“Wumi foyofoc i gin ceke”
NYO ibed idwoko foyofoc ni jumange? Eno tie penji ma ng’atuman ucikere ning’io ie en gire. Biblia ular uyero nia i nindo maeni ma wabekwo i ie, dhanu dupa bibedo “ju ma gifoyo foc ungo.” (2 Tim. 3:2) Saa moko nyo idaru rombo ku dhanu ma ginwang’u nia jumange ucikiri nitimo igi lembe moko ci, kunoke umii igi piny ma gitie ku yenyne. Edog ebedo ve i paru migi, gimbe ku yeny mi dwoko foyofoc pi piny ma jumange ubemio igi. Saa moko nyo in de inwang’u nia eber ungo nikwo i kind dhanu ma kumeno.
Tung’ ku dhanu maeno, Biblia ubeketho cwiny jutic pa Yehova kumae: “Wubed ma wufoyo foc.” Bende, wacikara ‘nimio foyofoc i gin ceke.’ (Kol. 3:15; 1 Tes. 5:18) I andha, etie ber dit nibedo dhanu ma dwoko foyofoc. Wakenen thelembe m’uketho wabeyero kumeno.
NIDWOKO FOYOFOC KETHO WAWINJARA MA BER
Thelembe acel ma pire tek ma cwaluwa nidwoko foyofoc utie nia dwoko foyofoc ketho wawinjara ma ber. Ka ng’atini udwoko foyofoc pi bero moko ma jutimo ire, ecopo winjere ma ber, man ng’atu m’efoyo bende nwang’u mutoro. Pirang’o nidwoko foyofoc nyayu mutoro i iwa man i jumange de? Kepar lembe ma e: Ka ng’atu moko uwodhere nitimo iri lembe moko, eno nyutho kamaleng’ nia ebedieng’ piri. Kumeno ngo? Kan inwang’u nia ebedieng’ piri, iwinjiri ma ber. Ecicopere nia Rutha de uwinjere kumeno kinde ma Boaz utimo ire bero. Saa m’enyang’ nia ng’atu moko ubedieng’ pire, mutoro nege lee mandha.—Rut. 2:10-13.
Pire tie tek nidwoko foyofoc asagane ni Mungu. M’umbe jiji, saa moko idaru paru pi giramia ma tung’ tung’ mi tipo ku mi kum ma Mungu udaru mio, ku m’ebemedere nimio. (Poi. 8:17, 18; Tic. 14:17) Ento kakare nidieng’ ungo ku lembe ma Mungu ubetimo iri, etie ber nia ibed iting’ saa pi niparu cuu iwi lembe ma tung’ tung’ ma Mungu ubetimo iri, man ni wedi peri. Kan ibewotho paru cuu pi bero ceke ma Jacwic peri ubetimo iri, mer m’imare ko bimedere man ibinwang’u nia karaman emeri lee man ebefoyo kudi.—1 Yoh. 4:9.
Andha, wacikara niparu kilili iwi bero ceke ma Yehova utimo iwa, man iwi mugisa m’emio iwa; re wacikara bende nifoye pi lembe maeno. (Zab. 100:4, 5) I buku moko, jukiewo nia ‘nidwoko foyofoc ni jumange mio mutoro ma lee dit ni dhanu.’
NIDWOKO FOYOFOC TWIO MER M’I KINDJO
Thelembe mange m’unyutho nia etie ber nidwoko foyofoc utie nia dwoko foyofoc ketho mer m’i kindjo doko tek. Wan ceke wabed wamito nia jumarwa. Kan ibefoyo ng’atini niai kud i adundeni pi bero moko m’etimo iri, eno ketho mer m’i kindwu tudere. (Rum. 16:3, 4) Bende, wang’ ma pol dhanu ma gidwoko foyofoc re ma gibed gibedo ayika nikonyo jumange. Gineno bero ma jumange ubetimo igi, eno cwalu gin bende nitimo bero ni jumange. Andhandha, nikonyo jumange mio mutoro. Calu ma Yesu uyero, “mio en e mugisa ma sagu gamu.”—Tic. 20:35.
Jalwo moko ma nyinge Robert Emmons m’ubetelo wi sayusac ma jubetimo iwi foyofoc i université mi Californie uyero kumae: “Kara wabed dhanu ma foyofoc, wacikara ning’eyo nia watie ku yeny mi jumange. Saa moko, wafoyogi, saa mange ke gin re ma gifoyowa.” Lembe m’ukwayu wang’ei utie nia, kara wamedara nikwo man wabed ku mutoro, watie ku yeny mi dhanu mange. Ku lapor, 1 Kor. 12:21) Ng’atu ma dwoko foyofoc foyo ku gin ceke ma jumange timo ire. Dong’ calu etie kumeno, nyo in de ibed idwoko foyofoc ni jumange pi lembe ma gibetimo iri?
pi ninwang’u giracama kunoke thieth, watie ku yeny mi jumange. (DWOKO FOYOFOC KETHO WABEDO KU NEN MA BER
Thelembe mange ma cwaluwa nidwoko foyofoc utie nia dwoko foyofoc konyowa niketho wiwa i kum lembe ma beco kakare niparu kwa pi lembe ma cuu ngo. I ayi moko ng’ith mwa tio ve kiyongila, niwacu ekonyowa niketho wiwa i kum lembe ma beco, ento ungo i kum lembe m’ubewotho cuu ngo. Kan ibed idwoko foyofoc, ibiketho wii akeca i kum bero ma jubetimo iri, ento ibiparu ngo akeca i kum peko m’ibenweng’iri ko. Bende, nidwoko foyofoc pi lembe ceke biketho ibineno lembe ma beco ma jumange ubetimo; eno bicweli nibedwoko foyofoc nisagu. Kan ibed isayu ning’eyo lembe m’icopo dwoko foyofoc pigi, eno bikonyi nilubo juk ma e ma jakwenda Paulo umio: “Anyong’a negwu thiri thiri i Rwoth.”—Flp. 4:4.
Nidwoko foyofoc copo konyi niriemo paru ma rac cen kud i wii. Ku lapor, etie lembe ma winjere ngo nia ng’atini udwok foyofoc ni wadi, re i saa ma rom ebed ku kumira i kume, ebed ku can i ie kunoke ku ng’ecwiny. Bende, dhanu ma dwoko foyofoc gisayu ngo giki mi kum akeca. Gifoyo ku piny ma gitie ko kakare nisayu giki dupa.—Flp. 4:12.
PAR PI MUGISA CEKE M’INWANG’U!
Calu m’itie Jakristu, m’umbe jiji ing’eyo nia Sitani ubemito nia peko mi nindo maeni mi kajikceng’ unyai can i ii man utur cwinyi. Anyong’a copo nege nineno nia itie ku paru ma cuu ngo man ibed iwegiri saa ceke. Kan itie kit dhanu ma kumeno, icopo nwang’u ngo adwogi ma ber i tic mi rweyo lembanyong’a. I andha, dwoko foyofoc wotho karacelo ku nying’ tipo maleng’ pa Mungu. Ku lapor, mutoro negowa ka wabeneno piny ceke ma beco ma Mungu mio iwa; bende, wabedo ku yioyic i lembang’ola m’etimo pi nindo m’ubino.—Gal. 5:22, 23.
Calu itie Jamulembe pa Yehova, copere iyio nia lembe ma jukoro iwi dwoko foyofoc i thiwiwec maeni tie lemandha. Re ibenyang’ nia saa moko ebed ebedo yot ungo nidwoko foyofoc man nibedo ku nen ma ber. Ento kud iwek lembe maeno utur cwinyi. Icopo pidho ng’iyo mi bedwoko foyofoc i kwo peri. Nenedi? Kubang’ nindo, bed ipar pi lembe moko m’utimere i kwo peri, m’icopo dwoko foyofoc pire. Kan ibed itimo kumeno nja, e ibidoko dhanu ma foyofoc lee. Eno biketho ibinwang’u anyong’a nisagu ju ma giparu kwa pi peko migi. Par pi lembe ma tung’ tung’ ma beco ma Mungu man dhanu mange gitimo iri m’umio amora i kumi man m’unyayu mutoro i ii. Kubang’ ceng’ icopo bekiewo lembe ario kunoke adek m’icopo dwoko foyofoc pire.
Jutim sayusac moko ginwang’u nia “ka wabedwoko foyofoc kubang’ nindo, eno loko ayi ma ng’ith mwa tio ko man ketho ebedo iwa yot nifoyo ku kwo mwa.” Ng’atu ma dwoko foyofoc bedo jamutoro. Pieno par pi lembe ma beco m’udaru timere i kwo peri, par bende pi lembe ceke ma beco m’ibenweng’iri ko kawoni, man bed idwok foyofoc saa ceke! Kakare nineno gin ceke ma Yehova utimo iri ni gin m’ecikere nitimo, ‘foi Yehova; kum en e ber.’ Eyo, ‘mi foyofoc i gin ceke.’—1 Kei. 16:34; 1 Tes. 5:18.