Nyo ibepoi?
Nyo icopo dwoko wang’ penji m’ulubo e m’ucungo iwi Otkur ma Wiw m’uwok i kind oro 2019?
Lembang’ola pa Mungu ma nia, “jambali moko mbe ma jucwio i kumi ma bibedo miero” thelembene tie ang’o? (Isa. 54:17)
Watie ku genogen nia Mungu bigwokowa i kum jambali moko ci ma tie ve “atido mi ju mi ndiri.” (Isa. 25:4, 5) Judegi mwa gibituc ungo nyanok de ninyayu peko i kumwa pi nja.—w19.01, mba. 6-7.
Lembe ma Mungu utimo i kum Jukanani man i kum Juisrael ma giworo ngo cik pare unyutho bedopwe pare nenedi?
Mungu ukelo pokolembe iwi ju ma gibed gitimo lemsasa mi tarwang’, ju ma gibed gisendo mon man awiya. Ebed emio mugisa ni ju ma gibeworo cik pare man ma gibetimo lembe m’atira ni jumange.—w19.02, mba. 22-23.
Wacikara nitimo ang’o ka ng’atu m’uberwo utie ngo Jamulembe pa Yehova?
Wacikara nibedo ling’ re mito wanyuth woro. Ento wabiyero ngo “amen” kunoke nimaku cing dhanu ma keca. Wacopo ng’io nirwo wan giwa nyaling’ ling’.—w19.03, mba. 31.
Pirang’o maku awiya tie dubo ma pek?
Maku awiya tie nidubo i kumgi, nidubo i kum cokiri, nidubo ni judongo pa gavmenti, man nidubo ni Mungu. Kaka ma cik mi ng’om ukwayu nia junyuth ni judongo pa gavmenti ka jumaku nyathin, judong cokiri giworo cik maeno.—w19.05, mba. 9-10.
Icopo timo ang’o kara ituc niwilo pidoii?
Icopo timo lembe ma e: Kwai Yehova. Bed inyam i lembe pi ning’iyiri giri. Ng’ii jurimbi ku rieko.—w19.06, mba. 11.
Wacopo timo ang’o kara wayikara pi ragedo?
Kwayu wabed ku mer ma ceng’ini ku Yehova. Ng’ei nia emaruwa man nia ebikunowa ki ngo. Som Biblia kubang’ ceng’, man rwo areri. Ng’ei m’umbe jiji nia andha mugisa mi Ker pa Mungu bipong’o kakare kakare. Mak giragora moko m’imaru ku wii man wer ma wayungo ko Yehova bende.—w19.07, mba. 2-4.
Wacopo timo ang’o pi nikonyo wedi mwa kara gibothi?
Pire tie tek lee nia wakethara kakagi, wawek timo mwa re m’uponjgi, wabed dhanu ma ciro lembe, man wabed ma ber kugi, ento wakwo kugi ku riekowang’.—w19.08, mba. 15-17.
Calu ma Yesu ung’olo i Matayo 11:28, tin wabenwang’u yom nenedi?
Watie ku jutelwic ma beco, jurimo ma beco mandha, man wabetimo tic ma ber m’usagu zoo.—w19.09, mba. 23.
Yehova copo mio iwa ava man kero mi timo yeny pare nenedi? (Flp. 2:13)
Kinde ma wabesomo Lembe pare man wabenyamu ie, Mungu copo mio iwa ava man kero mi timo yeny pare. Bende, ecopo tio ku tipo pare maleng’ pi nimedo kor bodho moko ma dong’ watie ko con.—w19.10, mba. 21.
Etie lembe mi rieko nia ilar itim ang’o i wang’ nimaku yub moko ma pire tek?
Kwayu ilar itim lembe abic ma e: Tim sayusac lee. Kwai rieko i bang’ Yehova. Ng’ei cuu thelembe m’ubecweli nimaku yub. Ng’ei gin m’ukwayu itim. Tim lembe m’icopo.—w19.11, mba. 27-29.
Nyo ponji ma nia dhanu tie ku ng’eyong’ec ma tho ngo ucaku i kum lembe ma Sitani uyero ni Eva?
Ubenen ve ungo. Sitani uyero ngo ni Eva nia kan ecamu kum nying yen ma Mungu kwero, kum pare bitho ento ng’eyong’ec pare bimedere nikwo kaka moko. Ponji ceke mi vupo ugam ujik saa ma pii ma dit uumo ng’om i rundi pa Noa. Copere ponji ma nia dhanu utie ku ng’eyong’ec ma tho ngo ucaku ma fodi Mungu ulalu ngo dhanu m’ubino giero adhura mi Babel.—w19.12, mba. 15.