwang’, nwang’u dong’ nimakere ku Biblia, embe ku twero mi lalu gamiri migi.​—w18.12, mba. 13.