I RUNDI mi Biblia, jubed jukolo keny ni jupagi nyaku tek jupagi nyakune ku jupagi jalawobi dhoggi urombo. Kenyne ubino piny ma pire tek, uketho i iye leya kunoke sente. Saa moko kenyne ubed ubedo tic ma ng’atini timo, calu ve tic ma Yakobo ugam uyiyo nitimo ni Laban pi nigamu nyare ma Rahel. (Tha. 29:17, 18, 20) Jubed jukolo kenyne pi thelembang’o?

Carol Meyers ma tie jararieko m’uponjo lembe iwi Biblia uyero kumae: “Jukolo keny ni jupagi nyaku pi kawang’ kony ma pire tek ma nyaku migi ubeweko nikonyo kogi i tic mi podho.” Keny ma jukolo ubed uketho bende winjiri i kind jupagi nyaku ku jupagi jalawobi. Juruot ario maeno gicopo nikonyiri i kindgi i saa mi peko kunoke i saa mi can. M’umedo maeno, keny ubed unyutho nia nyaku uyiyo niwok kud i the gwok man tela pa won pi nidok i the gwok man tela pa won ot pare.

Keny ubed unyutho ngo nia jung’iewo nyaku ang’iewa kunoke nia julwore alwora. Buku moko (Ancient Israel​—Its Life and Institutions) ukoro nia “sente kunoke piny mange m’ukethere nia jumii ni jupagi nyaku, ubed uketho nyithindho mir Israel gibed gineno gamiri ve gin mi ng’iew. Ento ubenen nia keny ma jubed jukolo ubino kony ma jumiyo ni jupagi nyaku, ento ungo gin ma jung’iewo ko nyaku ang’iewa.”

Tin i ng’om moko dhanu ubemediri asu niworo suru mi kolo keny. Tek jurunyodo ma Jukristu gikwayu nia jukol keny iwi nyaku migi, mito ‘giwek dhanu ceke ung’ey nia gitie dhanu ma i lembe migi tek ungo’ ma kud gikway ko piny lee akeca. (Filip. 4:5; 1 Kor. 10:32, 33) Eno binyutho nia gitie ngo “jumar sente” kunoke ju ma ketho cwiny hai i kum piny. (2 Tim. 3:2) M’umedo maeno, tek jurunyodo pa nyaku ukwayu ngo piny lee, jalawobi ucikere ngo nicwalu lembe mi gam udok ku ng’eye bor kara ya enwang’ sente m’ekol ko keny. Kunoke, ecikere ngo niweko tic pa jayab yo pi keny ma dit ma jung’olo ire kara ya etim tic mi kum saa ceke pi ninwang’u sente mi kenyne.

I theng ng’om moko, cik pa gavmenti re ma ng’olo kadhiri mi gin ma jumii ni keny. Kaka ma kumeno, ukwayu jurunyodo ma Jukristu giwor cik maeno. Pirang’o? Kum Lembe pa Mungu ubekwayu Jukristu nia “giwor jubim mi ng’om” man giwor bende cik mi ng’om m’uturo ngo cik pa Mungu.​—Rum. 13:1; Tic. 5:29.