Buku mi Poi mi cik 22:25-27 ubeweco ngo iwi kosa pa jalawobi, pilembe ubenen kamaleng’ nia emaku nyakune andha. Ento Mungu umio cik maeno pi ninyutho nia nyaku ma jumaku umbe ku kosa. Wakeng’ii i verse m’i wang’e.

Poi mi cik 22:23, 24 uweco iwi jalawobi m’umaku nyaku ma jubenyomo “i adhura” man evuto kude. Jalawobi maeno utimo gier pilembe con eca, jubed juneno nyaku ma jubenyomo ve dong’ etie dhaku pa ng’atini. Ka nyakune ke? En de etie ku kosa kum “egoyo nduru ngo m’eni i adhura.” Ka nwang’u egoyo nduru, m’umbe jiji, nwang’u dhanu winjo dwande man gibino lare. Pieno calu m’egoyo ngo nduru, en de etimo gier; gin ario zoo gitie weg kosa.

I ng’eye, Cik ukoro lembe moko m’ukoc ku maeno, eyero kumae: “Ento tek ng’atu moko nwang’u nyaku ma jubenyomo i thim, e ng’atuno make ku tego, man evuto kude, e ng’atuca kende m’uvuto kude bitho: ento kud itim gin moko kum nyakune: dubo ma romo ku tho mbe wi nyakune: kum calu dhanu ai kum wadi, man enege, e lembe maeni bedo kumeno; kum enwang’e i thim, e nyaku m’anyoma goyo nduru, man ng’atu moko mbe m’ulare.”​—Poi. 22:25-27.

I saa maeni, jupoklembe gibed giyio lembe ma nyakune yero. Pirang’o? Jupoklembe gibed ginwang’u nia nyakune “goyo nduru, man ng’atu moko mbe m’ulare.” Pieno, etimo ngo gier. Ento jalawobi utimo gier pilembe emaku nyaku ma jubenyomo “ku tego man evuto kude.”

Kadok nwang’u jumio cik maeno pi ninyutho nia nyaku umbe ku kosa de, re ekoro bende kamaleng’ nia jalawobi tie won kosa kum emaku nyaku ku kero man etimo gier. M’umbe jiji, jupoklembe gibed ‘gipenjo cu’ pi ninyang’ i lembene man gipoko lembe nimakere ku cik ma Mungu udwogo i wie wang’ ma pol.​—Poi. 13:14; 17:4; Ai 20:14.