1. I rundi ma kwong’a, Jukristu gibino ku peko ma nenedi?

JAKWENDA Petro ukiewo barua ni “jubedo mi jumulal mba ma gini i Ponto, ku Galatia, ku Kapadokia, kud Asia, man Bithunia,” copere i kind oro 62 ku 64. (1 Pet. 1:1) Umego ku nyimego maeno giai i kabedo ma tung’ tung’. Gibino nwang’iri ku “muloic ma calu mac,” kunoke ragedo, pieno gibino ku yeny mi tielocwiny man mi telowic. Bende, gibino nikwo i kind nindo ma rac. Petro ukiewo kumae: ‘Kajik mi gin ceke dhingo ceng’ini.’ I ng’ei oro ma tundo ngo apar, Yerusalem ubecinyothere. Dong’ ang’o ma bikonyo Jukristu kakare ceke ma gini ie, niciro i kind saa maeno ma lembe bibedo i ie lieth?​—1 Pet. 4:4, 7, 12.

2, 3. Pirang’o Petro ukwayu umego pare nia gijoliri i kindgi? (Nen cal mir acaki.)

² Gin acel ma Petro ugam ukwayu nia umego gitim, ubino nia ‘gigwokiri,’ niwacu gijoliri i kindgi. (1 Pet. 4:9) Wec mi dhu Jugiriki ma juloko nia “jol” thelembene utie “ninyutho mer kunoke ninyutho berocwiny ni ng’atu m’ing’eyo ngo.” Re Petro ubino kwayu umego ku nyimego pare nia ‘gijoliri’ i kindgi, kadok nwang’u dong’ ging’eiri man gitimo lembe karacelo de. Ninyutho jol bikonyogi nenedi?

 ³ Ka gibenyutho jol, kindgi bibedo ceng’ini. Ka in ke? Nyo ibepoi de iwi kite ma wugam wunambu ko ma ber, kinde ma ng’atu moko ulwong’i yo pare? In de kinde m’igam ilwong’o ng’atu moko yo peri, ma jiji mbe, kindwu udoko ceng’ini kude. Yo ma cuu ma waromo ng’eyo ko umego ku nyimego mwa utie nilwong’ogi i bang’wa. I rundi pa Petro, ugam ukwayere nia Jukristu gitwiyiri karacelo, saa ma lembe ucaku bedoko rac magwei. I nindo maeni mi “kajikceng’” de, wacikara nitimo kumeno.​—2 Tim. 3:1.

4. I thiwiwec maeni, wabing’io i penji ma kani?

⁴ Wacopo nyutho jol i kindwa i yo ma kani? Lembang’o ma copo cerowa ku jolo welo, man wacopo timo ang’o kara wavoi lembene? Ang’o ma romo konyowa kara wabed welo ma cuu?

5. Wacopo nyutho jol nenedi i coko mwa mi Jukristu?

⁵ I coko: Yehova karacelo ku dilo pare gibelwong’owa i coko. Wabemito nia ju m’ubino i coko mwa de ginwang’iri nia jujologi cuu, asagane ju ma fodi gibino ma nyen. (Rum. 15:7) Gin de gitie welo pa Yehova, pieno wabemito ginwang’iri nia gitie ma ber, kadok gibenen ni kit dhanu ma nenedi, kunoke gikendiri nenedi de. (Yak. 2:1-4) Kan ineno nia welo moko ubedo kende, nyo icopo kwaye ngo nia wubed wukude? Anyong’a romo nege lee dit kan ibekonye ninyang’ i program m’ubekadhu, man ibewotho yabu verse ma jubesomo. Eno re m’utie yo ma cuu mandha mi ‘gwoko welo ber.’​—Rum. 12:13.

6. Wacikara ninyutho jol asagane ni jukani?

⁶ Nilwong’o jumange ni cai moko kunoke ni cam: I rundi ma con, ayi ma dhanu gibed gijolo ko welo, ubino nilwong’o jumange i pacu migi ni cam, pi ninyutho nia gibemito gibed jurimo man gibed ku kwiocwiny. (Tha. 18:1-8; Pok. 13:15; Lk. 24:28-30) Wacikara ninyutho jol asagane ni jukani? Wanyuth jol asagane ni umego ku nyimego mi cokiri mwa. Calu ma ng’om ubedoko rac magwei, wacikara nitwiyara kud umego ku nyimego mwa man nibedo kugi jurimo mandha. I oro 2011, Guriri m’utelowic uwilo saa mi ponji mi Otkur ma Wiw mi juruot mi Bethel mir États-Unis. Nwang’u jubed jutime saa 12:45 mi reto, re jucaku time saa 12:15 mi reto. Pirang’o? Jumio atwong’a nia yub maeno bikonyo ju ma gibetimo i Bethel, kara ebed igi yot niyio lwong’o man nijolo jumange de ka coko uthum con. Filial mange bende utimo lembe ma rom. Lembuno ukonyo ju ma pol ma gibetimo i Bethel kara gitund ning’eiri i kindgi.

7, 8. Waromo nyutho jol nenedi ni jukorlembe ma welo?

⁷ Saa moko, umego mi cokiri mange, juliew mi twodiri, kunoke umego ma juoro kud i Bethel, gibed gibino i cokiri mwa pi nimio korolembe. Kan umego ma kumeno gibino, wacopo jologi nenedi? (Som 3 Yohana 5-8.) Yo acel utie nilwong’ogi i pacu mwa, ni cai moko kunoke ni cam.

⁸ Nyamego moko mir États-Unis ubepoi i kum lembe ma gibed gitimo, ekoro kumae: “Pi oro ma dupa, waku won ot para wabed wajolo jukorlembe dupa ku mon migi i pacu mwa.” Nyamego maeno unwang’u nia kubang’ bedo ma gibedo kugi utielo yioyic migi, man umio igi anyong’a ma lee dit. Eyero kumae: “Wanwang’u nia lembe ma watimo, ubino ber nisagu.”

9, 10. (a) Ng’a ma copo gonjo i bang’wa pi nindo m’ung’adu? (b) Nyo ju ma udi migi diny de gicopo jolo welo? Kemii lapor moko.

⁹ Welo ma bigonjo agonja i beng’i: I rundi ma con, jubed jumio kabedo ni welo ma bigonjo pi nindo ma lee.  (Yob 31:32; Flm 22) Tin de, wacopo lubo lapor maeno. Wang’ ma pol, juliew mi twodiri gibed gibedo ku yeny mi ot ma gicopo bedo i ie, ka gibeliewo cokiri. Umego ku nyimego ma gibino i somo mi theokrasi, man ju ma gimiiri pi giedo de gicopo bedo ku yeny mi kabedo moko. Ka ju ma udi migi unyothere i saa mi peko ma wok rek ke? Gin de gicopo bedo ku yeny mi kabedo ma giromo vogiri i ie, nitundo ma ot migi bicungo. Wacikara ngo niparu nia ju ma udi migi dongo kende re ma gicopo konyo. Ecicopere nia i wang’e de, gidaru konyo wang’ dupa i saa ma kumeno. Dong’ nyo in de icopo mio kabedo, kadok nwang’u ot perine diny de?

¹⁰ Umego moko mi Corée du Sud ubepoi pi jol m’enyutho ni jumoko m’ugamiri, m’ucidho i somo mi theokrasi; ekiewo kumae: “Akealworo, pilembe nwang’u fodi wagamara agama, man wabedo i ot ma diny. Re i kind nindo ma wabedo ku ju m’ubino i somo eno, anyong’a unegowa lee dit. Calu ma fodi wagamara ma nyen, bedo kugi ugam ukonyowa nineno nia ju m’ugamiri gicopo bedo ku mutoro, ka gibetimo ni Yehova, man gibelubo lembakeca mi tipo karacelo.”

11. Pirang’o ukwayu ninyutho jol ni dhanu m’utundo ma nyen i cokiri mwu?

¹¹ Umego ku nyimego ma gitundo ma nyen i cokiri: Umego, nyimego kunoke juruot moko gicopo ai kud i cokiri mange, gidwogo i beng’wu. Ecicopere nia gidwogo i beng’wu pilembe cokiri mwu utie ku yeny mi kony. Kunoke gicopo bedo juyab yo ma juoro aora i cokiri mwu. Eno romo bedo ni alokaloka ma lee igi. Ubekwayu ging’ii ku kabedo ma nyen, cokiri ma nyen, man saa moko nyo dhok kunoke suru de ma nyen. Nyo icopo lwong’ogi ni cai moko kunoke ni cam, kunoke nyo nicidho karacelo kugi i nambu moko? Eno bikonyogi ninwang’u jurimo, man ning’iyo ku kwo migi ma nyen.

12. Lapor ma kani m’ubenyutho nia, kara ijol welo pire tie tek ungo niyiko kokoro piny dupa?

¹² Kara ijol welo, pire tie tek ungo nia kokoro iyik piny dupa. (Som Luka 10:41, 42.) Umego moko ubepoi i kum lembe ma gikadhu kud i ie giku dhaku pare, kinde ma fodi gidoko bamisioner adoka. Eyero kumae: “Wabino aradu, fodi nwang’u wang’iyo de ngo ku kabedo mwa ma nyen, man ava thuwa ubino negowa lee. Dhu uthieno moko, ava pacu umaku dhaku para magwei, man an de akonye kpe. E i kum piny mi saa 1:30, nyamego moko m’ubeponjo Biblia ugam udwong’o dhugola. Ekelo iwa mucungua adek, pi nijolo bamisioner ma nyen. Wajole i ot, man wamio ire pii m’amadha. I ng’eye wamuro ire cai man cokola ma lieth. Wang’eyo ngo Swahili, en de eng’eyo ngo Anglais.” Umegone ukoro nia lembuno uketho gicaku theyo mer kud umego ma keca, man ginwang’u anyong’a ma lee.

13. Jolo welo copo konyi nenedi?

¹³ Nyo nindo moko lworo udaru negi nijolo welo? Ka kumeno, ng’ei nia iweko nambu ma cuu ukedhi, man iweko kaka mi theyo mer ku dhanu ma nwang’u icopo bedo kugi jurimo nja. Jolo welo utie yo ma ber mandha ma ketho ng’atini nwang’ere nia etie kende ngo. Dong’ pirang’o jumoko belworo nijolo welo? Wakenen thelembe moko.

14. Waromo timo ang’o ka wambe ku saa man kero mi yio lwong’o man mi jolo jumange?

¹⁴ Saa man kero: Dhanu pa Yehova gitie ku lembe lee ma gitimo, man rwom de dupa. Pieno, jumoko gicopo paru nia dong’ gimbe ku saa man kero mi jolo welo. Kan ibed iparu kumeno, ubekwayu ilok program peri, kara weng’i copo dong’ thwolo pi niyio lwong’o, man ninyutho jol ni jumange. Jolo welo pire tek dit  pilembe etie gin ma Biblia re m’ubekwayu watim. (Ebr. 13:2) Pieno ka wabenyutho jol, nwang’u wabetimo lembe m’atira. Re kara itund nijolo welo, ubekwayu ngo inyoth saa lee ku lembe ma kitgi mbe.

15. Pirang’o jumoko gicopo paru nia giromo ngo nijolo welo?

¹⁵ Kite m’ibed ineniri ko giri: Nyo idaru mito nia ijol welo re inweng’iri nia iromo ngo? Saa moko nyo ibed ibedo dhanu ma weco ngo lee, pieno ibelworo nia welo peri romo lar ol pio. Kunoke nyo sente peri mbe, pieno ibelworo nia ibiwok mio ngo piny ma cuu ni welo peri calu m’umego ku nyimego mange gibed gimio. Re ng’ei nia pire tie tek ungo nia ot peri ukeubed ot m’ubemil amila. Welo peri bibedo kud anyong’a tekene iweyo ot peri ma leng’, ipangu piny ceke kakare, man tek ibeweco ma mit i bang’gi.

16, 17. Iromo timo ang’o ka lworo ubenegi nijolo welo?

¹⁶ Ka lworo jolo welo ubenegi, ng’ei nia itie kendi ngo. Jadit cokiri moko mi Grande-Bretagne ukoro kumae: “Koo koo moko copo bedo nuti ka jubeyikiri pi jolo welo. Ento calu tic moko ci ma watimo ni Yehova utie ku bero, jolo welo de bimio iwa bero ma lee nisagu koo koo ma walar wabino ko. Abed amaru kende kende nibedo ku welo para, man niweco kugi, nwang’u wabeciku madhu kawa moko.” Etie lembe ma ber dit nidieng’ cuu ku welo peri. (Flp. 2:4) Dhanu ma dupa gibed gimaru gikor lembe ma gikadhu kud i ie i kwo migi. Wacopo winjo lembene kende kende ka wabedo kugi karacelo. Jadit cokiri mange ukiewo kumae: “Kan abelwong’o dhanu mi cokiri mwa yo para, eno konya niwinjogi ma ber, man ning’eyogi, asagane kite ma gimaku ko lemandha.” Kan ibedieng’ cuu ku welo peri, ng’ei nia gin zoo gibinambu ma ber.

¹⁷ Nyamego moko ma jayab yo ma wang’ ma pol ubed ugonjo ju ma gibino i somo mi theokrasi ukoro kumae: “Ku kwong’a lworo keunega, pilembe haki pa ot para mbe, man odene de bino ku piny m’utii, ma de jumio ira amia. E min ot p’umego moko ma tie japonjo mi somone ujuko cwinya. Ekoro ira nia ka gicidho niliewo cokiri moko giku won ot pare, lembe ma nyang’ugi utie nitimo yenga acel zoo ku ng’atu mi tipo, ma saa moko nyo jamcinge de mbe akeca, ma re calu gin, ubetimo ni Yehova m’umbe nibedo ku giki mi kum dupa i kwo. Wec pare uketho apoi i kum lembe ma e, ma mama ubed uyero iwa nwang’u fodi wathindho: ‘Cemo mi dek ma col, ka ma mer ni i ie, e ber.’” (Rie. 15:17) Dong’ andha ubekwayu ngo walwor, pilembe gin ma pire tek akeca utie ninyutho mer ni welo mwa.

18, 19. Ninyutho jol copo konyowa nenedi kara wawodh cen paru ma rac kud i wiwa?

¹⁸ Kite m’ibed ineno ko jumange: Nyo i cokiri mwu ng’atu moko timo pare benyayu ng’ecwiny i ii? Kan itimo ngo kero pi niriemo paru mi lembene, ebibedwogo nja i wii. Icopo maru ngo ilwong’ ng’atu ma timo pare nyeng’i ngo ubin yo peri. Kunoke nyo con ng’atu moko utimo iri lembe ma rac, man wii ubewil ungo i kum lembene.

¹⁹ Biblia uyero nia nijolo welo copo konyi nikwo ma ber ku jumange, kadok ku judegini de. (Som Lembrieko 25:21, 22.) Kan ilwong’o ng’atini yo peri, eno copo konyi niriemo paru ma rac m’itie ko i wiye, man nikwo kude ku kwiocwiny. Icopo caku neno kite pare ma beco m’ugam uketho Yehova utele ko i lemandha. (Yoh. 6:44) Ka mer re m’ubecweli nilwong’o ng’atu moko ma nwang’u ung’eyo ngo nia icopo lwong’e, lembuno romo thebo the mer i kindwu. Dong’ icopo timo ang’o kara ibed ku merne? Yo acel ma copo konyi utie nitio ku juk ma  nwang’ere i Jufilipi 2:3, m’uyero kumae: “Ku pidoic ma mol wek ng’atuman ie pid ya wadi ber ma sagu en.” Wacikara niparu cuu nia umego ku nyimego mwa gisaguwa i lembe ma kani. Saa moko nyo wacopo lubo lapor mi yioyic migi, cirocir migi kunoke kite migi mange mi Jukristu. Ka wabeparu iwi kite migi ma beco, wabimarugi lee, man wabitundo ninyutho igi jol yot yot.

20. Ka wadaru yio lwong’o moko, wacopo nyutho nenedi nia watie dhanu ma jugeno, man pirang’o?

²⁰ Jagor Zaburi Daudi upenjo kumae: “Yehova, ng’a ma bibedo i hema peri nindo moko?” (Zab. 15:1) I ng’eye, Daudi ukwanu kite ma tung’ tung’ ma Yehova ubemito welo pare gibed ko. Acel utie nibedo ng’atu ma juromo geno, niwacu “ng’atu ma kwong’o kwong’ [kadok] ma time rac, man elokre ngo.” (Zab. 15:4) Ka wayio nia wabicidho i bang’ ng’atini, wacikara ngo niranyu programne ka macero ma lee umbe. Saa moko nyo ng’atu m’ulwong’owa udaru yikere cuu pi tundo mwa, pieno ka wacidho ngo, nwang’u waketho enyotho piny pare mananu. (Mat. 5:37) Jumoko giranyu lwong’o, pi niyio lwong’o mange ma gineno nia utie cuu nisagu. Nyo eno nyutho andha mer man woro? Wacikara nifoyo piny ceke ma ng’atu m’ulwong’owa biwok mio iwa. (Lk. 10:7) Ka wanwang’u nia wabicidho ngo ke, ukwayu walar wanyuth i wang’e; eca binyutho mer man woro mwa.

21. Niworo lembe ma timere i kabedoman konyowa nenedi nibedo welo ma cuu?

²¹ Bende pire tie tek niworo lembe ma timere i kabedoman. I suru moko, jujolo kadok welo m’ular unyutho ngo pi tundo pare. I suru mange ke, welo ucikere nilar nyutho pire i wang’e. I kabedo moko, juyiko cam ma cuu ku nying’ welo, ni weg pacu ke juyiko kit cam mange. I kabedo mange ke, weg pacu ku welo ceke gicamu cam ma rom. I theng ng’om moko, welo de bino ku cam moko kaka ma julwong’e i ie. Kaka mange ke, ng’atu m’ulwong’o welo yio ngo nia welo ubin ku piny moko. I suru moko, ku woro, ng’atini kelar kwero lwong’o wang’ ma kwong’a ku wang’ mir ario. Kaka mange lundo nikwero lwong’o kadok wang’ ma kwong’a utie tegowic. Pieno, wacikara nitimo kero mwa ceke kara wawok wanyai mutoro i ng’atu m’ulwong’owa.

22. Pirang’o pire tie tek nijoliri?

²² Petro uyero kumae: ‘Kajik mi gin ceke dhingo ceng’ini.’ (1 Pet. 4:7) I nindo ma wabekwo i ie eni, wabecimondo i can ma dit ma fodi ayine mbe. Calu ma ng’om maeni ubenyothere ubecidho i wang’e, wacikara nitwio mer ma ceng’ini akeca kud umego ku nyimego mwa. Pieno, juk ma e ma Petro umio pire tie tek asagane i nindo ma tin eni: “Wugwokuru (wujoluru).” (1 Pet. 4:9) Ma jiji mbe, nijolo welo utie lembe ma ber mandha man ma pire tek dit tin eni, man rondo ku rondo.