YOMARA kud umego pare Marcelo man Hiver gibed gikwo i kiaru moko ma nyanok i ng’om mi Guatemala. Yomara ucaku ponjo Biblia ku Jumulembe pa Yehova, man i ng’eye umego pare de gicaku ponjo Biblia. Re peko moko de ubino nuti. Gin adek ceke gitie abinga man ging’eyo somo ngo kwan ma jusomo ku cingjo ma jukiewo pi ju ma wang’gi tho (braille); uketho ng’atu ma ponjo kugi Biblia somo en udukuwec ku giragora ma tung’ tung’.

Nicidho i coko bende ubino igi lembe ma tek, kum gicopo wotho ngo gin gigi woth mi dakika 40 pi nitundo i Ot ker ma ceng’ini kugi. Ento umego mi cokiri gimaku yub mi becidho gamugi kara gicidh i coko ceke. Kinde ma jucaku miyo igi theng program i coko m’i kind yenga, umego ubed ukonyogi nimaku thengene ku wigi.

I dwi mir 5, oro 2019, jucaku timo coko i kiaru migi. E ndhundhu i ng’eye, umego moko giku min ot pare ma gitie juyab yo ma nja gidok i kiarune. Juyab yone giketho lembakeca mi ponjo juponj Biblia adek maeno ku nisomo man nikiewo girasoma mi ju ma wang’gi utho, kadok nwang’u gin de fodi ging’eyo ngo nisome man nikiewe. Pieno, gicidho i kapang buku moko pi ning’eyo lembe iwi girasoma mi ju ma wang’gi tho man ning’eyo bodho ma juromo tiyo ko pi niponje ni jumange.

I ng’ey dwi ma nyanok, Yomara, Marcelo, man Hiver gicaku somo girasoma mi ju ma wang’gi tho yot yot, man eno ukonyogi nitimo mediri ma cuu mandha i thenge mi tipo. Kawoni gin adek zoo gitiye juyab yo ma nja. Marcelo utie bende jakony tic. I kind yenga zoo, gibed gimiyiri lee mandha i lembe mi tipo. Amora migi uyawu kum jumange de.

Yomara, Marcelo, man Hiver gitie ku foyofoc ma lee pi kony mi mer ma cokiri unyutho igi. Yomara uyero kumae: “Jumulembe pa Yehova ginyutho iwa mer mandha mi Jukristu niai ma warombo kugi wang’ ma kwong’a.” Marcelo umedo kumae: “Watie ku jurimo ma beco i cokiri mwa, man watie i kind juruot mir umego mi wang’ ng’om zoo ma mer udikogi i acel.” Yomara kud umego pare gibekuro kud ava ma lee nineno ku wang’gi kite ma Yehova bidwoko ko ng’om udok ni paradizo.​—Zab. 37:10, 11; Isa. 35:5.