Wec ma nia “amen,” thelembene tie “ebed kumeno” kunoke “andha.” Eai kud i wec mi dhu Juebrania ma nyutho gin moko kunoke dhanu “ma pwe” man “ma jugeno.” Con, jubed jutio kude saa moko i lembe m’uneno cik. Con eca, ka ng’atini timo lembang’ola moko, ubed ukwayere nia eyer “amen” pi ninyutho nia lembe m’eai eyero utie andha kumeca, man nia etie ayika niyio matoke moko ci ma lembene copo kelo. (Wel 5:22) “Amen” m’eyero i wang’ dhanu ceke nyutho nia ebiii nitimo lembe m’eng’olo.​—Neh. 5:13.

I buku mi Poi mi Cik thek 27, jutio ku wec ma nia “amen” i ayi ma wang’u ijo. I ng’ei ma nyithindho mir Israel gimondo i Ng’om mi Lembang’ola, Mungu ugam ung’olo nia gicokiri i kind got Ebal ku got Gerizim pi niwinjo cik ma Musa bisomo igi. Gicokiri pi niwinjo Cik awinja kende ngo, ento bende pi ninyutho nia giyio Cikne. Ka jusomo pi kwong’ ma bibedo iwi ng’atu m’uturo cik moko, giyero nia “Amen” pi ninyutho nia giyio Cikne. (Poi. 27:15-26) Kepar pir udul dhanu maeno, co, mon, man awiya; kite ma gibedwoko ko jibu ku dwandgi ma tek man m’uripo nia, “amen!” (Yoc. 8:30-35) M’umbe jiji, wigi wil ungo nyanok de pi lembe ma giyero nindo maeno. Nyithindho mir Israel gituc niworo lembe ma ging’olo, pilembe Biblia uyero kumae: “E Israel utimo ni Yehova, i nindo ceke pa Yocuwa, man i nindo ceke mi judongo m’ubedo kwo yo ng’ei Yocuwa, man m’ung’eyo tic ceke pa Yehova, m’etimo ni nyithindho mir Israel.”​—Yoc. 24:31.

Yesu bende ubed utio ku wec ma nia “amen” pi ninyutho nia lembe moko utie  andha; ento etuc nitio ku wec maeno i ayi ma segi. Yesu ubed utio ku wec ma nia “amen” (ma juloko i Biblia mi dhu Alur nia “andha”) i wang’ niyero lembe moko pi ninyutho nia etie andha; ento ebed eyero ngo wec maeno pi niyio lembe ma ng’atu moko uai uyero. Saa moko ebed edwogo iwi wecne wang’ ario; ebed eyero nia “amen amen,” niwacu “andhandha.” (Mat. 5:18; Yoh. 1:51) Kumeno re ma Yesu ubed uketho cwiny juwinj pare nia lembe m’ebeyero utie lemandha. Ebed eweco m’umbe jiji nyanok de pilembe en re m’ebino ku twero mi ketho lembang’ola pa Mungu utimere kakare.​—2 Kor. 1:20; Nyu. 3:14.

Kinde ma nyithindho mir Israel gibepaku Yehova man gibekwaye, gin de gibed giyero nia “amen.” (Neh. 8:6; Zab. 41:13) “Amen” ma giyero i thum pa rwo unyutho nia giyio lembe ceke ma juyero i rwone. Kumeno re ma gidikiri i lembe m’ubino timere, man giyungo Mungu. Lembe ma kumeno ugam utimere bende kinde m’ubimo Daudi udwoko Sanduku mi lembariba pa Yehova i Yerusalem. I saa mi foc ma gitimo i ng’eye, Daudi urwo ni Yehova kud adundene ceke; rwone nwang’ere i wer ma jukiewo i 1 Lemkei 16:8-36. Lembe ma Daudi uwacu i rwo maeno umulo adunde dhanu lee dit uketho gin “ceke giwacu kumae, Amen, man gipaku Yehova.” Eyo, gibino kud anyong’a nipaku Yehova karacelo.

Jukristu mi rundi ma kwong’a de gibed gitio ku wec ma nia “amen” kinde ma gibepaku Yehova. Jugor Biblia moko de gitio ku wec maeno wang’ ma pol i barua migi. (Rum. 1:25; 16:27; 1 Pet. 4:11) Buku mi Lembanyutha ukoro pi giracwia mi tipo ma gipaku Yehova, giyero kumae: “Amen; Haleluya.” (Nyu. 19:1, 4) Jukristu mi rundi ma kwong’a gibed giyero “amen” i ng’ei rwo ma karacelo i coko. (1 Kor. 14:16) Gibed giyere ngo pilembe nia etie wec ma judaru ko rwo.

Waai waneno kite ma jurutic pa Yehova gibed gitio ko ku wec ma nia “amen.” Eno uketho  wanyang’ kamaleng’ nia pire tie tek niyero “amen” i thum pa rwo. Ka wayero “amen” i thum pa rwo mwa giwa, eca nyutho nia wayio lembe ma waai wayero i rwone ku cwinywa ceke. Bende kinde ma wabeyero “amen” kadok nyaling’ ling’ i thum pa rwo m’i kind lwak, eca nyutho nia wayio lembe ma juai juyero. Wakenen thelembe mange m’uketho “amen” ma wayero pire tie tek.

Niyero “amen” nyutho nia waketho wiwa i kum thier mwa. Wapaku Yehova kende kende ngo nikadhu kud i “amen” ma wabeyero, ento nikadhu kud i gin ma wabetimo i saa mi rwo. Calu ma wamito nia wayer “amen” ku cwinywa ceke, ubekwayu ngo watim lembe mange i saa mi rwo, ento wacik ithwa kilili mandha pi niwinjo rwone.

Niyero “amen” nyutho nia wabeworo Mungu i acel. (Tic. 1:14; 12:5) Ka wabeyero “amen” karacelo kud umego ku nyimego, eno diko kindwa dong’ magwei. Dok wayero amen ne nyayoyo kunoke ma tek, eno copo cwalu Yehova nitimo lembe ma wabekwayu i bang’e.

Niyero “amen” mio pak ni Yehova. Wi Yehova wil ungo i kum lembe moko ci ma wabetimo pi nimio ire thier. (Lk 21:2, 3) Yehova neno adundewa man thelembe m’ubecwaluwa nitimo ire thier. Kadok kinde ma wabelubo coko kud i telefon de, wang’ei nia “amen” ma wabeyero pire tie tek i wang’ Yehova. Eketho wan bende wapaku Yehova karacelo kud umego ku nyimego ma gini coko.

“Amen” ma wayero copo nen ni gin ma kabang’e mbe, re i andha etie kumeno ngo. Buku moko m’ukoro lembe iwi Biblia uyero kumae: “Nikadhu kud i wec acel maeno, jurutic pa Mungu ginyutho nia gitie ku yioyic, gidiko cing’gi i kum lembe ma juyero, man nia gitie ku genogen ma lee i adundegi.” Pieno dong’ “amen” ceke ma wabeyero ufoi i Yehova.​—Zab. 19:14.