KA JARIMBI moko m’imaru lee uoro iri barua, iwinjiri nenedi? Timoteo de ugam unwang’u barua m’uai i bang’ Paulo ma tie jarimbe m’emaru. Baruane tin i Biblia julwong’e Timoteo mir 2. Cicopere Timoteo ubedo kaka ma ling’ pi nisomo baruane. Saa moko nyo epenjere kumae: ‘Paulo tie ma beri? Nyo etie ku juk moko m’emito mio ira pi tic m’abetimo? Nyo ekiewo lembe moko ma copo konya nirweyo lembanyong’a, niponjo man nikonyo jumange?’ Calu ma wabineno, Timoteo unwang’u dwokowang’ penji maeno ceke, ku lembe mange de dupa ma beco. Dong’ kawoni wakebolu wang’wa i kum lembe ma dongo dongo ma nwang’ere i baruane.

Kinde ma Timoteo ucaku somo barua maeno asoma ci, copere nia epoi wang’ acel pi mer m’i kindgi ku jakwenda Paulo. I baruane Paulo ulwong’e nia “nyathin para ma jamer.” (2 Tim. 1:2) Timoteo unwang’u barua maeno i kum oro 65 R.M., nwang’u etie ku oro ma romo 30 kumeni, man nwang’u dong’ etie jadit cokiri. Etimo tic karacelo ku Paulo pi oro ma kadhu 10, man eponjo lembe dupa i bang’e.

Kinde ma Timoteo unwang’u nia Paulo ubeciro asu ragedo ma jubenyayu i kume, cicopere lembene utielo cwinye lee. Paulo ubino i kol i Roma, man saa maeca nwang’u dong’ judhingo nege. (2 Tim. 1:15, 16; 4:6-8) Timoteo uneno tegocwiny pa Paulo i wec m’eyero nia “aciro gin ceke.” (2 Tim. 2:8-13) Calu Timoteo, wan bende lapor mi cirocir pa Paulo copo tielo cwinywa.

Paulo ukwayu Timoteo nia enen tic pa Mungu m’ebetimo ni gin ma pire tek. Ewacu ire nia ‘eop wang’ giramia pa Mungu’ ma n’i ie calu mac. (2 Tim. 1:6, NWT) Paulo utio ku wec mi dhu Jugiriki kharisma pi ninyutho “giramia.” Wec eno ubenyutho giramia ma ng’atini nwang’u mi mananu ma nwang’u eromo ko ngo. Timoteo unwang’u giramia maeno kinde ma jung’iye nia ecak timo tic ma segi i cokiri.​—1 Tim. 4:14.

Timoteo ucikere nitim’ang’o ku giramia maeno? Kinde m’esomo wec m’uwacu nia “op wang’ giramia pa Mungu . . . calu mac,”  cicopere epoi pi mac ma jutio ko i pacu, ma saa moko copo tho dong’ ni cugi. Cugi macne m’udong’, jucopo opo wang’e eliel kendo. Diksioner moko uwacu nia, wec mi dhu Jugiriki (anazopyreo) ma Paulo utio ko thelembene tie “niopo, nicewo, nicwinyo.” I ayi mange ecopo nyutho “nimedo amora i tic moko.” I ayi moko ke, Paulo ubino yero ni Timoteo nia etim tic ma jumio i kore aketha cwinye. Tin wan bende mito watim lembe ma rom, niwacu watim tic pa Mungu kud amora, man ku yawyaw.

Kinde ma Timoteo ubemedere nisomo barua ma jarimbe ukiewo ire, enwang’u wec mange ma copo konye nitimo tic ma jumio i kore ma ber. Paulo ukiewo kumae: “Gin ma ber maeni ma juketho i kori no gwoke ku tipo maleng’ m’ubedo i iwa.” (2 Tim. 1:14) Girang’o ma ber ma juketho i kor Timoteo? I verse m’i wang’e, Paulo ular uweco iwi “lembe ma cu,” niwacu lemandha ma nwang’ere i Lembagora. (2 Tim. 1:13) Timoteo ubino ku rwom mi ponjo lemandha i cokiri man ni dhanu ma woko bende. (2 Tim. 4:1-5) M’umedo maeno, calu ebino jadit cokiri, umito ekwai udul rombe pa Mungu de. (1 Pet. 5:2) Ukwayu egwok gin ma jumio i kore, niwacu lemandha m’ecikere niponjo, ma nwang’u ebejengere ko iwi tego mi tipo maleng’ man iwi Lembe pa Mungu.​—2 Tim. 3:14-17.

Tin wan bende watie ku tic ma pire tek ma jumio i korwa, niwacu, lemandha ma wacikara niponjo ni jumange. (Mat. 28:19, 20) Wabinyutho nia wabeneno tic maeno ni gin ma pire tek, nwang’u wabeweko ngo nirwo man niponjo Lembe pa Mungu. (Rum. 12:11, 12; 1 Tim. 4:13, 15, 16) M’umedo maeno, wacopo bedo ku rwom mange bende, calu bedo jadit cokiri kunoke timo tic mi saa ceke. Tic maeno ma jumio i korwa ucikere nidwokowa mol man eketh wajengara zoo iwi Mungu. Pieno, ukwayu wagwok tic ma jumio i korwa, wamare man wakwai Yehova ukonywa watim tije ma ber.

Tic ma jumio i kor Timoteo ubino ire kende ngo, ento ecikere niponjo jumange de ung’ei tije. Paulo uyero ire kumae: “Gin m’iwinjo i bang’a . . . dong’ imi ni jumandha, ma gicopo ponjo dhanu mange bende.” (2 Tim. 2:2) Timoteo ucikere ninwang’u ponji i bang’ umego mange, man en de ecikere ninyutho igi gin m’eng’eyo. Tin bende, pire tie tek nia jadit cokiriman utim kumeno. Jadit cokiri ma cuu kanu ngo ng’eyong’ec m’etie ko ire gire, ento eponjo jumange de kara gibed ku copo mi timo tic m’ukwayere. Lworo nege ngo nia ju m’eponjo bing’eyo lembe lee man gibidoko jubodho lee nisage. Pieno, ka jadit cokiri ubeponjo jumange ku tic, mito ngo eponjgi nya malumalu, ento mito ekonygi gidok ni Jukristu m’uteng’ini, m’utie ku copo mi ng’io i lembe. I ayi maeno re ma dhanu m’eponjo bibedo ku kony lee i cokiri.

M’umbe jiji, Timoteo ufoyo lee mandha barua ma Paulo uoro ire. Cicopere nia ebed esomo baruane kendo kendo, ebed enyamu ie pi ninwang’u juk ma beco, man nineno kite m’ecopo tio ko ku lembene i tic ma jumio i kore.

Wan bende mito watii ku juk maeno. Nenedi? Nwang’u waopo wang’ giramia pa Mungu ma jumio i korwa calu mac, wabaye ngo, man nwang’u waponjo jumange bende ku ng’eyong’ec ma watie ko. I ayi maeno re, calu ma Paulo ukiewo ni Timoteo, wan bende ‘wabitimo tic mwa kakare.’​—2 Tim. 4:5.