SAA moko, jugor Biblia gibed gidwogo iwi wec ma rom tap tap. Wakenen thelembe adek ma e ma copere nia ubed ucwalugi nitimo kumeno:

Saa ma jukiewo wecne i iye. I Israel ma con, dhanu ma dupa gibino mbe ku buku mi Cik ma migi. Wang’ ma pol, gibed giwinjo Cik ma jubesomo kinde ma gicokiri i wang’ hema man i hekalu. (Poy. 31:10-12) M’umbe jiji, lembe ubino dupa m’ubed uwingo wigi saa ma gibewinjo Cik, man gibed gicungo pi saa m’ulwar i kind udul ma dit mi dhanu. (Neh. 8:2, 3, 7) I kare ma kumeno, nidwogo iwi wec ma pigi tek ubed uketho ebedo yot ni dhanu nipoy i kum giragora man nitiyo kugi i kwo migi. Nidwogo iwi wec moko ubed ukonyogi asagane nipoy cuu mandha i kum lembe ceke m’ugwaku kum cik ma Mungu umiyo igi.—Law. 18:4-22; Poy. 5:1.

Ayi ma jukiewo ko wecne. Kago apar wi dak mi theng Biblia utie wer, calu ve buku mi Zaburi, Wer pa Suleman man Ywak. I wer moko, junwang’u thenge ma ketho nwoc iwi wec ma pigi tek man ma konyo juwinj nimaku wecne ku wigi. Ku lapor, kenen wec ma e ma nwang’ere i Zaburi 115:9-11: “E Israel, gen Yehova: En e kony migi man ban migi. E ot pa Harun, wugen Yehova: En e kony migi, man ban migi. Wun ma wulworo Yehova, wugen Yehova: En e kony migi man ban migi.” Ibeneno ngo nia nidwogo iwi wec maeno, romo konyo juruwer nigwoko lemandha ma pigi tek i wigi man i adundegi?

Thelembe ma jukiewo ko wecne. Saa moko jugor Biblia gibed gidwogo iwi wec ma pigi tek lee. Ku lapor, kinde ma Yehova ung’olo ni Juisrael nia kud gicam rimo, eketho Musa udwogo iwi thelembene wang’ udul. Mungu umito ketho nwoc nia kwo mi ring’kum n’i rimo, nia rimo ubenyutho kwo. (Law. 17:11, 14) I ng’eye kinde ma jukwenda ku judong cokiri mi Yeruzalem gibino kwanu lembe ma pigi tek m’ukwayu Jukristu giur kara ginyay anyong’a i Mungu, giketho nwoc kendo nia pire tie tek niceriri i kum rimo.—Tic. 15:20, 29.

Ento Yehova ubino mito ngo nia nidwogo iwi wec mi Lembagora ubed ni ng’iyo ma nja. Ku lapor, Yesu uyero kumae: “Kinde m’iberwo, kud idwog iwi lembe acel wang’ dupa.” (Mat. 6:7) I ng’eye, enyutho iwa lembe m’atira ma wacopo rwo pigi man m’urombo ku yeny pa Mungu. (Mat. 6:9-13) Pieno kadok wabed watiyo ngo ku wec ma rom wang’ dupa i rwo mwa de, re watie agonya nidwogo iwi paru ma rom kendo kendo.—Mat. 7:7-11.

Lembe pa Mungu bedwogo iwi wec man lembe ma rom pi thelembe m’atira. Eno tie acel m’i kind yo ma dupa ma Japonji mwa ma dit ponjo kowa pi bero mwa.—Isa. 48:17, 18.