Penji mi jusom
Kinde ma Sitani uyero ni Eva nia ebitho ngo kan ecamu kum nying yen mi ng’eyong’ec mi gin ma ber ku gin ma rac, nyo emito yero ire nia dhanu tie ku ng’eyong’ec ma tho ngo calu ma ju ma dupa beponjo tin?
Wonabali uyero ngo ni Eva nia kan ecamu kum nying yen ma Mungu kwero, kum pare bitho ento ng’eyong’ec pare bimedere nikwo kaka moko. Saa ma Sitani ubeweco i bang’ Eva nikadhu kud i bang’ thwol, ewonde nia tek ecamu kum nying yen ne, ‘ebitho andha ngo.’ Emito yero nia Eva bimedere asu nikwo ma ber mandha iwi ng’om m’umbe telowic pa Mungu.—Tha. 2:17; 3:3-5.
Tek ponji mi ndra ma tin unyai nia dhanu tie ku ng’eyong’ec ma tho ngo ucaku ngo i podho mir Eden, dong’ ecaku awene ke? I andha, wacopo yero ngo nia ecaku tap awene. Wang’eyo nia thier ceke mi vupo ugam ujik saa ma pii ma dit uumo ng’om i rundi pa Noa. Calu ma Noa ku juode kendgi re ma giboth man gin ceke gibino timo thier mandha, i saa maeno ng’atu moko mbe m’ubed uponjo paru mi ndra.
Pieno, ponji ma tin unyai nia dhanu tie ku ng’eyong’ec ma tho ngo ucaku i ng’ei pii ma dit mi rundi pa Noa. Kinde ma Mungu loko dhok mi dhanu i adhura mi Babel, man gilal i “wang’ ng’om ngung’,” m’umbe jiji, niai ku keca re ma gilal ku paru ma nia dhanu utie ku ng’eyong’ec ma tho ngo. (Tha. 11:8, 9) Kadok wang’eyo ngo nia ponji maeno mi ndra ucaku awene de, re wang’eyo nia eai i bang’ Sitani Wonabali ma tie “won ndra” man anyong’a nege lee nineno kite ma ponjine unyai ko.—Yoh. 8:44.