1. Junyodo ma Jukristu gibed gimito gilar ging’ei ang’o i wang’e ma fodi nyathin migi ulimo ngo batizo?

NYAMEGO Blossom Brandt ukoro lembe m’utimere kinde m’emito nia elim batizo. Ekoro kumae: “Pi dwi ma dupa, abed ayero ni mama giku baba nia abemito alim batizo, man gin de wang’ ma pol gibed giweco kuda iwi lembene. Gimito gikeng’ei nia nyo andha anyang’ nia yub m’abemaku utie lembe mi tuko ngo. E i nindo 31 mi dwi mir 12, oro 1934, ceng’ maeno ma pire tek mi kwo para ugam uromo.” Tin bende, junyodo gibed gimito gikony awiya migi nimaku yub mi rieko. Ka nyathin ubemito ngo elim batizo, ma ke thelembe moko de mbe, mer pare ku Yehova copo nyothere. (Yak. 4:17) Re i wang’e ma fodi nyathin ulimo ngo batizo, junyodo ma riek gimito gilar ging’ei nia nyo andha nyathin utie ayika nidoko jalub pa Kristu.

2. (a) Juliew moko mi twodiri gineno lembang’o? (b) I thiwiwec maeni wabiponjo ang’o?

² Juliew moko mi twodiri gineno nia aradu ma pol ma  jumoko m’i kindgi dong’ oro migi 20 ku wiye de, fodi gilimo ngo batizo, kadok nwang’u gidongo i lemandha de. Wang’ ma pol, aradu maeno gicidho i coko, girweyo lembanyong’a, man gin gigi de ginwang’u nia gitie Jumulembe pa Yehova. Re pi thelembe moko, nwang’u fodi githiero ngo kwo migi ni Yehova man gilimo ngo batizo. Moko ke nwang’u junyodo re ma gibeparu nia fodi awiya migi gitie ngo ayika nilimo batizo. I thiwiwec maeni, wabiweco iwi lembe ang’wen m’uketho junyodo moko gibed giketho ngo cwiny awiya migi nia gilim batizo.

3. Junyodo pa Blossom gibino nidieng’ i kum lembang’o?

³ Junyodo pa Blossom ma juweco pigi i udukuwec mi kwong’o, gibino nidieng’ dit nia nyo nyaku migi utie ku oro m’uromo pire, m’ecopo nyang’ ko i thelembe mi batizo, man ning’eyo nia etie lembe mi tuko ngo. Dong’ junyodo gicopo ng’eyo nenedi ka nyo nyathin migi utie ayika nithiero kwo pare ni Yehova?

4. Lembe ma Yesu ung’olo i Matayo 28:19, 20 konyo junyodo nenedi tin eni?

⁴ Som Matayo 28:19, 20. Biblia unyutho ngo oro ma tap ma ng’atini ucikere nilimo i ie batizo. Re ubekwayu junyodo gipar cuu nia niketho dhanu udok julub thelembene tie ang’o. I dhok mi Jugiriki, wec ma nia ‘niketho [dhanu] udok julub’ ma jutio ko i Matayo 28:19, thelembene tie niponjo ng’atini, ma nwang’u ikeco nia ibikonye kara edok jalub. Jalub utie ng’atu m’ubeponjo lembe pa Yesu, m’ubenyang’ i ie man m’ubemito niwore. Pieno junyodo gicikiri niponjo awiya migi niai ma fodi ginyoliri anyola, ma nwang’u gikeco nikonyogi kara gibin githier kwo migi ni Yehova man gidok julub pa Kristu. I andha, nyathin ma nok magwei copo limo ngo batizo. Re Biblia unyutho nia kadok awiya de gicopo ninyang’ man nimaru lemandha mi Biblia.

5, 6. (a) Lembe ma Biblia ukoro iwi Timoteo ubecwaluwa niyero lembang’o iwi batizo pare? (b) Junyodo ma riek gicopo timo ang’o pi nikonyo awiya migi cuu?

⁵ Timoteo ubino jalub m’ugam umaku yub mi timo ni Yehova ma nwang’u fodi etie aradu. Jakwenda Paulo uwacu nia Timoteo ucaku ponjo lemandha mi Lembe pa Mungu ‘ma fodi e mukere.’ Won Timoteo ubino ngo jaratic pa Yehova, re min giku wang’umire gikonye nimaru Lembe pa Mungu. Eno uketho Timoteo ubino ku yioyic ma tek mandha. (2 Tim. 1:5; 3:14, 15) Kinde m’edoko ku oro 20 kumeni, nwang’u dong’ eromo nibedo ku rwom ma segi i cokiri.​—Tic. 16:1-3.

⁶ Awiya tie tung’ tung’. Gin ceke giteng’ini ngo i thenge mi tipo i oro ma rom. Jumoko ginyang’ i lemandha, gimaku yub ma cuu man gimito gilim batizo nwang’u fodi githindho. Jumange ke gibedo ayika nilimo batizo nwang’u dong’ oro migi ulwar. Pieno, junyodo ma riek gicego ngo mac i kum awiya migi nia gilim batizo, ento gikonyo nyathinman kara etim mediri nimakere ku copo pare. Anyong’a nego junyodo ka nyathin migi ubetio ku wec ma nwang’ere i Lembrieko 27:11. (Som.) Re gicikiri ning’eyo nia lembakeca migi utie nikonyo awiya migi gidok julub. Ku paru maeno i wigi, gicikiri nipenjiri kumae, ‘Nyo nyathin para utie ku ng’eyong’ec m’uromo pire pi nithiero kwo pare ni Mungu man nilimo batizo?’

7. Kara ng’atini ulim batizo, nyo ecikere ning’eyo lembe ceke mi Biblia? Kekor.

⁷ Kinde ma junyodo gibeponjo awiya migi, gikonyogi kara ging’ei lemandha cuu. Ng’eyong’ec maeno re ma bicwalu awiya nithiero kwo migi gigi ni Mungu. Re eno ubenyutho ngo nia nyathin ucikere ning’eyo ponji ceke ma jukoro i Biblia i wang’ nithiero kwo pare man nilimo batizo. Ng’atu moko ci m’utie jalub pa Kristu ucikere nimedere ku ponjo lembe, kadok i ng’ei limo batizo de. (Som Jukolosai 1:9, 10.) Dong’ ng’atini ucikere nibedo ku ng’eyong’ec ma rukani i wang’ limo batizo?

8, 9. Jakur odkol moko mi Filipi ukadhu kud i lembang’o, man lembene ubemio iwa ponji ma kani?

⁸ Lembe ma juruot moko ukadhu kud i ie i rundi ma con, romo konyo junyodo tin eni. (Tic. 16:25-33) Ceng’ini i oro 50, Paulo ucidho i adhura mi Filipi i wotho pare mir arionde i tic mi misioner. Kinde ma gitie kuca, judotogi kud adote mi ndra giku Sila, jutwiogi man jubologi i kol. I diewor ma ling’ digidi ma dit uyengo ng’om, uketho dhugola odkol ceke uyabere. Jakur odkol uparu nia jukol ceke udaru piei, pieno emito enegere cen. Re Paulo ujuke, man i ng’eye, giku Sila giponjo lemandha iwi Yesu ni jakur odkol maeno ku juruot pare. Giyio lembe ma juponjo igi iwi Yesu man ginyang’ nia pire tie tek dit niworo Yesu. Pieno gilimo batizo ndhundhu saa nica. Wacopo nwang’u ponji ma kani niai kud i lembuno?

⁹ Ecicopere nia i wang’e, jakur odkol maeno ubino askari mi Roma. Eng’eyo ngo Lembe pa Mungu, pieno kara edok Jakristu ugam ukwayere nia ekeponj lemandha mir ukungu mi Biblia, ekenyang’ bende i lembe ma Yehova ubekwayu i bang’ jurutic pare man eyii nia ebemito woro ponji pa Yesu. Lembe m’eponjo i kind saa maeca ma nyanok kende ukonye nibedo ku mito mi limo batizo. Ento i ng’ei batizo emedere niponjo lembe mange dupa. Dong’, ka nyathin peri uyero nia ebemito elim batizo pilembe emaru Yehova man ebemito ewore, icopo timo ang’o? Icopo weko ewec ku judong cokiri, kara gin re ma ginen nia nyo eromo nilimo batizo. * (Nen korolembe m’i there.) Calu Jukristu ceke m’ulimo batizo, en de ebimedere niponjo lembe iwi Yehova i nindo ceke mi kwo pare, kadok rondo ku rondo.​—Rum. 11:33, 34.

10, 11. (a) Junyodo moko gitie ku paru ma nenedi? (b) I andha ang’o ma bigwoko nyathin?

¹⁰ Junyodo moko giparu nia i wang’ limo batizo, ukwayu nyathin migi ukesom lee man enwang’ tic ma cuu. Paru mi junyodo ma kumeno copo bedo rac ungo, re gicikiri nipenjiri kumae: ‘Nyo eno bikonyo nyathin para nibedo ku kwo mandha? Nyo lembe maeno urombo ku gin ma wabeponjo i Biblia? Yehova ubemito watii ku kwo mwa nenedi?’​—Som Eklizia 12:1.

¹¹ Pire utie tek dit ning’eyo nia ng’om maeni ku piny ceke m’i ie utie kud adegi i kum paru pa Yehova man lembe m’ebemito. (Yak. 4:7, 8; 1 Yoh. 2:15-17; 5:19)  Mer ma ceng’ini ku Yehova re ma copo gwoko nyathin cuu mandha i kum Sitani man i kum ng’om maeni ma rac ku paru m’i ie. Ka junyodo giketho ponjiri mi ng’om man tic ma cuu re m’ubed ni lembe mi kwong’o i kwo, ma jiji mbe awiya migi de biparu nia piny ma tie i ng’om pigi tek niloyo mer ma ceng’ini ku Yehova. Eno ke tie ariti. Dong’ calu janyodo ma jamer, nyo andha ibemito ng’om maeni re m’unyuth gin ma copo mio anyong’a mandha ni nyathin peri? Yo acel kende ma ketho wabedo ku kwo ma cuu man kud anyong’a mandha, utie niketho Yehova i kabedo ma kwong’a i kwo mwa.​—Som Zaburi 1:2, 3.

12. Pirang’o junyodo moko giparu nia ukwayu nyathin migi ukedongi kan ebilimo batizo?

¹² Mego moko ukoro thelembe m’uketho ebino mito ngo nia nyaku pare ulim batizo. Eyero kumae: “Lewic ubenega niyero nia thelembe ma lee ubino nia, maru jubikoye kud i cokiri.” Calu mego maeno, junyodo ma pol de ginwang’u nia etie ber nia nyathin migi ukedongi agbele kan elim batizo, kara kud ebin ecorere swa i dubo. (Tha. 8:21; Rie. 22:15) Junyodo maeno giparu nia ka nyathin migi ulimo ngo batizo, jucopo ngo nikoye kud i cokiri. Re pirang’o paru maeno utie rac?​—Yak. 1:22.

13. Ka ng’atini ulimo ngo batizo, nyo eno nyutho nia ebiwodho ngo wel ni Yehova? Kekor.

¹³ I andha, junyodo gimito ngo nia nyathin migi ulim batizo ma fodi etie ngo ayika nithiero kwo pare ni Yehova. Re ecopo bedo kosa niparu nia nyathin biwodho ngo wel ni Yehova nitundo ebilimo batizo. Nyathin doko ma wodho wel ni Mungu tek edaru ng’eyo gin ma Yehova dagu ku m’emaru. (Som Yakobo 4:17.) Junyodo ma riek gicero ngo nyathin migi ku limo batizo. Kadok nwang’u fodi etie nyanok de, giponje nimaru gin ma Yehova umaru man nidagu gin m’edagu, calu gin bende. (Lk. 6:40) Mer ma nyathin peri umaru ko Yehova bigwoke i kum timo dubo ma lee, pilembe ebimaru etim lembe m’utie atira i wang’ Yehova.​—Isa. 35:8.

14. Judong cokiri giromo konyo kor junyodo nenedi?

¹⁴ Judong cokiri gicopo konyo kor junyodo nwang’u gibeweco ma mit pi lembakeca mi timo ni Yehova. Nyamego moko ubepoi i kum wec m’umego Russell uyero ire kinde m’ebino ku oro 6. Ekoro kumae: “Eting’a waweco kude pi dakika 15 iwi lembakeca para mi tipo.” Wecne ubino kud adwogi ma kani? I ng’eye nyamego maeno udoko jayab yo man etimo tije pi oro ma kadhu 70! Ma jiji mbe wec ma mit man ma ketho cwinyjo, copo bedo ku matoke ma cuu i kwo pa ng’atini zoo. (Rie. 25:11) Judong cokiri gicopo bende nikwayu junyodo kud awiya migi pi nikonyo tic mi yiko Ot Ker. Gicopo ketho awiya gitim tic m’uromo ku oro man copo migi.

15. Jumange i cokiri gicopo konyo awiya nenedi?

¹⁵ Dhanu mange mi cokiri ke gicopo konyo nenedi? Nwang’u gibeyenyo yo mi weco ku nyathinman. Ku lapor icopo neno lembe m’ubenyutho nia nyathin moko ubecoro ceng’ini i vut Yehova. Nyo edwoko wang’ penji cuu i coko, kunoke nyo etimo theng ponji i program mi coko m’i kind yenga? Nyo erweyo i daraza? Kinde m’enwang’ere i wang’ abidhe mi timo lembe ma rac, nyo etimo  ng’iong’ic ma cuu? Kan ineno lembe maeno i bang’e, yer ire wang’ acel nia ebetimo ber dit! Wacopo ketho lembakeca mi weco kud awiya i wang’ coko man i ng’eye bende. Tekene wabetimo kumeno, awiya binwang’u nia gin de gitie i ‘cokiri ma dit.’​—Zab. 35:18.

16, 17. (a) Pirang’o pire tie tek nia awiya gilim batizo? (b) Ang’o ma copo nyayu mutoro lee i junyodo? (Nen cal mir acaki.)

¹⁶ I kind rwom ma dongo ma junyodo gitie ko, acel utie niponjo awiya migi gimar Yehova. (Zab. 127:3; Ef. 6:4) I thek mir Israel, jubed juthiero awiya ni Yehova ka fodi ginyoliri anyola. Re tin eni jutimo ngo kumeno. Ka junyodo gimaru Yehova man gimaru bende lemandha, eca kende nyutho ngo nia awiya migi de bitimo ve gin. Ceng’ ma nyathin unyolere ci, junyodo gicikiri niketho lembakeca mi konye kara ebin ebed jalub, ethier kwo pare ni Mungu man elim batizo. Nyo lembe mange ma pire copo bedo tek nisagu maeno utie de? Ka ng’atini uthiero kwo pare ni Yehova, elimo batizo, man ebetimo ni Yehova ku bedopwe, eno biketho ebiboth i saa mi can ma dit.​—Mat. 24:13.

¹⁷ Kinde ma nyamego Blossom Brandt umito elim batizo, junyodo pare gimito gikeng’ei ka nyo andha etie ayika. Kinde ma ginyang’ nia etie ayika, gidiko cing’gi i kum ng’iong’ic pare. Blossom ukoro lembe ma won utimo uthieno m’i wang’ nindo mi batizo pare, eyero kumae: “Baba ukwayu nia wan ceke wakerum, e erwo. Eyero ni Yehova nia etie ku mutoro ma dit pi ng’iong’ic ma nyathi nyaku pare utimo m’ethiero ko kwo pare ni Yehova.” Oro ma kadhu 60 i ng’eye, Blossom uyero kumae: “Andhandha wiya biwil ungo nyanok de pi diewor maeca i kwo para zoo!” Junyodo, dong’ wun de anyong’a negwu, kinde ma wubeneno awiya mwu githiero kwo migi ni Yehova man gilimo batizo pi nitimo ire.