1. Jutic pa Yehova ginyutho pidoic ma kani ma ber niai coni?

 NYO imaru Yehova ku cwinyi ceke? M’umbe jiji, imare lee mandha! Man itie ngo kendi. Niai con, dhanu ma wendgi kwanere ngo gibed giwinjiri tap calu in. (Zab. 104:33, 34) Dhanu dupa gibed gitwoniri ku piny dupa pi nitimo thier ni Yehova. Eno ubino tap gin ma Junaziri mir Israel ma con gibed gitimo. Junaziri gibino jukani, man lapor migi copo miyo iwa ponji ma kani?

2. (a) Junaziri gibino jukani? (Wel 6:1, 2) (b) Pirang’o Juisrael moko gibed ging’iyo nidoko Junaziri?

² Wec ma nia “Janaziri” uai kud i wec mi dhu Juebrania ma thelembene tie “Ng’atu ma juketho ang’et,” “Ng’atu ma jukoyo ang’et,” kunoke “Ng’atu m’uthiero kwo pare.” Junaziri gibino Juisrael ma weg amora ma gitwoniri ku piny moko i kwo migi pi nitimo ni Yehova i ayi ma segi. Cik pa Musa ubed uyiyo nia nico kunoke dhaku m’umaru, utim lembang’ola ma segi ma ku kwong’ ni Yehova pi nikwo calu Janaziri pi kare moko. a (Som Wel 6:1, 2.) Ubed ukwayere nia ng’atu m’utimo lembang’ola maeno uwor telowic ma Juisrael mange gibed giworo ngo. Ang’o m’ubed ucwalu Jaisrael nitimo lembang’ola ma ku kwong’ pi nibedo Janaziri? Ubino mer ma thuc m’emaru ko Yehova man foyofoc m’etie ko pi bero m’ebetimo ire.—Poy. 6:5; 16:17.

3. Dhanu pa Mungu ma tin gitie calu Junaziri i ayi ma kani?

³ The yub mi bedo Janaziri uthum kinde ma “cik pa Kristu” uwilo Cik pa Musa. (Gal. 6:2; Rum. 10:4) Ento tap calu  Junaziri, dhanu pa Yehova ma tin de gibemediri ninyutho ava ma lee mi timo ire kud adunde, ku ng’eyong’ec, ku pidoic, man ku tego migi ceke. (Mark. 12:30) Watimo lembang’ola ma ku kwong’ mi timo kumeno kinde ma wabethiero kwo mwa ire. Pi nikwo nimakere ku lembang’olane, wacikara nitimo yeny pa Yehova man nitwonara ku piny moko kokoro. Kinde ma wabeng’iyo i ayi ma Junaziri gibed gikwo ko nimakere ku lembang’ola migi, wacopo kwanyu ponji ma beco dupa ma bikonyowa nikwo nimakere ku lembang’ola mwa bende. b (Mat. 16:24) Wakewec iwi laporne moko.

BED KU PIDOIC MI TWONIRI KU PINY MOKO

4. Nimakere ku Wel 6:3, 4, Janaziri ubed utwonere kud ang’o?

⁴ Som Wel 6:3, 4. Cik ubino nia Junaziri gikoyiri cen ku kong’o ceke man ku gin moko ci m’uai kud i kum yend ulok, nik’ebed nyinge m’ucek kadi m’uthwo. Dhanu m’i ng’etgi gibed gitiyo ku piny maeno zoo man ebino lembe ma kakare, kum racu ubino mbe nyanok de nitiyo kugi. Biblia bende uyero nia “pigulok ma nyayu mutoro i adunde dhanu,” utie giramiya m’uai i bang’ Mungu. (Zab. 104:14, 15) Ento, Junaziri gibed ging’iyo gigi nitwoniri kud anyong’a ma junwang’u i piny maeno. c

5. Madián giku Marcela ging’iyo nitwoniri kud ang’o, man pirang’o?

⁵ Calu Junaziri, wan bende watwonara ku piny dupa pi nitimo lee i tic pa Yehova. Wakewec iwi lapor p’umego Madián giku min ot pare Marcela. d Gibino ku kwo ma yot. Madián ubed utimo tic mi sente ma lee man gibed gikwo i ot moko ma leng’. Ento gibino mito nia gitim lee i tic pa Yehova. Pi nitundo i kum lembakecane, ginwang’u nia ukwayu gitim alokaloka i kwo migi. Giyero kumae: “Wacaku ku jwigo wel sente ma watiyo ko kubang’ ceng’. I ng’eye wadok i ot moko m’ujwik, man walworo muthukari mwa.” Ebino ngo cik nia Madián giku Marcela gitim lembuno ceke; ging’iyo nitimo kumeno pilembe gimito gitim lee i tic pa Yehova. Kawoni yub migine uketho gitie weg anyong’a man jumutoro.

6. Pirang’o Jukristu ma tin gitwoniri ku piny moko? (Nen bende cal.)

 ⁶ Tin dhanu pa Yehova gibedo kud anyong’a nitwoniri ku piny moko i kwo migi pi nimiyo saa migi ma lee zoo i tic mi theokrasi. (1 Kor. 9:3-6) Yehova ukethe ngo ni ng’ol ku cik nia wacikara nitimo kumeno; man utie de ngo nia piny ma watwonara kone gi rac araca. Ku lapor, jumoko giweko tic migi kunoke ot migi ma gimaru. Ju dupa gituc nicoro nindo mi gamiri migi kunoke mi nyolo awiya udok bor i wang’gi. Jumange ke ging’iyo nidok i kaka ma yeny utie lee i iye, kadok eno romo kwayu nia gikwo bor ku wedi migi man jurimgi. Dupa m’i kindwa gitimo lembuno pilembe gibemito gitim ni Yehova i kadhiri ceke ma gicopo. Dong’ cwinyi bed tek nia ebeneno wodhiri m’ibewodhiri ko pi nitimo ire ni gin ma pire tek lee, dok ebed i mukero ma lee kunoke ngo.—Ebr. 6:10.

BED AYIKA NIKOC KU JUMANGE

7. Pirang’o saa moko ebed ebedo tek ni Janaziri niworo lembang’ola pare? (Wel 6:5) (Nen bende cal.)

⁷ Som Wel 6:5. Junaziri gibed ging’olo ku kwong’ nia gibinyaru ngo yuk wigi. Eno ubed unyutho woro migi ma thuc yor i bang’ Yehova. Ka Jaisrael moko ubedo Janaziri pi kare m’ulwar, yuk wiye m’udongo ma boco caku nen yot yot. Tek dhanu m’ebekwo kugi de gimaru nia ebed Janaziri man gibekonye, ebedo mbe ku peko ma hai. Lembe ma rac lundo utie nia, saa moko Juisrael gibed giworo ngo Junaziri man gibed gikonyogi de ngo. Ku lapor, i rundi pa jabila Amos, Juisrael ma jujai gibed gimiyo “pigulok ni Junaziri gimadhi,” copere pi niketho ginyoth lembang’ola migi ma ku kwong’ ma nia gibikoyiri cen ku pigulok. (Amo. 2:12) Pieno saa moko ubed ukwayu Janaziri unyuth tegocwiny ma lee pi niworo lembang’ola pare man nikoc ku jumange.

8. Lembe ma Benjamin ukadhu kud i iye ubetielo cwinyi nenedi?

⁸ Ku kony pa Yehova, wan bende wacopo koc ku jumange ku tegocwinywa, kadok watie dhanu ma lwor. Wakewec iwi lapor pa Benjamin ma tie Jamulembe pa Yehova moko mi ng’om mi Norvège ma oro pare apar. Jugam juyiko pi program moko kaka m’esomo i iye ku nying’ ng’om mir Ukraine ma lwiny ubenyotho. Jukwayu nia awiya ceke giwer wer moko, ma gironyo kendi mi rangi mir abera mi ng’om mir Ukraine. Benjamin ukoyere ang’et nyanok ku kaka ma lembene ubekadhu i iye pi niuro nidikere i foc mi ng’om. Ento japonjo moko ma dhaku unene, man  elwong’e ku dwande ma tek kumae: “Icikiri nibino dikiri kudwa ka e. Wan ceke wabekuro de in!” Ku tegocwiny, Benjamin ucoro i bang’ japonjone man eyero kumae: “An adikara ngo i lemgamba, kadok i lembe moko ci ma jubetimo pi ninyutho cwircwiny. Kawoni Jumulembe pa Yehova dupa gin’i kol pilembe gikwero nidikiri i lwiny.” Japonjone uwinjo lembe pa Benjamin man eyero nia kud edikere i lembe m’ubino kadhune. Ento awiya wagi mi somo gicaku penje nia pirang’o edikere ngo kugi. Lworo upikere lee mandha i iye, uketho eyenyo wak awaka zoo; re ku tegocwiny, edwogo iwi lembe ma rom m’eyero ni japonjo i wang’ awiya ceke m’i ot somo pare. I ng’eye, Benjamin uyero ni junyodo pare nia eneno nia Yehova ukonye nicero bang’ yiyoyic pare.

9. Wacopo nyayu anyong’a i adunde Yehova nenedi?

⁹ Wan wang’iyo mwa niworo Yehova, uketho jumange gineno nia wakoc kugi. Pieno watie ku yeny mi tegocwiny pi ninyutho kamaleng’ i somo kunoke i kaka tic nia watie Jumulembe pa Yehova. Man calu ma pidoic man timo mi dhanu mi ng’om maeni ubemedere ameda ninyothere, saa moko nyo ebidoko iwa tek magwei nikwo nimakere ku cik mir ukungu mi Biblia man nirweyo lembanyong’a. (2 Tim. 1:8; 3:13) Ento saa ceke bed ipoy nia ka wabekoc ku tegocwinywa ku ju ma gitimo ngo ni Yehova, ‘wanyayu mutoro i adundene.’—Rie. 27:11; Mal. 3:18.

KETH YEHOVA I KABEDO MA KWONG’A I KWO PERI

10. Woro cik ma nwang’ere i Wel 6:6, 7 ubino amulaic ma lee ni Junaziri i ayi ma nenedi?

¹⁰ Som Wel 6:6, 7. Junaziri gibino mbe ku kaka mi coro i vut avu. Eromo nen nia i ayi maeno, gitwoniri ngo ku piny ma hai. Ento i rundi mi Biblia, Janaziri ubed unwang’u nia cik maeno utie tek asagane kinde ma wat pare moko ma ceng’ini re m’utho, pilembe lemsuru mi lemcan ubed ukwayu nia jubed i ng’et avu. (Yoh. 19:39, 40; Tic. 9:36-40) Janaziri ke ubino mbe ku twero mi woro lemsuru ma kumeno. Kadok kinde ma Junaziri gibedikiri i lemcan ma pek m’uwok i kind juruot migi, ubed ukwayu ginyuth yiyoyic ma tek pi nimoko i kum lembang’ola migi. M’umbe jiji, Yehova ubed umiyo tego ni jutic pare maeno ma giwodhiri ire, pi ninyego ku peko ma gibenwang’iri ko.

11. Jakristu ucikere nikeco nitimo ang’o kinde m’ebemaku yub iwi lembe m’umulo kum wedi pare? (Nen bende cal.)

 ¹¹ Wa Jukristu, waneno ngo thieriri ma wathierara ko ni Yehova ni gin mi tuko. Ebedo kud atelatela iwi yub man timo mwa i lembe m’i kindwa ku wedi mwa. Watimo kero pi nipong’o yeny mi juruot mwa, re waketho ngo nyanok de yeny mi wedi mwa i wang’ lembe ma Yehova ubekwayu i bang’wa. (Mat. 10:35-37; 1 Tim. 5:8) Saa moko pi ninyayu anyong’a i Yehova, romo kwayere nia watim lembe m’umaku ngo i wedi mwa.

12. Alexandru utimo ang’o kinde m’ebetiyo iwi lembe moko ma tek m’uwok i ot pare, man etimo ngo ang’o?

¹² Wakewec iwi lembe m’umego Alexandru giku min ot pare Dorina gikadhu kud i iye. I ng’ey ma gin ario ceke giponjo Biblia pi oro acel, Dorina ujigo, man emito nia Alexandru de ujigi. Ento eyero ire ku yoo man ku rieko nia en ebimedere pare asu. Lembuno unyang’u ngo Dorina nyanok de, man eii nidiye kara ejig niponjo Biblia. Alexandru uyero nia ebed etimo kero ninyang’ i kite ma min ot pare ubewinjere ko, re ebino ire lembe ma yot ungo. Saa moko ka Dorina ubenyware man ubedwoko ire lembe zoo ku kwinyo, eparu nia mito dong’ ejig ponjine cen. Ento Alexandru umedere asu niketho Yehova i kabedo ma kwong’a, man i saa ma rom eno enyutho bende mer man woro ma lee ni min ot pare. Tokcenne, lapor pare ma ber ucwalu min ot pare nicaku ponji pare mi Biblia kendo, man i ng’eye elimo batizo.—Nen video ma thiwiye tie, Alexandru giku Dorina Văcar: “Mer ciro lembe hai man ebedo ber ku dhanu,” i jw.org.

13. Wacopo nyutho nenedi nia wamaru Yehova man wedi mwa?

¹³ Yehova re m’ucaku the juruot, man ebemito nia juruot mwa gibed ku mutoro. (Efe. 3:14, 15) Tek wamito wabed ku mutoro mandha, ukwayu watim lembe nimakere ku yeny pare. Dong’ bed kud andha nia kinde m’ibekwo ku juruot peri ku mer man ku woro, Yehova ubeneno kero ceke m’ibetimo pi nitimo ire thier i ayi maeno.—Rum. 12:10.

KONY JUMANGE DE GIBED KU PIDOIC MA CALU MI JUNAZIRI

14. Ukwayu waii nitielo asagane cwiny jukani ku wec mwa?

¹⁴ Dhanu ceke ma tin gibetimo thier ni Yehova gicikiri niweko mer ma gimare ko ucwalgi niwodhiri pi tic pare. Saa moko re ebedo yot ungo. Dong’ wacopo konyara i kindwa nenedi kara watim kumeno? Nwang’u wabetielo cwinywa i kindwa ku wec  mwa. (Yob 16:5) Nyo jumoko tie i cokiri mwu ma gibemito nia kud gikwo ku giki mi kum dupa kara gitim lee i tic pa Yehova? Nyo ing’eyo aradu moko ma gibeii ku tegocwiny pi nikoc ku juwagi mi somo kadok etie yot ungo igi de? Nyo ing’eyo juponj Biblia man juyic wadwa moko ma gibenyego ma tek pi nigwoko bedoleng’ migi ni Yehova i wang’ jai mi wedi migi? Wek wan ceke watii ku kaka m’unen pi niyero wec ma tielo cwiny ni juyic wadwa ma kumeno, man wanyuth igi nia wamarugi nikum wodhiri man tegocwiny migi.—Filem. 4, 5, 7.

15. Jumoko gituc nikonyo ju ma gin’i tic mi saa ceke nenedi?

¹⁵ Saa moko, eromo copere iwa nikonyo Jukristu wadwa ma gin’i tic mi saa ceke ku piny ma gitie ku yenyne. (Rie. 19:17; Ebr. 13:16) Ku lapor, nyamego moko m’utii ma kwo i ng’om mi Sri Lanka, ubino lee dit kud ava mi timo tap kumeno. Kinde ma jumedo ire sente ma juculo ka ng’atini ujigo tic nikum oro pare m’ucidho, emito ekony nyimego ario m’aradu ma gi juyab yo kara gimediri ku tic migi, pilembe gibino ku peko pa sente. E epangu nibeculo sente ceke ma gitiyo ko pi nirweyo ku telefon. Nyamego eno unyutho pidoic ma ber andhandha!

16. Yub ma con mi bedo Janaziri ubemiyo iwa ponji ma kani?

¹⁶ M’umbe jiji, wacopo nwang’u ponji dupa dit i lapor ma ber ma Junaziri mi rundi ma con giweko! Ento yub maeno ubeponjowa bende ku lembe ma e iwi Yehova ma Wegwa m’i polo: Cwinye tek nia watie kud ava ma lee mi nyayu anyong’a i iye man nia wabemito watwonara ku piny moko kara wakwo nimakere ku lembang’ola mwa mi timo ire thier. Emiyo iwa bende yung, pieno eweko wanen giwa ayi ma wabemito wanyuth ko ire nia wamare. (Rie. 23:15, 16; Mark. 10:28-30; 1 Yoh. 4:19) Yub mi bedo Janaziri ubenyutho nia Yehova neno wodhiri ma wawodhara ko pi nitimo ire ni gin ma pire tek. Dong’ wek wabed ku lembakeca ma wamedara ko nitimo ire, man kud ava mi miyo ire gin ma pire tek nisagu zoo ma watie ko.