1-2. Umego moko unwang’u ponji ma kani pi juk m’emiyo?

 ORO dupa udaru kadhu, judong cokiri moko ario gicidh giliewo nyamego moko m’ukeng’o coko pi kare moko. Umego m’ubino telo wi wec saa maeca usomo giragora dupa m’uweco pi coko. Eparu nia liew ma gitimo uwotho ma ber. Re kinde ma giai gibedok, nyamegone uyero kumae: “Umego, wunyang’ ungo i lembe m’abekadhu kud i iye.” Umego gimiyo juk m’umbe nikenyang’ i lembe ma nyamego ubenwang’ere ko. Lembuno uketho nyamegone uneno ngo kony mi juk migi.

² Jadit cokiri m’utelo wiwec cing’ nica uwacu kumae: “Saa maeca aparu nia wi nyamego nica ubino tek ateka. Ento kinde m’aparu pi lembene, anwang’u nia asomo ire giragora ceke m’ukwayere kakare nilar paru ku kwong’a pi nyamego mwane. Nang’ acopo lar penje pi ning’eyo pi peko m’ebenwang’ere ko man nineno kite m’aromo konye ko.” Lembuno umiyo ponji ni jadit cokiri eno. Tin dong’ etie jakwac ma ber ma dieng’ pi jumange.

3. Jukani ma copo miyo juk i cokiri?

 ³ Judong cokiri gitie jukwac, man gitie ku rwom mi miyo juk tek ubekwayere. Re saa moko jumange m’i cokiri de copo miyo juk. Ku lapor, umego kunoke nyamego moko copo miyo juk m’ujengere iwi Biblia ni jarimbe. (Zab. 141:5; Rie. 25:12) Kunoke nyamego moko m’uteng’ini copo “ponjo mon ma nyir” i lembe ma jukiewo pire i Tito 2:3-5. Bende, wang’ ma pol bekwayere nia jurunyodo gimii juk man gitwiny awiya migi. Pieno, kadok thiwiwec  maeni uweco akeca pi judong cokiri, re wan ceke wacopo nwang’u ponji i iye kara wamii juk ma konyo ng’atini, ma cwale i timo, man ma ‘binyayu mutoro i adundene.’​—Rie. 27:9.

4. Wabineno lembang’o i thiwiwec maeni?

⁴ I thiwiwec maeni wabineno lembe ang’wen m’uweco iwi miyo juk: (1) Pirang’o jubed jumiyo juk? (2) Nyo andha pi jukne tie teki? (3) Ng’a m’ucikere nimiyo juk? (4) Icopo miyo juk cuu nenedi?

5. Pirang’o jucopo jolo ma ber juk pa jadit cokiri tek emiye ku mer? (1 Jukorintho 13:4, 7)

⁵ Judong cokiri gimaru umego ku nyimego. Saa moko ginyutho merne nikadhu kud i juk ma gimiyo ni ng’atu m’ukwanyu yo ma rac. (Gal. 6:1) Ento i wang’ niweco ku ng’atune, jadit cokiri ucikere niparu pi kite ma tung’ tung’ mi mer ma jakwenda Paulo uweco pire. Ekiewo kumae: “Mer ciro lembe hai man ebedo ber ku dhanu. . . . Emulere ku gin ceke, eyiyo gin ceke, egeno gin ceke, man eciro gin ceke.” (Som 1 Jukorintho 13:4, 7.) Ninyamu i lembe iwi giragora maeno bikonyo jadit cokiri nimiyo juk ma ku mer man i ayi ma ber. Tek ng’atu ma jumiyo ire juk uneno nia jadit cokiri ubedieng’ pire, ecopo jolo jukne ma ber.​—Rum. 12:10.

6. Jakwenda Paulo uweko lapor ma ber ma kani?

⁶ Jakwenda Paulo uweko lapor ma ber, kum en de ebino jadit cokiri. Ku lapor, kinde m’eneno nia umego mi Thesaloniki gibino ku yeny mi juk, ecerere ngo nimiyo igi juk. Re i barua pare m’ekiewo igi, elar efoyogi pi gwoko bedoleng’ migi, pi tic migi mi mer, man pi cirocir migi. Eparu bende pi lembe ma gibenwang’iri ko i kwo migi, man eng’eyo nia kwo ubino yot ungo igi man nia gibino ciro ragedo. (1 Thes. 1:3; 2 Thes. 1:4) Eyero igi nia gitie bende lapor ma ber ni Jukristu mange. (1 Thes. 1:8, 9) Gijolo foyofoc ma Paulo umiyo igi kud anyong’a ma lee! M’umbe jiji, Paulo ugam umaru umego pare lee mandha. Lembuno uketho emiyo juk ma cuu i barua pare ario m’ekiewo ni Juthesaloniki.​—1 Thes. 4:1, 3-5, 11; 2 Thes. 3:11, 12.

7. Ng’atini copo jolo ngo juk ma jumiyo ire pirang’o?

⁷ Lembang’o ma copo timere ka wamiyo ngo juk i ayi ma cuu? Jadit cokiri moko uwacu kumae: “Jumoko jolo ngo juk pilembe ya jukne tie rac, ento pilembe jumiye ngo i ayi mi mer.” Lembuno ubemiyo iwa ponji ma kani? Ng’atini jolo juk yot yot tek jumiye ku mer, ento ungo ku ng’eicwiny.

8. Jadit cokiri ucikere nipenjere ku penji ma kani tek enwang’u nia mito emii juk ni ng’atu moko?

⁸ Kum judong cokiri ucikere ngo nimiel i kum miyo juk. I wang’ nimiyo juk, jadit cokiri ucikere nipenjere kumae: ‘Nyo andha ukwayu ayer lembe moko? Nyo andha ng’atuni utimo lembe ma raci? Nyo gin m’etimone uturo cik m’i Biblia? Kunoke nyo paru para re m’ukoc ku pare?’ Judong cokiri mito ginyuth rieko, kud gibed dhanu “ma vur vur i lembe” migi. (Rie. 29:20) Tek jadit cokiri utie ku jiji iwi lembe m’emito ejuk iye ng’atu moko, mito ewec ku jadit cokiri mange pi ninyang’ ka nyo gin ma ng’atune utimo uturo cik moko mi Biblia m’umito jujuke pire.​—2 Tim. 3:16, 17.

9. Juk ma Paulo umiyo iwi kendi man iwi ruko ubemiyo iwa ponji ma kani? (1 Timoteo 2:9, 10)

 ⁹ Wakewec iwi lapor moko. Wakemak nia jadit cokiri moko uneno kendi kunoke ruko pa jayic wadi moko umaku ngo wang’e. Jadit cokiri eno ukwayu upenjere kumae: ‘Nyo giragora moko nuti m’ucwala niweco i kum lembene?’ Calu ma jadit cokiri eno ubemito ngo emii juk m’ujengere iwi nen pare gire, ecopo penjo paru pa jadit cokiri mange kunoke p’umego kadi pa nyamego m’uteng’ini. Karacelo gicopo neno juk ma Paulo umiyo iwi kendi man iwi ruko. (Som 1 Timoteo 2:9, 10.) Paulo uweco pi cik mir ukungu m’unyutho nia Jakristu ucikere nikendo kendi m’umaku piny man ma cuu. Ento erieyo ngo kit kendi m’umito jukendi kunoke ngo. Eng’eyo nia Jakristuman utie ku twero mi ng’iyo gin m’umaku ekendi ma re kud ebed tung’ ku gin ma Biblia uyero. Pieno, kinde ma judong cokiri gibeneno ka nyo umito jumii juk ni ng’atini, ukwayu ginen nia nyo ng’iyong’ic ma ng’atune utimo ukadhu mupaka man umaku piny kunoke ngo.

10. Mito wang’ey lembang’o pi yub ma ng’atini copo maku?

¹⁰ Mito wang’ey nia Jukristu ario ma giteng’ini i tipo gicopo maku yub m’ukoc i kindgi, ma re nwang’u yub migine zoo gitie cuu. Pieno, wacikara ngo niketho cik mwa giwa pi gin ma ber ku gin ma rac ni juyic wadwa.​—Rum. 14:10.

11-12. Jadit cokiri ucikere nipenjere ku penji ma kani tek ubekwayere nia emii juk man ke pirang’o?

¹¹ Tek unwang’ere nia mito jumii juk ni ng’atini, penji ma wacopo penjara ko ni e: Ng’a m’ucikere nimiyo jukne? I wang’ nimiyo juk ni nyamego m’utie ku won ot pare kunoke ni nyathin, jadit cokiri mito uwec ku jawi ot ma tie ng’atu m’ukwayu umii jukne. * Kunoke copo kwayere nia jawi ot ubed unuti kinde ma judong cokiri gibemiyo jukne. Man calu ma waneno i  udukuwec mir 3, saa moko ecopo kwayere nia nyamego ma wang’e teng’ini re m’umii juk ni nyamego m’aradu.

¹² Lembe mange de nuti m’ukwayu jung’ii iye. Jadit cokiri copo penjere kumae: ‘Nyo an re m’atie ng’atu m’ukwayu umii juk maeni, kunoke jucopo winjo jukne cuu ka ng’atu mange re m’umiye?’ Ku lapor, ng’atu m’ubecayere nia tije mbe copo winjo ma ber juk pa jadit cokiri m’ugam unwang’ere ku lembe ma rom ku pare nisagu ng’atu m’unwang’ere ngo ku kit lembene. Jadit cokiri m’ugam  ubino ku pidoic ma rom eno, copo nyang’ cuu i lembe pa ng’atune man wec m’eyero romo tego cwinye lee. Re kadok kumeno, judong cokiri ceke gitie ku rwom mi tielo cwiny umego ku nyimego man mi konyogi gitim alokaloka moko ci ma Lembagora ubekwayu. Pieno, pire tie tek nimiyo juk kadok nwang’u jadit cokiri m’umiyo jukne ukadhu ngo kud i lembe ma rom ku pa ng’atune de.

13-14. Pirang’o pire tie tek nia jadit cokiri ubed ayika niwinjo lembe?

¹³ Bed ayika niwinjo lembe. Kinde ma jadit cokiri ubeyikere pi nicimiyo juk, ecikere nipenjere kumae: ‘Ang’eyo lembang’o i kum lembe m’umira ubekadhu kud i iye? Ebenwang’ere ku lembang’o i kwo pare? Nyo ebenyego ku peko moko m’ang’eyo ngo pire? Etie ku yeny mi lembang’o pi kawoni?’

¹⁴ Cik mir ukungu ma nwang’ere i Yakobo 1:19 uweco asaga pi ju m’ubemiyo juk. Yakobo ukiewo kumae: “Ng’atuman ubed m’ewinjo lembe pio, ma weco ngo m’umbe niparu i lembe, man ma ng’eicwiny make pio ngo.” Jadit cokiri copo geno nia eng’eyo lembe moko cuu, re nyo andha eng’eyogi ceke? Lembrieko 18:13 ubepoyo wiwa kumae: “Ng’atu ma loko lembe ma fok’ewinjo ngo, en e lem ma kite mbe man lewic ire.” Etie ber nipenjo ng’atini ukor en gire lembe m’ekadhu kud i iye. Pieno i wang’ niweco, jadit cokiri ucikere nilar winjo lembe. Poy i kum ponji ma jadit cokiri ma waweco pire i caku mi thiwiwec maeni unwang’u. Edok epoy nia kakare nicaku liew pare ku wec m’elar eyiko, nwang’u ecikere nipenjo nyamegone pi ning’eyo peko pare man nineno kite m’eromo konye ko. Tek judong cokiri gibenwang’u saa mi nyang’ cuu i lembe, gibitundo nikonyo umego ku nyimego cuu man nitielo cwinygi.

15. Judong cokiri gicopo tiyo nenedi ku cik mir ukungu ma nwang’ere i Lembrieko 27:23?

¹⁵ Tim kero ing’ey rombe. Calu ma walar waweco pire i acaki, nimiyo juk ma cuu, utie ngo kende kende nisomo giragora moko kunoke niyero lembe moko acel kadi ke ario. Umego ku nyimego mwa gitie ku yeny mi neno nia wabedieng’ kugi, wanyang’ kugi man nia wamito wakonygi. (Som Lembrieko 27:23.) Judong cokiri gicikiri nitimo kero nibedo ku winjiri ma ceng’ini kud umego ku nyimego.

16. Ang’o ma bikonyo judong cokiri nimiyo juk ma cuu?

¹⁶ Mito ngo judong cokiri giketh umego ku nyimego unengi nia lembe utie dit i wang’gi, man nia saa mi weco kugi utie kende kende ka lembe moko uwok. Ento gibed giwec i bang’gi thirithiri, man gidieng’ ku ng’atuman kinde m’ebenwang’ere ku peko. Jadit cokiri moko  m’uteng’ini uwacu kumae: “Kan itimo kumeno, ibidoko jarimbgi. E i ng’eye tek ubekwayere nia imii juk moko, ibinwang’u nia miyo jukne tie yot iri.” Man ng’atu ma jubemiyo ire jukne de bijolo jukne yot yot.

17. Jadit cokiri ucikere ninyutho cirocir man bedo ber, asagane i saa ma kani?

¹⁷ Bed jacirlembe man dhanu ma ber. Cirolembe man bedo ber ku dhanu pire tie tek, asagane ka ku kwong’a ng’atu ma jumiyo ire juk ukwero nitiyo ku juk m’i Biblia ma jumiyo ire. Jadit cokiri umito ngo ubed ku kura mi maku ng’eicwiny tek jutiyo ngo ku juk pare ndhundhu. Biblia uyero pi Yesu nia “agada m’utur ebirungo ngo, kadi maj thala m’uliel nyayiri yiri de ebinego ngo.” (Mat. 12:20) Pieno, jadit cokiri copo kwayu i rwo pare ma segi nia Yehova umii mugisa ni ng’atu ma jumiyo ire juk, ekonye enyang’ i thelembe m’uketho jumiyo ire jukne man bende etii kude. Umego gicopo bedo ku yeny mi nwang’u saa pi ninyamu i lembe ma juyero igi. Tek jadit cokiri ubenyutho cirocir kinde m’ebeweco man etie dhanu ma ber, ng’atu m’ebemiyo ire juk biketho wiye i kum lembe ma jubeyero ire, ento ungo i kum ayi ma jumiyo ko ire jukne. Re kadok kumeno, mito saa ceke juk ma jubemiyo ujengere iwi Lembe pa Mungu.

18. (a) Lembang’o ma mito ngo wawil ko tek wabemiyo juki? (b) Calu ma junyutho i cal man i sanduku, jurunyodo gibeweco iwi lembang’o?

¹⁸ Nwang’ ponji i kum kosa peri. Calu ma waleng’ ungo, saa moko wiwa copo wil nitiyo tap tap ku lembe ma junyutho i thiwiwec maeni. (Yak. 3:2) Kokoro kosa bivuth iwa, ento tek evuth, mito wanwang’ ponji i kum lembene. Tek umego ku nyimego gibeneno nia wamarugi, ebibedo igi yot nitimo iwa kisa tek wayero kunoke watimo lembe moko m’uton i igi kinde ma wabemiyo igi juk.​—Nen bende sanduku “ Pi jurunyodo.”

19. Wacopo nyayu mutoro i umego ku nyimego mwa nenedi?

¹⁹ Calu ma waneno, nimiyo juk cuu tie ngo lembe ma yot. Watie dhanu ma waleng’ ungo, kadok ju ma wabemiyo igi jukne de. Pieno, poy i kum lembe ma waponjo i thiwiwec maeni. Ng’ey cuu thelembe m’ibemiyo ko juk. Bende, mito inen nia nyo andha juk m’ibecimiyo pire tie tek, man nia iromo ku miyo jukne. I wang’ nimiyo juk, lar ipenj penji man cik ithi cuu kara inyang’ i lembe ma ng’atune ubekadhu kud i iye. Pim nikethiri kakare. Bed dhanu ma ber, man bed jarimb umego ku nyimego. Poy i kum lembakeca ma e: Wamito ngo kende kende juk mwa ubed ma cuu, ento wamito bende ebed ma “nyayu mutoro i adunde.”​—Rie. 27:9.